རྒྱ་ནག་གཞུང་གིས་ནགས་ཆུའི་ཆབ་སྲིད་བཙོན་པ་ཟླ་བ་རྒྱལ་མཚན་ལགས་ལོ་བཅུ་དྲུག་རིང་བཙོན་འཇུག་བྱས་ཏེ་ཉེ་ལམ་གློད་ཀྲོལ་བཏང་ཡོད་འདུག
རྒྱ་ནག་གཞུང་གིས་ཕྱི་ལོ་ ༡༩༩༥ ལོར་བོད་རང་བཙན་གྱི་སྦྱར་ཡིག་བཀྲམས་པའི་ཉེས་མིང་འོག་འཛིན་བཟུང་དང་། ༡༩༩༧ ལོར་ལོ་ ༡༨ གྱི་བཙོན་འཇུག་ཁྲིམས་ཐག་བཅད་ཡོད་པའི་ནགས་ཆུ་ས་ཁུལ་གྱི་རང་ལོ་ ༤༧ ཡིན་པའི་ས་གནས་ཀྱི་དངུལ་ཁང་གི་རྩིས་པ་འཇིགས་མེད་རྒྱལ་མཚན་ལགས། འདས་པའི་ལོ་ ༡༦ རིང་བཙོན་འཇུག་གིས་མནར་གཅོད་ཚད་མེད་བཏང་སྟེ། ཟླ་བ་སྔོན་མའི་ནང་རྒྱ་གཞུང་གིས་དུས་བཀག་བཙོན་འཇུག་གི་དུས་ཡུན་ལོ་ ༢ ལས་ལྷག་མེད་པའི་སྐབས་སུ་གློ་བུར་གློད་ཀྲོལ་བཏང་ཡོད་འདུག
རྒྱ་ནག་གཞུང་གིས་ཟླ་བ་རྒྱལ་མཚན་ལགས་འཛིན་བཟུང་བྱེད་སྐབས། ཁོང་གི་སྤུན་མཆེད་གྲྭ་ཉི་མ་དོན་འགྲུབ་དང་། དེ་མིན་གྱི་བོད་མི་གཅིག་ལ་ལོ་ ༨ ནས་ ༡༥ བར་གྱི་བཙོན་འཇུག་ཁྲིམས་ཐག་བཅད་ཡོད་འདུག་ལ། ཉེ་སྔོན་ཟླ་བ་རྒྱལ་མཚན་ལགས་བཙོན་ཁང་དུ་སྡོད་རིང་སྤྱོད་པ་ཡག་པོ་ཡོད་པའི་དབང་གིས་དུས་བཀག་བཙོན་འཇུག་གི་དུས་ཡུན་མ་ཚང་ཡར་སྔོན་དུ་གློད་གྲོལ་བཏང་ཡོད་པ་ཙམ་ལས་ཞིབ་ཕྲའི་གནས་ཚུལ་བརྗོད་མེད་ཀྱང་། ས་གནས་བོད་མི་ཚོས་རྒྱ་གཞུང་གིས་ཁོང་བཙོན་ཁང་དུ་སྡོད་རིང་གཅར་རྡུང་མནར་གཅོད་ཚད་མེད་བཏང་སྟེ་རྐང་པ་ཡ་གཅིག་ནད་གཅོང་དུ་གྱུར་ཏེ། ཉེ་ལམ་བར་བདག་པོ་མ་བརྒྱབ་པར་ན་ཚ་ཇེ་སྡུག་ཏུ་ཕྱིན་པའི་དབང་གིས་གློད་ཀྲོལ་བཏང་ཡོད་པར་ངོས་འཛིན་བྱེད་ཀྱི་ཡོད་འདུག
ཉེ་ལམ་རང་ཁྱིམ་དུ་འབྱོར་སྐབས་ཟླ་བ་རྒྱལ་མཚན་ལགས་ཀྱི་གཟུགས་པོའི་གནས་སྟངས་ཧ་ཅང་སྐྱོ་བོ་ཆགས་ཡོད་པ་མ་ཟད། ད་ཆར་ཁོང་གི་ནང་མིར་འཚོ་བའི་ཐོག་དཀའ་ངལ་འཕྲད་ཀྱི་ཡོད་སྐོར་འབྲེལ་ཡོད་མི་སྣ་ཞིག་གིས་གསར་ལམ་དུ་བརྗོད་འདུག
ཁོང་ཉིད་བཙོན་ཁང་ནས་ཕྱིར་ཐོན་པར་བཀྲིས་བདེ་ལེགས་ཞུ།