ཉིན་འདི་འགར་རྒྱ་གར་ལྷོ་ཕྱོགས་འབྲས་སྤུངས་བླ་སྤྱིའི་འདུ་ཁང་དུ་༧གོང་ས་མཆོག་དབུ་བཞུགས་ཐོག་སེམས་དང་སྲོག་གི་བགྲོ་གླེང་ཐེངས་ཉེར་དྲུག་པ་མགོ་འཛུགས་གནང་འདུག
ངྷ་ས་བོད་ཀྱི་དཔེ་མཛོད་ཁང་གི་གོ་སྒྲིག་འོག ཟླ་འདིའི་ཕྱི་ཚེས་ ༡༧ ནས་ ༢༢ ཉིན་བར་དུས་ཡུན་བདུན་ཕྲག་གཅིག་ཙམ་རིང་། རྒྱ་གར་ལྷོ་ཕྱོགས་འབྲས་སྤུངས་བླ་སྤྱིའི་འདུ་ཁང་དུ་༼སེམས་དང་སྲོག་གི་བགྲོ་གླེང་༽ ཚོགས་འདུ་ཐེངས་ ༢༦ པ་འཚོགས་བཞིན་ཡོད་འདུག་ལ། ཐེངས་འདིའི་བགྲོ་གླེང་ཚོགས་འདུར་ཨ་རི་དང་ཡུ་རོབ། རྒྱ་གར་གཙོས་འཛམ་གླིང་རྒྱལ་ཁབ་འདྲ་མིན་ནས་ཚན་རིག་པ་དང་ཆེད་ལས་མཁས་པ་ ༧༠ ཙམ་དང་། བོད་ཀྱི་ས་དགེ་བཀའ་རྙིང་ཇོ་ནང་དང་གཡུང་དྲུང་བོན་བཅས་ཀྱི་བླ་སྤྲུལ་དགེ་བཤེས་དང་། དགོན་སྡེ་ཁག་གི་སྐུ་ཚབ་བཅས་ཁྱོན་ཚོགས་ཞུགས་པ་ ༡༠༠༠ ལྷག་འདུ་འཛོམས་བྱུང་ཡོད་འདུག
ཚོགས་འདུའི་དབུ་འབྱེད་མཛད་སྒོའི་ཐོག་༸གོང་ས་མཆོག་གིས་གདན་ས་འབྲས་སྤུངས་དགོན་པ་ནི་༸རྒྱལ་བ་སྐུ་ཕྲེང་རིམ་བྱོན་གྱི་གདན་ས་ཆགས་ཡོད་པ་དང་། ཐེངས་འདིར་ཕྱི་རོལ་རྒྱང་འཕེན་པ་སྐོར་ཞིག་སྐད་བཏང་སྟེ་ལྟ་གྲུབ་བགྲོ་གླེང་གནང་བཞིན་ཡོད་སྐོར་ངོ་སྤྲོད་གནང་བ་དང་འབྲེལ། དང་ཐོག་ཁོང་གིས་ཚན་རིག་པར་འབྲེལ་བ་བྱེད་སྐབས་ཕྱི་རྒྱལ་ངོ་ཤེས་རེ་ཟུང་གིས་ཚན་རིག་པར་འབྲེལ་བ་བྱས་ན་ནང་ཆོས་ལ་ཉེན་ཁ་འཕྲད་སྲིད་སྐོར་བཤད་མྱོང་ཡང་། ནང་ཆོས་ཀྱིས་ཀྱང་ཚན་རིག་ལྟར་བདེན་པ་དངོས་འཚོལ་གྱི་ཡོད་སྟབས་ཉེན་ཁ་དང་དཀའ་ངལ་གང་ཡང་འཕྲད་མེད་ལུགས་དང་། གཟུགས་ཅན་གྱི་ཆོས་ལ་ཚན་རིག་པས་འགྲེལ་བཤད་བརྒྱབ་པ་ཧ་ཅང་ཞིབ་ཚགས་དང་། ལྷག་པར་དུ་ཚན་རིག་འཕྲུལ་ཆས་ཐོག་གཟུགས་ཅན་ལ་ལྟ་སྐབས་རྫས་ཕྲ་མོ་རྣམས་སྐད་ཅིག་སྐད་ཅིག་ལ་གཡོ་འགུལ་ཐེབས་བཞིན་པ་མངོན་སུམ་གྱིས་མཐོང་ཐུབ་ཅིང་། སེམས་ཀྱི་རྣམ་རྟོག་འདྲ་མིན་ཐོག་སེམས་ནང་ཞི་བདེ་ཡོང་ཐུབ་མིན་ཐོག་ནང་ཆོས་ལས་གསུངས་པའི་འགྲེལ་བཤད་རྣམས་ཞིབ་ཚགས་ཡོད་སྟབས། ནང་ཆོས་དང་ཚན་རིག་བར་བགྲོ་གླེང་གནང་རྒྱུ་ཧ་ཅང་གལ་ཆེན་ཡིན་ཚུལ་ནན་གསུངས་གནང་འདུག
སྐབས་དེར་༸གོང་ས་མཆོག་གིས་མུ་མཐུད་དུ་ནང་ཆོས་དང་ཚན་རིག་བར་ལྟ་གྲུབ་བགྲོ་གླེང་བྱ་རྒྱུ་ཧ་ཅང་གལ་ཆེན་ཡིན་རུང་། ཁོང་གི་གྲོགས་པོ་ཚུད་པའི་ཚན་རིག་པའི་ཁྲོད་སོ་སོའི་ངོས་ནས་འགྲོ་བ་མིའི་སེམས་ཀྱི་རྣམ་རྟོག་སྐོར་ཞིབ་འཇུག་གནང་བཞིན་དུ་སེམས་ནང་ད་དུང་སེམས་ཁྲལ་གྱིས་ཁེངས་བསྡད་ཡོད་ཚུལ་དང་། ཚན་རིག་པ་རྣམས་བདེ་སྡུག་མྱོང་ཚོར་སྐོར་རྒྱུས་མངའ་ཡོད་མཁན་ཞིག་ཡིན་པའི་ཆ་ནས་སྔོན་ལ་སོ་སོའིོ་སེམས་ཞི་བདེ་བཟོ་དགོས་སྐོར། ཁོང་ཆུང་དུས་ནས་ཚན་རིག་ལ་དོ་སྣང་ཡོད་ཀྱང་དུས་ཚོད་མང་ཆེ་ཤོས་བྱང་ཆུབ་སེམས་དང་སྟོང་པ་ཉིད་སྒོམ་རྒྱུ། ནང་པའི་གཞུང་ཆེན་ཁག་ལ་སློབ་སྦྱོང་བྱས་ཏེ་བསྐྱལ་ཡོད་པ་ལྟར། གདན་ས་ཁག་གཙོས་དགོན་སྡེ་ཁག་གི་དགེ་འདུན་པ་ཚོས་ཀྱང་གཞུང་ཆེན་ཁག་ལ་སློབ་སྦྱོང་བྱ་རྒྱུར་གཞི་རྩར་བཞག་སྟེ། ཚན་རིག་ལ་ཞོར་འཕྲོས་ཀྱི་དོ་སྣང་དང་སློབ་སྦྱོང་བྱས་ན་འགྲིག་གི་ཡོད་སྐོར་གསུངས་ཡོད་འདུག
་་་་ཚན་རིག་པ་དང་ཆེད་ལས་མཁས་པ་ ༧༠ ཙམ་དང་། བོད་ཀྱི་ས་དགེ་བཀའ་རྙིང་ཇོ་ནང་དང་གཡུང་དྲུང་བོན་བཅས་ཀྱི་བླ་སྤྲུལ་དགེ་བཤེས་དང་། དགོན་སྡེ་ཁག་གི་སྐུ་ཚབ་བཅས་ཁྱོན་ཚོགས་ཞུགས་པ་ ༡༠༠༠ ལྷག་འདུ་འཛོམས་བྱུང་ཡོད་འདུག ་་་ཟེར།
ཡང་།
གདན་ས་ཁག་གཙོས་དགོན་སྡེ་ཁག་གི་དགེ་འདུན་པ་ཚོས་ཀྱང་གཞུང་ཆེན་ཁག་ལ་སློབ་སྦྱོང་བྱ་རྒྱུར་གཞི་རྩར་བཞག་སྟེ། ཚན་རིག་ལ་ཞོར་འཕྲོས་ཀྱི་དོ་སྣང་དང་སློབ་སྦྱོང་བྱས་ན་འགྲིག་གི་ཡོད་སྐོར་གསུངས་ཡོད་འདུག ་་་ཟེར།
ཚན་རིག་གི་བགྲོ་གླེང་འདི་ཚོགས་ནས་དེ་རིང་ཉིན་གཉིས་པ་དེ་ཡིན་ས་རེད། ངས་ཁ་སང་དེ་རིང་གཉིས་ལ་ཐད་གཏོང་ནས་ཉན་པ་ཡིན། ཚོགས་ཡུལ་དེ་བློ་གླིང་འདུ་ཁང་ཡིན་མིན་དང་འབྲས་སྤུངས་བླ་སྤྱི་རེད་ཟེར་བ་སོགས་ཀྱི་སྐོར་ལ་ཁ་སང་ངོ་དེབ་ནང་དུ་རྩོད་པ་བྱེད་ཀྱིན་འདུག མཐར་འབྲས་སྤུངས་བླ་སྤྱི་ཡིན་པར་ཁ་འཆམ་སོང་།
གསར་འགྱུར་དང་འབྲེལ་ཡོད་ཐད་གཏོང་དྲ་ཐག་འདི་གལ་ཆེན་དུ་མཐོང་ནས་མཆན་བུ་དང་སྦྲགས་འདིར་བཀོད་པ་ཡིན། སང་ཉིན་དུས་ཚོད་དགུ་བ་ནས་བགྲོ་གླེང་དབུ་འཛུགས་རྒྱུ་རེད། རྣམ་པ་ཚོར་དུས་ཁོམ་ཡོད་ཚེ་མཉམ་ཞུགས་གནང་རོགས།
http://www.ustream.tv/dalailamaliveenglish