རྒྱ་ནག་གཞུང་གིས་མགོ་ལོག་སྟོང་སྐྱབས་དགོན་པའི་གྲྭ་བ་ཞིག་འཛིན་བཟུང་བྱས་ཡོད་པ་མ་ཟད། དགོན་པའི་ནང་བདེ་སྲུང་མི་སྣ་འདུག་སྡོད་ཀྱིས་རྒྱ་གཅེས་སློབ་གསོ་སྤེལ་གྱི་ཡོད་འདུག
ཟླ་འདིའི་ཕྱི་ཚེས་ ༡༡ ཉིན་རྒྱ་གཞུང་དྲག་ཆས་ཉེན་རྟོག་པས་བོད་མདོ་སྨད་མཚོ་སྔོན་མགོ་ལོག་ཁུལ་དགའ་བདེ་རྫོང་ཐོག་ཏུ། སྟོང་སྐྱབས་སྐྱབས་དགོན་པའི་རྩོམ་པ་པོ་གྲྭ་ཁྲི་བཙན་ཞུ་བ་གློ་བུར་འཇུ་བཟུང་བཙན་ཁྲིད་བྱས་ཏེ། ད་ཆར་ནང་མི་ཉེ་འབྲེལ་ཚོས་ཁོང་གར་ཡོད་ཅི་བྱུང་གི་གནས་ཚུལ་ཅི་ཡང་མ་ཤེས་པར་ལྷག་ཡོད་པ་མ་ཟད། ཉིན་དེ་ནས་བཟུང་དུང་སྐྱབས་དགོན་པར་བདེ་སྲུང་མི་སྣ་དང་གཞུང་གི་ལས་བྱེད་མི་སྣ་ ༡༠༠ ཙམ་འདུག་སྡོད་བྱས་ཏེ། དགོན་པའི་གྲྭ་བཙུན་རྣམས་ལ་རྒྱལ་གཅེས་ཆོས་གཅེས་ཀྱི་དྲིལ་བསྒྲགས་སློབ་གསོ་སྤེལ་བཞིན་ཡོད་འདུག
ཟླ་འདིའི་ཕྱི་ཚེས་ ༡༥ ཉིན་དགའ་བདེ་རྫོང་གི་འབྲེལ་ཡོད་ལས་བྱེད་ཁག་ཅིག་སྟོང་སྐྱབས་དགོན་པའི་ནང་ཡོང་སྟེ། གྲྭ་ཁྲི་བཙན་ལགས་ཀྱིས་བརྩམས་པའི་༼བདེན་པའི་ཁ་རླངས༽ཞེས་པའི་དེབ་དེར་དཔལ་འབྱོར་གྱི་མཐུན་རྐྱེན་སྦྱོར་མཁན་གྲྭ་བ་རྣམས་རྩིས་སྤྲོད་དགོས་ལུགས་ཀྱི་བཙན་བཀའ་བཏང་ཡོད་ཀྱང་། དགོན་པའི་གྲྭ་བཙུན་རྣམས་ཀྱིས་ངོས་ལེན་བྱས་མེད་སྟབས། ཕྱི་ཚེས་ ༡༧ ཉིན་དགའ་བདེ་རྫོང་གི་བདེ་སྲུང་མི་སྣ་དང་ལས་བྱེད་སོགས་མི་བརྒྱ་མ་ཟིན་ཙམ་དགོན་པའི་ནང་བསླེབས་ཏེ། ཁོ་ཚོ་དགོན་པ་གཞུང་གི་མགྲོན་ཁང་ནང་འདུག་འཇུག་དགོས་པ་དང་། དགོན་པའི་འདུ་ཁང་ནང་ཚོགས་འདུ་འཚོགས་འཇུག་དགོས་སྐོར་བརྗོད་ཡོད་ཀྱང་། དགོན་པའི་ངོས་ནས་འདུ་ཁང་ནང་ཚོགས་འདུ་བསྐང་རྒྱུ་དང་། དགོན་པ་གཞུང་གི་མགྲོན་ཁང་ནང་རྒྱ་གཞུང་གི་ལས་བྱེད་རུ་ཁག་སྡོད་འཇུག་རྒྱུ་ངོས་ལེན་བྱས་མེད་སྟབས། རྒྱ་གཞུང་གིས་དགོན་པའི་ར་སྐོར་ནང་ལས་བྱེད་རུ་ཁག་འདུག་སའི་སྡོད་གུར་མང་པོ་བརྒྱབ་པ་དང་། དགོན་པའི་འདུ་ཁང་གི་སྒོ་ཁར་དྲིལ་བསྒྲགས་སློབ་གསོའི་འཕྲེད་དར་འཕྱར་ཞིང་། འདུ་ཁང་གི་མདུན་གྱི་འཁྱམ་རའི་ཐང་དུ་གྲྭ་བ་རྣམས་ལ་རྒྱལ་གཅེས་ཆོས་གཅེས་ཀྱི་སློབ་གསོའི་ཚོགས་འདུ་བསྐངས་ཏེ། དགོན་པར་ཕྱོགས་ཡོངས་ནས་བཀག་སྡོམ་དམ་དྲག་བྱེད་མགོ་བརྩམས་ཡོད་འདུག
