མ་བུ་གཉིས་ཊེན་ཌ་སྨན་ཁང་དུ་བསྐྱལ་འདུག

ཁ་སང་ཕྱི་ཚེས་ ༤ ཉིན་གྱི་ཕྱི་དྲོ་ ༥།༠༠ ཡས་མས་སུ་བཞུགས་སྒར་ངྷ་རམ་ས་ལའི་ཡོངས་གླིང་སློབ་གྲྭའི་འཛིན་གྲྭ་གྲོལ་ཏེ། ཁྱིམ་བདག་ཚོས་རང་རང་གི་ཕྲུ་གུ་རང་ཁྱིམ་འཁྲིད་ཡོང་སྐབས། རླངས་འཁོར་འབབ་ཚིགས་ཀྱི་ཁང་བརྩེགས་བཞི་བའི་ཟ་ཁང་ (Xcite) ཞིག་གསོ་བྱེད་བཞིན་པའི་ཁང་པའི་རྩིག་གྱང་མར་ཟགས་ཏེ། མིང་ལ་སྒྲོལ་མ་འབོད་པའི་བུད་མེད་ཅིག་དང་ཁོང་གི་བུ་མོ་བསྟན་འཛིན་པདྨ་གཉིས་ལ་ཕོག་ཡོད་འདུག་ལ། ཕྱིས་སུ་དེར་ཡོད་མི་མང་གིས་རོགས་རམ་འོག་ཛོ་ནཱ་དང་ཊེན་ཌ་སྨན་ཁང་བཅས་སུ་འཁྲིད་དེ་མྱུར་སྐྱོབ་སྨན་བཅོས་བྱས་རྗེས་སྲོག་ཉེན་ལས་མཐར་ཡོད་འདུག  

 འདིའི་ཐད་གསར་འགོད་པས་ཁ་སང་གནས་ཚུལ་དངོས་མཐོང་མཁན་ཨ་བརྟན་རྒྱལ་ལགས་སུ་སྐད་ཆ་དྲིས་པར་ཁོང་གིས། “ ངས་ནམ་རྒྱུན་ཁང་བརྩེགས་དེའི་འོག་ཏུ་བག་ལེབ་བཙོང་གི་ཡོད། ཁ་སང་ཞོགས་པ་ནས་ཁང་པའི་འོག་ཏུ་རྡེའུ་ ཟགས་ཡོང་གི་འདུག སྐབས་དེར་ངའི་རོགས་པས་བཤད་རོགས་ཞེས་ང་ལ་སྐུལ་སོང་མོད་ངས་བཤད་ཐུབ་མ་སོང་། ཁ་སང་ཕྱི་དྲོ་སློབ་གྲྭ་གྲོལ་རྗེས་ང་ཚོས་རང་རང་གི་ཕྲུ་གུ་བླངས་ཏེ་ཁོང་མ་བུ་གཉིས་དང་ང་ཚོ་སྔ་གཞུག་བྱས་ཏེ་ཡོང་གི་ཡོད། རླངས་འཁོར་འབབ་ཚིགས་སུ་བསླེབས་སྐབས་ཁོང་མ་བུ་གཉིས་ཀྱིས་བྱིས་པར་ཟ་རྒྱུ་ཞིག་ཉོས་ཏེ་ངའི་རྗེས་ལུས་སོང་། སྐབས་དེར་ངས་བྱིས་པ་གཞན་ལ་བསྐུར་ཏེ་ཕྱིར་བག་ལེབ་བཙོང་སར་ཡོང་སྐབས། ཁང་པའི་རྩིག་གྱང་མར་ལྷུང་སྟེ་ཁོང་མ་བུ་གཉིས་སར་འགྱེལ་འདུག དེ་མ་ཐག་ཉེ་འཁོར་དུ་ཡོད་པའི་བོད་མི་ཚོས་མཉམ་རུབ་ཐོག་ཟུར་དུ་བླངས་རྗེས་ང་ཁོང་གི་ཤ་ཉེ་འབོད་དུ་སོང་བ་ཡིན་ལ། ངའི་གྲོགས་པོས་བདེ་དོན་ལས་ཁུངས་ལ་གནས་ཚུལ་ཡར་ཞུ་བྱས་འདུག རྗེས་སུ་བོད་མི་ཁག་ཅིག་དང་བདེ་དོན་སྐུ་ངོ་བཅས་ཀྱི་རོཊ་རམ་འོག་བདེ་ལེགས་སྨན་ཁང་དང་དེ་ནས་ཛོ་ནོལ་ (Zonal Hospital) འཁྲིད་འདུག དེའི་རྗེས་ཀཱང་ར་ཊེན་ཌ་སྨན་ཁང་དུ་ (TanDa Hospital) འཁྲིད་འདུག དེ་རིང་ང་དང་གྲོགས་པོ་གཉིས་སྨན་ཁང་དུ་ལྟ་རུ་འགྲོ་སྐབས་གློག་པར་གསུམ་པ་དེ་བསླེབས་འདུག་ལ།  སྨན་པས་ཀྱང་ཨ་མའི་སྲོག་ལ་ཉེན་ཁ་མི་འདུག་ལབ་སོང་། བུ་མོ་དངངས་སྐྲག་སྐྱེས་ཏེ་ངུ་ངག་བཏོན་ཡོད་པ་ལས། དམིགས་བསལ་རྨས་སྐྱོན་ཅི་ཡང་བཟོས་མི་འདུག ” ཅེས་བརྗོད་བྱུང་།

