བཙན་བྱོལ་ནང་ཉམས་ཞིབ་ཐད་ཆེད་མཁས་སློབ་སྟོན་པ་དཀོན་པོ་འདུག

ཟླ་འདིའི་ཕྱི་ཚེས་ ༤ ཉིན་ཤེས་རིག་ལས་ཁུངས་ཀྱི་གོ་སྒྲིག་འོག་ས་རཱ་མཐོ་སློབ་ཏུ་ཉིན་གཉིས་རིང་ཉམས་ཞིབ་ཟབ་སྦྱོང་ཞིག་ཚོགས་པ་དང་བསྟུན་ཏེ། འདི་གའི་གསར་འགོད་པས་ཚོགས་ཞུགས་པ་འགར་ཉམས་ཞིབ་བརྒྱུད་རིམ་དང་ཉམས་མྱོང་སྐོར་ལ་དགོངས་ཚུལ་བསྡུས།

ཤེས་རབ་དགའ་ཚལ་སློབ་གླིང་གི་བོད་དགེ་སྐལ་བཟང་ཉི་མ་ལགས་ཀྱིས་༼བོད་ཀྱི་ཕྲུ་གུའི་རྩོམ་རིག་གི་གནས་བབ་དང་མདུན་ལམ་༽ཞེས་པའི་བརྗོད་གཞིའི་ཐོག་ཉམས་ཞིབ་གནང་གི་ཡོད་ཅིང་། ཁོང་ལ་བརྗོད་གཞིའི་དེའི་སྐོར་ལ་བཅར་འདྲི་ཞུས་པར་ཁོང་གིས། སོ་སོ་དགེ་རྒན་བྱས་རིང་གི་ཉམས་མྱོང་བརྒྱུད། བོད་ཀྱི་སྲོལ་རྒྱུན་གཞི་རིམ་རྩོམ་རིག་སྟེ། བོད་རང་གི་གནའ་སྔ་མོ་ནས་བརྒྱུད་ཡོང་བའི་བྱིས་པའི་རྩོམ་རིག་ལ་དོ་སྣང་བྱུང་ཞིང་། བཙན་བྱོལ་གྱི་བྱིས་པའི་རྩོམ་རིག་ནི་རྒྱ་གར་འགྱུར་མ་ལྟ་བུ་ཞིག་གམ། རྒྱ་གར་གྱི་བྱིས་རྩོམ་གྱིས་ལྷད་ཞུགས་པ་མང་ཞིང་། བོད་ཀྱི་སྲོལ་རྒྱུན་གྱི་བྱིས་པའི་རྩོམ་རིག་གི་གཡའ་དང་དྲི་འགོས་མེད་སྟབས། བོད་རང་གི་བྱིས་པའི་རྩོམ་རིག་ལས་ལེགས་ཆ་རྣམས་བསྡུས་ཏེ། བོད་ཀྱི་སྲོལ་རྒྱུན་བྱིས་པའི་རྩོམ་རིག་གི་སྒྲོམ་གཞི་ཞིག་བསླང་ཐུབ་ན་སྙམ་སྟེ་བརྗོད་གཞི་འདི་བདམས་པ་ཡིན་སྐོར་བརྗོད་བྱུང་།

