རྒྱལ་སྤྱིའི་བོད་རང་བཙན་ལས་འགུལ་ཚོགས་པས་རྒྱལ་སྤྱིར་བོད་ནང་གི་ཛ་དྲག་གནས་སྟངས་དང་། རང་ལུས་མེར་བསྲེཊ་གནང་མཁན་ཚོའི་ཞལ་ཆེམས་དང་མངོན་འདོད་བསྒྲགས་ཕྱིར་ཞི་བའི་གོམ་བགྲོད་ཀྱི་ལས་འགུལ་ཞིག་སྤེལ་འདུག
ཟླ་འདིའི་ཕྱི་ཚེས་ ༢༣ ཉིན་རྒྱལ་སྤྱིའི་བོད་རང་བཙན་ལས་འགུལ་ཚོགས་པ་དང་ས་གནས་བོད་དོན་རྒྱབ་སྐྱོར་ཚོགས་པ་( Bay Area Friends of Tibet)། ས་གནས་བོད་རིགས་སྤྱི་མཐུན་ཚོགས་པ། ས་གནས་གཞོན་ནུ་བཅས་ཐུན་མོང་གི་གོ་སྒྲིག་འོག ཨ་རིའི་ནུབ་ཕྱོགས་མངའ་སྡེ་ཁ་ལེ་ཧྥོ་ནི་ཡཱའི་གྲོང་ཁྱེར་རོས་ཁཱ་མོན་ཌིར་ (Richmond) ནས་མགོ་འཛུགས་ཀྱིས་རྒྱང་ཐག་སྤྱི་ལེ་ ༡༠༨ ཡོད་པའི་གྲོང་ཁྱེར་སཱན་ཧྥི་རན་སི་ཀོ་ (San Francisco) བར་བོད་རང་བཙན་གྱི་གོམ་བགྲོད་ལས་འགུལ་ཞིག་མགོ་འཛུགས་གནང་ཡོད་འདུག
ལས་འགུལ་འདིའི་དམིགས་ཡུལ་གཙོ་བོ། བོད་ནང་རང་ལུས་མེར་བསྲེཊ་གནང་མཁན་རྒྱལ་གཅེས་དཔའ་བོ་དཔའ་མོ་རྣམས་ལ་གདུང་སེམས་མཉམ་སྐྱེད་བྱ་ཆེད་དང་། ཁོང་རྣམ་པའི་ཞལ་ཆེམས་དང་མངོན་འདོད་རྒྱལ་སྤྱིའི་ཐོག་དང་ཨ་རིའི་མ་མང་ལ་བརྒྱུད་བསྒྲགས་བྱ་ཆེད་ཡིན་འདུག་ལ། ཉིན་གྲངས་བརྒྱད་ཙམ་གྱི་ལས་འགུལ་ནང་ཨ་རི་བ་བཞི་དང་དགུང་ལོ་ ༧༣ ཡིན་པའི་ཨ་མ་གཡང་དཀར་ལགས་གཙོས་བོད་མི་ཁག་ཅིག་བཅས་མཉམ་ཞུགས་ཀྱིས་བོད་རྒྱལ་གཅེས་དཔའ་བོ་དཔའ་མོ་རྣམས་ཀྱི་ཞལ་ཆེམས་དང་མངོན་འདོད་བརྒྱུད་བསྒྲགས་བྱས་ཡོད་པ་དང་། སང་ཉིན་ཕྱི་ཚེས་ ༣༠ ཉིན་སཱན་ཧྥི་རན་སི་ཀོ་གྲོང་ཁྱེར་དུ་ཡོད་པའི་རྒྱ་ནག་དོན་གཅོད་ཁང་གི་མདུན་དུ་བོད་མི་དང་བོད་དོན་རྒྱབ་སྐྱོར་ལྷན་འཛོམས་ཐོག ཞི་བའི་ངོ་རྒོལ་དང་སྐད་འབོད་ཁྲོམ་སྐོར་གྱི་ལས་འགུལ་ཞིག་སྤེལ་ཏེ་ལས་འགུལ་མཇུག་སྒྲིལ་རྒྱུ་ཡིན་འདུག
ཐེངས་འདི་ནི་རྒྱལ་སྤྱིའི་བོད་རང་བཙན་ལས་འགུལ་ཚོགས་པས་གོ་སྒྲིག་བྱས་པའི་རང་བཙན་གོམ་བགྲོད་ཐེངས་ ༡༩ པ་དེ་ཆགས་ཡོད་འདུག
གསར་འགོད་པ། དོན་གོ
