བྱང་ཀོ་རེ་ཡའི་མེ་ཤུགས་འཕུར་མདའ་དང་རྒྱ་སྤྱིའི་དོ་སྣང་།

བྱང་ཀོ་རེ་ཡའི་མེ་ཤུགས་འཕུར་མདའ་ཚོད་ལྟ་བྱས་པར་རྒྱལ་ཁབ་མང་པོས་སྐྱོན་བརྗོད་བྱེད་བཞིན་པའི་སྐབས་འདིར། བྱང་ཀོ་རེ་ཡའི་ནང་རྒྱལ་ཁའི་དགའ་སྟོན་བྱེད་བཞིན་ཡོད་པ་རེད།

ཕྱི་ཚེས་ ༡༢ ཉིན་བྱང་ཀོ་རེ་ཡས་རིམ་པ་གསུམ་ཅན་གྱི་མཁའ་སྐྱོད་མེ་ཤུགས་འཕུར་མདའ་ཞིག་མཁའ་དབྱངས་སུ་བཏང་ཡོད་པ་དང་། དེར་རྒྱལ་སྤྱིའི་ཁྱོན་ཡོངས་ནས་རྡུལ་མཚོན་ཚོད་ལྟའི་འགུལ་སྐྱོད་ཅིག་ཡིན་པར་ངོས་འཛིན་གྱིས་ངོ་རྒོལ་དང་སྐྱོན་བརྗོད་བྱེད་ཀྱི་ཡོད་ཀྱང་། བྱང་ཀོ་རེ་ཡས་དེ་ནི་ཞི་བདེ་དང་ཚན་རྩལ་རང་བཞིན་གྱི་ལས་དོན་ཞིག་དང་། མཁའ་དབྱིངས་ས་ཁམས་བརྟག་དཔྱད་ཀྱི་མིས་བཟོས་རྒྱུ་སྐར་གཏོང་འཇོག་བྱས་པ་ཞིག་ཡིན་པར་བརྗོད་དེ། ཕྱི་ཚེས་ ༡༤ ཉིན་བྱང་ཀོ་རེ་ཡ་གཞུང་གིས་ཐེངས་འདིའི་མེ་ཤུགས་འཕུར་མདའ་མཁའ་དབྱིངས་སུ་བཏང་བ་ལེགས་འགྲུབ་བྱུང་ཡོད་སྐོར་དང་། མ་འོངས་པར་ལས་གཞི་དེ་མཇུག་སྣོན་བྱ་རྒྱུ་ཡིན་སྐོར་བསྒྲགས་འདུག

ཉིན་དེའི་གཞུང་འབྲེལ་གསལ་བསྒྲགས་རྗེས་སུ་བྱང་ཀོ་རེ་ཡའི་མི་མང་སྟོང་ཕྲག་མང་པོ་ཁྲོམ་གཞུང་གང་སར་ཐོན་ཏེ་དགའ་སྟོན་བྱས་ཡོད་པ་མ་ཟད། གཞུང་འབྲེལ་བརྙན་འཕྲིན་བརྒྱུད་ལམ་ཁག་ཏུ་དེ་ནི་ལོ་ན་ཆུང་བའི་སྲིད་འཛིན་ཀེམ་ཇོང་ཨུན་(Kim Jong-Un) གྱི་བློ་སྟོབས་དང་དཔའ་ངར། རིག་སྟོབས་ཤིག་ཡིན་པ་སོགས་མགོ་ཁྲིད་ཀྱི་ནུས་པ་དྲིལ་བསྒྲགས་བྱས་ཡོད་ལ། མེ་ཤུགས་འཕུར་མདའ་གཏོང་སྐབས་ཀྱི་ཆེས་མཐའ་མཇུག་གི་བཀའ་ཁྱབ་དེ་ཀེམ་གྱིས་གཏོང་བཞིན་པའི་པར་དང་བརྙན་རིས་ཀྱང་འགྲེམས་སྤེལ་བྱས་ཡོད།