            ཉམས་ཞིབ་བརྒྱུད་རིམ་ཁྲོད་ཀྱི་ཉམས་མྱོང་དང་དཀའ་ཚགས་སྐོར་དྲིས་པར་ཁོང་གིས། ཉམས་མྱོང་ཆེ་ཤོས་དེ་ཞིབ་འཇུག་གི་བརྗོད་བྱ་ཅུང་ཁ་གསལ་བོར་འགྲོ་བཞིན་པའི་སྟེང་ནས་སྔར་གྱི་བྱིས་པའི་རྩོམ་རིག་གི་ཁྱད་ཆོས་མང་པོ་ཞིག་མཐོང་བ་དང་། ལྷག་པར་དུ་ཞིབ་འཇུག་གི་ཐབས་ལམ་གྱི་སྟེང་ནས་མིས་བཤད་པ་དང་རང་གིས་བཙལ་ཏེ་སྦྱངས་པའི་གོ་རིམ་ཁྲོད། ཞིབ་འཇུག་ཟེར་བ་དེ་བོད་སྤྱི་ཚོགས་ཀྱི་ཟུར་ཞིག་ན་སྤྱི་བམ་པ་ཞིག་དང་སྐད་ཆ་སྦོམ་བཤད་ཀྱི་སྤྱི་སྣང་ཞིག་ཡོད་པ་དེ་མ་ཡིན་པར། ཞིབ་འཇུག་ནི་རྒྱུ་ཆ་དང་གོ་རིམ་གྱི་སྟེང་ནས་ཁ་སྐད་ཀྱིས་བཤད་ན་སྐད་ཆ་གསལ་བོ་གོ་རྒྱུ་ཡོད་པ་ཞིག་ཡིན་དགོས་པའི་མྱོང་སྣང་བྱུང་བ་དང་། དཀའ་ངལ་གྱི་ཐད་ནས་ཞིབ་འཇུག་གི་བརྗོད་བྱ་དེར་ད་དུང་བོད་ཕྱི་ནང་གང་ནའང་བདག་པོ་མང་པོ་མེད་སྟབས་རྒྱུ་ཆ་འཚོལ་ཞིབ་ཀྱི་དཀའ་ངལ་ཡོད་པ་དང་། དེ་ནས་བཙན་བྱོལ་སྤྱི་ཚོགས་ཁྲོད་རིགས་གཅིག་རྐང་འཛིན་སློབ་སྦྱོང་བྱེད་མཁན་ཚོར་ཐུན་མོང་གི་དཀའ་ངལ་ཞིག་ཡོད་པ་ནི་སྐད་ཆ་འདྲི་ས་དང་ལམ་སྟོན་ཞུ་ས་མི་རག་པར་ཁེར་རྒྱུག་ལྟ་བུ་བྱེད་དགོས་ཤིང་། ཞིབ་འཇུག་བྱེད་ཐབས་ཀྱི་ཐད་ནས་རྒན་རབས་ཞིབ་འཇུག་པ་ཚོས་རང་ལུགས་འཇོག་པ་དང་གཞན་ལུགས་དགག་པ། རྩོད་པ་སྤོང་བ་ཞེས་སྤྱི་འགྲོས་ཤིག་བགྲང་པ་ལས་ཞིབ་འཇུག་གི་དུས་ཡུན་དང་སྡེ་ཚན་མི་འདྲ་བའི་སྒྲོམ་གཞི་དང་སྒྲིག་གཞི་སོགས་གཏན་འཁེལ་ཞིག་བཤད་རྒྱུ་མེད་པ་སོགས་ཀྱི་དཀའ་ངལ་ཡོད་སྐོར་བརྗོད་བྱུང་།

            ཤེས་རིག་གིས་སྒྲིག་ཞུགས་མ་ཡིན་པའི་ཉམས་ཞིབ་པ་ཚོར་ཟབ་སྦྱོང་ཐེངས་གཉིས་གོ་སྒྲིག་གནང་པ་དེས་ཕན་ཐོགས་བྱུང་ཡོད་མེད་དྲིས་སྐབས། ཟབ་སྦྱོང་ཐེངས་གཉིས་ཀ་སྤྱི་ཡོངས་ནས་ཤེས་ཡོན་གྱི་ཐོས་པ་བསགས་པའི་ཕན་པ། བཙན་བྱོལ་སྤྱི་ཚོགས་ཁྲོད་ཀྱི་མཁས་པ་རྒན་རབས་པ་མང་པོ་ཞིག་ལ་འབྲེལ་འདྲིས་དང་། ཁོང་རྣམ་པར་རང་རང་གི་མཁས་རྩལ་གྱི་ཡོན་ཏན་མི་འདྲ་བ་མཇལ་རྒྱུ་བྱུང་བ་བཅས་པ་དགེ་ཕན་དུ་མཐོང་ཡང་། གཙོ་བོ་ཟབ་སྦྱོང་ཐེངས་གཉིས་ཀ་ཞིབ་འཇུག་བྱེད་ཐབས་ཀྱི་ཐད་ཡིན་སྟབས། གོང་ནས་བཤད་པ་ལྟར་སྤྱི་བཤད་ཙམ་ལས་བྱེ་བྲག་གི་ཐབས་ལམ་དང་དཀའ་ངལ་རེ་རེ་བཞིན་སེལ་ཐུབ་པ་ཞིག་བྱུང་མེད་སྐོར་བརྗོད་བྱུང་།

ས་རཱ་མཐོ་སློབ་ཀྱི་རྒྱལ་རབས་དགེ་རྒན་གཙང་ཕྲུག་སྟོབས་ལགས་ཀྱིས་༼༧པཎ་ཆེན་སྐུ་ཕྲེང་དགུ་བའི་སྲིད་དོན་མཛད་རྣམ་༽ཞེས་པའི་བརྗོད་གཞིའི་ཐོག་ཞིབ་འཇུག་བྱེད་ཀྱི་ཡོད་ཅིང་། ཁོང་གི་ལོ་གཉིས་མ་ཟིན་ཙམ་རིང་གི་ཉམས་ཞིབ་གནས་སྟངས་གང་འདྲ་ཆགས་ཡོད་མེད་དྲིས་པར་ཁོང་གིས། ད་ཆར་ཉམས་ཞིབ་སྤྱིའི་སྒྲོམ་གཞི་གྲུབ་ཟིན་ཏེ་བསྐྱར་ཞིབ་དང་སྣོན་འཕྲི་སྤོར་གཅོག་གི་མཚམས་སུ་སླེབས་ཡོད་སྐོར་དང་། ཉམས་ཞིབ་ཀྱི་བརྗོད་གཞི་༧པཎ་ཆེན་རིན་པོ་ཆེ་སྐུ་ཕྲེང་དགུ་བའི་སྐོར་དང་། ལྷག་པར་དུ་ཁོང་གི་སྲིད་དོན་མི་ཚེའི་སྐོར་ཡིན་སྟབས། གཙོ་བོ་ཡིག་ཐོག་དང་ངག་རྒྱུན་དཔང་རྟགས་གཉིས་རྩ་འཛིན་བྱེད་ཀྱི་ཡོད་ཅིང་། ༧པཎ་ཆེན་རིན་པོ་ཆེ་སྐུ་ཕྲེང་དགུ་བ་མཆོག་གི་མི་ཚེའི་ལོ་རྒྱུས་ནི་ ༡༨༨༨ ནས་ ༡༩༣༧ བར་གྱི་གནས་ཚུལ་ཞིག་ཆགས་ཡོད་སྟབས། དུས་སྐབས་དེ་དག་གི་གནས་ཚུལ་བོད་རྒྱ་དབྱིན་གསུམ་ནང་གང་རག་པ་དང་། ཡིག་ཐོག་ཁ་གསབ་དང་ཁ་གསལ་མེད་པའི་གནས་ཚུལ་མང་པོ་ཞིག་འབྲེལ་ཡོད་མི་སྣ་བརྒྱུད་ངག་རྒྱུན་གནས་ཚུལ་འཚོལ་བསྡུ་བྱས་ཡོད་སྐོར་བརྗོད་སོང་།

            མ་འོངས་པར་ཤེས་རིག་ལས་ཁུངས་དང་ཉམས་ཞབས་པ་རང་ངོས་བཅས་ནས་ཡར་རྒྱས་གཏོང་དགོས་ས་གང་དག་ཡོད་མེད་དྲིས་པར། ཉམས་ཞིབ་པ་ཁག་ཅིག་ལ་བརྗོད་གཞི་དང་འབྲེལ་བའི་ཆེད་མཁས་པ་བཙན་བྱོལ་ནང་མེད་པའམ་དཀོན་པོ་ཡིན་པས་སློབ་སྟོན་པ་དང་བློ་འདྲི་ཞུ་ས་ཡག་པོ་མེད་པའི་དཀའ་ངལ་ཡོད་པར་ཤེས་རིག་གིས་དགོངས་པ་བཞེས་དགོས་པ་དང་། ཉམས་ཞིབ་པ་སོ་སོའི་ངོས་ནས་ཁྲལ་ལྟ་བུ་མ་ཡིན་པར་གྲུབ་དོན་ཡག་པོ་ཡོང་ཐབས་ལ་འབད་བརྩོན་དང་། གྲུབ་དོན་དེ་རྒྱ་ཁྱབ་ཏུ་སྟོན་རྒྱུ་ཡོད་པ་ཞིག་གནང་རྒྱུ་གལ་ཆེན་པོ་ཡིན་པ། ཤེས་རིག་གིས་ཀྱང་ཉམས་ཞིབ་གྲུབ་དོན་ཡག་པོ་ཡོད་པ་དག་ལ་ཆེ་མཐོང་དང་ངོས་འཛིན་ལག་འཁྱེར་སྤྲོད་རྒྱུ། མཐར་ཕྱིན་ལག་འཁྱེར་སྤྲོད་སྐབས་མཛད་སྒོ་རྒྱས་པ་ཚོགས་པ་སོགས་བརྒྱུད་སྤྱི་ཚོགས་ནང་ཤེས་རྟོགས་དང་མ་འོངས་པའི་ཉམས་ཞིབ་པ་ཚོར་དོ་སྣང་སླེབས་ཐབས་བྱ་གལ་ཆེ་བ། ཁོང་རང་ཉིད་ལ་མཚོན་ན་དབྱིན་ཡིག་དང་རྒྱ་ཡིག་སོགས་རང་རྐྱ་འཕེར་བ་ཞིག་མེད་པའི་དཀའ་ངལ་འཕྲད་ཀྱི་ཡོད་སྐོར་སོགས་བརྗོད་བྱུང་།

སྒྲོལ་མ་གླིང་དང་རྒྱུད་སྟོད་བོད་དགེ་བཀྲ་ཤིས་དོན་འགྲུབ་ལགས་ཀྱིས་ ༼དགེ་རྒན་གྱི་མཚན་ཉིད་དང་འོས་ཆོས་སྐོར་ལ་དཔྱད་པ་༽ཞེས་པའི་བརྗོད་གཞིའི་སྟེང་ཉམས་ཞིབ་བྱེད་ཀྱི་ཡོད་ཅིང་། ཁོང་ལ་ཐོག་མར་ཉམས་ཞིབ་ལ་བཟུང་པའི་ལྟ་ཚུལ་དང་རྗེས་ཀྱི་ལག་ལེན་དངོས་ལ་ཁྱད་པར་གང་འདྲ་བྱུང་ཡོད་མེད་དྲིས་པར་ཁོང་གིས། ཉམས་ཞིབ་ནང་དངོས་སུ་ཞུགས་སྐབས། ཐོག་མའི་བསམ་བློ་འཁོར་ཕྱོགས་དང་གཏན་ནས་མི་འདྲ་བ་ཞིག་བྱུང་ཡོད་པ་དང་། དེ་ནི་གཅིག་ནས་སྔོན་མ་དེང་རབས་ཉམས་ཞིབ་ཀྱི་འགྲོ་སྟངས་ལྟར་ཉམས་ཞིབ་བྱས་མྱོང་མེད་པ་དང་། གཉིས་ནས་ཉམས་ཞིབ་ཀྱི་སྒྲོམ་གཞི་འགོད་སྟངས་དང་རྒྱུ་ཆ་མཁོ་སྒྲུབ་བྱེད་སྟངས། དཔྱད་ཞིབ་བསྡུར་གསུམ་གྱི་ཐབས་ལམ་སོགས་ལ་ཞིབ་ཚགས་ཤེས་རྟོགས་མེད་སྟབས། ཟབ་སྦྱོང་སྐོར་ལ་ཆེད་མཁས་མི་སྣ་ཚོས་ལམ་སྟོན་བྱེད་ཡོང་སྐབས། ཐོག་མའི་སོ་སོའི་བསམ་བློ་གཏོང་སྟངས་དེ་འགྲིག་གི་མེད་པ་ཧ་གོ་རྗེས། ཁོང་རང་ཉིད་ལ་མཚོན་ན་ཉམས་ཞིབ་ཀྱི་བརྗོད་གཞིའི་ཁྱབ་ཁོངས་དང་འཆར་འགོད་སོགས་ཀྱི་ཐད་འགྱུར་བ་གཏོང་དགོས་བྱུང་ཡོད་སྐོར་བརྗོད་བྱུང་།

