མོན་རྟ་དབང་ཨོ་རྒྱན་གླིང་དུ་མ་ཧཱ་གུ་རུའི་འབུམ་ཚོགས།

༄༅། །རྒྱལ་བསྟན་དར་ཞིང་འགྲོ་ཀུན་བདེ་བ། ལྷག་པར་༸གོང་ས་སྐྱབས་མགོན་ཆེན་པོའི་སྐུ་ཚེ་ཞབས་པད་ཡུན་དུ་བརྟན་པ། བོད་རང་དབང་བདེན་པའི་རྒྱལ་ཁ་མྱུར་དུ་སོན་པ། ལྷག་པར་ཉེ་བའི་ཆ་ནས་བོད་ནང་རང་ལུས་མཆོད་མེར་ཕུལ་གནང་མཁན་རྒྱལ་གཅེས་དཔའ་བོ་བརྒྱ་ཕྲག་ལྷག་བྱུང་བ་རྣམས་ཀྱི་སྨོན་དོན་གྲུབ་པ། འཇིག་རྟེན་ཀུན་ཏུ་ནད་མུག་འཁྲུགས་རྩོད་ཞི་ནས་ཞི་བདེའི་དཔལ་ལ་སྤྱོད་པ་སོགས་ལེགས་ཚོགས་སྒོ་བརྒྱར་དམིགས་ད་ལམ་༸རྒྱལ་དབང་སྐུ་ཕྲེང་དྲུག་པ་རིན་ཆེན་ཚངས་དབྱངས་རྒྱ་མཚོ་སྐུ་འཁྲུངས་པའི་གནས་མཆོག་ཁྱད་པར་ཅན་ཨོ་རྒྱན་གླིང་དུ་མ་ཧཱ་གུ་རུ་རིག་འཛིན་གདུང་སྒྲུབ་ཀྱི་སྒོ་ནས་འབུམ་ཚོགས་རྒྱས་པར་འབུལ་གཤོམ་སྐབས་ཆོག་གྲཱའི་དབུ་བཞུགས་སུ་གཞུང་བསྟེན་དགྲ་ལྷ་ཚེ་རིང་མའི་སྐུ་བསྟེན་འཁའ་འགྲོ་མཆོག་དང་རྟ་དབང་དགོན་གྱི་སྐྱབས་གནས་མཁན་རིན་པོ་ཆེ། གཞན་ཡང་འདི་ཁུལ་གྱི་རིས་མེད་མཁན་བླ་སྤྲུལ་རྣམ་པ། རྣམ་གྲྭའི་དབུ་མཛད་ཆེན་མོ་དང་དགོན་སྡེ་ཁག་གི་དགེ་འདུན་བཙུན་མ་སྔགས་འཆང་རྣམས་ནས་ཆུ་སྦྲུལ་བོད་ཟླ་ ༢ ཚེས་ ༡༩ ནས་ ༢༥ བར་ཐོག་མཐའ་བར་གསུམ་རྟགས་རྟེན་ལེགས་འགྲིག་བྱུང་ཞིང། སྐབས་དེར་མི་མང་ནས་ཐུབ་པའི་མཚན་སྔགས་གྲངས། ༡༣༤༣༠༠༠། མ་ཎི་གྲངས། ༤༤༥༤༧༠༧༣། བཛྲ་གུ་རུ་གྲངས། ༡༠༤༥༤༥༨༡། བཅས་གྲངས་གསོག་ཞུས་པའི་དགེ་རྩ་རྣམས་བྱང་ཆེན་གྱི་རྒྱུར་བསྔོ་བ་གནང་བ་དང། འབུམ་ཚོགས་ཉིན་དྲུག་རིང་ཞལ་འདེབས་བྱུང་བ་སྒོར་ ༢༢༢༥༤༦༥། སོང་བ་སྒོར་ ༡༦༢༦༢༨༩། ཁ་ཐབ་ལྷག་ལུས་སྒོར་ ༥༩༩༡༧༦ ཐམ་པ་ད་ལམ་མོན་ཡུལ་མི་མང་ནས་༸མགོན་པོ་ཐུགས་རྗེའི་གཏེར་ཆེན་གང་ཉིད་སྐུ་ཚེ་ཞབས་པད་བརྟན་པའི་གསོལ་འདེབས་མཎ་ཌལ་གྱི་གཟུགས་སུ་བཀོད་དེ་ཏཱ་ལའི་བླ་མའི་དགེ་རྩར་ཕུལ་འདུག ཕྱི་ལོ་ ༢༠༡༣ ཟླ་ ༤ ཚེས་ ༧ ལ།།