གཟའ་ལྷག་པའི་ཉིན་མེ་ཤུགས་འཕུར་མདའ་མཁའ་དབྱིངས་སུ་བཏང་འཕྲལ། རྒྱལ་ཚོགས་བདེ་འཇགས་ལྷན་ཁང་ནང་ཛ་དྲག་ཚོགས་འདུ་བསྡུས་ཏེ།  མཉམ་འབྲེལ་རྒྱལ་ཚོགས་ཀྱི་བཅའ་ཁྲིམས་དང་འགལ་ཡོད་པའི་བྱང་ཀོ་རེ་ཡའི་འགུལ་སྐྱོད་དེར་རྒོལ་ལན་སྤྲོད་ཕྱོགས་ལ་གྲོས་བསྡུར་བྱས་ཡོད།  ཨ་རི་དང་ཉི་ཧོང་། ལྷོ་ཀོ་རེ་ཡ་སོགས་ཀྱིས་དེ་ནི་བྱང་ཀོ་རེ་ཡས་དྲག་མཚོན་འཕེལ་རྒྱས་བཏང་སྟེ་རྡུལ་མཚོན་ཅན་གྱི་དམག་འཁྲུག་ཅིག་མདུན་དུ་བསུ་བཞིན་ཡོད་པ་ཞིག་ཡིན་པའི་སྐྱོན་བརྗོད་དང་། དེར་རྒྱལ་སྤྱིའི་སྤྱི་ཚོགས་ཀྱིས་གནོན་ཤུགས་དང་འགོག་རྐྱེན་སྤྲོད་དགོས་སྐོར་ནན་བརྗོད་བྱས་ཡོད།

ཨ་རིའི་གཞུང་གིས་བྱང་ཀོ་རེ་ཡའི་མགོ་ཁྲིད་གསར་པར་སོ་སོའི་རྒྱལ་ཁབ་དུས་རབས་ཉེར་གཅིག་པར་སྣེ་འཁྲིད་རྒྱུའི་གོ་སྐབས་བྱུང་ཡོད་ཀྱང་། དེ་ལས་ལྡོག་སྟེ་ཁོས་ནོར་འཁྲུལ་ཅན་གྱི་གདམ་ཀ་བཟོ་བཞིན་ཡོད་པའི་ཉེན་བརྡ་བཏང་ཡོད་ལ། དེང་ཕྱིན་བྱང་ཀོ་རེ་ཡའི་འགུལ་སྐྱོད་ལ་ལྟ་རྟོག་ནན་མོ་བྱ་རྒྱུ་དང་། ཉེ་འཁོར་ས་ཁུལ་ཁག་གི་ཕྱོགས་གཏོགས་རྒྱལ་ཁབ་དག་གི་བདེ་འཇགས་ལ་ཆོད་སེམས་བརྟན་པོས་འགན་སྲུང་བྱ་རྒྱུ་ཡིན་པ་མ་ཟད། ཐེངས་འདིའི་འགུལ་སྐྱོད་ལ་བརྟེན་ནས་རྒྱལ་ཁབ་དེ་དག་དང་མཉམ་འབྲེལ་ཐོག་ཞི་བདེ་རྒྱ་མཚོའི་མངའ་ཁུལ་གྱི་བདེ་སྲུང་ཐད་སྔར་བས་ནུས་སྟོབས་རྒྱ་སྐྱེད་གཏོང་རྒྱུ་ཡིན་པའི་ཉེན་བརྡ་བཏང་ཡོད།

དེ་བཞིན་ཨ་རིའི་གཞུང་གི་མགྲིན་ཚབ་པ་ནཱུ་ལན་ཌི་(Victoria Nuland) ཡིས་བསྒྲགས་གཏམ་ཞིག་སྤེལ་ཏེ། ད་ཆར་ཨ་རིའི་གཞུང་གིས་མཐུན་ཕྱོགས་རྒྱལ་ཁབ་ ༦ དང་། རྒྱལ་ཚོགས་བདེ་འཇགས་ལྷན་ཁང་གི་ཁོངས་གཏོགས་དག་དང་ལྷན་དུ་བྱང་ཀོ་རེ་ཡའི་འགུལ་སྐྱོད་དེར་ཁ་གསལ་དོན་གནད་ལྡན་པའི་རྒོལ་ལན་སྤྲོད་རྒྱུར་གྲོས་བསྡུར་གྲ་སྒྲིག་བྱེད་ཀྱི་ཡོད་སྐོར་དང་། རྒྱ་ནག་སྡེ་ཚན་དེ་གཉིས་ཀྱི་ཁོངས་སུ་ཡོད་པ་ལྟར་མཉམ་ཞུགས་ཡོད་ཚུལ་བརྗོད་ཡོད།

