གྲོས་ཚོགས་འདི་སྨད་འཚོང་མ་ཞིག་རེད།

བཀྲ་ཤིས་འཇིགས་མེད།

མང་གཙོ་ནི་སྐྱེ་བུའི་མངོན་འདོད་སྒྲུབ་པའི་ཐབས་ཤེས་བཟང་ཤོས་སུ་བརྩི་ཞིང་། དེའི་མཚོན་རྟགས་ལེགས་ཤོས་གྲོས་ཚོགས་རེད། དུས་རབས་ཉི་ཤུ་བའི་ནང་དབྱིན་ཡུལ་གྱི་གྲོས་ཚོགས་ནི་དུས་སྐབས་དེའི་མང་གཙོའི་མཚོན་རྟགས་ཆེ་ཤོས་སུ་ངོས་འཛིན་དང་གུས་བཀུར་ཞུ་ཡུལ་ཞིག་ཡིན། ཕྱི་ལོ་ ༡༩༠༩ ལོར་བདག་ཉིད་ཆེན་པོ་གྷ་ངྷིས་དེང་རབས་ཀྱི་སྤྱི་ཚོགས་དཔལ་ཡོན་འདིས་རྒྱ་གར་གྱི་འབྱུང་འགྱུར་ལ་ཕན་ཐོགས་གང་ཡང་མེད་ཚུལ་བརྗོད་བྱར་བྱས་པའི་བསྟན་བཅོས་གྲགས་ཅན་ཧིནྡསྭརཱཇ་ཞེས་པ་གསར་རྩོམ་གནང་ཞིང་། བསྟན་བཅོས་དེའི་ནང་དབྱིན་ཇི་ཚོས་ངོམ་ངོམ་བྱེད་པའི་མང་གཙོའི་མཚོན་རྟགས་ཀྱི་གྲོས་ཚོགས་དེར་རབས་ཆད་མ་དང་། སྨད་འཚོང་མ་ཞེས་མིང་འདོགས་བྱས་པས་མི་ཚང་མ་ཧང་སང་དུ་བཅུག་ཡོད། མི་མང་གིས་འོས་འདེམས་བྱས་པའི་འཐུས་མི་ལྷན་ཚོགས་ཀྱི་རྭ་བ་དེར་མིང་འདི་འདྲའི་རྩུབ་པོ་ཞིག་ཐོགས་རྒྱུ་ཡིན་པ་སྐྱེ་བོ་མང་པོ་ཞིག་གི་བསམ་པའི་ཡུལ་ན་མེད། སྤྱིར་དུས་སྐབས་དེའི་ནང་གྷ་དྷིའི་བསྟན་བཅོས་ཀྱི་བརྗོད་དོན་ཧྲིལ་པོར་སྐྱེ་བོ་སུས་ཀྱང་ངོས་ལེན་བྱེད་དཀའ་བ་ཞིག་རེད། གྲོས་ཚོགས་ལ་རབས་ཆད་མ་དང་སྨད་འཚོང་མའི་མིང་བཏགས་པ་ནི་དེ་བས་བཟོད་དཀའ་བ་ཞིག་ཡིན་པ་སྨོས་ཅི་དགོས། དེ་ནི་བསྟན་བཅོས་འདི་བརྩམས་ནས་ལོ་ཉི་ཤུ་ལྷག་ཕྱིན་པའི་རྗེས་སུ་དབྱིན་ཇིའི་བུད་མེད་ཅིག་གིས་འབོད་སྐུལ་ཞུས་པ་བཞིན་གྷ་དྷིས་མིང་འདི་ཕྱིར་འཐེན་བྱེད་རྒྱུ་ཡིན་ཞེས་བརྗོད་པ་ལས་ཤེས་ཐུབ།

