ང་རང་བལ་ཡུལ་ནས་བཙོན་གྲོལ་ཐོབ་སྟེ་བདེ་ཐང་ངང་རྡ་ས་མེག་ལོར་དུ་འབྱོར་བའི་ཉིན་རྗེས་མ་དེར། བོད་མི་རིགས་ཀྱི་འདི་ཕྱི་གཉིས་ཀྱི་༧སྐྱབས་གནས། ཚེ་རབས་ལས་ཀྱི་༧མགོན་པོ་༧གོང་ས་ལྷ་མིའི་རྣམ་འདྲེན་མཆོག་ལ་གཟིམ་ཆུང་མཇལ་ཁ་ཞུས། ངའི་བལ་ཡུལ་བཙོན་ཁང་ཟླ་ཤས་རིང་ཞི་བའི་ངག་བཅད་བྱས་པའི་ངག་སྒོ་ཕྱེས་ཏེ་མགོན་པོ་མཆོག་ལ་རང་གི་ཞི་བའི་འཐབ་རྩོད་ཀྱི་བརྒྱུད་རིམ་རོབ་ཙམ་ཞུས། ནང་དུ་ལོག་རྗེས་དྲིན་ཆེན་ཕ་མ་གཉིས་ལ་མི་རིང་ཞི་བའི་གོམ་བགྲོད་ཐེངས་གཉིས་པ་བརྒྱུད་བོད་དུ་བསྐྱོད་རྒྱུའི་སྐོར་ཞུས། དྲིན་མ་ལོ་མཆོག་གིས་མིག་ཆུ་ཆུ་མིག་བརྡོལ་བརྡོལ་བཞུར་བཞིན་{ཁྱོད་རང་གིས་མུ་མཐུད་ཞི་བའི་གོམ་བགྲོད་བྱེད་རྒྱུ་ཡིན་ཚེ། མ་རྒན་ང་ཡང་མཉམ་དུ་ཁྲིད་རོགས་}གསུང་ནས་འབོད་སྐུལ་ཞུས་དུས། ངས་རང་ཉིད་ཀྱིས་ཞི་བའི་གོམ་བགྲོད་ཐེངས་གཉིས་པའི་ནང་དུ་སྐྱེ་བོ་སུ་ཞིག་མཉམ་ཞུགས་བྱེད་བློ་ཡོད་ཀྱང་། དགག་བྱ་བྱེད་ཀྱི་མེད་མོད། གཙོ་བོ་དེ་ནི་ཞི་བའི་གོམ་བགྲོད་འདིའི་མགོ་ནས་མཇུག་བར་དུ་སྐྱེལ་བློ་ཡོད་མཁན་གྱི་སྐྱེ་བོ་སུ་ཞིག་ཡོད་ན་དེ་ཡི་ཐད་དུ་ལོ་གྲངས་ཚད་བཀག་ཞིག་བཟོས་ཡོད་པ་དེར་ཕ་མ་གཉིས་ཀྱིས་ཀྱང་བརྩི་སྲུང་བྱེད་དགོས་པ་དང་མ་བྱས་པ་ཡིན་ན་ཡག་པོ་མེད་ཚུལ་རྒྱུ་མཚན་དང་བཅས་ཞུས་རྗེས་སུ། ཕ་མ་གཉིས་ཀྱིས་{ཁྱོད་རང་གིས་དེ་འདྲའི་སེམས་ཐག་ཞིག་བཅད་ཚར་ཡོད་ཚེ། ངེད་རྒན་རྒོན་གཉིས་ཀྱིས་ཁྱོད་རང་གི་བསམ་ཚུལ་དེར་སྔ་མོ་ཡང་རྒྱབ་སྐྱོར་བྱས་པ་ཡིན་ལ་ད་རེས་ཀྱང་རྒྱབ་སྐྱོར་ལོས་བྱེད་ཀྱང་}ཟེར་ནས་གསུངས་པ་དང་། དྲིན་མ་ལོས་བདག་ལ་ཡང་བསྐྱར་དུ་ཞི་བའི་གོམ་བགྲོད་ལ་མགོ་ནས་མཇུག་བར་དུ་མཉམ་ཞུགས་བྱེད་དུ་བཅུགས་རོགས་ཟེར་ནས་ཞུ་བ་བྱས་ཀྱང་ངས་དེར་ངེས་ལེན་བྱེད་ཐུབ་མེད་པའི་ཐ་ཚིག་བསྒྲགས་པ་ཡིན།
དེ་ནས་བཟུང་ཉི་མ་འདི་དག་གི་རིང་དུ་དྲིན་མ་ལོའི་སེམས་ཁོང་དུ་མཆི་མས་བཀང་བ་དང་མཚན་མོའི་གཉིད་ཀྱང་ཡག་པོ་མི་ཁུགས་པར་མིག་གཉིས་རིག་རིག་གིས་གང་ཞིག་ལ་བསམ་བློ་སྣ་ཚོགས་ཤིག་གཏོང་གི་འདུག་པ་ང་རང་གིས་ངོས་སུ་མཐོང་ནའང་། ངས་རང་ཉིད་ཀྱི་དྲིན་ཅན་ཕ་མ་གཉིས་ཀྱི་ཚེ་མཇུག་ས་མཐའ་ཞིག་ནས་འདི་ལྟར་བསྐྱེལ་དགོས་བྱུང་བའི་བརྒྱུད་རིམ་ལ་སེམས་པ་སྐྱོ་ནའང་། རང་ཉིད་ཀྱིས་བོད་མི་རིགས་ཀྱི་བདེན་དོན་མཐའ་སེལ་བའི་ཆེད་དང་། ༧གོང་ས་མཆོག་བོད་དུ་གདན་འདྲེན་བྱེད་ཆེད་དུ་བཞག་པའི་དམ་བཅའ་དང་བློས་གཏོང་ལ་འགྱུར་བ་རྩ་ནས་གཏོང་ཐབས་བྲལ་བའི་འགན་རང་ཉིད་ལས་གཞན་སུ་ལའང་ལེ་བདའ་བྱེད་ས་མེད་པའི་ཆོད་སེམས་འགྱུར་བ་གཏན་ནས་མ་སོང་མོད། འཇིག་རྟེན་འདིའི་སྟེང་གི་བྱམས་བརྩེ་ལྡན་པའི་མ་ལོ་ཞིག་གི་རང་ཉིད་ཀྱི་བུ་མི་རིང་བར་གསོན་པ་ལས་འཆི་བའི་ལམ་ཁར་སྙེགས་བཞིན་པའི་ངང་ཚུལ་འདིའི་སྐྱོ་སྣང་ལ་སེམས་བསམ་པའི་ལྟ་ཤེས་མཁན་ཉུང་བའི་སྤྱི་ཚོགས་འདི་ལས། ངས་རང་གི་དྲིན་ཆེན་མ་ལོར་ང་ལྟ་བུའི་ཕ་མ་གཉིས་ལ་སྲི་ཞུ་བྱེད་མ་ཐུབ་པའི་བུ་ཁྲེལ་མེད་ཅིག་བྱུང་བ་དེར་དགོངས་དག་མི་ཞུ་ཐབས་མེད་དུ་གྱུར་སོང་།
དྲིན་ཕ་ལོ་ནི་སྐྱེ་བ་ཕོ་ཡི་རང་ཚུགས་ལྡན་ཞིང་སྡུག་གཏམ་མང་བོ་དང་མིག་ཆུ་འདོན་པར་མི་དགའ་ཡང་། རང་གི་གཅེས་ཕྲུག་ཞིག་དེ་ལྟར་སོང་ནས་ཡང་བསྐྱར་འདི་ལྟར་འགྲོ་བ་ལ་སེམས་ཀྱིས་བཟོད་དུ་མེད་པ་མིག་གིས་མཐོང་ཞིང་སེམས་པའི་ཤེས་ནའང་། ངས་རང་ཉིད་ཀྱི་ཕ་རྒན་ལ་{ཁྱོད་རང་ད་ལྟ་གཟུགས་པོའི་གནས་སྟངས་ཀྱང་ཡག་པོ་མེད་པ་དང་། ན་ནིང་ང་སོང་ཤུལ་ནས་སེམས་ཁྲལ་གྱིས་ན་བ་དེ་ད་དུང་ཡང་དྲགས་བསྐྱེད་བྱུང་མེད་དུས། ཞི་བའི་གོམ་བགྲོད་འདི་ལ་མཉམ་ཞུགས་མ་བྱས་ན་བཟང་རབས་}ཞུས་ཀྱང་། ཕ་རྒན་གྱིས་{སྐྱོན་མེད། ང་ཉི་མ་ཁ་ཤས་ཤིག་ལ་མཉམ་ཞུགས་བྱས་པ་དེས་ང་རང་ཤི་མི་ཡོང་། སོ་སོའི་སྡིག་སྒྲིབ་དག་སྲིད་ལ། བོད་མི་རིགས་དང་༧གོང་ས་མཆོག་གི་སྐུ་ཚེ་བརྟན་པའི་ཞབས་འདེགས་ཕྲན་བུ་ཞིག་དུ་བུད་སོང་བ་ཡིན་ན། དེ་གས་ངའི་ཡིད་ཚིམས་པ་ཡིན་}ཞེས་བློ་ཐག་བཅད་སྟབས། ངས་རང་གི་ཕ་མ་གཉིས་ཉིན་བདུན་རིང་དུ་ཞི་བའི་གོམ་བགྲོད་ཐེངས་གཉིས་པར་ཞུགས་ཆོག་རྒྱུར་ཁས་ལེན་བྱས་པ་ཡིན།
མི་རིགས་ཤིག་གི་བདེན་དོན་ཆེད་དུ་ངས་ཡོད་ཚད་བློས་བཏང་ཟིན་པ་ཁོང་རྒན་རྒོན་གཉིས་ཀྱིས་རྣ་བའི་ཐོས་ཤིང་། སེམས་པའི་ཤེས་དུས་{ཁྱོད་ཀྱིས་རང་ཉིད་བསམ་ནས་འགྲོ་བཞིན་མེད་པ་དང་། རང་གི་མི་རིགས་དང་༧གོང་ས་མཆོག་གི་བཀའ་དགོངས་ལས་མ་འགལ་བར་ཞི་བའི་འཐབ་རྩོད་བྱེད་ཀྱི་ཡོད་པ་དེར་ངེད་རྒན་རྒོན་གཉིས་ཀྱི་སེམས་བདེ་ནི་ཡིན་}གསུངས་ཀྱང་། འགྲོ་བའི་ཁ་ཐག་ཉེ་རུ་སོང་བ་དང་རླུང་འཚུབ་ལྟ་བའི་མྱི་ཁ་དང་འཕྱ་དམོད། ཟུར་ཟ་སོགས་ཕྱོགས་གང་ས་ནས་ཁུར་འོང་དེ། ཁོང་རྒན་རྒོན་གཉིས་ཀྱིས་སེམས་ནང་དུ་བློ་འཚབ་སྔར་ལས་ཀྱང་ཤུགས་ཆེན་པོ་ཞིག་ཡོང་གི་ཡོད་པ་དང་། སེམས་པའི་ན་ཟུག་ཡང་ཆེ་ནས་ཆེ་རུ་འགྲོ་བཞིན་ཡོད་པའི་ནང་སེམས་ཀྱི་དཀའ་ངལ་ལ་ལག་པ་སྙོབ་ཐུབ་མཁན་གྱི་མི་སུ་ཡང་ཁོང་རྒན་རྒོན་གཉིས་ཀྱི་འཁྲིས་སུ་མེད་པའི་སྐབས་འདིར། ངས་ཁོང་རྒན་རྒོན་གཉིས་ལ་{གལ་སྲིད་ས་གང་ཞིག་ནས་སྟབས་མ་ལེགས་པ་དེ་འདྲ་ངའི་སྒང་ལ་བྱུང་ན་ཁྱོད་གཉིས་ཀྱི་ངའི་ཆེད་དུ་སེམས་ཁྲལ་བྱེད་པ་ལས་ཕན་སེམས་ཀྱི་བསམ་བློ་གོང་དུ་འཕེལ་བའི་ཆེད་དུ་ལས་ཀ་རེ་བྱེད་ཐུབ་སོང་བ་ཡིན་ན། བུ་ང་ལ་ཤ་ཚ་བ་ཡིན་ལ་ངས་ཀྱང་སྐྱེ་བ་དུ་མར་ཁྱེད་ཕ་མ་གཉིས་ཀྱི་གཙོ་བའི་མིའི་རིགས་ལ་ཕན་ཐོགས་པའི་སྐྱེ་བ་ཞིག་ལེན་ཐུབ་རྒྱུར་སྨོན་ལམ་རྒྱག་ཀྱི་ཡིན་}ཟེར་ནས་ཞུས་དུས། ཨ་མས་{ཡ་ཡ་}གསུངས་པ་ལས་ཕ་རྒན་གྱིས་ངག་ཡང་མི་གྲོལ་བར་མགོ་བོ་ནང་དུ་བཀུག་སོང་།
