སྔར་ལོའི་རྐང་སྤོལ་དམར་གསོད་དོན་རྐྱེན་འབྲེལ་ཡོད་མི་སྣར་ཁྲིམས་ཆད་ཐད། ཨེ་ཇིབ་ནང་མི་མང་གིས་ཟིང་འཁྲུག་བསླངས་ཏེ་མི་ ༣༧ དམར་གསོད་ཐེབས་ཡོད་འདུག
དེ་རིང་ཕྱི་ཚེས་ ༢༨ ཉིན་ཨེ་ཇིབ་སྲིད་འཛིན་མོར་སེ་(Mohammed Morsi) ཡིས་ཐེངས་འདིའི་ཟིང་འཁྲུག་དོན་རྐྱེན་བྱུང་ཡུལ་པཱོར་ཊི་སའེ་ཌི་(Port Said) དང་སའུ་ཛེ་(Suez)། ཨི་སི་ལཱ་ལེ་ཡ(Ismalia) བཅས་ས་ཁུལ་གསུམ་གྱི་ནང་ཛ་དྲག་དམག་གི་བཀའ་ཁྱབ་བཏང་ཡོད་པ་རེད།
ཟླ་འདིའི་ཕྱི་ཚེས་ ༢༦ ཉིན་ཨེ་ཇིབ་ཀྱི་པཱོར་ཊི་སའེ་ཌི་གྲོང་ཁྱེར་ཁྲིམས་ཁང་ཞིག་གིས། སྔ་ལོའི་ཕྱི་ཟླ་ ༢ པའི་ནང་རྒྱལ་ཡོངས་རྐང་སྤོལ་རྩེད་འགྲན་སྐབས་ཟིང་འཁྲུག་དོན་རྐྱེན་འོག་མི་ ༧༤ རྐྱེན་ལམ་དུ་ཤོར་པའི་ཉེས་དོན་དང་འབྲེལ་བའི་ལག་དམར་བ་མི་ ༢༡ ལ་ཚེ་བཙོན་གྱི་ཁྲིམས་ཐག་བཅད་སྐབས། དེ་སྔའི་དོན་རྐྱེན་འོག་འདས་གྲོངས་ཕྱིན་པའི་ཉེ་འབྲེལ་དང་ཤོག་གཏོགས་པ་མང་པོ་པཱོར་ཊི་སའེ་ཌི་གྲོང་ཁྱེར་ནང་འཛོམས་ཏེ། ཉེས་ཅན་དེ་དག་ཡོད་སའི་བཙོན་ཁང་དང་ཉེན་རྟོག་ཁང་། གཞུང་གི་ལས་ཁུངས་སོགས་ལ་གཏོར་རྒོལ་བྱས་སྐབས། ཉེན་རྟོག་དམག་དང་མི་མང་བར་འཁྲུག་རྩོད་ཤོར་ཏེ། ངོ་རྒོལ་བ་དང་ཉེན་རྟོག་དམག་མི་ ༣༧ ཙམ་རྐྱེན་ལམ་དུ་ཤོར་ཡོད་ཅིང་། བརྒྱ་ཕྲག་ལྷག་ལ་རྨས་སྐྱོན་བཟོས་ཡོད་འདུག
གཟའ་ཉི་མའི་ཉིན་པཱོར་ཊི་སའེ་ཌི་དང་སའུ་ཛེ། ཨི་སི་མཱ་ལེ་ཡ། རྒྱལ་ས་ཀེ་རོ་སོགས་ཀྱི་ནང་མི་མང་སྟོང་ཕྲག་མང་པོ་འདུ་འཛོམས་ཀྱིས། ཕྱི་ཚེས་ ༢༦ ཉིན་གྱི་དོན་རྐྱེན་འོག་འདས་གྲོངས་ཕྱིན་པ་རྣམས་ལ་མྱ་ངན་དང་། སྲིད་འཛིན་མོར་སེ་དང་ཁོང་གི་སྲིད་ཇུས་ལ་ངོ་རྒོལ་ལས་འགུལ་ཤུགས་ཆེར་སྤེལ་སྟབས། གོང་གི་གྲོང་ཁྱེར་གསུམ་དང་དེ་དག་གི་ས་གནས་ཁག་ནང་ཛ་དྲག་དམག་གི་བཀའ་ཁྱབ་བཏང་སྟེ། ཟིང་འཁྲུག་གི་མགོ་གནོན་ཐབས་བྱེད་ཀྱི་ཡོད་འདུག
ཆབ་སྲིད་དཔྱད་བརྗོད་པ་ཚོས། ཐེངས་འདིའི་དོན་རྐྱེན་ནི་གཙོ་བོ་མི་མང་གིས་ད་ལྟའི་སྲིད་འཛིན་མོར་སེ་ཡི་སྤྱི་ཚོགས་དང་ཆབ་སྲིད་བཅོས་སྒྱུར་ལ་འདོད་བློ་མ་ཁེངས་པ་དང་། ལྷག་པར་དུ་ཉེ་ཆར་གཏན་འབེབས་བྱས་པའི་རྩ་ཁྲིམས་བསྐྱར་བཅོས་ཟིན་བྲིས་ནི་སྲིད་འཛིན་གྱི་དབང་ཤུགས་དང་། ཁ་ཆེ་ཆོས་ལུགས་པའི་སྟོབས་ཤུགས་རྒྱ་སྐྱེད་ཐོག གུ་ཡངས་རིང་ལུགས་པ་དང་ཡེ་ཤུ་ཆོས་ལུགས། ཆོས་མེད་རིང་ལུགས་པའི་ཐོབ་ཐང་བཅས་འདྲ་མཉམ་མེད་པའི་ངོ་རྒོལ་ཤུགས་རྐྱེན་ཆགས་ཡོད་པར་བརྗོད་ཀྱི་ཡོད་འདུག
གསར་འགོད་པ། བནྡེ་སྐྱབས།