ཡང་གསར་འགོད་པས་ས་གནས་མགོ་འཛིན་བསོད་ནམས་རྡོ་རྗེ་ལགས་སུ་གནས་ཚུལ་ཇི་ལྟར་ཐག་གཅོད་བྱ་འཆར་ཡོད་མེད་དྲིས་པར་ཁོང་གིས།  “ ཁ་སང་གནས་ཚུལ་བྱུང་རྗེས་བདེ་དོན་ལས་ཁུངས་དང་ས་གནས་བུད་མེད། བཞུགས་སྒར་ཁུལ་བོད་མི་ཁག་ཅིག་གིས་རོགས་རམ་འོག  སྒྲོལ་མ་སྲོག་ཉེན་ལས་མཐར་ཐུབ་པ་བྱུང་སོང་ལ། ད་ཆར་ལག་པའི་དཔུང་པ་གཉིས་ལ་རྨས་སྐྱོན་ཚབས་ཆེན་ཕོག་ཡོད་པ་ལས། སྨན་པས་ཀླད་པར་དམིགས་བསལ་གྱི་སྐྱོན་བྱུང་མི་འདུག་ལབ་སོང་། ཕོ་མོ་བསྟན་འཛིན་པདྨར་རྨས་སྐྱོན་སོགས་ཅི་ཡང་བྱུང་མི་འདུག ཁ་སང་གནས་ཚུལ་བྱུང་རྗེས། གངས་ལྗོངས་འགྲིམ་འགྲུལ་ལས་ཁུངས་ཀྱི་འགན་འཛིན་ཟླ་བ་ལགས་དང་བདེ་དོན་གྱི་ལས་བྱེད་བཅས་ཀྱིས་ཉེན་རྟོག་པར་གནས་ཚུལ་ཡར་ཞུ་བྱས་ཡོད་པ་མ་ཟད། གནས་ཚུལ་བྱུང་ཡུལ་ལ་པར་བརྒྱབ་པ་དང་ཅ་དངོས་ཁག་ཅིག་ཉེན་རྟོག་པར་རྩིས་སྤྲོད་བཅས་བྱས་ཏེ་ཉེན་རྟོག་པས་གནས་ཚུལ་ཡར་ཞུ་བྱས་འདུག  ང་ཚོའི་ངོས་ནས་གནས་ཚུལ་འདི་ཁྲིམས་ཁང་ལ་བསྐྱལ་རྒྱུའི་འཆར་གཞི་ཡོད། ཡིན་ནའང་། དེ་རིང་ཉིན་གུང་ཟ་ཁང་སྦྱིན་བདག་དང་ནང་མི་ཁག་ཅིག་སྨན་ཁང་དུ་བསླེབས་ཏེ་དགོངས་དག་ཞུས་སོང་བ་མ་ཟད། དངུལ་ཏོག་ཙམ་འཁུར་འདུག་མོད། ང་ཚོས་དངུལ་བླངས་མེད།  སང་ཉིན་ཕྱི་དྲོ་ང་ཚོས་སྒྲོལ་མའི་ཁྱིམ་མི་དང་ཟ་ཁང་སྦྱིན་བདག་ཚང་མ་མཉམ་འཛོམས་ཐོག གནས་ཚུལ་ཅི་ལྟར་ཐག་གཅོད་བྱ་མིན་ཐོག་གྲོས་བསྡུར་བྱ་འཆར་ཡོད། ”ཅེས་བརྗོད་བྱུང་།

གསར་འགོད་པ། དོན་གོ