ཡིན་ནའང་གྷ་དྷིས་གྲོས་ཚོགས་ལ་རབས་ཆད་མ་དང་སྨད་འཚོང་མ་ཞེས་མིང་འདོགས་གནང་ནས་ལོ་ ༡༠༠ ལྷག་ཕྱིན་པའི་དེ་རིང་གི་ཉིན་མོར་ང་ཚོས་གྲོས་ཚོགས་དང་། རབས་ཆད་མ། སྨད་འཚོང་མ་ཞེས་པའི་མིང་དོན་གྱི་འབྲེལ་བ་འདི་ཅི་འདྲའི་འོས་ཤིང་འཚམས་པ་ཞིག་ཡིན་པ་མཐོང་ཐུབ། བདག་ཉིད་ཆེན་པོས་གྲོས་ཚོགས་ལ་རབས་ཆད་མ་ཞེས་བརྗོད་དགོས་དོན་ནི་གྲོས་ཚོགས་དེས་ད་བར་རང་ངོས་ནས་ལས་དོན་སྣེ་གཅིག་སྒྲུབ་མྱོང་མེད་པ་དང་། ཕྱི་ནས་གནོན་ཤུགས་མ་བྱུང་ན་གང་ཡང་མི་བྱེད་པ་དེ་གྲོས་ཚོགས་ཀྱི་རང་བཞིན་ཡིན་པ་དང་། སྨད་འཚོང་མ་ཞེས་འབོད་དོན་ནི་བློན་ཆེན་སུས་ཉར་ཡང་དེའི་གམ་དུ་གནས་ཤིང་། དེ་རིང་བློན་ཆེན་ཀ་པའི་ཞབས་ཞུ་བསྒྲུབས་ནའང་སང་ཉིན་བློན་ཆེན་ཁ་པའི་རྐུབ་ལ་རྒྱུག་སྲིད་པ་གསུངས་ཡོད། འདི་ནི་དེང་རབས་དམངས་གཙོའི་གྲོས་ཚོགས་ཀྱི་ལས་དོན་བྱེད་ཕྱོགས་ལ་ནག་ཐིག་བཏབ་པ་རང་ཡིན། གལ་ཏེ་དེང་རབས་ཡར་ཐོན་ཅན་གྱི་དམངས་གཙོའི་མཚོན་རྟགས་ཆེ་ཤོས་སུ་ངོས་འཛིན་བྱེད་པའི་གྲོས་ཚོགས་དེ་ཚོར་རབས་ཆད་མ་དང་སྨད་འཚོང་མའི་མིང་དོན་གྱི་འབྲེལ་བ་གྲུབ་ཀྱི་ཡོད་ན།བཙན་བྱོལ་བོད་མིའི་དམངས་གཙོའི་མཚོན་རྟགས་ཆེ་ཤོས་སུ་བརྩི་བའི་གྲོས་ཚོགས་ཆུང་ཆུང་འདི་ལ་ཡང་སྨད་འཚོང་མ་དང་རབས་ཆད་མའི་མིང་འདོགས་བྱས་ན་ཆོག་གམ།

ང་ཚོའི་གྲོས་ཚོགས་ནི་ཤར་ནུབ་ཀྱི་དམངས་གཙོའི་ལམ་སྲོལ་མང་པོ་ཞིག་ནས་ལེགས་ཆ་བླངས་ཏེ་བཙུགས་པར་བརྟེན་ཇི་ལྟར་དབྱིན་ཡུལ་དང་རྒྱ་གར་གྱི་གྲོས་ཚོགས་ལ་མིང་དེ་གཉིས་འཇུག་པ་བཞིན་དུ་ང་ཚོའི་གྲོས་ཚོགས་ལ་ཡང་འཇུག་གི་རེད། གལ་སྲིད་ང་ཚོའི་གྲོས་ཚོགས་ཀྱིས་གཞན་གྱི་གནོན་ཤུགས་ལ་མ་ལྟོས་པར་རང་ངོས་ནས་ལས་དོན་ཧུར་ཐག་སྒྲུབ་ཚེ་ང་ཚོའི་གྲོས་ཚོགས་ལ་རབས་ཆད་མའི་མིང་འདོགས་དོན་མེད།གལ་ཏེ་ང་ཚོའི་གྲོས་ཚོགས་བློན་ཆེན་སུ་གང་གི་ཡང་རྐུབ་ལ་མ་རྒྱུག་པར་རང་ཚུགས་བཟུང་ནས་བསྡད་ན་སྨད་འཚོང་མའི་མིང་འདོགས་དོན་མེད།

