སྐབས་བཅོ་ལྔ་པའི་གྲོས་ཚོགས་ཐེངས་ལྔ་པ་དབུ་འཛུགས་གནང་སོང་།

དེ་རིང་སྔ་དྲོར་གངས་སྐྱིད་བཀའ་ཤག་ཚོགས་ཁང་དུ་སྐབས་བཅོ་ལྔ་པའི་གྲོས་ཚོགས་ཚོགས་དུས་ལྔ་པ་དབུ་འཛུགས་གནང་སོང་ལ། ད་རེབ་ཀྱི་ལས་རིམ་གཙོ་བོ་སྔོན་རྩིས་སྐོར་ཡིན་ཡང་། རང་ལུས་མེར་བསྲེགས་ཀྱིས་མཚོན་པའི་བོད་ནང་གི་ཛ་དྲག་གནས་སྟངས་ཐོག་བགྲོ་གླེང་དང་གྲོས་ཆོད་གཏན་འབེབས་གནང་རྒྱུ་ཡིན་འདུག

དེ་རིང་ཕྱི་ཚེས་ ༡༨ ཉིན་གྱི་ཞོགས་པའི་ཆུ་ཚོད་ ༩།༣༠ ཐོག སྐབས་བཅོ་ལྔ་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ལྔ་པ་གངས་སྐྱིད་བཀའ་ཤག་ཚོགས་ཁང་དུ་དབུ་འཛུགས་གནང་སོང་། ཚོགས་འདུའི་ཐོག་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་དང་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག་རྣམ་གཉིས་ཀྱིས་དབུས་པའི་སྤྱི་འཐུས་རྣམ་པ་དང་། སྲིད་སྐྱོང་བློ་བཟང་སེང་གེ་མཆོག་གིས་དབུས་པའི་བཀའ་བློན་རྣམ་པ། ཟུར་ཉན་དུ་ལྷན་ཁང་ཁག་གི་དྲུང་ཆེ་དང་ཕྱི་རྒྱལ་བོད་དོན་རྒྱབ་སྐྱོར་བ། གསར་འགོད་པ་བཅས་འདུ་འཛོམས་བྱུང་སོང་།

ཚོགས་འདུ་དབུ་འཛུགས་སྐབས་ཚང་མ་སྐུ་བཞེངས་ཐོག་བོད་རྒྱལ་ཁབ་ཆེན་མོའི་རྒྱལ་གླུ་གྱེར་འདོན་དང་། ཚོགས་གཙོའི་དབུ་འཛུགས་གཏམ་བཤད་གནང་རྗེས། བོད་ཕྱི་ནང་གཉིས་སུ་རང་ལུས་མེར་བསྲེཊ་གནང་མཁན་རྒྱལ་གཅེས་དཔའ་བོ་དཔའ་མོ་ཡོངས་དང་། བོད་མིའི་སྒྲིག་འཛུགས་ཀྱི་བཀའ་བློན་ཁྲི་ཟུར་བསོད་ནམས་སྟོབས་རྒྱལ་མཆོག་བཅས་ལ་སྐར་མ་གཅིག་རིང་མྱ་ངན་གུས་འདུད་ཞུས་སོང་།

