རྡོར་གླིང་ས་གནས་ཀྱི་བོད་པའི་སློབ་ཕྲུག་གཉིས་ལ་སྤོག་རི་སྦོང་ས་གནས་མཛེས་རྩལ་འགྲན་བསྡུར་ཁྲོད་བྱ་དགའ་ཐོབ་ཡོད་འདུག
ཟླ་སྔོན་མའི་ཕྱི་ཚེས་ ༢༦ ཉིན་རྒྱ་གར་གྱི་ནུབ་བྷེན་གྷལ་(West Bengal)མངའ་སྡེའི་རྡོར་གླིང་ཁྱབ་ཁོངས་སྤོག་རི་སྦོང་ས་གནས་གཞོན་ནུ་རིག་རྩལ་ཚོགས་པས་ (YUWA PRATIVA SANGH) ། ས་གནས་ཀྱི་སློབ་གྲྭ་ཆེ་འབྲིང་ཆུང་གསུམ་ ༡༨ ལྷག་གི་སློབ་མར་ཞ་སྨྱུག་དང་ཚོན་རྩིའི་རི་མོའི་འགྲན་བསྡུར་ཞིག་གོ་སྒྲིག་གནང་ཡོད་པའི་ཁྲོད། བཙན་བྱོལ་བོད་མིའི་སྒྲིག་འཛུགས་སྤོག་རི་སྦོང་སཾ་བྷོ་ཊ་གཏན་སློབ་ཀྱི་སློབ་ཕྲུག་ཁག་ཅིག་མཉམ་ཞུགས་བྱས་ཏེ། མཐའ་མའི་མཛེས་རྩལ་འགྲན་བསྡུར་ཁྲོད་སྤོག་རི་སྦོང་སཾ་བྷོ་ཊ་གཏན་སློབ་ཀྱི་འཛིན་གྲྭ་ལྔ་པའི་སློབ་མ་བསྟན་འཛིན་ཆོས་སྒྲོན་ལ་ཨང་གཉིས་པ་དང་། བསོད་ནམས་ཆོས་སྐྱིད་ལ་ཨང་གསུམ་པ་ཐོབ་སྟེ་གཟེངས་རྟགས་བྱ་དགའ་དང་ཕྱག་འཁྱེར་བཅས་བསྩལ་ཡོད་འདུག་ལ། གནས་ཚུལ་དེ་ཧི་མ་ལ་ཡའི་མེ་ལོང་ (HIMALAYAN DARPAN) ཞེས་པའི་ས་གནས་ཀྱི་ཚགས་ཤོག་སྟེང་བཀོད་འདུག