ཡང་བདག་ཉིད་ཆེན་པོས་གྲོས་ཚོགས་ཀྱི་འཐུས་མི་ཚོས་བསམ་བློ་མ་བཏང་བར་རང་ཕྱོགས་ལ་འོས་ཤོག་སྤྲོད་རྐྱང་བྱེད་ཅིང་། དེ་འདྲ་མ་བྱས་ཀྱང་ཀ་མེད་རེད། ཅེས་གསུངས་ཡོད། གལ་སྲིད་ང་ཚོའི་གྲོས་ཚོགས་འཐུས་མི་ཚོས་བསམ་བློ་མ་བཏང་སྔོན་ནས་རང་ཕྱོགས་ལ་འོས་ཤོག་སྤྲོད་པའམ། རྒྱབ་སྐྱོར་མཚོན་བྱེད་ཀྱི་སྨྲ་བརྗོད་མ་སྤེལ་བར་ཟུར་གནས་ཀྱི་བསམ་གཞིགས་བྱེད་ཐུབ་ན་ང་ཚོའི་གྲོས་ཚོགས་འདི་རབས་ཆད་མ་དང་སྨད་འཚོང་མའི་མིང་འཇུག་སའི་གྲོས་ཚོགས་དེ་ཚོའི་རྭ་བ་ལས་བརྒལ་ཟིན་པས་ང་ཚོས་ད་དུང་རབས་ཆད་མ་དང་སྨད་འཚོང་མའི་མིང་འདོགས་བྱས་ན་རང་ཉིད་ངོ་ནོང་སྐྱེ་དགོས་པ་ཞིག་རེད། འོན་ཀྱང་ཡིད་ཕང་བ་ཞིག་ལ་ང་ཚོའི་གྲོས་ཚོགས་འདི་ཡང་ཤར་ནུབ་ཀྱི་གྲོས་ཚོགས་མང་པོ་དང་འདྲ་བར་རབས་ཆད་མ་དང་སྨད་འཚོང་མ་རང་རེད།

ང་ཚོས་འདས་མ་ཐག་པའི་སྐབས་བཅོ་ལྔ་པའི་གྲོས་ཚོགས་ཚོགས་དུས་ལྔ་པའི་བརྒྱུད་རིམ་ལས་དཔེ་མཚོན་ཆུང་ཆུང་འགའ་ཞིག་བཀོད་ན། འཐུས་མི་མང་པོས་ཉེ་བའི་འཆར་སྲི་ཞུ་བ་གསར་བསྡུ་བྱེད་སྐབས་ཡིག་རྒྱུགས་སྔོན་གཟབ་སྦྱོང་ཟླ་བ་དྲུག་ཙམ་སྤྲད་ནས་གསར་བསྡུ་བྱེད་པའི་ལམ་སྲོལ་དེ་ནི་འཛིན་སྐྱོང་གི་ལྟ་གྲུབ་ཆེན་པོ་གསུམ་ལས་གསར་གཏོད་ཀྱི་ཁོངས་སུ་གཏོགས་པའི་ལས་དོན་ཞིག་ཡིན་པ་དང་གྲུབ་འབྲས་བྱུང་བའི་ལས་དོན་ཞིག་རེད་ཅེས་བསྔགས་བརྗོད་ཆེན་པོ་གནང་ཡོད། ཡིན་ནའང་གཞི་རིམ་ནང་ལས་དོན་འདིའི་བརྒྱུད་རིམ་ཐོག་ཡ་མཚན་སྐྱེ་བའི་གནས་ཚུལ་མང་པོ་བྱུང་ཡོད། གཟབ་སྦྱོང་ལ་འདེམས་ཐོན་བྱུང་བའི་མི་དེ་དག་ས་རཱ་མཐོ་སློབ་ཏུ་གཟབ་སྦྱོང་མགོ་འཛུགས་བྱས་ཏེ་གང་ཙམ་ཕྱིན་རྗེས་སྲི་ཞུ་བའི་ཡིག་རྒྱུགས་ས་དམིགས་བསལ་བསྒྲགས་བྱས་ཡོད། གསལ་བསྒྲགས་ནང་དེ་སྔ་སྲི་ཞུ་བའི་རྒྱུགས་སྤྲོད་ཀྱི་ལམ་སྲོལ་ནང་མེད་པའི་གསར་གཏོད་ཅིག་བྱས་ཡོད་པ་ནི་རྩིས་ཀྱི་རྒྱུགས་སྤྲོད་དེ་ཡིན། དེ་ནི་རང་དབང་ཅན་གྱི་སྡེ་ཚན་གཞུང་ཞབས་འདེམས་ལྷན་ནས་བཀའ་ཤག་གི་དགོངས་དོན་བཞིན་བྱས་པ་ཡིན་ཞེས་བརྗོད་པ་དེ་ནི་ཡ་མཚན་དང་པོ་དེ་རེད།

དེ་ནས་སྲི་ཞུ་བའི་ས་དམིགས་བསལ་བསྒྲགས་བྱེད་ཕྱོགས་དེ་རེད། ཡོང་ཁྱབ་ཀྱི་བསལ་བསྒྲགས་ནང་དྲུང་གཞོན་གྱི་ས་དམིགས་དགུ་ཡོད་པར་བརྗོད་ཡོད། ཡིན་ནའང་ས་རཱར་ཡོད་པའི་གཟབ་སྦྱོང་བ་ཚོར་ངག་ཐོག་ནས་དྲུང་གཞོན་གྱི་ས་དམིགས་ ༡༣ ཡོད་ཅེས་གསུངས་ཡོད། གཟབ་སྦྱོང་བ་འགའ་ཤས་ནས་གསལ་བསྒྲགས་ནང་དགུ་ལས་མི་འདུག་འདིར་བཅུ་གསུམ་ཡོད་ཟེར་གྱི་འདུག་པ་དེ་གང་འདྲ་ཡིན་ནམ་ཞེས་བཀའ་འདྲི་ཞུ་སྐབས། ཁ་མ་མང་ང་ཚོས་ཡོད་རེད་ཟེར་དུས་ཡོད་པ་རེད་ཅེས་བཤད་འདུག་འདི་ཡ་མཚན་གཉིས་པ་དེ་རེད། ཡིན་ནའང་རྗེས་སུ་ལབ་གླེང་མང་པོ་བྱུང་བས་དགུ་རང་ལ་བཞག་དགོས་བྱུང་ཡོད། དེ་ནས་ཡང་གསལ་བསྒྲགས་ཤིག་ཏུ་གཟབ་སྦྱོང་ལ་ཚུད་པ་ཚོར་རང་བཞིན་གྱི་བརྒྱ་ཆ་ལྔའི་ཐོབ་བྱ་ཡོད་པའི་སྐོར་དེ་རེད། གསལ་བསྒྲགས་འདི་ཡང་རྒྱ་བོད་ཡིག་རིགས་སོ་སོར་ནང་དོན་མི་འདྲ་བ་ཡོད། ཐོབ་བྱ་བརྒྱ་ཆ་ལྔ་ཡོད་ཀྱང་ཐོབ་སྟངས་དེ་བརྒྱ་ཆ་ལྔ་བཅུ་བརྒལ་ཟིན་པའི་སྟེང་དུ་བསྣན་རྒྱུ་ཡིན་པ་བརྗོད