མིག་མི་འཛུམ།
ཧ་ལམ་སྐབས་ཐོག་འདིར་ང་གཅིག་བུ་མ་ཡིན་པར་ཚང་མ་ལ་བསམ་ཚུལ་འདི་ཡོད་ངེས་པ་དང་། བསམ་ཚུལ་འདིའི་སྟེང་ལ་ཚོར་བའང་གཅིག་མཚུངས་ཀྱིས་ཡོད་པར་ངེས། དེ་ལྟར་ན། མགོ་འདོགས་རིང་ལུགས་པ་ཚོས་ནམ་རྒྱུན་ཁ་ཕར་འཁོར་ནས་སྐད་ཆ་མི་བཤད་པར་ཚུར་འཁོར་ནས་བཤད་སྡོད་པ་སྟེ། རྣམ་འགྱུར་ཇེ་ཡག་ཏུ་སོང་ཡོད་རབས་དང་དཔོན་རིགས་ཆེ་གེ་མོའི་གཏམ་བཤད་ཅིག་ཅིག་མུག་མུག་གི་སྒང་ནས་སྐད་ཆའི་བཤད་ཕྱོགས་བཟང་རབས་སོགས་བཤད་ནས་གོ་རྟོགས་ཧ་ཅང་དམའ་བའི་མི་མང་ཞིག་ལ་མགོ་སྐོར་གཏོང་གི་ཡོད། ང་ཚོའི་མིག་གིས་མཐོང་ས་དང་རྣ་བས་ཐོས་ས་ཁོ་ནར་ཉིས་སྟོང་དགུ་ནས་ད་བར་མི་གྲངས་ག་ཚོད་ཀྱིས་མེར་བསྲེག་བཏང་བ་དང་། དེ་དག་རེ་རེའི་རྗེས་འབྲེལ་གྱི་དཀའ་སྡུག་གང་འདྲ་ཡིན་པ། ལྷག་པར་དུ་ཉིན་འདི་འགར་མེར་བསྲེག་གི་གནས་ཚུལ་གྱིས་རྣ་བ་ཏོག་ཙམ་འཇམ་ནའང་། མི་མང་བསྡེབས་འཛིན་དང་དོན་མེད་གཅར་བརྡུང་། ཉེས་མེད་ཁྲིམས་ཆད་ག་ཚོད་གཏོང་གི་འདུག ད་དུང་དེ་བས་ཀྱང་ཁ་དཔེར། མདའ་བརྒྱབ་པས་མི་ཚད་གཞུ་མོ་གནམ་ལ་ཕྱར། རྡོ་བརྒྱབ་པས་མི་ཚད་རྗེས་ལ་ཀི་ལྡིར་བྱེད་ཟེར་བ་བཞིན། བོད་མི་སྤྱི་བོ་གནམ་སྟོན་ཚང་མས་སྡུག་གི་མགོ་བོ་འཁྱོག་གི་མེད་སྐབས། རྒྱ་སྒོར་ཁྲི་ཁྲག་མང་བོའི་བརྔན་པ་ཡོད་རབས་ཀྱི་འཆལ་གཏམ་གསལ་བསྒྲགས་འདྲ་མིན་ཅི་ཙམ་སྤེལ་གྱི་ཡོད། དེ་ནི་ཝ་མི་བརྒྱལ་མི་ག་མེད་འདྲེ་ཡིས་འགྲམ་ལྕག་ཟེར་བ་དེ་མ་རེད་དམ།
སྐད་ཆ་དྲང་མོར་བཤད་ན། ད་ནི་འུ་ཅག་གི་ངོས་ནས་ཕར་བསྟུན་རྒྱུ་མ་ཡིན་པར་དགྲ་བོའི་ངོས་ནས་ཚུར་བསམ་བློ་ཞིག་གཏོང་བའི་དུས་ལ་སླེབས་ཡོད། ད་དུང་དེ་བས་ཀྱང་བདག་གི་རྩོམ་ཡིག་སྔ་ཕྱི་ཚང་མའི་ནང་ཉེན་བརྡ་སྤྲད་པ་བཞིན། ནམ་ཉི་མ་ཞིག་ལ་བོད་པར་འུ་ཐུག་པའི་དུས་ཚོད་ཅིག་ཡོད་ངེས་ན། དེ་དུས་ལྷོད་ན་རྫ་མ་ཆག་རྒྱུ་དང་བཟུང་ན་ལག་པ་བསྲེག་རྒྱུ་ཞིག་འབྱུང་བར་གདོན་མི་ཟ། དུས་ཚོད་དེ་ནི་དགྲ་བོས་ཡོད་ཚོད་ཐག་ཆོད་པར་རེ་སྒུག་བྱེད་སའི་༸གོང་ས་མཆོག་མ་བཞུགས་པའི་ཉིན་མོ་དེ་ཡིན་ལ། ༸གོང་ས་མཆོག་བོད་དུ་ཕེབས་མ་ཐུབ་པར་ཕྱི་ལོགས་ནས་ཞིང་གཞན་དུ་ཕེབས་པའི་དུས་ངན་དེར། གཞིས་ལུས་བོད་མི་ས་ཡ་དྲུག་པོ་དཔའ་བོར་འགྱུར་ངེས་ལ། བོད་མི་ས་ཡ་དྲུག་པོ་དཔའ་བོ་བྱ་ངེས།
དགྲ་བོའི་ཕྱོགས་ནས་ཁ་བརྡུང་དང་གསོད་གཏུབ་བཅོམ་གསུམ་བྱེད་ཀྱིན་པའི་སྐབས་འདིར། ད་དུང་རང་ཕྱོགས་ཀྱི་ཆབ་སྲིད་པའི་ལག་ཆར་གྱུར་བའི་ཅོལ་ཆུང་ཁག་ཅིག་གིས་བོད་རྒྱ་ཞི་མོལ་དང་སྐུ་ཚབ་བསྐོ་འཇོག་གི་སྐོར་ནས་གླེང་སློང་བྱེད་ཀྱིན་ཡོད། བྱ་གྲགས་ཚོད་དང་ནམ་ལང་ཚོད་མི་ཟིན་པའི་མི་མང་བོ་ཞིག་གིས་ཀྱང་ཚ་ཚ་འུར་འུར་གྱིས་དགྲ་ལ་གཉེན་གྱི་འདུ་ཤེས་འཛིན་གྱི་ཡོད་པ་མཐོང་ན། དགྲ་བོས་འུ་ཅག་གི་མི་རིགས་འདི་ཧ་ཅང་གླེན་ལྐུགས་ཀྱི་མི་རིགས་ཤིག་ལ་ངོས་འཛིན་པ་དེར་ཡང་འཛིན་རྒྱུ་ཞིག་ལོས་ཡོད་འདོད། དེའི་སྟབས་ཀྱིས་དགྲ་བོའི་མཁྲེགས་འཛིན་གྱི་སྲིད་ཇུས་དེ་དང་མཐུན་པའི་སྐད་ཆ་དང་རྣམ་འགྱུར་ཞིག་ཏན་ཏན་སྟོན་དགོས་ཀྱི་འདུག་ཅེས་བཤད་ཀྱི་ཡོད། ཕར་ཕྱོགས་ནས་རྔ་བོ་ཇི་ལྟར་བརྡུང་བ་དེ་བཞིན་དུ་ཚུར་ཕྱོགས་ནས་ཀྱང་འཆམ་དེ་ལྟར་འཁྲབ་དགོས་པ་ནི་གནད་ཀྱི་དོན་པོ་ཡིན།
ཚུར་ཅི་ཙམ་བསད་པའི་སྐོར་གྱི་རོབ་བཤད་ཅིག་བདག་གི་རྩོམ་ཡིག་སྔ་མ་ཞིག་ཏུ་བཤད་པ་བཞིན་ཡིན་ལ། དེ་ལྟར་བསད་པ་དང་གསོད་ཀྱིན་ད་དུང་ཏཱ་ལའི་ཇག་ཚོགས་ཟེར་མཁན་དེ་སུ་རེད་དམ། དྲག་པོའི་དཔུང་དམག་གིས་བོད་ཀྱི་ཚོ་བ་རེ་རེ་དང་གྲོང་ཁྱེར་རེ་རེའི་སུམ་མདོ་དང་གནད་ས་ཚང་མ་བཟུང་ནས་དྲག་པོའི་གོ་མཚོན་ཁོ་ཚོས་ངོམ་གྱིན་ཚུར་དྲག་སྤྱོད་པ་ཟེར་གྱིན་པ་དེ་སུ་རེད་དམ། སྨྲ་ཤེས་ཤིང་དོན་མི་གོ་བའི་ཁྱི་ཕྲུག་ཅིག་གི་མདུན་ནས་རྐང་བ་ས་ལ་བརྡབས་ནའང་ཚུར་མཆེ་བ་གཙིགས་རྒྱུ་དེ་ཆོས་ཉིད་དུ་གྲུབ་ཡོད་ན། དགྲ་བོས་ད་བར་དུ་བོད་མི་དག་གསོད་གཏུབ་བཅོམ་གསུམ་དེ་ལྟར་བྱས་རྗེས་ད་དུང་བློ་དཀར་བའི་བཟོ་ལྟ་དེ་ཅིའི་ཕྱིར་སྟོན་དགོས་སམ། གཅིག་བྱས་ན་དེ་དག་ནི་བདག་གིས་ཆབ་སྲིད་རིགས་པ་མ་ཤེས་པའི་སྐྱོན་ཞིག་ཡིན་སྲིད།
༢༠༡༢ ༡༢ ༡༣ ལ་བྲིས།
མང་ཐོས་མ་རེད་ཉུང་ཐོས་རེད། སེམས་ཚོར་སྤས་ཐབས་བྱེད་མཁན་འདི་ཚོ་དོན་གྱི་བོད་སྤྱི་བའི་འཐབ་རྩོད་ལ་ཡོལ་མཁན་ཤ་སྟག་རེད། ནམ་རྒྱུན་སེམས་ཚོར་ལབ་ནས་རང་ཉིད་དང་ལོགས་སུ་བཞག རང་ལས་གཞན་གཅེས་སམ་མ་ཤེས་མདོག་མདོག་དང་མ་གོ་མདོག་མདོག རང་ཉིད་ཀྱི་སེམས་ཁམས་ཐེབས་པའི་ཟུག་གཟེར་ཀྱང་ཕྱིར་འདོན་པའི་དགེ་བ་མེད་སོང་ཚེ། བཟོད་སྒོམ་གྱི་ལས་འདི་སྡར་མ་དང་གཉིས་སུ་མ་མཆིས། དེ་ན་རང་ཚུགས་ཟེར་བ་ཞིག་གང་ནས་འཚོལ་རྒྱུ་ཡིན་ནམ། སྐབས་རེ་བསམ་སྣང་ལ་བོད་མི་རིགས་འདིས་རྩུབ་པོ་དང་རྒོད་པོ། བཙན་པོ་དང་གཏུམ་པོའི་བྱ་སྤྱོད་ཡོངས་སུ་ལྟ་ཚུལ་བྱེ་བྲག་པའི་དབང་འོག་ཏུ་བསྡུ་ཐབས་བྱེད་ཀྱིན་པའི་ལས་བསམ་ན། བོད་མི་རིགས་ཀྱིས་རང་ཉིད་ཀྱི་ལྷན་སྐྱེས་དང་འཚོ་གནས་བློས་བཏང་སོང་བས་རང་ཚུགས་ཟེར་བ་འདི་རྦད་དེ་ཤོར་བ་སོང་བ་རེད། རྐྱེན་འདི་རིགས་ལ་བརྟེན་འཇིག་རྟེན་སྲིད་པའི་དོན་འཁྱོང་གི་མེད་ལ་སེམས་ཚོར་དང་ཡོངས་སུ་འགལ་བའི་བསམ་སྤྱོད་མ་གཏོགས། གནས་ལུགས་ཤིག་དང་དྲང་བདེན་དེ་གླེང་མ་ཤེས་བ་རེད། མདོར་སྒྲིལ་བཤད་ན་མང་ཐོས་རིགས་ཅན་འདི་དག་འཇིག་རྟེན་སྲིད་པ་ནས་ལོགས་སུ་བུད་ན་ཡག་ཤེས་རེད། རང་བློ་རང་ལ་ལྐོག་ཏུ་མ་གྱུར་བ་བཞིན་སེམས་ཚོར་ནི་དངངས་སྐྲག་སྒོ་ནས་ཐོན་ཡོང་ལ། དགའ་སྤྲོའི་སྒོ་ནས་འཛུམ་ཆོག