            ཡང་ཁོང་ཉམས་ཞིབ་པ་མང་ཆེ་བ་གཞུང་སྒེར་ཚོགས་སྡེ་སོགས་སུ་ལས་ཞོར་ཆགས་ཡོད་སྟབས། ཉམས་ཞིབ་ཚགས་ཚུད་ཡོང་ཐུབ་མིན་དྲིས་པར། ཁོ་རང་དགེ་རྒན་ཞིག་ཡིན་སྟབས་ཉམས་ཞིབ་རྒྱུ་ཆ་འཚོལ་བསྡུར་ཕྱོགས་སྐྱོད་བྱ་རྒྱུར་དུས་ཚོད་ཀྱི་དཀའ་ངལ་ཡོད་པ་དང་། མ་འོངས་པར་ཤེས་རིག་ལས་ཁུངས་ཀྱིས་ལས་ཞོར་མ་ཡིན་པའི་ཉམས་ཞིབ་པ་བསྡུ་ཐུབ་ན་ཉམས་ཞིབ་ཀྱི་གྲུབ་དོན་དང་སྤུས་ཚད་ཡག་པོ་འབྱུང་ངེས་ཡིན་པ། དེ་བཞིན་ཤེས་རིག་གི་ངོས་ནས་ཉམས་ཞིབ་ཚད་ལྡན་ཡོང་ཕྱིར་མ་འོངས་པར་མཐུན་རྐྱེན་ཇེ་ལེགས་སུ་གཏོང་རྒྱུ་གལ་ཆེན་ཡིན་སྐོར་སོགས་བརྗོད་བྱུང་།

སྙན་ངག་པ་བློ་གྲོས་ཟླ་འོད་ལགས་ཀྱིས་༼མི་ལོ་ལྔ་བཅུའི་རིང་གི་བཙན་བྱོལ་བོད་མིའི་རྩོམ་རིག་གནས་བབ་ལ་དཔྱད་པ༽ ཞེས་པའི་བརྗོད་གཞིའི་ཐོག་ཉམས་ཞིབ་གནང་གི་ཡོད་ཅིང་། གསར་འགོད་པས་ཁོང་ལ་ཉམས་ཞིབ་བརྗོད་གཞི་དེ་ཐོག་མར་བདམས་པའི་ཀུན་སློང་སྐོར་དྲིས་པར་ཁོང་གིས། སོ་སོ་བོད་དུ་ཡོད་སྐབས་ཀྱི་ཉམས་མྱོང་ལ་གཞིགས་ཏེ་དང་ཐོག་བོད་ཀྱི་རྩོམ་རིག་སྤྱིའི་སྐོར་ལ་ཉམས་ཞིབ་བྱ་འཆར་ཡོད་ཀྱང་། སློབ་སྟོན་པ་དང་གྲོགས་པོ་ཁག་ཅིག་བཅས་ཀྱིས་བོད་ཀྱི་རྩོམ་རིག་སྤྱི་ཟེར་པ་དེ་བརྗོད་གཞིའི་ཁྱབ་ཁོངས་ཆེ་དྲགས་པ་དང་། གཉིས་ནས་བོད་ཀྱི་རྩོམ་རིག་སྐོར་གང་འཚམ་མང་པོ་ཡོད་པ་དང་། བཙན་བྱོལ་གྱི་ལོ་ ༥༠ རིང་གི་རྩོམ་རིག་དང་དེའི་འཕེལ་འགྱུར་སོགས་ཀྱི་སྐོར་མེད་པ་བཅས་ལ་བརྟེན་ཏེ་བརྗོད་གཞི་དེ་བདམས་སྐོར་བརྗོད་བྱུང་།

