ཁ་སང་དགོང་མོ་བོད་མདོ་སྨད་ཀན་ལྷོ་མཛོད་དགེ་རུ་རྒྱལ་གཅེས་དཔའ་བོ་བན་དེ་མཁར་ལགས་ཀྱིས་རང་ལུས་མེར་བསྲེགས་གནང་སྟེ་སྐུ་གྲོངས་འདུག
ཁ་སང་དགོང་མོའི་བོད་ནང་གི་ཆུ་ཚོད་ ༧ ཡས་མས་སུ། བོད་མདོ་སྨད་ཀན་ལྷོ་ཁུལ་མཛོད་དགེ་ཡར་ཀི་སོག་སྡེ་ཡི་རང་ལོ་ ༢༡ ཡིན་རྒྱལ་གཅེས་དཔའ་བོ་བན་དེ་མཁར་ལགས་ཀྱིས། གཙོད་གྲོང་ཁྱེར་དུ་རང་ལུས་མེར་བསྲེགས་ཀྱིས་རྒྱ་གཞུང་གི་དྲག་གནོན་དབང་སྒྱུར་སྲིད་ཇུས་ལ་ངོ་རྒོལ་གནང་སྟེ་སྐུ་གྲོངས་འདུག
བྱམས་པ་ལགས་ཀྱིས་འདི་གར་གནས་ཚུལ་བརྗོད་པ་ལྟར་ན། རྒྱལ་གཅེས་དཔའ་བོ་ཁོང་ཕ་ཡུལ་ནས་སྤྱི་ལེ་ ༢༠ ཙམ་གྱི་སར་ཡོད་པའི་གཙོད་གྲོང་ཁྱེར་དུ་སོང་སྟེ། ” ༸རྒྱལ་བ་བསྟན་འཛིན་རྒྱ་མཚོ་བོད་ལ་ཕེབས་སུ་འཇུག་དགོས། པཎ་ཆེན་རིན་པོ་ཆེ་བཙོན་ནས་ཀློད་གྲོལ་གཏོང་དགོས། བོད་ལ་རང་དབང་དགོས། སྐད་ཡིག་དང་ཆོས་དད་ལ་རང་དབང་དགོས། ཁོར་ཡུག་སྲུང་སྐྱོབ་བྱེད་དགོས” ཞེས་སྐད་འབོད་གནང་བཞིན་རང་ལུས་མེར་བསྲེགས་གནང་ཡོད་འདུག
རྒྱལ་གཅེས་དཔའ་བོ་ཁོང་ནི་རྒྱ་གཞུང་གིས་ཀན་སུའུ་ཞིང་ཆེན་ཀན་ལྷོ་ཁུལ་གཙོད་གྲོང་ཁྱེར་གྱི་ཁོངས་སུ་ཆ་བགོས་བྱས་ཡོད་པའི་མདོ་སྨད་མཛོད་དགེ་ཤོག་པ་ལྔའི་ནང་ཚན་རྐང་ཚའི་ཡར་ཀི་སོག་སྡེ་ནས་ཡིན་པ་དང་། ཁོང་གི་ཕའི་མིང་ལ་ཚེ་རིང་ཐར་དང་མའི་མིང་ལ་ཀུན་བཟང་སྒྲོལ་མ། ཁོང་ལ་སྤུན་མཆེད་གཉིས་ཡོད་པའི་ཆེ་བའི་མིང་ལ་བྱམས་པ་དང་ཆུང་བའི་མིང་སངས་རྒྱས་དོན་འགྲུབ་ཟེར་གྱི་ཡོད་འདུག
དེ་རིང་ཕྱི་ཚེས་ ༢༩ ཉིན་རྒྱལ་གཅེས་དཔའ་བོ་ཁོང་གི་རང་ཁྱིམ་དུ་ཡུལ་ལུང་དགོན་སྡེ་ཁག་ནས་འདས་མཆོད་བསྔོ་སྨོན་བྱེད་བཞིན་པ་ཡོད་པ་དང་། ད་ལྟའི་ཆར་རྒྱ་དམག་གིས་དམ་དྲག་གི་དབང་གིས་ཞིབ་ཕྲའི་གནས་ཚུལ་ཤེས་ཁག་པོ་ཆགས་ཡོད་འདུག