གནད་དོན་དེའི་ཐད་བྱང་ཀོ་རེ་ཡའི་མཐུན་ཕྱོགས་ཉེ་ཤོས་རྒྱ་ནག་གིས་ཀྱང་བློ་ཕམ་ཡོད་པའི་ཐད། རྒྱ་ནག་ཕྱི་སྲིད་ལས་ཁུངས་ཀྱི་མགྲིན་ཚབ་པས་བྱང་ཀོ་རེ་ཡས་རྒྱལ་སྤྱིའི་སྤྱི་ཚོགས་ཀྱི་དོ་ཁུར་ལ་སྣང་མེད་ཀྱིས་མེ་ཤུགས་འཕུར་མདའ་ཚོད་ལྟ་བྱས་པར་བློ་ཕམ་ཡོད་སྐོར་ཀྱི་རྣམ་འགྱུར་བསྟན་ཡོད་ལ། རྒྱ་གཞུང་གིས་མཉམ་འབྲེལ་རྒྱལ་ཚོགས་ཀྱིས་དེར་ཡ་ལན་གང་འདྲ་ཞིག་སྤྲད་ཀྱང་ངེས་པར་དུ་ཞི་འཇམ་དང་དྲག་ཤུགས་ལ་གཡོ་ཐབས་བྱ་དགོས་པའི་འབོད་སྐུལ་ཞུས་ཡོད། ཡང་རྒྱ་ནག་གཞུང་འབྲེལ་ཞིན་ཧྭ་གསར་ཤོག་སྟེང་། རྒྱལ་ཁབ་གཞན་དག་ནང་བཞིན་བྱང་ཀོ་རེ་ཡར་མཁའ་དབྱིངས་འཁོར་སྐར་བཟོ་གཏོང་གི་ཐོབ་ཐང་ཡོད་ཀྱང་། རྒྱལ་ཚོགས་ཀྱི་བཅའ་ཁྲིམས་དང་མ་འགལ་པ་བྱ་དགོས་པ་མ་ཟད། རྒྱལ་སྤྱིའི་སྤྱི་ཚོགས་ཀྱི་དོ་ཁུར་བརྩི་འཇོག་གིས། གནས་བབ་ཞི་འཇགས་ཡོང་ཐབས་བྱ་དགོས་སྐོར་བཀོད་ཡོད་འདུག

འོན་ཀྱང་། ཀེམ་ཇོང་ཨུན་གྱིས་ཕྱི་ཕྱོགས་ཀྱི་སྐྱོན་བརྗོད་དང་ངོ་རྒོལ་ལ་མུ་མཐུད་སྣང་མེད་ཀྱིས། བྱང་ཀོ་རེ་ཡའི་ཚན་རྩལ་འཕྲུལ་ཆས་དང་དཔལ་འབྱོར་འཕེལ་རྒྱས་ཐད་མ་འོངས་པར་མིས་བཟོས་རྒྱུ་སྐར་མུ་མཐུད་བཟོ་གཏོང་བྱ་རྒྱུ་ཡིན་ཚུལ་བརྗོད་འདུག་ལ། གཞུང་འཛིན་ཚོགས་པའི་དྲུང་ཆེ་ཀེམ་ཀེ་ནཱམ་གྱིས། མིས་བཟོས་རྒྱུ་སྐར་ནི་རྒྱལ་ཁོངས་དཔལ་འབྱོར་འཕེལ་རྒྱས་ལ་མེད་ཐབས་མེད་པ་ཞིག་དང་། དེ་ནི་རྒྱལ་སྤྱིའི་འཕེལ་ཕྱོགས་ཤིག་ཡིན་པ་མ་ཟད་བྱང་ཀོ་རེ་ཡའི་མི་མང་གི་ཐོབ་ཐང་ཞིག་ཀྱང་ཡིན་སྟབས། ཕྱི་ཕྱོགས་ཀྱིས་གཞུང་དང་སྒྲིག་འཛུགས་སུ་གང་གིས་ཀོ་རེ་ཡའི་རྒྱུ་སྐར་བཟོ་གཏོང་གི་ལས་གཞིར་དྲག་མཚོན་ཚོད་ལྟ་བྱེད་ཀྱི་ཡོད་པའི་སྙོན་འཛུགས་དང་འཇིགས་སྐུལ་བྱ་ཐབས་མེད་སྐོར་བརྗོད་འདུག