ཞེ་སྡང་གི་ལས་ནས་སྐྱེས་ཡོང་ལ། ཐ་ན་སྙིང་རྗེ་བསམ་པའི་བློའི་འཁྱེར་སོ་ལས་ཀྱང་འབྱུང་སྲིད་ན། འཇིག་རྟེན་སྲིད་པ་ཁོ་རང་འདི་འདྲ་རེད་ལ་འཇིག་རྟེན་སྲིད་པའི་དོན་ཡང་འདི་ལྟར་བསྒྲུབ་ན་ལས་ཅི་བྱའམ། ཐག་ཉེ་ས་ནས་དཔེར་བཞག་ན། རང་ལུས་མེར་བསྲེགས་ཀྱི་དོན་རྐྱེན་ཁྲོད་འདས་པོ་དཔའ་བོ་དཔའ་མོ་དག་གི་སྐུན་ཕུང་མཐོང་ཡོང་དུས། ཁྱོད་ལ་སེམས་ཅན་ལས་ལྷག་པའི་བྱང་ཆུབ་གྱི་སེམས་ཞིག་ཡོད་ན་ལས། བོད་གངས་ཅན་པའི་སེམས་ལ་ཟུག་བཞིན་པའི་ཚོར་བ་ནི་མི་རིགས་ལ་དུང་སྣང་ཞིག་དང་དགྲ་ལ་སྡངས་སེམས་འདི་རེད། ཚོར་བ་འདི་གཡུག་ཚར་རྗེས་ང་ཚོས་ཅི་ཞིག་གླེང་ནས་གང་དེ་རྩོད་དགོས་བ་ཡིན་ནམ། ནན་བཤད་འདོད་པ་ཞིག་ལ་བསམ་གཞིགས་གཞན་དབང་ནས་མ་གཏོང་ཟེར་རྒྱུ་ཡིན། གོ་བ་ལོན་མེད་གང་ཤེས།
ཁ་བཤད་ལས་ལག་ལེན་གལ་ཆེ་བ་ཡིན་པ་ཤེས་གྱི་ཡོད་དམ་་་་་་་་་་་་་་་་་་་་
རྩོམ་པ་བོ་མིག་མི་འཛུམ་ལགས་ཀྱིས་བརྩམས་པའི་རྩོམ་ཡིག་འདིའི་ནང་དོན་དང་། ངའི་སེམས་ཚོར་གཉིས་ཧ་ཅང་ཐག་ཉེ་བོ་ཉེ་བོ་རེད། ཡིན་ན་ཡང་སེམས་ཚོར་ནི་སེམས་ཚོར་རང་རེད། སེམས་ཚོར་འདིའི་རིགས་ཁོང་ཁྲོ་དང་གཅིག་ཏུ་འདྲེས་པས་འཇུག་འབྲས་ཅི་བྱུང་ལ་འགན་ཁུར་གྱི་འདུ་ཤེས་ཀྱི་ཆ་ཡོད་མི་སྲིད། སེམས་ཚོར་འདིའི་རིགས་སྲོག་ཆགས་ཕལ་ཆེ་བ་ལ་ཡོད།
མིག་མི་འཛུམ་གྱིས་རྩོམ་ཡིག་རེ་བྲིས་ཡོང་དུས་དངོས་གནས་དོན་སྙིང་འདུག ཆོས་དང་ཆབ་སྲིད་གཉིས་རྦད་དེ་ཐ་དད་གཅིག་རེད།
ཆབ་སྲིད་སྒོ་ནས་བལྟས་ན་མིག་མི་འཛུམ་གྱི་གང་བརྗོད་བཞིན་པ་ལྟར་དགྲ་འདུལ་གཉེན་སྐྱོང་རང་དགོས་པ་དེ་དོན་ལ་གནས་ཀྱིན་འདུག ཆོས་ཀྱི་སྒོ་ནས་བཤད་ན་་་་་་་ཁེ་དང་རྒྱལ་ཁ་གཞན་ལ་འབུལ་་་་་་གྱོང་དང་བུ་ག་རང་གིས་ལེན་་་་་ཟེར་བ་དེ་རང་རེད།
