ཉེ་ཆར་རྒྱ་གཞུང་གིས་རང་བསྲེགས་ངོ་རྒོལ་ལ་བརྒྱུད་སྐུལ་གྱི་ཉེས་འཛུགས་འོག རེབ་གོང་དུ་བོད་མི་ ༧༠ འཇུ་བཟུང་བྱས་པའི་ཁྲོད་བོད་མི་ ༡༢ ལ་ཁྲིམས་ཐག་གཅོད་གཏན་ཁེལ་ཡོད་འདུག
ཟླ་འདིའི་ཕྱི་ཚེས་ ༧ ཉིན་རྒྱ་གཞུང་ཞིན་ཧྭ་གསར་ཁང་གིས་གནས་ཚུལ་སྤེལ་བའི་ནང་། མཚོ་སྔོན་གྱི་ཉེན་རྟོག་སྡེ་ཁག་གིས་བོད་མདོ་སྨད་རེབ་གོང་ཁུལ་གྱི་མེར་བསྲེགས་ངོ་རྒོལ་ལ་བརྒྱུད་སྐུལ་བྱས་པའི་ཉེས་མིང་འོག བོད་མི་ ༧༠ འཇུ་བཟུང་བཀག་ཉར་བྱས་ཡོད་པ་དང་། དེའི་ཁྲོད་མི་ ༥༢ ལ་དྲག་སྡོམ་འདྲི་གཅོད་དངོས་སུ་ལག་བསྟར་དང་། མི་ ༡༢ དངོས་སུ་འཛིན་བཟུང་ཁྲིམས་གཅོད་བྱ་གཏན་ཁེལ་ཡོད་སྐོར་བསྒྲགས་ཡོད་པ་མ་ཟད། འཕགས་པ་དང་སྒྲོལ་མ་སྐྱབས་གཉིས་ལ་ཆེད་དུ་མི་དམར་གསོད་བཏང་བའི་ཉེས་འཛུགས་བྱས་ཡོད་འདུག
རྒྱ་གཞུང་གི་གནས་ཚུལ་དེའི་ནང་། འཇུ་བཟུང་བཀག་ཉར་བྱས་ཡོད་པའི་བོད་མི་དེ་དག་ནི། སྔར་ལོའི་ཕྱི་ཟླ་ ༡༡ ཚེས་ ༨ ཉིན་སྒྲོལ་མ་ཐང་ཆེན་དུ་རང་ལུས་མེར་བསྲེགས་གནང་མཁན་རྒྱལ་གཅེས་དཔའ་བོ་སྐལ་བཟང་སྦྱིན་པ་དང་། ཕྱི་ཟླ་ ༡༡ ཚེས་ ༡༧ ཉིན་རེབ་གོང་གྲོང་རྡལ་གྱི་དགའ་བདེ་ཁྲོམ་རའི་བྱང་སྒོའི་ཁ་གཏད་སྲང་ལམ་དུ་རང་ལུས་མེར་བསྲེགས་གནང་མཁན་རྒྱལ་གཅེས་དཔའ་མོ་ལྕགས་མོ་སྐྱིད། ཕྱི་ཟླ་ ༡༡ ཚེས་ ༡༥ ཉིན་རེབ་གོང་བཙན་མོ་མགོ་སྡེ་བའི་འདུ་ཁང་ཆོས་རྭའི་ནང་རང་ལུས་མེར་བསྲེགས་གནང་མཁན་རྒྱལ་གཅེས་དཔའ་མོ་ཏང་འཛིན་སྒྲོལ་མ་བཅས་ཀྱི་རང་བསྲེགས་ངོ་རྒོལ་དང་འབྲེལ་བ་ཡོད་ལུགས་བརྗོད་པ་མ་ཟད། རྒྱལ་གཅེས་དཔའ་བོ་དཔའ་མོ་དེ་དག་གི་ཀུན་སྤྱོད་ལ་སྒྲོ་འདོགས་དམའ་འབེབས་སོགས་བྱས་ཏེ། མི་སྒེར་གྱི་འཚོ་བའི་དཀའ་ངལ་དང་བཟའ་ཚང་འགྲིག་མཐུན་མ་ཡོང་པ་སོགས་ལ་བརྟེན་ནས་རང་བསྲེགས་བྱས་པ་ཡིན་སྐོར་རྫུན་སྒྲོག་བྱས་ཡོད་པ་རེད།