ལྷོ་ཀོ་རེ་ཡའི་ཕྱི་སྲིད་བློན་ཆེན་གྱིས། བྱང་ཀོ་རེ་ཡས་མཉམ་འབྲེལ་རྒྱལ་ཚོགས་གཙོས་རྒྱ་སྤྱིའི་ཉེན་བརྡ་དང་དགོས་འདུན་ཁག་ལ་སྣང་མེད་ཀྱིས་མེ་ཤུགས་འཕུར་མདའི་ཚོད་ལྟ་བྱས་སྟབས། ལྷོ་ཀོ་རེ་ཡས་རྒྱལ་སྤྱིའི་སྤྱི་ཚོགས་དང་མཉམ་འབྲེལ་ཐོག་བྱང་ཀོ་རེ་ཡར་རྒོལ་ལན་སྤྲོད་རྒྱུ་ཡིན་པའི་ཉེན་བརྡ་བཏང་ཡོད་ལ། ཉི་ཧོང་གཞུང་གིས་ཀྱང་བྱང་ཀོ་རེ་ཡས་ཕྱི་ཕྱོགས་ཀྱི་འབོད་སྐུལ་ལ་ཆ་འཇོག་མ་བྱས་པར་རྡུལ་མཚོན་ཚོད་ལྟ་ལག་བསྟར་བྱས་པར་བློ་ཕམ་ཆེན་པོ་ཡོད་ཚུལ་དང་། ཉི་ཧོང་གཞུང་གིས་འགུལ་སྐྱོད་དེར་བཟོ་སྒོམ་བྱ་ཐབས་བྲལ་པས། བྱང་ཀོ་རེ་ཡར་མཐའ་གཅིག་ཏུ་ངོ་རྒོལ་བྱེད་རྒྱུ་ཡིན་ཞེས་བསྒྲགས་འདུག

དབྱིན་ཇིའི་ཕྱི་སྲིད་བློན་ཆེན་གྱིས་ “དེ་རིང་བྱང་ཀོ་རེ་ཡས་མེ་ཤུགས་འཕུར་མདའི་ཚོད་ལྟ་བྱས་པ་དེར་མཐའ་གཅིག་ཏུ་སྐྱོན་བརྗོད་བྱེད་ཀྱི་ཡོད། བྱང་ཀོ་རེ་ཡས་སོ་སོའི་མང་ཚོགས་ཀྱི་འཚོ་གནས་ཡར་རྒྱས་གཏོང་ཐབས་བྱ་རྒྱུའི་ཚབ་ལ་རྡུལ་མཚོན་ཚོད་ལྟའི་ལས་གཞི་ཨང་དང་པོར་བཟུང་པར་ངོ་རྒོལ་དང་། བྱང་ཀོ་རེ་ཡའི་ཕྱི་འབྲེལ་ཐད་གནོན་ཤུགས་སྤྲོད་རྒྱུ་ཡིན་”ཞེས་ཉེན་བརྡ་བཏང་ཡོད། དེ་བཞིན་རཱ་ཤི་ཡའི་ཕྱི་སྲིད་ལས་ཁུངས་ཀྱིས་ཀྱང་རཱ་ཤི་ཡ་ཚུད་པའི་རྒྱལ་སྤྱའི་སྤྱི་ཚོགས་ཀྱིས་བྱང་ཀོ་རེ་ཡར་རྡུལ་མཚོན་ཚོད་ལྟ་མི་བྱ་བའི་འབོད་སྐུལ་བྱས་པར་སྣང་མེད་བཏང་པ་དེ་བློ་ཕམ་སྐྱེས་ཡུལ་དུ་གྱུར་ཡོད་པའི་སྐྱོན་བརྗོད་བྱས་ཡོད།

