མཚན་ཚོགས་ཁང་ལ་མེ་སྐྱོན།

གཟའ་ཉི་མའི་ཉིན་བྷར་ཛིལ་ནང་མཚན་ཚོགས་ཁང་ཞིག་ལ་མེ་ཤོར་ཏེ། མི་ ༢༣༣ ཙམ་རྐྱེན་ལམ་དུ་ཤོར་ཡོད་འདུག་ལ། དེ་ནི་འཛམ་གླིང་ལོ་རྒྱུས་ནང་མཚན་ཚོགས་དོན་རྐྱེན་ཚབ་ཆེས་ཤོས་ཤིག་ཆགས་ཡོད་འདུག

ཕྱི་ཚེས་ ༢༧ ཉིན་བྷར་ཛིལ་གྱི་ལྷོ་ཕྱོགས་སན་ཊ་མཱ་རེ་ཡ་(Santa Maria) གྲོང་ཁྱེར་ནང་མཚན་ཚོགས་སྤྲོད་སྐྱིད་ཁང་ཞིག་ལ་མེ་ཤོར་ཏེ། མི་ ༢༣༣ ཙམ་རྐྱེན་ལམ་དུ་ཤོར་ཡོད་ཅིང་། མི་ ༡༠༠ ལྷག་སྨན་ཁང་དུ་མྱུར་སྐྱོབ་བྱེད་བཞིན་ཡོད་འདུག་ལ། ཐེངས་འདིའི་མེ་སྐྱོན་འོག་རྐྱེན་འདས་སུ་གྱུར་པ་ཕལ་ཆེ་བ་ལོ་ ༡༦ ནས་ ༢༠ བར་ཡིན་པའི་གཞོན་སྐྱེས་རྐྱང་ཡིན་འདུག

མེ་སྐྱོན་དོན་རྐྱེན་དེ་བྱུང་འཕྲལ་བྷར་ཛིལ་སྲིད་འཛིན་ལྕམ་ཌེལ་མཱ་(Dilma Rousseff) ལགས་ཆཱི་ལི་(Chile) རུ་རྒྱལ་དོན་ཕྱོགས་སྐྱོད་བྱེད་བཞིན་པ་མཚམས་བཞག་སྟེ། ཕྱིར་ལོག་ནས་མེ་སྐྱོན་འོག་འདས་གྲོངས་སུ་གྱུར་པའི་ཕ་མ་ནང་མི་ཚོར་སེམས་གསོ་དང་། སྨན་ཁང་དུ་ཡོད་པའི་ནད་པ་རྣམས་ལ་གཟིགས་སྐོར་བྱེད་བཞིན་ཡོད་ཅིང་། ཁོང་གིས་ “བྷར་ཛིལ་མི་མང་དང་སན་ཊ་མཱ་རེ་ཡའི་མང་ཚོགས་ཚོར་བརྗོད་འདོད་པ་ནི། སེམས་སྐྱོ་བའི་གནས་ཚུལ་འདི་འདྲ་བྱུང་པའི་སྐབས་འདིར། ང་ཚོ་ཆིག་སྒྲིག་ཐོག་དཀའ་ངལ་ལས་གྲོལ་ཐུབ་པར་བྱ་དགོས” ཞེས་དང་། འདས་གྲོངས་སུ་གྱུར་པ་དག་གི་ནང་མི་དང་རྨས་སྐྱོན་ཕོག་མཁན་ཚོར་གཞུང་གིས་རོགས་འདེགས་གང་ཐུབ་གནང་རྒྱུའི་ཁས་ལེན་ཡང་བྱས་འདུག

ཚོད་དཔག་བྱས་པ་ལྟར་ན། མེ་ཤོར་སྐབས་མཚན་ཚོགས་སྤྲོ་སྐྱིད་ཁང་གི་ནང་དུ་མི་ ༣༠༠ ནས་ ༥༠༠ བར་ཡོད་འདུག་ལ། དེ་དག་མང་ཆེ་བ་ཉེ་ཁུལ་གྱི་སློབ་ཆེན་སློབ་མ་ཡིན་ཞིང་། མཚན་ཚོགས་ཁང་དེར་ཕྱིར་ཐོན་སའི་སྒོ་ཆེན་གཅིག་ལས་མེད་སྟབས། མི་མང་པོ་ཞིག་སྒོ་ཆེན་ནས་འཚང་ཁ་ཐེབས་ཏེ་ཤི་བ་དང་། མང་པོ་ཞིག་སྒོ་ཆེན་ནས་ཕྱིར་བྲོས་མ་ཐར་པར་དུ་བས་དབུགས་འཚུབ་པའི་རྐྱེན་གྱིས་འཆི་ལམ་དུ་ཤོར་ཡོད་འདུག

གསར་འགོད་པ། བནྡེ་སྐྱབས།