གནས་ཚུལ་འབྱོར་གསལ་ལ། ད་ལོའི་ལོ་གསར་ཚེས་གཅིག་ཉིན་བོད་ཀྱི་རྒྱལ་ས་ལྷ་སའི་གྲོང་ཁྱེར་གྱི་ས་ཚིགས་ཁག་ཏུ་དམག་མི་དང་ཉེན་རྟོག་པ་ཕོན་ཆེན་འགྲེམས་འཇོག་གིས་དམ་དྲག་ཤུགས་ཆེན་བྱེད་བཞིན་ཡོད་པ་དང་། ལྷག་པར་དུ་གཙུག་ལག་ཁང་དང་ར་མོ་ཆེའི་སྟེང་འོག་བར་གསུམ་དུ་གོ་མཚོན་དང་དྲག་ཆས་སྣ་ཚོགས་ཐོགས་པའི་དཔུང་དམག་གིས་མི་མང་ཚོར་སུན་གཙེར་དང་འཇིགས་སྣང་སྐུལ་གྱི་ཡོད་འདུག
༢༠༠༨ ལོའི་གོང་དུ་ལྷ་སའི་གཙུག་ལག་ཁང་དང་ར་མོ་ཆེ་སོགས་ལོ་གསར་གནམ་གང་དགོང་མོའི་ཆུ་ཚོད་ ༡༠ པ་ནས་ཚེས་གཅིག་ཉིན་གྱི་ཕྱི་དྲོ་མཆོད་མཇལ་པ་མ་རྫོགས་བར་སྒོ་རྒྱག་པའི་ལུགས་སྲོལ་མེད་ཀྱང་། ད་ལོར་གཙུག་ལག་ཁང་དང་ར་མོ་ཆེ་སོགས་གནམ་གང་ཉིན་གྱི་དགོང་དྲོའི་ཆུ་ཚོད་ ༩ པ་ནས་སྒོ་ཕྱེས་ཏེ་ཚེས་གཅིག་ཉིན་གྱི་ཉིན་རྒྱབ་ཆུ་ཚོད་ ༣ ཙམ་ལ་མཆོད་མཇལ་བ་མ་རྫོགས་སྔོན་ལ་སྒོ་བརྒྱབ་ཡོད་པ་དང་། མི་མང་པོ་ཞིག་ལ་མཆོད་མཇལ་གྱི་གོ་སྐབས་མ་རག་སྟབས་བློ་ཕམ་ཆེན་པོ་བྱེད་ཀྱི་ཡོད་འདུག
གནས་ཚུལ་ནང་བསྟན་དོན། “ དེང་སྐབས་བོད་ཀྱི་ལྷ་སའི་གཙུག་ལག་ཁང་གཙོ་བྱས་ཏེ་ལྷ་སའི་འདུ་ཁང་ཁག་གི་དབང་ཆ་ཡོངས་རྫོགས་རྒྱ་གཞུང་གི་ལས་བྱེད་དང་དམག་མིའི་སྟངས་འཛིན་འོག་བཅུག་ཡོད་པའི་དབང་གིས་དགོན་པའི་གྲྭ་བ་རྣམས་ལ་ཆོས་ཕྱོགས་ཀྱི་མཛད་སྒོ་སྤེལ་བའི་དབང་ཆ་གཅིག་ཀྱང་མེད་པ་མ་ཟད་ཐ་ན་འགྲོ་འདུག་སྤྱོད་གསུམ་ཡང་གཞན་དབང་དུ་གྱུར་ཡོད་པ་རེད”ཅེས་བཀོད་འདུག
