བོད་ཀྱི་རྒྱལ་ས་ལྷ་ས་གཙོས་པའི་ས་ཁུལ་མང་པོ་ཞིག་ཏུ་རང་ལུས་མེར་བསྲེགས་ལ་གདུང་སེམས་མཉམ་སྐྱེད་ཆེད་་ཟས་བཅད་ངོ་རྒོལ་གནང་བཞིན་ཡོད་འདུག
བཞུགས་སྒར་ཀིརྟི་བྱེས་པ་གྲྭ་ཚང་གི་གྲྭ་ཀ་ཉག་ཚེ་རིང་ལགས་ཀྱིས་གནས་ཚུལ་བཏང་འབྱོར་བྱུང་བ་ལྟར་ན། དེ་རིང་ཁ་སང་ཕྱི་ཚེས་ ༢༦ ཉིན་གྱི་སྔ་དྲོའི་བོད་ནང་གི་ཆུ་ཚོད་བཅུ་པ་ནས་ཕྱི་ཚེས་ ༢༧ ཀྱི་སྔ་དྲོའི་དུས་ཚོད་༨ བར་དུ་བོད་ཀྱི་རྒྱལ་ས་ལྷ་ས་དང་། ཁམས་བྲག་མགོ འཇོ་མདའ། རྫ་ཆུ་ཁ། ཁྲི་འདུ། གསེར་རྟ། མཚོ་སྔོན་ཟི་ལང་། རེབ་གོང་། དཀར་མཛེས། དེ་བཞིན་རྒྱ་ནག་གི་གྲོང་ཁྱེར་ཁྲིན་ཏུའུ་བཅས་སུ་ཡོད་པའི་བོད་བོད་ ༦༠ ལྷག་གིས་ས་གནས་སོ་སོ་ནས་ཟས་བཅད་ངོ་རྒོལ་དང་། གདུང་སེམས་མཉམ་སྐྱེད་ཀྱི་བསྔོ་བ་སྨོན་ལམ་གནང་གི་ཡོད་འདུག
བོད་མི་དེ་དག་ནི་ས་གནས་སོ་སོར་ཡོད་པའི་སློབ་གྲྭ་ཆེན་མོ་པ་དང་། རྒྱལ་ཁབ་ཀྱི་ལས་བྱེད་པ། རྩོམ་པ་པོ། གྲྭ་པ། ཚོང་པ་སོགས་ལས་རིགས་འདྲ་མིན་གཉེར་བཞིན་པའི་ཤེས་ལྡན་པ་རྐྱང་རྐྱང་ཡིན་ཞིང་། དེ་ལྟར་གནང་དགོས་པའི་རྒྱུ་མཚན་ནི་ད་བར་བོད་ཕྱི་ནང་གཉིས་ནས་བོད་མི་ ༩༡ ལྷག་གིས་བོད་བསྟན་པ་ཆབ་སྲིད་ཀྱི་དོན་དུ་རང་ལུས་མེར་བསྲེགས་བཏང་ཞིང་། དེ་བས་མང་པོ་ཞིག་ཁྲི་མུན་བཙོན་འཇུག་བྱས་ཏེ་མནར་གཅོད་བཟོད་བརླག་མེད་མྱངས་དང་མྱོང་བཞིན་ཡོད་པ་སོགས་ལ་གདུང་སེམས་མཉམ་སྐྱེད་མཚོན་ཆེད་ཡིན་སྐོར་རྗོད་ཀྱི་ཡོད་འདུག