གསར་འགོད་པ། ཚེ་རིང་རྒྱལ།
ཁོང་རྣམས་ཀྱིས་སྐུ་ལུས་དང་སྐུ་སྲོག་མཐའ་དག་བོད་མི་རིགས་འདིའི་བདེ་སྡུག་གི་ཆེད་དུ་མེར་རུ་འཕུལ་བ་འདིར་ང་ཚོས་རྒྱུན་ལྡན་གྱི་གནས་ཚུལ་ཞིག་ལ་ངོས་འཛིན་གནང་ན་མི་རུང་། ཚང་མས་སེམས་ཚོར་དང་སྙིང་སྟོབས་ཆེ་རུ་བསྐྱེད་དགོས་ལ། ང་ཚོས་ངེས་པར་ཏུ་ཁོང་རྣམ་པས་རླབས་ཆེན་གྱི་བློས་བཏང་གནང་བ་དེ་འཇམ་ཡལ་དུ་མ་སོང་བ་འབུར་དུ་ཐོན་པའི་གྲུབ་འབྲས་ཤིག་ལ་ཡོང་ཐབས་སུ་འབུངས་དགོས།
སྤྱི་ཚེས་ ༢༨ ཉིན་གྱི་དགོང་མོ་རེད་བས། སྤྱིར་བཏང་དུས་བབ་ཚང་གིས་ཟླ་དུས་ཚེ་གྲངས་འགོད་རྒྱུར་ཐུགས་བརྗེད་མ་ཤོར་བ་ཤིན་ཏུ་གལ། ཐུགས་རྗེ་ཆེ་གནས་ཚུལ་དུས་ཐོག་ཏུ་བཀོད་པར།
སླར་ཡང་དལ་བའི་རྟེན་བཟང་མི་ལུས་མྱུར་དུ་ཐོབ་པའི་སྨོན་ལམ་ཡོད།
ཨོཾ་མ་ཎྀ་པདྨེ་ཧཱུཾ། ཨོཾ་མ་ཎྀ་པདྨེ་ཧཱུཾ། ཨོཾ་མ་ཎྀ་པདྨེ་ཧཱུཾ། ངས་ཀྱང་རྒྱལ་གཅེས་དཔའ་བོ་ཁོང་ལ་མྱ་ངན་གུས་འདུད་དང་། ཤུལ་ལུས་ནང་མི་ཚོར་གདུང་སེམས་མཉམ་བསྐྱེད་ཞུ་གི་ཡོད།།
སྔོན་ཆད་མེར་སྲེག་གི་གསར་འགྱུར་གཅིག་རེ་གཉིས་རེ་སླེབས་ཡོང་སྐབས། ཚོར་བས་དེད་ཡོང་སྟེ་སེམས་ལ་སྐད་ཆ་བཤད་རྒྱུ་རྫོགས་མེད་རེ་ཡོད་མོད། ཁ་སང་དེ་རིང་མེར་སྲེག་གཏོང་མཁན་ཉིན་ལྟར་ཐོན་ཡོང་དུས་ད་ནི་ཅི་ཞིག་བཤད་དགོས་པ་དང་ཇི་ལྟར་བཤད་དགོས་པའང་ཤེས་ཀྱི་མི་འདུག་ལ། ཐ་ན་སོ་སོའི་སེམས་ལ་ཚོར་བ་ཡང་ཁ་གསལ་བོ་ཞིག་མི་འདུག
ཨོཾ་མ་ཎྀ་པདྨེ་ཧཱུཾ། རྒྱལ་གཅེས་དཔའ་བོ་ཁོང་ལ་མྱ་ངན་གུས་འདུད་དང་། ཤུལ་ལུས་ནང་མི་ཚོར་གདུང་སེམས་མཉམ་སྐྱེ་ཞུ་གི་ཡོད།