སི་ཁྲོན་ཁྱུང་ཆུ་རྫོང་ལུང་བཟང་སྡེ་བའི་རྩ་ཐང་ཐོག་རྒྱ་ནག་གིས་གནམ་གྲུ་འབབ་ཐང་ཞིག་བཟོ་བཞིན་པའི་ས་རྡུལ་གྱིས་ཕྱུགས་ཟོག་ཤི་རྨས་ཐེབས་བཞིན་འདུག་ཟེར།
ཆབ་སྲིད་བཙོན་ཟུར་ལྷ་མོ་སྐྱབས་ལགས་སུ་བོད་ནས་གནས་ཚུལ་འབྱོར་བ་ལྟར་ན། ཕྱི་ལོ་ ༢༠༠༨ ཡས་མས་ཤིག་ལ་རྒྱ་ནག་གཞུང་གིས་སི་ཁྲོན་རྔ་པ་ཁུལ་ཁྱུང་ཆུ་རྫོང་ལུང་བཟང་སྡེ་བའི་ཉེ་འགྲམ་གྱི་རྩྭ་ཐང་ཐོག་དམག་མིའི་གནམ་གྲྭ་འབབ་ཚིགས་ཤིག་རྒྱག་རྒྱུ་ཡིན་ཚུལ་བཤད་དེ་འཛུགས་སྐྲུན་ལས་གཞི་ཞིག་མགོ་འཛུགས་བྱས་ཡོད་པ་དང་། སྐབས་དེར་ས་གནས་མང་ཚོགས་ཀྱིས་གནམ་ཐང་རྒྱག་མཁན་ལ་ངོ་རྒོལ་དང་། གོང་རིམ་ལ་ཞུ་གཏུག་ཡང་ཡང་བྱས་ཏེ་ས་དེར་དམག་མིའི་གནམ་ཐང་རྒྱག་མི་ཆོག་ཚུལ་བརྗོད་ཡོད།
རྗེས་སུ་སྲིད་གཞུང་གི་མི་སྣས་མང་ཚོགས་ཀྱི་རེ་འདུན་ལྟར་དམག་མིའི་གནམ་ཐང་རྒྱག་རྒྱུ་ཕྱིར་འཐེན་བྱས་ཟིན་ཡང་། ས་གནས་མི་མང་གི་དཔལ་འབྱོར་འཕེལ་རྒྱས་དང་ཡུལ་སྐོར་སྤྲོ་འཆམ་ལས་རིགས་གོང་འཕེལ་ཆེད་འགྲུལ་སྐྱེལ་དམངས་སྤྱོད་གནམ་ཐང་ཆེན་པོ་ཞིག་ངེས་པར་དུ་རྒྱག་རྒྱུ་ཡིན་ཚུལ་བརྗོད་དེ། ༢༠༡༠ ཙམ་ནས་འཛུགས་སྐྲུན་ལས་གཞི་སྔར་ལས་ཤུགས་ཆེ་རུ་བཏང་ཡོད་འདུག
གཞན། གནམ་གྲུ་འཕུར་སྐྱོད་ལ་དཀའ་ངལ་ཡོད་ཚུལ་བརྗོད་དེ་ཉེ་འཁོར་གྱི་རི་ཞིག་བསྐོ་སློག་བྱེད་ཀྱི་ཡོད་པ་དང་། ད་ཆར་ལས་བཟོ་བ་དང་རླངས་འཁོར་མང་པོ་ཕར་སྐྱོད་ཚུར་ཡོང་དང་། ས་བསྐོ་རྡོ་སློག་བྱེད་པ་སོགས་ཀྱིས་ཡུལ་དེའི་གནམ་ས་གཉིས་ཀར་ས་རྡུལ་གྱིས་ཁེངས་ཏེ་ས་གནས་མང་ཚོགས་ཀྱི་ལུས་སེམས་གཉིས་ཀར་དཀའ་ངལ་བཟོ་བཞིན་ཡོད་པ་མ་ཟད། རྩྭ་ཐང་ཐོག་ས་རྡུལ་བབས་ཏེ་འབྲོག་པའི་ནོར་ཕྱུགས་ཤི་རྨས་ཀྱི་གནས་ཚུལ་ཡང་འབྱུང་བཞིན་ཡོད་འདུག
