ཁ་སང་གཟའ་མིག་དམར་ཉིན་སེར་བྷེ་ཡཱའི་བྷེལ་གྷི་རེ་ཌེ་ས་གནས་ཀྱི་གྲོང་ཚོ་ཞིག་ཏུ་མེ་མདའི་དོན་རྐྱེན་བྱུང་སྟེ། མི་ ༡༣ རྐྱེན་ལམ་དུ་ཕྱིན་འདུག
ཁ་སང་ཕྱི་ཚེས་ ༩ ཉིན་སེར་བྷེ་ཡ་ (Serbia) བྷེལ་གྷི་རེ་ཌེ་ (Belgrade) ས་གནས་གྲོང་ཚོའི་མི་ཞིག་གིས། རང་ཉིད་ཀྱི་ནང་མི་དང་ཁྱིམ་མཚེས་སོགས་མི་ ༡༣ ལ་མེ་མདའ་བརྒྱབ་སྟེ་དམར་གསོད་བཏང་བའི་དོན་རྐྱེན་ཞིག་བྱུང་ཡོད་པ་དང་། ས་གནས་ཉེན་རྟོག་པས་མི་དེ་རང་ལོ་ ༦༠ དང་། མིང་ལ་ཇུ་བྷེ་སཱ་ (Ljubisa Bogdanovic) ཟེར་བ་དང་། སེར་བྷེ་ཡའི་དམག་མི་ཟུར་པ་ཞིག་ཡིན་སྐོར་བརྗོད་འདུག ཁ་སང་ཁོས་ལག་པར་མེ་མདའ་ཐུང་བ་ཞིག་བཟུང་སྟེ་ཐོག་མར་རང་ཉིད་ཀྱི་ཨ་མ་དང་བུ་གཉིས་བསད་རྗེས་ཐད་གར་ཁྱིམ་མཚེས་ཚོའི་སྒོ་རྡུང་ཡོད་ཅིང་། སྒོ་ཕྱེས་སྐབས་གང་བྱུང་མེ་མདའ་བརྒྱབ་སྟེ་སྐྱེས་པ་ ༦ དང་བུད་མེད་ ༦ ། ལོ་གཉིས་ཅན་གྱི་བྱིས་པ་གཅིག་བཅས་ཁྱོན་མི་ ༡༣ དམར་གསོད་བཏང་མཐར། ཁོས་རང་གི་བཟའ་ཟླ་དང་རང་ཉིད་ལ་མེ་མདའ་བརྒྱབ་སྟེ་འཆི་རྩིས་བྱས་ཡོད་ཀྱང་། རྨས་སྐྱོན་ཚབས་ཆེན་ཕོག་ཡོད་པ་ལས་ཤི་རྐྱེན་མ་བྱུང་བར་ཉེན་རྟོག་པས་སྨན་ཁང་དུ་བསྐྱལ་ཡོད་འདུག
དེའི་ཐད་གྲོང་ཚོའི་དེའི་རཱ་ཌོ་ཝན་ཟེར་བ་ཞིག་གིས་གསར་ལམ་དུ། “ ཁོ་དུས་རྒྱུན་ཁྱིམ་མཚེས་ཡག་པོ་ཞིག་ཡིན་སྟབས། ཁོས་སྒོ་རྡུང་སྐབས་མི་ཚང་མས་སྒོ་ཕྱེ་ཀྱི་ཡོད་ཀྱང་། ཐེངས་འདིར་རྒྱུ་མཚན་ཅི་ཞིག་གི་དབང་གིས་བྱུང་བ་ཤེས་མ་སོང་ ”ཞེས་བརྗོད་འདུག་ལ། འབྲེལ་ཡོད་ཉེན་རྟོག་པས་ཀྱང་ཁོང་དང་ནང་མིར་ཉེས་དོན་རིགས་ཀྱི་གནས་ཚུལ་གང་ཡང་བྱུང་མྱོང་མེད་པ་དང་། སེམས་ཁམས་བདེ་མིན་གྱི་གནས་ཚུལ་རིགས་ཀྱང་མེད་སྐོར་བརྗོད་འདུག
གསར་འགོད་པ། བནྡེ་སྐྱབས།