་་་་་་་་་་ཁག་ཅིག་གིས་བོད་རྒྱ་ཞི་མོལ་དང་སྐུ་ཚབ་བསྐོ་འཇོག་གི་སྐོར་ནས་གླེང་སློང་བྱེད་ཀྱིན་ཡོད། བྱ་གྲགས་ཚོད་དང་ནམ་ལང་ཚོད་མི་ཟིན་པའི་མི་མང་བོ་ཞིག་གིས་ཀྱང་ཚ་ཚ་འུར་འུར་གྱིས་དགྲ་ལ་གཉེན་གྱི་འདུ་ཤེས་འཛིན་གྱི་ཡོད་པ་མཐོང་་་་་་
སྐུ་ཚབ་དང་ཞི་མོལ་ཟེར་བ་དེ་ཕྱོགས་གཉིས་ཀྱི་ཉི་མ་བསྐྱལ་རྒྱུའི་སྐད་ཆ་གཅིག་ཡིན། དེའི་ཐོག་གཅིག་ལབ་མཁན་ཚོར་་་་གཞོང་པ་སྟོང་པའི་གཞུང་འཛིང་ཟེར་བ་དེ་རེད།་་་་
བོད་ཀྱི་བཤད་རྒྱུན་ཞིག་ལ། བསམ་དཀར་ཚོ་སྡེ་གྲལ་འཚོ་རྒྱབ་ན་ཁ་ཁོག་མེད་པར་ཆུ་རྒྱུག་རྒྱུག་བཞིན། བསམ་རྒྱུ་སྤྱི་དོན་དང་དྲན་རྒྱུ་གཞུང་དོན་མ་གཏོགས་ཡོད་བ་མ་རེད་ཟེར་སྲོལ་ལྟར། དངོས་ནས་མིག་མི་འཛུམ་པ་འདི་བོད་སྤྱི་བའི་དོན་དུ་བཤད་ཕོད་པ་དང་བསམ་ཕོད་པ་ཞིག་རེད་བསམ་པ་དྲན་ཡོད། མ་གཞི་ནས་བཙན་བྱོལ་བོད་མིའི་ཁྲོད་ན་རྩོམ་སྒྲིག་པ་དང་རྩོམ་པ་པོ། སྙན་ངག་པ་དང་གསར་འགོད་པ་ཐ་ན་ཐན་ནེ་བྱུང་མྱོང་བ་མ་ཟད། འཚོ་སྡོད་ལྟོ་གོས་ལ་སོགས་ཀྱང་བྱ་བྱེད་དེ་རིགས་ལ་བརྟེན་ནས་བྱུང་བ་ཤ་སྟག་ཡིན། འོན་ཀྱང་། མིག་མི་འཛུམ་པ་འབོད་པའི་གནས་ལུགས་འདི་དང་གླེང་གཞི་འདིའི་ཁྲོད་ན། ཡུལ་གྱར་བོད་མིའི་རྩོམ་སྒྲིག་པ་དང་རྩོམ་པ་པོ་དེ་ཚོ་དོན་གྱི་བསམ་གཞིགས་སྟོང་བའམ་མི་སྨྲ་བའི་རྟུལ་ཞུགས་འཛིན་པ་འདི་ཅིས་ཀྱང་དགོད་སྤྲོ་བ་ཞིག་རེད། དོན་དམ་པས་རྩོམ་སྒྲིག་པ་དང་རྩོམ་པ་པོ་འདི་ཚོ་ཚིག་གྲུབ་བཟོ་རྒྱུ་དཀའ་ངལ་ཡོད་བ་མ་རེད་དེ། གནས་ལུགས་ཟེར་བའི་སྐད་ཆ་དེ་བཤད་ཤེས་ཀྱིན་མེད་པ་མིན་ནམ། དེ་མ་གཏོགས་མིག་མི་འཛུམ་པ་འབོད་པས་བཙན་བྱོལ་བོད་ཀྱི་ཤེས་ཡོན་པ་ཚོའི་སྒོ་ཅི་ལྟར་རྡུང་ན་དེ་ལྟར་ཕྱི་བ་དགུན་ཉལ་བཞིན། ལྟོ་གོས་འཛོམས་པོ་རེ་སྒྲིག་ནས་སྒོམས་ལ་བསྡད་ཡོད་པ་འདྲ་བ་འདུག བློ་ཕམ་པོ་རེད།