་ཡོད། ཡིན་ནའང་རྗེས་སུ་བརྒྱ་ཆ་དངོས་སུ་སྡོམ་སྐབས་གཟབ་སྦྱོང་བ་མང་པོ་རྒྱ་ཆ་ལོང་མེད་པས་ཁོང་ཚོའི་ཐོབ་བྱའི་བརྒྱ་ཆ་ལྔ་པོ་དེ་གང་ན་མ་ལོང་བ་དེའི་ཐོག་ཏུ་བསྣན་པ་མ་ཟད་རྩ་བའི་བརྒྱ་ཆ་ལྔ་བཅུ་ལོན་མེད་པའི་ཐོག་ཏུ་ལོན་ཐབས་སུ་བསྣན་ཡོད། ཐོག་མར་གཞུང་ཞབས་ཞུ་མུས་ཡིན་པ་ཡིག་རྒྱུགས་གཏོང་མཁན་ཚོར་བརྒྱ་ཆ་ལྔ་སྤྱི་མཚུངས་ཡོད་ཁུལ་བཤད་ཀྱང་དོན་དངོས་སུ་གང་བྱས་གསལ་པོ་མེད། དེ་ནི་ཡ་མཚན་གསུམ་པ་དེ་རེད། དེ་ནས་ཡིག་རྒྱུགས་གཏོང་སྐབས་སུ་གཞུང་ཞབས་ཞུ་མུས་ཡིན་པ་ཡིག་རྒྱུགས་གཏོང་མཁན་ཚོར་རྩིས་ཀྱི་ཡིག་རྒྱུགས་ཡོད་མེད་ཐག་གཅོད་དེ་སྲི་ཞུ་བ་ཡིག་རྒྱུགས་གཏོང་མགོ་ཚུགས་དུས་ཀྱང་ཐག་མ་ཆོད་པར་ངང་འཐེན་གྱིས་གོ་བསྡུར་བྱ་དགོས་བྱུང་ཡོད་པ་དེ་ནི་ཡ་མཚན་བཞི་པ་དེ་རེད། ད་དུང་ཡིག་རྒྱུགས་གྲུབ་འབྲས་ཕྱིར་བསྒྲགས་སྐབས་ཀྱང་ཡིག་རྒྱུགས་གཏོང་མཁན་འགའ་ཤས་ཐོག་མར་མ་འཕྲོད་པའི་ཁོངས་སུ་བཞག་པ་དང་། ཡང་ཉིན་ཤས་སོང་རྗེས་ཁྱེད་རང་ཡིག་རྒྱུགས་འཕྲོད་འདུག་ཅེས་ལན་གཞི་ནས་སྤྲད་པ་ཡང་བྱུང་ཡོད། དེ་ནི་ཡ་མཚན་ལྔ་པ་དེ་རེད། སྲི་ཞུ་ལས་བྱེད་གསར་བསྡུ་བྱ་ཕྱོགས་ཀྱི་བརྒྱུད་རིམ་ཆུང་ཆུང་ཞིག་ལ་གླེང་གཞི་འདི་ལྟ་བུ་བྱུང་བ་འདི་ཚོ་གྲོས་ཚོགས་ནང་གླེང་བའི་སྐབས་ཡོད་ཀྱང་གླེང་མཁན་སུ་གཅིག་བྱུང་མེད།

ད་དུང་ཤེས་ཡོན་སྲིད་བྱུས་དང་འབྲེལ་ཡོད་ཀྱི་ཡ་མཚན་འགའ་ཤས་བརྗོད་ན། ཤེས་ཡོན་སྲིད་བྱུས་ནི་བོད་མི་མང་སྤྱི་འཐུས་ལྷན་ཚོགས་ནས་སྤྱི་མོས་གཏན་འབེབས་གནང་བའི་སྲིད་བྱུས་ཤིག་ཡིན། ཤེས་ཡོན་སྲིད་བྱུས་ཀྱི་དགོངས་དོན་གཙོ་བོ་ཞིག་ནི་སློབ་སྦྱོང་གི་གྲུབ་འབྲས་མཚུངས་བསྡུར་མི་བྱེད་པ་དང་། བརྒྱ་ཆ་གཙོར་བཟུང་མི་བྱེད་པ་དེ་ཡིན། འོན་ཀྱང་མཐོ་སློབ་ཀྱི་སློབ་ཡོན་རྣམས་བརྒྱ་ཆ་གཙོར་བཟུང་བྱས་ཏེ་སྤར་གཅོག་བྱས་པ་དེ་བོད་མི་མང་སྤྱི་འཐུས་ཀྱིས་གཏན་འབེབས་བྱས་པའི་ཤེས་ཡོན་སྲིད་བྱུས་ཀྱི་དགོས་པ་དང་འགལ་ནའང་སྤྱི་འཐུས་ཚོས་མིག་བཙུམ་རྒྱབ་སྐྱོར་བྱེད་པ་དེ་ཡ་མཚན་དང་པོ་རེད། བཀའ་ཤག་ནས་ཐབས་འཚོལ་གནང་བའི་ཨ་སྒོར་ས་ཡ་གཉིས་དེ་ཤེས་ཡོན་གྱི་ལས་དོན་ཁག་ལ་གཏོང་ཕྱིར་ཤེས་ཡོན་དང་འབྲེལ་བའི་ལས་འཆར་གང་ཡོད་འཆར་འགོད་ལས་ཁུངས་སུ་འབུལ་དགོས་གསུངས་ཡོད། གོ་ཐོས་བྱུང་བར་གཞིགས་ན་འཆར་ལོ་ནས་བོད་ཡིག་དང་འབྲེལ་བའི་ཤེས་ཡོན་གྱི་ལས་འཆར་ཡོངས་རྫོགས་བཀག་ཡོད། དེའི་རྒྱུ་མཚན་ནི་བོད་ཡིག་དང་འབྲེལ་བའི་ལས་འཆར་དེ་ཚོའི་ཐོག་གཏོང་རྒྱུའི་མ་དངུལ་རྣམས་གཞི་རིམ་སློབ་གྲྭ་ཁག་ནང་སློབ་ཁྲིད་ལག་འཁྱེར་གློག་ཀླད་ནང་ནས་ཐད་འཁྲིད་བྱ་རྒྱུའི་ལས་འཆར་ལ་གཏོང་གི་ཡིན་གསུངས་པ་དེ་ནི་རང་གི་སྐད་ཡིག་ལ་མཐོང་ཆུང་བྱས་པའི་ཡ་མཚན་གཉིས་པ་རེད།

དེང་སྐབས་ཤེས་རིག་ལས་ཁུངས་ནས་བྱེད་དགོས་ཀྱི་ཤེས་ཡོན་དང་འབྲེལ་བའི་ལས་འཆར་མང་པོ་ཞིག་འཆར་འགོད་ལས་ཁུངས་ནས་བྱེད་ཀྱི་ཡོད། དེའི་རྒྱུ་མཚན་ནི་ཤེས་ལས་སུ་ལས་འཆར་དེ་དག་འཆར་འགོད་བྱེད་མཁན་གྱི་ཤེས་ལྡན་མི་སྣ་མེད་ཚུལ་བཤད་ཡོད། ཡིན་ནའང་ལས་དོན་དངོས་ཀྱི་ཐོག་ལས་ཀ་བྱེད་མཁན་ཤེས་རིག་ལས་ཁུངས་ཀྱི་ལས་བྱེད་པ་འགའ་ཤས་འཆར་ལས་སུ་ཡར་འཇོག་བྱས་པ་ནི་ཡ་མཚན་གསུམ་པ་རེད། ཡང་ཉེ་བའི་འཆར་ཤེས་ཡོན་ལྷན་ཚོགས་ནས་སློབ་གྲྭ་ཁག་ལ་གཞི་རིམ་འཛིན་གྲྭ་བདུན་པ་བརྒྱད་པ་བར་སློབ་