རྒྱ་དམར་ཚོགས་ཆེན་ ༡༨ སྐབས་བོད་མི་འཇིགས་མེད་ཚེ་བརྟན་ལགས་ཀྱིས་སོ་སོར་གྲི་བཙུགས་ཏེ་རྒྱ་གཞུང་ལ་ངོ་རྒོལ་བྱས་ཡོད་འདུག
ཉེ་སྔོན་རྒྱ་དམར་ཚོགས་ཆེན་ ༡༨ སྐབས་དང་བསྟུན་ནས། རང་ལོ་ ༣༠ ཡིན་པའི་འཇིགས་མེད་ཚེ་བརྟན་ལགས་ཀྱིས་སོ་སོའི་བྲང་ཁ་གྲིས་གཤགས་ཏེ། ཁ་གྱ་སྟོད་ཞང་གི་སློབ་གྲྭའི་རྩིག་གྱང་ངོས་སུ་རང་ཉིད་ཀྱི་ཟུངས་ཁྲག་དམར་པོས་བོད་རང་བཙན་ཞེས་བྲིས་རྗེས། བསྐྱར་དུ་རང་ཉིད་ལ་གྲི་བཙུགས་ཏེ་རྒྱ་གཞུང་གི་དྲག་གནོན་དབང་སྒྱུར་སྲིད་ཇུས་ལ་ངོ་རྒོལ་བྱས་ཡོད་འདུག
རྒྱལ་གཅེས་དཔའ་བོ་ཁོང་ནི་ད་ལྟའི་རྒྱ་གཞུང་གི་ས་ཁུལ་ཆ་བགོས་ལྟར་ན། ཀན་ལྷོ་བོད་རིགས་རང་སྐྱོང་ཁུལ་གཙོས་གྲོང་ཁྱེར་ཁ་གྱ་སྟོད་ཞང་ཆུ་ནག་སྡེ་བའི་ཡིན་པ་དང་། ཁོང་གི་ཨ་ཕ་སྔོན་མ་ནས་འདས་གྲོངས་ཕྱིན་ཡོད་པ་དང་། ད་ལྟ་ཁོང་གི་ཁྱིམ་དུ་ཨ་མ་དང་ཆུང་མ། བྱིས་པ་གཉིས་བཅས་ཡོད་འདུག ཁོང་གིས་རང་ཉིད་ལ་གྲི་བཙུགས་ཏེ་ངོ་རྒོལ་བྱས་པའི་དུས་ཚེས་དང་ད་ལྟའི་ཆར་ཁོང་སྐུ་གྲོངས་ཡོད་མེད་སོགས་ཀྱི་གནས་ཚུལ་གསལ་བོ་ཤེས་རྟོགས་མེད་པ་རེད།
བོད་ནས་གནས་ཚུལ་མཁོ་གཏོང་པས་ཨེ་ཤ་ཡ་རླུང་འཕྲིན་ཁང་ལ། “ཚེས་གྲངས་གསལ་པོ་ཤེས་མ་སོང་། སྐབས་དེར་དྲ་ལམ་ཚང་མ་བཀག་ཡོད་པས་གནས་ཚུལ་ཕྱི་ལ་མཁོ་སྤྲོད་བྱེད་ཐུབ་མེད” ཅེས་བརྗོད་དེ། རྒྱལ་གཅེས་དཔའ་བོ་འཇིགས་མེད་ཚེ་བརྟན་ལགས་ཀྱིས་རང་ཉིད་ལ་གྲི་བཙུགས་ཏེ་ངོ་རྒོལ་བྱས་པའི་དུས་ཚེས་ནི། རྒྱ་གཞུང་གིས་རྒྱ་ནག་ཚོགས་ཆེན་བཅོ་བརྒྱད་སྐབས་སྡེ་བ་སོ་སོར་ལྟ་རྟོག་བྱེད་མཁན་ལས་བྱེད་མངག་ནས་སྐོར་གཡེང་བྱེད་བཅུག་ཡོད་པའི་སྐབས་ཡིན་སྟབས། རྒྱལ་གཅེས་དཔའ་བོ་ཁོང་གིས་ཁ་གྱ་སྟོད་ཞང་སློབ་གྲྭའི་རྩིག་གྱང་ངོས་སུ་སོ་སོའི་ཟུངས་ཁྲག་གིས་བོད་རང་བཙན་ཞེས་པའི་ཡེ་གེ་བྲིས་པ་དང་