བྱང་ཀོ་རེ་ཡའི་རྡུལ་མཚོན་དམག་དོན་ཐད་རྒྱལ་སྤྱིའི་སྟེང་གལ་གནད་ཆེན་པོ་ཆགས་ཀྱི་ཡོད་པ་ནི། ཀོ་རེ་ཡ་ལྷོ་བྱང་བར་དུས་ཡུན་རིང་པའི་ཛ་དྲག་རང་བཞིན་གྱི་གནས་བབ་ཆགས་ཡོད་པ། ཉི་ཧོང་དང་འགྲན་རྩོད་ཀྱི་མཁའ་དབུགས་ཆེ་ཆེར་འབྱུང་བཞིན་པ། ཤར་ཨེ་ཤ་ཡའི་མངའ་ཁུལ་དུ་དྲག་མཚོན་བཟོ་སྐྲུན་གྱི་འགྲན་ཤུགས་འཕེལ་པའི་རྒྱུ་རྐྱེན་དུ་འགྱུར་བཞིན་པ། རྒྱ་ནག་གི་མཐུན་ཕྱོགས་ཉེ་ཤོས་དམར་པོའི་སྲིད་དབང་སྒེར་འཛིན་གཞུང་དེ་འཛམ་གླིང་ནང་གི་དམག་དོན་སྟོབས་ཤུགས་ཆེ་གྲས་ཨང་ལྔ་པར་སླེབས་ཡོད་པ་བཅས་ལ་བརྟེན། ཕྱོགས་ཡོངས་ནས་བྱང་ཀོ་རེ་ཡའི་དམག་དོན་དང་དྲག་མཚོན་བཟོ་སྐྲུན་དང་། ལྷག་པར་དུ་རྡུལ་མཚོན་དང་དུག་མཚོན་བཟོ་སྐྲུན་བྱེད་བཞིན་པའི་འཇིགས་སྣང་བྱེད་ཀྱི་ཡོད་ལ། ཉི་ཧོང་གཙོས་ཞི་བདེ་རྒྱ་མཚོའི་མངའ་ཁུལ་གྱི་མཐུན་ཕྱོགས་རྒྱལ་ཁབ་ཁག་ནང་རྟེན་གཞི་བྱེད་པའི་ཨ་རིའི་དམག་དོན་ཐད་ནས་ཨ་རིའི་གཞུང་གིས་དམིགས་བསལ་བྱང་ཀོ་རེ་ཡའི་འགུལ་སྐྱོད་ལ་ལྟ་རྟོག་ནན་མོ་བྱེད་ཀྱི་ཡོད་འདུག

ཆབ་སྲིད་དཔྱད་བརྗོད་དག་གིས། ཐེངས་འདིར་རྒྱལ་སྤྱིའི་སྤྱི་ཚོགས་ཀྱི་གནོན་ཤུགས་དང་ཉེན་བརྡ་ལ་མགོ་བོ་མ་སྒུར་པར་མེ་ཤུགས་འཕུར་མདའི་ཚོད་ལྟ་བྱས་པ་དེས། ཕྱོགས་གཅིག་ནས་ད་ལྟའི་མགོ་ཁྲིད་ཀེམ་གྱི་ཕ་རྒན་འདས་ནས་ལོ་གཅིག་ཕྱིན་པའི་ཉིན་མོར་བསླེབ་ལ་ཉེ་བའི་སྐབས་འདིར་(ཟླ་འདིའི་ཚེས་ ༡༧ ) ཕའི་ཕུགས་བསམ་དང་ལས་དོན་རྒྱུན་སྐྱོང་བྱེད་ཀྱི་ཡོད་པ་མཚོན་ཐབས་དང་། ཕྱོགས་གཞན་ཞིག་ནས། ཕྱི་ཕྱོགས་ལ་བྱང་ཀོ་རེ་ཡར་སྟོབས་ཤུགས་ཡོད་པ་སྟོན་ཐབས་དང་ལོ་ན་ཆུང་པའི་མགོ་ཁྲིད་ནུས་ལྡན་ཡིན་པ་མཚོན་ཐབས། དེ་བཞིན་བྱང་ཀོ་རེ་ཡའི་རྒྱལ་ཁོངས་ནང་མི་མང་གི་ངོ་རྒོལ་ཟིང་འཁྲུག་འབྱུང་སྲིད་པའི་ཞེད་སྣང་འོག མང་ཚོགས་ཀྱི་བསལ་བློའི་མགོ་གནོན་ཐབས་བཅས་ལ་དམིགས་པ་ཞིག་ཡིན་པར་གླེང་།

ཨ་རིར་རྟེན་གཞི་བྱེད་པའི་འགྲོ་བ་མིའི་ཐོབ་ཐང་སྡེ་ཚན་ཞིག་གི་ཞིབ་འཇུག་སྙན་ཐོ་ལྟར་ན། ད་ཆར་བྱང་ཀོ་རེ་ཡར་ཆབ་སྲིད་བཙོན་པ་ ༢༠༠༠༠༠ ཙམ་ཡོད་འདུག

གསར་འགོད་པ། བནྡེ་སྐྱབས།