གྲོས་ཚོགས་དབུ་འཛུགས་གཏམ་བཤད་སྐབས་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས། ཐེངས་འདིར་སྲིད་སྐྱོང་མཆོག་གཙོས་པའི་བཀའ་བློན་ཚང་མ་དང་། སྤྱི་འཐུས་ཚང་འཛོམས་ཐུབ་པར་བསྔགས་བརྗོད་དང་། ད་རེབ་ཀྱི་ལས་དོན་གཙོ་བོ་ཕྱི་ལོ་ ༢༠༡༣ ནས་ ༢༠༡༤ ལོའི་བོད་མིའི་སྒྲིག་འཛུགས་ལས་ཁུངས་མ་ལག་དང་བཅས་པའི་སྔོན་རྩིས་གཏན་འབེབས་ཡིན་ཡང་། བོད་ནང་རང་ལུས་མེར་བསྲེཊ་གནང་མཁན་ ༡༠༩ དང་།  འདས་གྲོངས་སུ་ཕྱིན་པ་ ༩༡ ཆགས་ཏེ་ཛ་དྲག་ཆགས་ཡོད་སྟབས། ལས་རིམ་ནང་ཁོང་རྣམ་པ་དང་ཤུལ་ལུས་ནང་མི་སྤུན་མཆེད་ལ་གདུང་སེམས་མཉམ་སྐྱེད་ཀྱི་མྱ་ངན་གུས་འདུད་ཀྱི་གྲོས་ཆོད་གྲོས་འཆར་ཞིག་ཡོད་པ་དང་། དུས་ཚོད་མང་ཆེ་བ་སྔོན་རྩིས་ཐོག་གཏོང་དགོས་སྟབས། སྤྱི་འཐུས་རྣམ་པས་དཔལ་འབྱོར་བཀའ་བློན་མཆོག་དང་སྔོན་རྩིས་ཚོད་དཔག་འཆར་རྩིས་ཚོགས་ཆུང་གི་སྙན་ཐོ་སོགས་ལ་ཐུགས་ཞིབ་ཚགས་མོ་གནང་དགོས་པའི་ལམ་སྟོན་གནང་སོང་།

ཚོགས་གཙོ་མཆོག་གིས་གསུང་དོན། “ད་རེབ་གྲོས་ཚོགས་ནང་བོད་ནང་གནས་སྟངས་ཐད་གཞུང་འབྲེལ་གདུང་སེམས་མཉམ་སྐྱེད་ཀྱི་གྲོས་ཆོད་གྲོས་འཆར་ཞིག་ཕེབས་བཞིན་ཡོད། ད་ལྟའི་བར་འཛིན་སྐྱོང་བཀའ་ཤག་གི་ངོས་ནས་འཛམ་གླིང་ནང་གང་ཐུབ་ཀྱིས་བོད་དོན་འགྲེལ་བཤད་དང་མི་མང་གི་སྣེ་འཁྲིད་པའི་ལས་འགུལ་མང་དག་ཅིག་སྤེལ་ཡོད་ལ། བོད་མི་མང་སྤྱི་འཐུས་ལྷན་ཚོགས་ཀྱི་ངོིས་ནས་ཀྱང་འདས་པའི་ལོ་གཅིག་རིང་གཞི་རྒྱ་ཆེ་བའི་ལས་འགུལ་ཁག་ཅིག་སྤེལ་ཡོད། ལྷག་པར་དུ་བཀའ་སྤྱི་ཐུན་མོང་གིས་སྤེལ་བའི་ལྡི་ལིའི་ལས་འགུལ་དེ་མི་མང་གི་འདོད་པ་ཁེངས་ཡོད་པ་མ་ཟད།  ཕྱི་མི་ཚོས་ཀྱང་ཞི་བ་དང་འཚེ་བ་མེད་པ། ཡུལ་ཁྲིམས་དང་མཐུན་པ། ཆེ་མཐོང་ལྡན་པའི་ཐོག་ནས་སྤེལ་བའི་ལས་འགུལ་དེ་ཡག་པོ་བྱུང་སོང་ཞེས་བསྔགས་བརྗོད་གནང་གི་འདུག ཉེ་ཆར་གསུམ་བཅུའི་དུས་དྲན་དང་བསྟུན་ཏེ་འཛམ་གླིང་ཡུལ་གྲུ་གང་སར་ཡོད་པའི་བོད་མི་ཚོས་ལས་འགུལ་སྤེལ་ཡོད། ང་ཚོས་ལས་འགུལ་ག་རེ་སྤེལ་ཡང་མིའི་ནུས་པ་དང་དཔལ་འབྱོར་གྱི་ནུས་པ་གང་ཇིའི་ཐོག་ཞན་པོ་ཡིན་ཡང་། ཆིག་སྒྲིལ་གྱི་ནུས་པ་བཏོན་པའི་ཤུགས་རྐྱེན་ཞིག་ཐེབས་ཀྱིན་པར་ངོས་འཛིན་ཞུ་ཐུབ་ཀྱི་འདུག རྒྱ་ནག་གིས་དམ་དྲག་ཆེན་པོ་ཞིག་བྱེད་བསྡད་ཀྱི་ཡོད་ཀྱང་། ཁ་སང་དེ་རིང་མཚོན་བོད་ནང་མེར་བསྲེཊ་ཀྱི་གནས་ཚུལ་མུ་མཐུད་འགྲོ་བསྡད་ཀྱི་ཡོད་པ་རེད། རྒྱ་ནག་གིས་བཟང་ཕྱོགས་ནས་ཡ་ལན་ཚུལ་མཐུན་ཞིག་མ་བྱུང་བར་དུ་བོད་ནང་གི་རང་ལུས་མེར་བསྲེཊ་གནང་བའི་གནས་ཚུལ་དེ་ལམ་སེང་མཚམས་ཆད་ཀྱི་རེད་བསམ་པ་དྲན་གྱི་མི་འདུག  ”ཅེས་གསུངས་བྱུང་།

