མདོ་སྨད་བླ་བྲང་བསང་ཁོག་འབྲོག་སྡེ་རུ་མ་འོངས་པའི་ལོ་ལྔའི་རིང་རྐུ་འཕྲོག་བཅོམ་གསུམ་དང་ཤོ་རྒྱག་རྒྱན་འཛུགས་མི་བྱེད་པའི་དམ་བཅའ་བཞག་འདུག
ཁ་སང་ཕྱི་ཟླ་ ༤ ཚེས་ ༡༠ སྟེ། ལྷག་དཀར་ཉིན་དང་བསྟུན་ཏེ་མདོ་སྨད་ཀན་ལྷོ་ཁུལ་བསང་ཆུ་རྫོང་བསང་ཁོག་ཚོ་བ་བདུན་གྱི་རྒན་པོ་ལོ་ན་ ༦༠ མན་དང་གཞོན་པ་རང་ལོ་ ༡༥ ཡན་གྱིས་ཡུལ་གྱི་སྲུང་མ་ཨ་མ་གྲགས་རྒྱལ་མའི་ལྷ་ཁང་མདུན་དུ་བསང་གསོལ་ཆེན་པོ་ཞིག་དང་ལྷན་དུ། ལྷ་ཁང་གི་སྐུ་བརྙན་ལ་ཁ་བཏགས་སྒྲོན་ཏེ། ཉི་མ་དེ་རིང་ནས་བཟུང་འབྱུང་འགྱུར་ལོ་ལྔའི་རིང་ཕྱི་ནང་གཉིས་སུ་རྐུ་འཕྲོག་བཅོམ་གསུམ་དང་ཤོ་རྒྱག་རྒྱན་འཛུགས་རིགས་མི་བྱེད་པའི་མནའ་སྐྱེལ་དམ་བཅའ་བཞག་ཡོད་འདུག
ཐེངས་འདིའི་མནའ་སྐྱེལ་དམ་འཇོག་འདི་ཡུལ་མིའི་མགོ་འཛིན་གྲངས་ ༡༡༡ གི་འགན་ཁུར་འོག་བཞག་པ་ཞིག་ཡིན་འདུག་ལ། མནའ་སྐྱེལ་དམ་བཅའ་དེར་ “ཡོངས་བསྒྲགས་བརྡ་ཁྱབ་ཁྱུང་གཤོག་དྲུག་དཀར་”ཞེས་པའི་རྩ་འཛིན་ཡིག་ཆ་དོན་ཚན་ ༣ ཅན་ཞིག་གཏན་འབེབས་བྱས་ཡོད་ཡོད་པའི་ནང་། དོན་ཚན་དང་པོའི་ནང་ཕྱི་ལོ་ ༢༠༡༣ ཟླ་ ༤ ཚེས་ ༡༠ ནས་ ༢༠༡༨ ལོའི་ཟླ་ ༤ ཚེས་ ༡༠ བར་མནའ་སྐྱེལ་དམ་བཅའ་འདི་ཉིད་བརྩི་སྲུང་བྱ་དགོས་པར་བཀོད་འདུག་ལ། དོན་ཚན་གཉིས་པའི་ནང་གོང་གསལ་དུས་ཡུན་དེའི་རིང་ཕྱི་ནང་བོད་རྒྱ་སོག་གསུམ་གྱི་ཡུལ་གང་དུ་ཡང་རང་ཉིད་ཀྱི་རྩོལ་བ་མ་ཡིན་པའི་རྒྱུ་ནོར་ཅ་དངོས་ཆུང་བ་ཁབ་སྐུད་ནས་ཆེ་བ་གསེར་དངུལ་སོགས་གཞན་ལ་བདག་པའི་ནོར་དིལ་འབྲུ་ཙམ་ཡང་རྐུ་འཕྲོད་བཅོམ་གསུམ་མི་བྱེད་པ་མ་ཟད། མི་གཞན་ལ་བརྒྱུད་སྐུལ་རིགས་ཀྱང་མི་བྱེད་པའི་རྩ་ཚིག་གསལ་འདུག