ནུ་མོ་ལྷ་མོ་སྐྱིད་ཀྱིས་ཀྱང་རང་གི་བརྩེ་བའི་ཕུ་བོ་སླར་ཡང་བཟོད་དུ་མེད་པའི་ལམ་ཕྲན་དེར་འགྲོ་རྒྱུ་ཡིན་པ་ཐོས་པ་དེ་ནས་བཟུང་། ཕུ་བོ་ང་ལ་དེ་ཡི་སྐོར་གྱི་སྐད་ཆ་གང་ཡང་གླེང་མི་ཕོད་པར་ཕྱིར་སློབ་གྲྭར་འགྲོ་རོགས་བར་དུ་ང་གང་དུ་སོང་ན་དེ་རུ་རྗེས་འདེད་བཏང་ནས་འོང་བ་ལས་གཞན་གང་ཡང་བཤད་མ་ཤེས་པར་སེམས་ཀྱི་སྐྱོ་སྣང་དྲག་པོ་ཞིག་ཁུར་ནས་ཕྱིར་སློབ་གྲྭར་སོང་ནའང་། ཕལ་ཆེར་ཉི་མ་རེ་ལ་ཁ་པར་རེ་བཏང་ནས་{ཨ་མ་ཕུ་བོའི་ག་རེ་གནང་གི་འདུག}ཟེར་བའི་ཚིག་དེ་གཅིག་བུ་ལས་བཤད་མི་ཤེས་པའི་གནས་སྟངས་ནང་དུ་ལུས་ཡོད།
ཚུར་ལ་སྙིང་ནས་བརྩེ་བའི་མི་རིགས་མི་གཅིག་པའི་མཛའ་མོ། གཅེས་ཕྲུག་གཉིས་ཀྱི་མ་རྒན། གངས་དཀར་ལྷ་འཚོས་གཅེས་ཕྲུག་གཉིས་ཀྱི་ཕ་རྒན་ང་སླར་ཡང་མི་རིང་བར་ཞི་བའི་གོམ་བགྲོད་དུ་འགྲོ་བའི་གནས་ཚུལ་ཐོས་པ་དང་བཙན་བྱོལ་ནང་གི་གནད་ཡོད་མི་སྣ་ཁག་ལ་ཡི་གེ་བཏང་ནས་{ངའི་རང་གི་གཅེས་ཕྲུག་གཉིས་ཀྱི་ཕ་རྒན་བོར་བརླག་དུ་འགྲོ་ལ་ཉེ་བའི་སྐབས་འདིར། ཁོ་རང་གིས་རང་གི་གཅེས་ཕྲུག་གཉིས་ཕ་མེད་དྭ་ཕྲུག་ཏུ་མི་སྐྱུར་བ་དང་ངེད་མ་སྨད་གསུམ་བཟོད་དུ་མེད་པའི་འཚོ་བའི་ནང་བསྟུད་མར་མི་ལྷུང་ཆེད། རོགས་འདེགས་ཡོང་བའི་རྒྱབ་སྐྱོར་བྱེད་རོགས་}སོགས་གང་སར་ཐབས་ཤེས་ཡོད་དགུ་རྩལ་སྤྲུགས་བྱེད་ཀྱི་ཡོད་པ་དང་། ཁྲེལ་གཞུང་མེད་པའི་མཛའ་བོ་དང་ཁྲེལ་གཞུང་མེད་པའི་ཕ་རྒན་ངས་བྱས་ཉེས་ལ་ངོས་ལེན་ཡོང་བར་རེ་བ་བཅིངས་པ་དང་། ངས་སྐྱུར་བའི་མ་བུ་གསུམ་གྱི་འཚོ་བའི་དཀའ་ངལ་དང་གཅེས་ཕྲུག་གཉིས་ཀྱིས་རང་གི་ཕ་རྒན་གྱི་གནས་ཚུལ་ཉི་མ་རེ་རེ་བཞིན་དྲིས་འོང་དུས། ཁོ་མོས་ལན་ཇི་ལྟར་སློག་དགོས་མིན་མི་ཤེས་པར་ལྷག་ཡོད་པ་ཡ་ང་བའི་མི་ཡུལ་གྱི་འཚོ་བ་ཞིག་ལ་གདོང་ལེན་བྱེད་རྒྱུ་དེ་ནི་ལས་སླ་བོ་ཞིག་མིན་པ་གསལ་སྟོན་བྱེད་པའི་འཕྲིན་ཡིག་སྔ་ཕྱི་སོགས་སྐུར་ཡོད་པ་དང་། ཆེད་དུ་ང་ལ་སྐུར་བའི་འཕྲིན་ཡིག་ནང་དུའང་{ང་རང་གི་ངོས་ནས་ཁྱོད་རང་ལ་སྐད་ཆ་གང་ཡང་བཤད་རྒྱུ་མེད་ཀྱང་། བུ་ཕྲུག་གཉིས་ཀྱིས་ཁྱོད་ལ་སྒུག་ཡོད་པ་དང་ཁྱོད་རང་ཡང་བུ་ཕྲུག་འདི་གཉིས་དང་ལྷན་དུ་གནས་ཐུབ་པར་རེ་བ་ཆེན་པོ་ཡོད། རེད་དེ། ངས་ཁྱོད་རང་གི་མ་འོངས་པ་དེ་གཏན་ནས་ཤེས་མ་སོང་}གསུང་ནས་བློ་འཚབ་དང་ཁྲེལ་མེད་པའི་མི་ངས་སྐྱུར་བའི་ཁོང་མ་སྨད་གསུམ་གྱི་འཚོ་བའི་གནས་སྟངས་ལ་བཤད་མི་ཤེས་པའི་འགྱུར་ལྡོག་ཐེབས་ནས། བཟོད་དུ་མེད་པའི་དཀའ་ངལ་མང་བོ་ཞིག་ཡོད་པ་ཡང་དང་བསྐྱར་དུ་གསུང་ཐེངས་རེར། ངས་རང་གི་གཅེས་ཕྲུག་གཉིས་དང་ཁོ་མོ་ང་རང་མེད་པའི་ཉི་མ་དེ་ནས་བཟུང་དཀའ་ངལ་ནང་ལྷུང་ཡོད་པ་ཤེས་ཀྱང་། ངས་རང་ཉིད་ཀྱི་སེམས་པའི་ཕྱི་ནང་གི་དམ་བཅའ་དང་བློས་གཏོང་གི་ལྗིད་ཚད་ལ་ཞིབ་འཇལ་གྱིས་ངས་ཁོང་ཚོ་མུ་མཐུད་དུ་མི་འདོད་ཀྱང་དེ་འདྲ་བའི་ཤི་མིན་གསོན་མིན་གྱི་འཚོ་བའི་ནང་དུ་མི་སྐྱུར་ཐབས་མེད་དུ་ལུས་སོང་།
དྲིན་ཕ་མ་གཉིས་ཀྱི་སེམས་སྡུག་དང་མཛའ་མོའི་སེམས་ཀྱི་ན་ཟུག ཕ་མེད་དྭ་ཕྲུག་ལ་སྐྱུར་བའི་གཅེས་ཕྲུག་གཉིས་ཀྱིས་ཕ་རྒན་དྲན་པའི་གདུང་བ་སོགས་ཀྱི་ཡ་ང་བའི་སྐྱོ་གར་འབྲི་དགོས་ཚེ། དེབ་རྒན་ཞིག་བྲིས་ཀྱང་མི་འཐུས་མོད། ད་ལྟ་རང་ཉིད་ལ་དུས་ཚོད་ཀྱི་མི་འདང་བ་དང་ཡ་ང་བའི་སྐྱོ་གར་མང་བོ་ཞིག་ཡིག་ཐོག་དུ་ཕབ་ན་མི་སེམས་ལ་སྡུག་བསྔལ་སྟེར་བ་ལས་མེད་སྟབས་ཧ་ཅང་བསྡུས་པའི་ཚུལ་དུ་བྲིས་པ་ཡིན།
སེམས་ལ་འཇུག་པོ་བྱུང་