སྤྱི་ལོ་ ༢༠༡༢ ཟླ་བ་ ༡༡ ཚེས་ ༡༠ ཉིན་འཕགས་ཡུལ་འབྲི་གུང་བཀའ་བརྒྱུད་ཀྱི་གདན་ས་བྱང་ཆུབ་གླིང་དུ། དྷེ་ར་དྷུན་ཁུལ་གྱི་ཆོས་བརྒྱུད་ཆེན་པོ་བཞི་དང་། གཡུང་དྲུང་བོན་དང་བཅས་པའི་རིས་སུ་མ་ཆད་པའི་དགེ་འདུན་དང་བཙུན་མ་བརྒྱ་ཕྲག་བརྒྱད་ལས་བརྒལ་བ་དང་། མི་མང་བརྒྱ་ཕྲག་གཉིས་བཅས་ཁྱོན་བསྡོམས་སེར་སྐྱ་མི་མང་སྟོང་ཕྲག་ལྷག་འདུ་འཛོམས་ཀྱིས། འཛམ་གླིང་ཞི་བདེའི་རིས་མེད་སྨོན་ལམ་ཆེན་མོ་འཚོགས་གནང་ཞིང་། དེ་ཡང་དེང་གི་ཆར་རྒྱལ་བསྟན་སྤྱི་དང་བྱེ་བྲག་ཆོས་ལུགས་ཆོས་བརྒྱུད་རྣམས། ཤར་ནུབ་ཡུལ་གྲུ་གང་སར་བཤད་སྒྲུབ་ལས་གསུམ་གྱི་སྒོ་ནས་དར་ཞིང་རྒྱས་པ་དེ་ལྟར་ཡང་། ད་དུང་ཡངས་པའི་ཁྱོན་འདིར་ནད་མུག་འཁྲུགས་རྩོད་ཙད་ཐན་སད་སེར་འབྱུང་བཞིའི་བསྐལ་ངན་སོགས་མི་འདོད་པའི་རྒུད་ཚོགས་བྱུང་དང་འབྱུང་བཞིན་པ་དེ་དག་རྨིག་མེད་རང་སར་དུ་ཞི་ནས། འཇིག་རྟེན་གྱི་ཁམས་འདིར་ཞི་བདེ་འཆམ་མཐུན་དང་། ཆར་ཆུ་དུས་འབབ། ལོ་ཕྱུག་རྟག་ལེགས་སོགས་ཀྱི་སྒོ་ནས་རྫོགས་ལྡན་གསར་བའི་དཔལ་ལ་ལོངས་སུ་སྤྱོད་ཐུབ་ཅིང་། ཁྱད་པར་དུ་རང་རེ་ཁ་བའི་ལྗོངས་སུ་ནག་ཕྱོགས་ཀླ་ཀློའི་དཔུང་གིས་གདུག་རྩུབ་དང་གཉའ་གནོན་འོག རང་དབང་དང་ཞི་བདེའི་སྣང་བ་ཆེས་ཕྲ་ཞིང་། སྡུག་གྱོང་དང་མནར་གཅོད་ཀྱིས་དུས་འདའ་བཞིན་པའི་གཉན་འཕྲང་ཅན་གྱི་དུས་འདིར། བླ་ན་མེད་པའི་ལྷག་བསམ་དང་། ཞུམ་པ་མེད་པའི་སྙིང་སྟོབས་ཀྱིས་བསྟན་པ་དང་བསྟན་འཛིན། ཆབ་སྲིད་དང་རང་རིགས་ཀྱི་སླད་དུ། གཅེས་པའི་ལུས་སྲོག་གཙོས་པའི་རྒྱུ་དང་དཔལ་འབྱོར། བུ་དང་ཆུང་མ། ཉེ་འཁོར་ལྟོས་བཅས་སོགས་གང་ལའང་ཆགས་ཞེན་སྤུ་ཙམ་ཡང་མེད་པར། རང་གི་ལུས་སྲོག་བདེན་པའི་མེ་མཆོད་དུ་ཕུལ་བའི་རྒྱ་ཆེའི་དཔའ་བོ་དང་དཔའ་མོ་རྣམས། སྲིད་པ་བར་དོའི་འཁྲུལ་སྣང་ལས་ཡོངས་སུ་གྲོལ་ཏེ། མཐོ་རིས་ཀྱི་ཡོན་ཏན་བདུན་དང་ལྡན་ཞིང་། དལ་བའི་རྟེན་བཟང་རིན་པོ་ཆེ་རིམ་བརྒྱུད། ཞི་བ་དང་བདེ་བའི་དཔལ་ཕུན་སུམ་ཚོགས་པས་ཆེས་ཆེར་མཛེས་ཤིང་། བླ་ན་མེད་པའི་གོ་འཕང་རྣམ་མཁྱེན་རྒྱལ་བའི་དབང་པོ་འཐོབ་པ་དང་། དེ་བཞིན་རྣམ་དཀར་ཚོགས་བསགས་ཀྱི་བདེན་པ་ཆེན་པོའི་མཐུས་བོད་ཆེན་པོའི་ལྗོངས་ཀྱི་རང་དབང་བདེན་པའི་མཐའ་མྱུར་དུ་གསལ་བ་སོགས་ལེགས་པའི་ཆ་དུ་མར་དམིགས་པའི་སྨོན་ལམ་ཆེན་མོ་ཚོགས་གནང་བའི་གནས་ཚུལ་དུ།
འཕཊ་ཡུལ་འབྲི་གུང་བཀའ་བརྒྱུད་གཙུག་ལག་སློབ་གཉེར་ཁང་གི་རྒྱུན་ལས་ཁང་ནས།
སྤྱི་ལོ་ ༢༠༡༢ ཟླ་བ་ ༡༡ ཚེས་ ༡༧ ལ།