དོན་ཚན་གསུམ་པའི་ནང་། དུས་ཡུན་ལོ་ ༥ ནང་མནའ་སྐྱེལ་དམ་བཅའ་དང་འགལ་རིགས་བྱུང་ཚེ། བརྐུས་པའི་རྒྱུ་ནོར་གང་དེའི་མ་རྩའི་བརྒྱ་ཆ་ ༡༠ དང་བཅས་ཕྱིར་རྒྱུ་བདག་ལ་སྤྲོད་དགོས་པ་མ་ཟད། རྐུ་རོགས་སུ་དང་གང་ཡོད་པ་དག་གི་དངོས་མིང་དང་བརྐུས་པའི་རྒྱུ་ནོར་བཅས་ཡི་གེར་ཕབ་སྟེ་རྒྱང་བསྒྲགས་དང་གྱང་ངོས་སོགས་སུ་སྦྱར་རྒྱུའི་རྩ་འཛིན་བཀོད་འདུག
གནས་ཚུལ་མཁོ་སྤྲོད་པས་བརྗོད་པ་ལྟར་ན། མནའ་སྐྱེལ་དམ་འབུལ་གྱི་ལས་འགུལ་དེ་ནི་བོད་མིའི་མཐུན་ལམ་རྡོག་རྩ་ཆིག་བསྒྲིལ་དང་། བོད་དང་བོད་མིའི་ཆེད་འདས་ཟིན་པའི་རྒྱལ་གཅེས་དཔའ་བོ་དཔའ་མོ་རྣམ་པའི་ཞལ་ཆེམས་དང་མངོན་འདོད་བསྒྲུབ་ཆེད་ཡིན་འདུག
གསར་འགོད་པ། བནྟེ་སྐྱབས།
བོད་ནང་གི་དཔའ་བོ་རྣམས་ཀྱི་མཛད་རྗེས་ལ་མངོན་པར་བསྟོད་དོ། གསར་འགྱུར་འདི་འབྲི་སྟངས་མ་འགྲིག་པ་ཡིན་ནམ་གང་ཡིན་མི་ཤེས། ལོ་ལྔའི་ནང་ལ་རྐུ་འཕྲོག་མི་བྱེད་ཟེར་དུས། ལོ་ལྔའི་རྗེས་སུ་རྐུ་འཕྲོག་བྱ་རྒྱུ་ཡིན་པའི་གོ་དོན་ཞིག་ཟུར་ནས་དོན་ཡོང་གི་མི་འདུག་གམ། གྲོགས་པོ་ཚང་མའི་ཚོར་སྣང་ག་འདྲ་འདུག
ཧ་ཅང་ལེགས།
བོད་ནང་ནས་ལྷག་དཀར་ལས་འགུལ་སྤེལ་སྟངས་འདི་འདྲ་རེད། བཙན་བྱོལ་སྤྱི་ཚོགས་ནང་དུ་སྔོན་མ་ལྷག་དཀར་ཚ་ཚ་འུར་འུར་འདྲ་ཞིག་བྱས་སོང་ཡང་། བར་སྐབས་ཤིག་ནས་གྲགས་འགུལ་མེད་པ་ཆགས་སོང་། ལྷག་པར་དུ་རྒྱན་འཛུགས་ཤོ་རྒྱག་ཟེར་བ་འདི་བོད་ནས་ལས་བཙན་བྱོལ་ནང་སྡུག་ཤོས་རེད་རྒྱུ་རེད་བསམ་གྱི་འདུག། རྡ་རམ་ས་ལའི་གཡས་གཡོན་ཚང་མར་རྒྱན་འཛུགས་དང་ཤོ་རྒྱག་ས་ཁེངས་འདུག གངས་ཅན་སྐྱིད་གཤོང་གཡས་གཡོན་ནའང་འགའ་རེ་ཡོད་པ་ཞིག་གོ་སོང་། དེ་ལས་སྡུག་ཤོས་གཅིག་ནི་རྡ་རམ་ས་ལའི་ཨ་མདོའི་གྲོང་གསེབ་ལམ་ཁའི་ས་ཁང་ཞིག་ཏུ་ཤོ་ཁང་ཞེད་སྣང་ཚ་བོ་ཞིག་འདུག ད་དུང་ཤོ་ཁང་དེའི་བདག་པོ་སྔོན་ཆད་གསོག་སྒར་སློབ་གྲྭའི་བོད་དགེ་ཞིག་རེད་ཟེར། འདི་དག་རྩ་མེད་བཟོ་དགོས་པ་རེད། སྤྱི་ཚོགས་རུལ་སུངས་སུ་གཏོང་གི་ཡོད་པ་རེད།