ཉེ་ལམ་དགོན་པའི་ནང་འདུག་སྡོད་བྱེད་མཁན་རྒྱ་གཞུང་གི་ལས་བྱེད་ཀྱི་ཁ་གྲངས་ཇེ་མང་དུ་འཕར་བཞིན་པ་མ་ཟད། རྫོང་ཐོག་ནས་བུད་མེད་སྐོར་ཅིག་ཁྲིད་ཡོང་སྟེ་ལས་བྱེད་ཚོར་ཟ་མ་གཡོ་སྐོལ་བྱེད་འཇུག་གི་ཡོད་པ་དང་། རྒྱ་གཞུང་གི་ལས་འགུལ་རུ་ཁག་དེ་དགོན་པའི་ནང་ཟླ་གཅིག་ལྷག་འདུག་སྡོད་བྱ་རྩིས་ཡོད་འདུག ལས་འགུལ་གྱི་ཉིན་དང་པོ་སྟེ་ཁ་སང་ཕྱི་ཚེས་ ༡༧ ཉིན་དགོན་པའི་གྲྭ་བ་རྣམས་ལ་ཚོགས་འདུ་བསྐངས་ཏེ། གྲྭ་ཁྲི་བཙན་ལགས་ཀྱི་དེབ་དང་འབྲེལ་ཡོད་ཀྱི་གྲྭ་བཙུན་རྣམས་རྩིས་སྤྲོད་དགོས་ལུགས་དང་། ཉེ་སྔོན་བོད་མིའི་རང་དབང་སྒེར་གསུམ་བཅུའི་དུས་དྲན་ཉིན། དགོན་པའི་གྲྭ་བཙུན་རྣམས་ཀྱིས་དགོན་པའི་ཉེ་འདབས་ཀྱི་བཀའ་བསྟན་རྡོ་བརྩིགས་མའི་མཐའ་འཁོར་དུ་ཞག་སྒྲོན་བསྒྲོན་ཏེ། རྒྱལ་གཅེས་དཔའ་བོ་དཔའ་མོ་རྣམས་ལ་མྱང་ངན་རྗེས་དྲན་དང་གསོལ་བ་སྨོན་ལམ་སོགས་གནང་ཡོད་པ་དེ་ནི། རྒྱལ་ཁབ་ཀྱི་ཁྲིམས་དང་འགལ་བའི་བྱ་སྤྱོད་ཅིག་ཡིན་པ་དང་། གལ་སྲིད་གྲྭ་བཙུན་རྣམས་ཀྱི་རྒྱལ་ཁབ་ཀྱི་སྒྲིག་བརྩི་སྲུང་ཡག་པོ་མ་བྱས་ཚེ། རྒྱ་གཞུང་གི་ངོས་འཛིན་ཡོད་པའི་གྲྭ་བའི་ཐོབ་ཐང་ལག་ཁྱེར་མཁན་རྣམས་དགོན་པ་ནས་ཕྱིར་འབུད་རྒྱུ་ཡིན་སྐོར་སོགས་བསྒྲགས་ཡོད་འདུག
རང་ལོ་ ༢༦ ཡིན་པའི་གྲྭ་ཁྲི་བཙན་ལགས་ནི། མཚོ་སྔོན་ཞིང་ཆེན་མགོ་ལོག་བོད་རིགས་རང་སྐྱོང་ཁུལ་དགའ་བདེ་རྫོང་རྡོ་ཁ་ཡུལ་ཚོའི་རྒྱ་སྐོར་སྨད་མ་སྡེ་
བའི་མ་ཕག་མོ་ལགས་ཀྱི་བུ་ཡིན་པ་དང་། ད་ཆར་སྟོང་སྐྱབས་དགོན་པའི་གྲྭ་བ་ཡིན་འདུག ཁོང་གི་སྨྱུག་མིང་ལ་ཁྲི་བོད་ཁྲག་ཟེར་ཞིང་། ཕྱི་ཟླ་ ༣ པའི་ཚེས་ ༨ ཉིན་ཁོང་གིས་བརྩམས་པའི་ <<བདེན་པའི་ཁ་རླངས>>ཞེས་པའི་དེབ་ཅིག་སྟོང་སྐྱབས་དགོན་པའི་ནང་དབུ་འབྱེད་འགྲེམས་སྤེལ་བྱས་ཡོད་འདུག དེབ་དེའི་ནང་སྔར་ལོའི་ཕྱི་ཟླ་ ༡ ཚེས་ ༨ ཉིན་མགོ་ལོག་དར་ལག་རྫོང་ཐོག་ཏུ། རྒྱ་གཞུང་གི་དྲག་གནོན་དབང་སྒྱུར་སྲིད་ཇུས་ལ་ཞི་བའི་ངོ་རྒོལ་གྱིས་རང་ལུས་མེར་བསྲེགས་གནང་སྟེ་སྐུ་གྲོངས་མཁན་སྟོང་སྐྱབས་དགོན་པའི་བླ་མ་སྤྲུལ་སྐུ་བསོད་བྷ་ལགས་ཀྱི་མཛད་རྣམ་དང་། དེ་བཞིན། བོད་མི་རིགས་ཀྱི་རང་དབང་བདེན་པའི་འཐབ་རྩོད་ཆེད་རང་ལུས་མེར་བསྲེགས་གནང་མཁན་རྒྱལ་གཅེས་དཔའ་བོ་དཔའ་མོ་རྣམས་ལ་རྗེས་དྲན་གདུང་འབོད་ཀྱི་རྩོམ་ཡིག་སོགས་བྲིས་ཡོད་འདུག
སྟོང་སྐྱབས་དགོན་པའི་ནང་ད་ཆར་རྒྱུན་བཞུགས་གྲྭ་པ་ ༢༠༠ ལྷག་དང་། རྒྱ་གཞུང་གི་ངོས་འཛིན་ལག་ཁྱེར་ཡོད་པའི་གྲྭ་པ་ ༡༠༠ ལྷག་ཡོད་འདུག