ཡང་ཚོགས་གཙོ་མཆོག་གིས་རྒྱ་ནག་གི་མགོ་ཁྲིད་གསར་བའི་སྐོར་ལ་གསུངས་དོན།  “ རྒྱ་ནག་ལ་མཚོན་ན་ད་ཆར་ཞི་ཅིན་ཕེན་གྱིས་འགན་འཁུར་བའི་མཚམས་སུ་བསླེབས་ཡོད་པ་རེད། ཁོང་གི་འགན་འཁུར་བའི་རིང་གི་ཚོགས་ཆེན་ཚོགས་སྟངས་དང་བཀའ་མོལ་གནང་སྟངས་སོགས་ཕྱོགས་ཡོངས་ལ་བལྟས་ན་ཏོག་ཙམ་གུ་ཡངས་པོ་ཡོད་པའི་རྣམ་པ་ཞིག་མཐོང་འདུག རྒྱ་ནག་ནང་ལོགས་ལ་མཚོན་ན། ཆབ་སྲིད་ཐོག་གི་གནོན་ཤུཊ་དང་གནས་སྟངས་ཀྱི་དབང་གིས་འགྱུར་བ་མི་འགྲོ་ཐབས་མེད་ཀྱི་དུས་ལ་བབ་ཡོད། འགྱུར་བ་དེ་ཟིང་ཟིང་དང་ཞི་བའི་ཐོག་གཏོང་མིན་རྒྱ་ནག་གི་མགོ་ཁྲིད་ཚོའི་ལག་ཏུ་ཡོད། དུས་ཚོད་ག་ཚོད་ཅིག་ལ་འགོག་མིན་སུས་ཀྱང་བཤད་ཤེས་ཀྱི་མེད་ཀྱང་། རྒྱ་ནག་དམངས་གཙོར་རིམ་པས་འགྱུར་དགོས་པ་ཞིག་དང་། རྒྱ་ནག་གི་ས་ཁྱོན་དང་མི་འབོར་ལ་གཞིགས་ན། རྒྱལ་ཕྲན་མཉམ་འབྲེལ་གྱི་སྲིད་གཞུང་ཞིག་ལ་བསྒྱུར་ཐུབ་པ་ཡིན་ན། ཚང་མར་ཕན་ཐོགས་ཡོང་བའི་རེ་བ་བྱེད་མཁན་མང་པོ་ཞིག་ཡོད་པ་རེད། གྲོས་ཚོགས་འདི་བརྒྱུད་དེ་རྒྱ་ནག་གི་མགོ་ཁྲིད་ཚོར། གནད་དོན་གང་ཡིན་ཡང་སྦེ་སྐུང་དང་སྐྱག་རྫུན་བཤད་པ་གཅིག་པུ་མིན་པར། བོད་ནང་ཏིན་ཞའོ་ཕིན་གྱིས་བཤད་པ་ལྟར་དངོས་ཐོག་བདེན་འཚོལ་གྱིས་ཞིབ་འཇུག་མཐིལ་ཕྱིན་པ་ཞིག་བྱས་ཏེ། བོད་པའི་དཀའ་རྙོག་སེལ་བའི་ལམ་ཁ་ཞིག་ཏུ་བསྒྱུར་དགོས་པ་གལ་ཆེན་པོ་རེད། བོད་མིའི་སྒྲིག་འཛུགས་ཀྱི་ངོས་ནས་སྲིད་སྐྱོང་མཆོག་གིས་ཐེངས་མང་པོར་འབྲེལ་མོལ་གང་དུ་ག་དུས་གནང་ཡང་གྲ་སྒྲིག་ཡོད་གསུངས་ཡོད་པ་རེད། དེ་བོད་མིིའི་སྒྲིག་འཛུགས་ཀྱི་ངོས་ནས་ལྷག་བསམ་རྣམ་དག་གིས་གསུངས་པ་ཡིན་སྟབས། རྒྱ་ནག་གི་མགོ་ཁྲིད་ཚོས་ཚད་དང་ལྡན་པའི་ཡ་ལན་བྱ་ཐུབ་པ་ཡིན་ན།  ང་རང་ཚོའི་ལངས་ཕྱོགས་དེ་ཡང་དངོས་ཡོད་གནས་སྟངས་ལ་གཞི་བཞག་སྟེ་དབུ་མའི་ལམ་གྱི་ལངས་ཕྱོགས་སྒང་འགྲོ་བཞིན་ཡོད་སྟབས། རྒྱ་ནག་གི་མགོ་ཁྲིད་ཚོས་བོད་པའི་དཀའ་རྙོག་སེལ་དགོས་པ་ཞིག་དང་། སེལ་ཐུབ་པ་ཞིག་ཡིན་པའི་ཐོག་ནས་འབད་བརྩོན་གནང་བ་ཡིན་ན། ད་ལྟ་དུས་བཟང་པོ་ཞིག་ལ་བསླེབས་ཡོད་པ་རེད་དྲན་ཡོད། ” ཅེས་གསུངས་བྱུང་།