མཚན་བོད་ཡིག་ནང་འཁྲིད་དགོས་པའི་བཀོད་ཁྱབ་ཅིག་བཏང་ཡོད། ཤེས་ཡོན་ལྷན་ཚོགས་ནི་བཀའ་ཤག་སྐབས་གོང་མའི་སྐབས་དམིགས་ཡུལ་ཆེན་པོ་ཞིག་གི་ཐོག་ནས་བཙུགས་པ་རེད། ཤེས་ཡོན་དང་འབྲེལ་བའི་ལས་ཁུངས་མཐོ་ཤོས་དེ་ཡིན། འདི་འཛིན་སྐྱོང་གི་འོག་ཏུ་མ་ཚུད་པའི་རང་དབང་ཅན་ཞིག་ཏུ་འགྱུར་རྒྱུར་རེ་བ་ཆེན་པོ་བཅངས་ཡོད།

ད་ལྟའི་འཆར་ཤེས་ཡོན་ལྷན་ཚོགས་ཀྱི་ལས་ཀ་གཙོ་བོ་ཤེས་ཡོན་སྲིད་བྱུས་ཀྱི་ལམ་སྟོན་བཞིན་སློབ་ཚན་ཁག་བོད་ཡིག་ནང་སྒྱུར་རྩོམ་བྱས་ཏེ་གཞི་རིམ་གོང་འོག་གི་སློབ་ཚན་དེ་དག་བོད་ཡིག་ནང་འཁྲིད་རྒྱུར་འབད་རྩོན་བྱེད་པའི་འགན་དང་དབང་ཆ་གཉིས་ཀ་ཡོད་པ་ཞིག་རེད། ཤེས་ཡོན་ལྷན་ཚོགས་ཀྱིས་བཏང་བའི་བཀོད་ཁྱབ་དེས་བཀའ་ཤག་དང་ཤེས་རིག་ལྷན་ཁང་གི་དགོངས་པར་བབ་ས་མེད་པས། གཞི་རིམ་འཛིན་གྲྭ་བདུན་པ་བརྒྱད་པའི་སློབ་ཚན་ངེས་པར་དབྱིན་ཡིག་ནང་ཁྲིད་དགོས་པའི་བཀོད་ཁྱབ་གནང་ཡོད། སློབ་གྲྭ་ཁག་གི་དགེ་རྒན་དེ་ཚོ་བཀོད་ཁྱབ་གཉིས་ཀྱི་འོག་མགོ་ན་བཅུག་པ་དེ་ཡ་མཚན་བཞི་པ་རེད། འདི་དག་ནི་བདག་དང་བདག་འདྲའི་སྐྱེ་བོ་ཕལ་བས་ཀྱང་ཤེས་ཐུབ་པའི་གནས་ཚུལ་ཆུང་ཆུང་འགའ་ཤས་འདིར་དྲངས་པ་ཙམ་ཡིན། འདི་དག་ནི་གྲོས་ཚོགས་ནང་གླེང་བའི་སྐབས་ཡོད་ཀྱང་གླེང་མཁན་སུ་གཅིག་བྱུང་མེད། དེ་ལས་ལྡོག་སྟེ་སྤྱི་ཚོགས་ནང་གི་རྙོག་གླེང་མང་པོ་ཞིག་གྲོས་ཚོགས་ནང་འཁྱེར་ཐུབ་ཐབས་སུ་རང་སྲོག་ཀྱང་བཏང་མི་ཡོང་ངམ་སྙམ་པའི་འབད་པ་སྒོ་དུ་མ་ནས་བྱེད་མཁན་མང་དག་ཅིག་བྱུང་སོང་། འདི་ལྟ་བུའི་བྱེད་སྟངས་ལ་བལྟས་ན་དེ་རིང་གི་ང་ཚོའི་གྲོས་ཚོགས་འདི་ཡང་རབས་ཆད་མ་དང་སྨད་འཚོང་མ་རང་རེད།