རྨ་ལྷོ་ཁུལ་ཉེན་རྟོག་ཁང་གི་མགོ་གཙོ་གཞོན་པ་ཝང་ཧུའུ་ཁྲིན་གྱིས། ༢༠༡༢ ཕྱི་ཟླ་ ༦ ནང་འཕགས་པ་རེབ་གོང་ཐུན་རིན་རྫོང་གི་ཁྲིམས་མཐུན་མིན་པའི་༼གངས་ལྗོངས་སྲོལ་རྒྱུན་རིག་གནས་ཞབས་ཞུ་ཚོགས་པ༽ནང་འཛུལ་ཞུགས་བྱས་ཡོད་པ་མ་ཟད། ཐེངས་མང་པོར་ཚོགས་པ་དེའི་སྐུ་ཚབ་བྱས་ཏེ་རང་ལུས་མེར་བསྲེགས་གཏོང་མཁན་ཚོའི་སྐུ་ཕུང་ཞུགས་འབུལ་ཐོག་སྐུལ་སློང་གཏམ་བཤད་དང་། ཕྱི་ཟླ་ ༡༡ ཚེས་ ༨ ཉིན་ཁོས་དགེ་རྒན་གྱི་ཐོབ་ཐང་བེད་སྤྱད་དེ། ཐུན་རིན་རྫོང་མདོ་བ་ཞང་གི་སློབ་ཕྲུག་ ༥༠ དང་ས་གནས་ཡུལ་མི་བཅས་མདོ་བ་ཞང་སྲིད་གཞུང་གི་སྒོ་ཁར་འདུ་འཛོམས་བྱེད་བཅུག་སྟེ། བོད་རང་བཙན་གྱི་སྐད་འབོད་བྱས་ཡོད་སྐོར་དང་། དེ་བཞིན། ཕྱི་ཟླ་ ༡༡ ཚེས་ ༡༩ ཉིན་སྒྲོལ་མ་སྐྱབས་ཀྱིས་རྡོ་སྣུམ་དང་སྲིང་བལ། ཙིག་སྨན་སོགས་གྲ་སྒྲིག་གིས་རང་བསྲེགས་གཏོང་རྩིས་བྱས་སྐབས། ནང་མིས་ཤེས་རྟོག་བྱུང་སྟེ་བཀག་འགོག་བྱས་མཐར་མེར་བསྲེགས་གཏོང་ཐུབ་མེད་ཚུལ་བརྗོད་འདུག
ཉེ་སྔོན་རེབ་གོང་ཁུལ་དུ་རང་བསྲེགས་ངོ་རྒོལ་རིམ་པར་བྱུང་བའི་རྗེས། མཚོ་སྔོན་ཞིང་ཆེན་ཉེན་རྟོག་ཁང་གིས་རྨ་ལྷོ་ཁུལ་དུ། ཞིང་ཆེན་རིམ་པའི་མེར་བསྲེགས་གྱོད་དོན་ཚོགས་ཆུང་ཞིག་ཆེད་འཛུགས་བྱས་ཡོད་པ་དང་། ཚོགས་ཆུང་དེའི་མགོ་གཙོའི་འགན་ནི་མཚོ་སྔོན་ཞིང་ཆེན་ཉེན་རྟོག་ཁང་གི་མགོ་གཙོ་གཞོན་པ་ལུའུ་པིན་ཆཱན་ཁུར་ཡོད་འདུག
གསར་འགོད་པ། ཚེ་རིང་རྒྱལ།