མཇུག་ཏུ་ཚོགས་གཙོ་མཆོག་གིས་བོད་ནང་གི་བོད་མི་ཚོར། “ བོད་ནང་གི་བོད་མི་ཁྱེད་རང་ཚོས་རྒྱ་ནག་གི་དྲག་གནོན་དབང་བསྒྱུར་གྱི་གདུག་རྩུབ་མང་པོ་ཞིག་གི་འོག་མྱངས་བསྡད་ཡོད་པ་རེད། ང་ཚོ་བཙན་བྱོལ་ནང་ཡོད་མཁན་ཚོས་གནས་སྟངས་དེ་དག་ཤེས་ཀྱི་ཡོད། ང་ཚོ་བཙན་བྱོལ་ནང་གཞན་དབང་སྟབས་བསྟུན་མང་པོ་ཞིག་ཆགས་ཀྱི་ཡོད་ཀྱང་། ང་རང་ཚོས་ཁྱེད་ཅག་གི་སྐུ་ངལ་བསྐྱོན་བཞག་པ་དེ་འཛམ་གླིང་ནང་ཕྱིར་བསྒྲགས་བྱེད་རྒྱུར། དེ་སྔ་གང་ཐུབ་ཞུས་ཡོད་ལ། མ་འོངས་པར་ང་ཚོའི་ངོས་ནས་གང་ཐུབ་འབད་བརྩོན་གནང་རྒྱུ་ཡིན། ” ཞེས་གསུངས་བྱུང་།

སང་ཉིན་ཕྱི་ཚེས་ ༡༩ ཉིན་གཞུང་འབྲེལ་རྗེས་དྲན་གྲོས་འཆར་ཐོག་གི་བགྲོ་གླེང་ཐད་བཀའ་ཤག་གི་གསལ་བཤད་དང་། དཔལ་འབྱོར་འབྱོར་བཀའ་བློན་མཆོག་གིས་ཕྱི་ལོ་ ༢༠༡༣ ནས་ ༢༠༡༤ ལོའི་བོད་མིའི་སྒྲིག་འཛུགས་ལས་ཁུངས་མ་ལག་དང་བཅས་པའི་སྔོན་རྩིས་འགོད་འབུལ། སྔོན་རྩིས་ཚོད་དཔག་འཆར་རྩིས་ཚོགས་ཚོགས་ཆུང་གི་སྙན་ཐོ་སྙན་སྒྲོན་བཅས་གནང་རྗེས་དེ་དག་གི་ཐོག་བགྲོ་གླེང་གནང་རྒྱུ་ཡིན་འདུག

གསར་འགོད་པ། དོན་གོ