བོད་མིའི་འགན།
ང་བདེན་པའི་ཆེད་དུ་མགོ་བོ་ལན་བརྒྱར་གཏུབ་ཀྱང་འགྱོད་མི་སྲིད།
ངས་ཀྱང་འཇིག་རྟེན་གྱི་མི་སྤྱི་མཚུངས་ལྟར། འཚོ་བ་ལྷོད་ལྷོད་ཅིག་རོལ་ན་མ་འདོད་པ་གཏན་ནས་མིན་ལ། བུ་ཕྲུག་ལ་བལྟ་སྐྱོང་བྱེད་པའི་ཕ་རྒན་བཟང་བོ་ཞིག དྲིན་ཕ་མར་སྲི་ཞུ་བྱེད་པའི་བུ་ཕྲུག་ཡ་རབས་ཤིག བཟའ་ཚང་ལ་བརྩེ་བའི་ཚེ་གྲོགས་དགའ་ཞིག འཚོ་བ་ངན་ངོན་ལ་ཤི་འཐམ་རོ་འཐམ་བྱེད་པའི་ཁྱིམ་བདག་དཀྱིས་མ་ཞིག་བཅས་བྱེད་འདོད་རྩ་བྲལ་དུ་སོང་བའི་འགྲོ་བ་མིའི་སེམས་རྒྱུན་ལྡན་གྱི་ཚོར་བ་བོར་བའི་མི་ཡི་སེམས་ལ་གཟུགས་མེད་ཀྱི་གདོན་གྱིས་རྣམ་ཤེས་འཛུལ་བ་དེ་འདྲ་གཏན་ནས་མིན་ན་ཡང་། ཉག་ཕྲ་བའི་བོད་མི་རིགས་ཀྱི་ལས་དབང་སྐྱུར་མོའི་ཁྲོད་དུ་སྐྱེ་བའི་“བོད་མིའི་འགན་”ཞེས་པ་ཕྲག་ཏུ་ལེན་མཁན་དང་ལེན་དགོས་མཁན་ཞིག་ཏུ་གྱུར་སྟབས། ངས་རང་ཉིད་ཀྱི་ཕ་མ་དང་བཟའ་ཚང་། ཁྱིམ་དང་བུ་ཕྲུག ཚེ་གྲོགས་ཟེར་ནས་ལྷོད་སྡོད་ཀྱི་འཚོ་བ་ཙམ་ལ་མགོ་འཁོར་ནས་བསྡད་ཚེ། “བོད་མིའི་འགན”ཁུར་བའི་ལས་དབང་ལ་འགྱུར་བ་གཏོང་བའི་དམིགས་དཔེ་ཙམ་ཡང་ཞོག་ཐབས་བྲལ་བ་རྟོགས་སྟབས། “བོད་མིའི་འགན”ཞེས་པའི་ལམ་ཕྲན་འདི་གསལ་སྤྲོད་ཡོང་ཆེད་དུ། ངའི་ཕ་མ་དང་ཚེ་གྲོགས། བུ་ཕྲུག་དང་ཁྱིམ་ཚང་བཅས་བཟོད་དུ་དཀའ་བའི་ལོ་ཟླའི་ནང་མི་སྐྱུར་ཐབས་མེད་བྱུང་བ་དང་། འཇིག་རྟེན་ཀྱི་མི་ཕལ་ཆེ་བའི་མི་འདོད་པའི་ཚེ་གྲོགས་ཁེར་རྐྱང་གསོན་བྲལ་གྱི་མུན་ནག་གི་འཚོ་བ་ཞིག་གི་ནང་དུ་བརྫངས་པ། གཅེས་པའི་བུ་ཕྲུག་གཉིས་ཕ་ངོ་ཤེས་མ་ཤེས་མཚམས་སུ་ཕ་མེད་དྭ་ཕྲུག་དང་ཕ་མེད་པའི་ལོ་ཟླ་གྲང་མོ་ཞིག་གི་གྲང་གཟེར་ཁྲོད་འཚོ་རུ་མི་འཇུག་ཐབས་མེད་ཀྱིས་ལམ་འདིར་ཞུགས་དགོས་ཐུག་ཡོད། “བོད་མིའི་འགན”ཞེས་པ་འདིའི་སྐོར་གླེང་དགོས་ཚེ། རབ་འབྲིང་ཐ་གསུམ་ཡོད་ལ། སྒྲུབ་ཕྱོགས། བསམ་ཕྱོགས། གླེང་ཕྱོགས། འཐབ་ཕྱོགས། དུས་རྒྱུན་འཚོ་བའི་ནང་གི་བྱ་དངོས་སྤྱོད་གསུམ་གང་གི་ཁྲོད་ཀྱང་། ཉག་ཕྲ་བའི་བོད་མི་རིགས་ཀྱི་སྐྱིད་སྡུག་ལེགས་ཉེས་ལ། “བོད་མིའི་འགན”ཁུར་སྟངས་སྣ་ཚོགས་ཡོད་པ་དང་གྲངས་ཀྱི་མི་ཟིན་པ་ཡོད་པ་ལས། ཆེས་ཚད་མཐོ་བའི་“བོད་མིའི་འགན”ཁུར་བ་ལ། བློས་གཏོང་ཞེས་པ་འདི་དགོས་ཀྱི་ཡོད་ལ། དཔེར་ན། གྲྭ་བའི་རྒྱུད་ལ་སྡོམ་དམ་ཚིག་བླང་བ་ལྟར། རང་ཉིད་ཀྱིས་དམ་བཅའ་ཞིག་ལེན་རྒྱུ་དེ་ཡིན། དེ་ནི་བློས་གཏོང་གི་དམ་བཅའ་ཟེར་གྱི་ཡོད། བློས་གཏོང་གི་དམ་བཅའ་འདི་ལེན་པར་དཔའ་བོ་བློ་ཁོག་ཡོད་པ་ཞིག་དགོས་ཀྱང་། འཇིག་རྟེན་པའི་གྲགས་ཚུལ་དུ་“དཔའ་བོ་མཚོན་ཁར་ཤི”ཟེར་བ་དེ་འདྲ་མ་ཡིན་པར། བདེན་བའི་ཆེད་དུ་སུ་ལ་ཡང་འཇིགས་ཞུམ་མེད་མཁན་གྱི་བློ་དེ་འདྲ་ཞིག་ཡོད་པ་ནས་“བོད་མིའི་འགན”ཁུར་བར་སྒེར་གྱི་བྱ་དངོས་ཕྲན་ཚེགས་རྒྱབ་ཏུ་སྐྱུར་མཁན་གྱི་དཔའ་བོ་ཞེས་པ་དང་ནང་ཆོས་ཀྱི་གསུང་ཚུལ་དུ་བྱང་ཆུབ་སེམས་དཔའ་ཟེར་བའི་སེམས་བསྐྱེད་དེ་གང་ཙམ་རྒྱུད་ལ་སྐྱེ་ཡོད་མཁན་ཞིག་ལ་གོ་དགོས་ཀྱི་ཡོད། ཆེས་ཚད་མཐོ་བའི་“བོད་མིའི་འགན”ཁུར་སྟངས་ཀྱི་ཁ་ཕྱོགས་ནི་དེ་འདྲ་ཞིག་ཡིན་ལ། ཁ་ཕྱོགས་འདི་འཛིན་པ་ལ་རྒྱུ་དངོས་དང་དཔལ་འབྱོར། སྒེར་གྱི་སྙན་གྲགས་སོགས་ནི་བྲག་ཆ་ལྟ་བུར་འདོད་ནས། མིང་དང་རྗེས་འབྲེལ་གྱི་བྱ་དངོས་གང་ཡིན་ཡང་། སྤྱི་དོན་ལ་ཞོག་པ་ཞིག་ལ་འབད་འབུངས་བྱེད་དགོས་པ་མ་ཟད། ནམ་ཞིག་“བོད་མིའི་འགན”ཁུར་འགྲུབ་པ་དང་མིང་གནས་རྗེས་འབྲེལ་གྱི་རྒྱུ་དངོས་ཡོད་ཚད། སྙན་གྲགས་དང་གོ་གནས་སོགས་གྱང་ཁའི་རྩ་བཞིན་དོར་ནས་སྒེར་སེམས་མེད་པ་ཞིག་བྱེད་ཐུབ་དགོས། འདི་ནི་ངའི་“བོད་མིའི་འགན”ཁུར་སྟངས་ལ་བཅིངས་པའི་ལྟ་ཚུལ་དང་རང་ཉིད་ཀྱིས་“བོད་མིའི་འགན”ཁུར་སྟངས་ཀྱི་བློས་གཏོང་གི་བསམ་བློའི་ཁ་ཕྱོགས་ཤིག་ཡིན། “བོད་མིའི་འགན”འདི་བོད་ལ་སྐྱེ་བའི་སྐྱ་སེར་ཕོ་མོ་རྒན་གཞོན་དར་གསུམ་ཡོངས་རྫོགས་པར་འཁྲི་བ་ཞིག་ལས། མཐོ་བླ་མ་དང་དཔོན་པོ། བར་ལས་བྱེད་དང་སློབ་གཉེར་བ། དམན་ལག་ཤེས་པ་དང་སྒྱུ་རྩལ་ལས་རིགས་གཉེར་མཁན་ཚོའི་ཕྲག་པར་ཅིས་ཀྱང་ལེན་དགོས་པ་ལས། བོད་སྤྱི་འབངས་རྣམས་རང་རང་སར་ཁ་རོག་གེར་སྡོད་དགོས་པ་ཞིག་གཏན་ནས་ཆགས་མེད་པ་རེད། དེའི་ཕྱིར་“བོད་མིའི་འགན”བོད་མི་སྤྱི་བོ་སྐྱ་སེར་དབྱེར་མེད་ལ་འཁྲི་སྟངས་སྐོར་ལ། བོད་མི་བློ་ཆུང་པ་ངའི་དྲན་ཚུལ་ཁ་ཁོག་པའི་མ་གསང་། གློ་རྒྱུ་མའི་མ་འཁུམ་པར་གང་ཐུབ་ཐུབ་ཅིག་དང་དྲན་ངོ་ཡོང་ཚད་ཅིག མ་མང་མ་ཉུང་བའི་བསམ་ཚུལ་འབྲི་བར་འབད་ཀྱི་ཡིན་ན། མཐོན་པོའི་ཐུགས་ལ་མ་འཕྲོད་པ། དམའ་མོའི་སེམས་ལ་མ་རན་པའི་ཚིག་འདྲ་བྱུང་ཚེ་དགོངས་དག་དང་བཅས། “བོད་མིའི་འགན”ཁུར་སྟངས་སྐོར་ལ་དངོས་སུ་ཞུགས་ནས་བསམ་ཚུལ་འབྲི་རྒྱུ་ཡིན། བསམ་ཚུལ་འདི་ཡང་ང་སྐྱེ་བོ་ཕལ་བ་ཞིག་གི་དྲན་ཚུལ་ལས། ཀུན་ལ་བཞག་པའི་བསླབ་བྱ་མིན། མུ་འགོད། དྲུང་ཡིག་དོན་ལྡན་ནས།