            བཙན་བྱོལ་རྩོམ་རིག་ཉམས་ཞིབ་ཀྱི་ཁྱབ་ཁོངས་དང་དུས་རིམ་སོགས་དབྱེ་བ་ཇི་ལྟར་ཕྱེས་ཏེ་ཞིབ་འཇིག་བྱེད་ཀྱི་ཡོད་མེད་དྲིས་པར། ཁོང་གི་རྩོམ་རིག་ཞིབ་འཇུག་གི་ཁྱབ་ཁོངས་ཀྱི་ཆ་ནས་སྒྲུང་རྩོམ་དང་སྙན་ངག ལྷུག་རྩོམ། དཔྱད་རྩོམ། སྒྱུར་རྩོམ་སོགས་གཙོ་བོ་སྒྱུ་རྩལ་རྩོམ་རིག་སྐོར་ཡིན་པ་དང་། དུས་རིམ་གྱི་ཆ་ནས་ལོ་རབས་དྲུག་ཅུ་ནས་དགུ་བཅུའི་བར་དང་། ལོ་རབས་དགུ་བཅུ་ནས་ཉིས་སྟོང་བར། ཉིས་སྟོང་ནས་ཉིས་སྟོང་བཅུ་བར་བཅས་རིམ་པ་གསུམ་ལ་དབྱེ་སྟེ་ཞིབ་འཇུག་བྱེད་ཀྱི་ཡོད་འདུག་ལ། ཁོང་གིས་བོད་ནང་གི་རྩོམ་རིག་དང་བསྡུར་ན་བཙན་བྱོལ་གྱི་རྩོམ་རིག་གི་སྤུས་ཚད་ཞན་པ་དང་། མི་ཐོག་རྒན་པའི་དུས་སྐབས་སུ་རྩོམ་རིག་ཆེས་དཀོན་པ་མ་ཟད་གང་འཚམ་རེ་བྲིས་ཡོད་པ་དག་དེང་སྐབས་རག་ཁག་པོ་ཡིན་པ། སྤྱིར་བཙན་བྱོལ་དུ་རྩོམ་རིག་གི་མཁའ་དབུགས་ཆུང་དྲགས་པ་བཅས་ལ་བརྟེན། ཉམས་ཞིབ་བྱེད་ཆོག་ཆོག་ཅིག་མེད་པ་མ་ཟད། རང་ཉིད་ལ་མཚོན་ན་ཤེས་རིག་གི་དུས་བཀག་ནང་ཡོངས་སུ་འགྲུབ་ཐུབ་པའི་གདེང་ཚོད་མེད་ཀྱང་། དུས་ཡིན་གང་འཚམ་ཞིག་གི་ནང་འདོད་པ་ཁེངས་པ་ཞིག་ཡོང་ཐུབ་བྱ་འདོད་ཡོད་སྐོར་བརྗོད་བྱུང་། ཁོང་གིས་མུ་མཐུད། ཉམས་ཞིབ་སྤུས་དག་པོ་ཞིག་ཡོང་དགོས་ན། ས་གནས་འདྲ་མིན་དང་དཔེ་མཛོད་ཁང་སོགས་སུ་རྒྱུ་ཆ་འཚོལ་བསྡུ་བསྐྱོད་དགོས་སྟབས། ཤེས་རིག་གི་ངོས་ནས་ཉམས་ཞིབ་པ་ཚོའི་མཐུན་རྐྱེན་ཐོག་ཡར་རྒྱས་གཏོང་གལ་ཆེ་སྐོར་བརྗོད་བྱུང་།

གསར་འགོད་པ། བནྡེ་སྐྱབས།