། རང་ཉིད་ལ་བསྐྱར་དུ་གྲི་བཙུགས་ཏེ་རང་སྲོག་གཅོད་པའི་ངོ་རྒོལ་དེ་གནང་རྗེས། ཆུ་ནག་ཡུལ་ཚོར་བལྟ་རྟོག་བྱེད་མཁན་སྡེ་བའི་མགོ་བ་དང་ལྟ་རྟོག་བྱེད་མཁན་མི་སྣ་སླེབས་ཏེ་ལམ་སང་ཡི་གེ་བསུབ་པ་དང་། ཁོང་གིས་ཨ་རག་འཐུང་རྗེས་ར་བཟི་སྟེ་རང་ཤི་བརྒྱབ་པ་ཡིན་ཚུལ་བསྒྲགས་ཏེ་ནས་གནས་ཚུལ་ངོ་མ་གསང་འགེབས་བྱས་ཡོད་འདུག
གནས་ཚུལ་མཁོ་གཏོང་བས་བརྗོད་པ་ལྟར་ན། སྐབས་དེར་དྲ་ལམ་ཐམས་ཅད་བཀག་ཡོད་སྟབས། གནས་ཚུལ་དེ་ད་ལྟའི་བར་དུ་ཕྱི་ལ་བཤད་པའི་གོ་སྐབས་བྱུང་ཐུབ་མེད་པ་རེད། དེ་བཞིན། ད་སྐབས་ཀན་ལྷོ་ཁུལ་དུ་དམ་དྲག་ཞིབ་བཤེར་ནན་མོ་བྱས་ཏེ། བོད་མི་ཕན་ཚུན་བར་ཁ་པར་ཐོག་རང་ལུས་མེར་བསྲེགས་ཀྱི་གནས་ཚུལ་དང་པར་རིས་སོགས་བཏང་པར་རྐྱེན་བྱས་ནས། བོད་མི་མང་པོ་ད་ལྟ་འཇུ་བཟུང་བཀག་ཉར་བྱེད་བཞིན་པའི་གནས་སྟངས་ཆགས་ཡོད་འདུག
རྒྱལ་གཅེས་དཔའ་བོ་འཇིགས་མེད་ཚེ་བརྟན་ལགས་ཀྱི་ཕ་ཡུལ་ཆུ་ནག་སྡེ་བ་དང་ཁ་གྱ་སྟོད་ཞང་སྲིད་གཞུང་བར་སྤྱི་ལེ་ཕྱེད་ཀ་ཙམ་ལས་མེད་པར་འདབས་འབྲེལ་ལྟ་བུར་གནས་ཡོད་པ་ཞིག་ཡིན་འདུག
གསར་འགོད་པ། ཚེ་རིང་རྒྱལ།
བོད་དོན་ཆེད་དུ། མེ་དང་ཆུ་བོ། གྲི་གསུམ་ག་བདེ་སྤྱད་པ་འདི་ཡང་བོད་རིགས་ཚོས་དུས་ནམ་ཡང་བརྗེད་མི་ཉན་ལགས། མེ་ཆུ་གྲི་གསུམ་གང་ཡང་བེད་སྤྱད་ཀྱང་ང་ཚོས་མྱ་ངན་གུས་དུད་དང་། སླར་ཡང་དལ་བའི་རྟེན་བཟང་མྱུར་དུ་ཐོབ་པའི་སྨོན་ལམ་ཡོད།
་་་་་་ ཁྲག་གིས་བོད་རང་བཙན་ཞེས་པའི་ཡེ་གེ་བྲིས་ཏེ་རང་སྲོག་བཅད་པའི་རྗེས། ཆུ་ནག་ཡུལ་ཚོར་བལྟ་རྟོག་བྱེད་མཁན་སྡེ་བའི་མགོ་བ་དང་ལྟ་རྟོག་བྱེད་མཁན་མི་སྣ་སླེབས་ཏེ་ལམ་སང་ཡི་གེ་བསུབ་པ་དང་། ཁོང་གིས་ཨ་རག་འཐུང་རྗེས་ར་བཟི་སྟེ་རང་ཤི་བརྒྱབ་པ་ཡིན་ཚུལ་བསྒྲགས་ཏེ་ནས་གནས་ཚུལ་ངོ་མ་གསང་འགེབས་བྱས་ཡོད་འདུག ་་་་ཟེར།