དུས་དབང་སོ་གསུམ་པའི་སྟེང་མི་༨༠༠༠༠ འཛོམ་རྒྱུའི་ཚོད་དཔག

༸གོང་ས་མཆོག་གི་དཔལ་དུས་ཀྱི་འཁོར་ལོའི་དབང་ཆེན་ཐེངས་ ༣༣ པ་དེ་འཆར་ལོའི་ཕྱི་ཟླ་ ༧ པའི་ཚེས་ ༣ ནས་ ༡༤ ཉིན་བར། ལ་དྭཊ་རྒྱལ་ས་སླེ་རུ་ཡོད་པའི་ཞི་བ་ཚལ་དུ་བསྩལ་གཏན་ཁེལ་ཡོད་པ་རེད།

ལོ་རྗེས་མའི་ཕྱི་ཟླ་ ༧ པའི་ཚེས་ ༣ ནས་ ༡༤ ཉིན་བར་དུས་ཡུན་ཉིན་གྲངས་ ༡༡ གྱི་རིང་། ༸གོང་ས་མཆོག་གིས་ལ་དྭགས་རྒྱལ་ས་སླེ་རུ་ཡོད་པའི་ཞི་བ་ཚལ་དུ་དཔལ་དུས་ཀྱི་འཁོར་ལོའི་དབང་ཆེན་ཐེངས་ ༣༣ པ་བསྩལ་གཏན་ཁེལ་འདུག ཉེ་ལམ་འདི་གའི་གསར་འགོད་པས་སྐུ་སྒེར་དྲུང་ཆེ་བློ་བཟང་སྦྱིན་པ་ལགས་སུ་བཅར་འདྲི་ཞུས་པར་ཁོང་གིས། ༧གོང་ས་མཆོག་གིས་ལོ་རྗེས་མར་ལ་དྭགས་སུ་དུས་འཁོར་བཀའ་དབང་ཐེངས་སོ་གསུམ་པ་གནང་གཏན་ཁེལ་ཡོད་པ་དང་། བསྟན་པའི་སྦྱིན་བདག་གཙོ་བོ་ཁག་ནི། ལ་དྭགས་ནང་པའི་ཆོས་ཚོགས་དང་ལ་དྭགས་དགོན་ཚོགས། གཞིས་བྱེས་ཇོ་ནང་ཆོས་བརྒྱུད་དང་གཞིས་བྱེས་ཀོང་པོ་མི་དམངས། དེ་བཞིན་དད་ལྡན་བོད་མི་སྒེར་བ་ཁག་ཅིག་བཅས་ཡིན་སྐོར་བརྗོད་བྱུང་།  

ཁོང་གིས་མུ་མཐུད་ངོ་སྤྲོད་གནང་དོན་ལ། སྔོན་ཆད་ལ་དྭཊ་སུ་༸གོང་ས་མཆོག་གིས་དུས་འཁོར་བཀའ་དབང་བསྡུས་པ་ཞིག་བསྩལ་མྱོང་ཡོད་པ་ལྟར། ད་ཐེངས་ལ་དྭགས་ནང་པའི་ཆོས་ཚོཊ་དང་ལ་དྭགས་དགོན་ཚོགས་ཀྱིས་བསྐྱར་དུ་༸གོང་ས་མཆོག་ལ་དུས་འཁོར་བཀའ་དབང་རྒྱས་པ་ཞིག་གསོལ་འདེབས་ཞུས་སྟབས། ལོ་རྗེས་མའི་ཕྱི་ཟླ་བདུན་པའི་གནམ་གཤིས་ཧ་ཅང་ཡག་པོ་ཡོད་པའི་སྐབས་དང་བསྟུན་ཏེ། རྒྱལ་ས་སླེའི་ཞི་བ་ཚལ་དུ་དུས་དབང་ཐེངས་སོ་གསུམ་པ་བསྩལ་རྒྱུའི་ཞལ་བཞེས་གནང་བ་ཞིག་དང་། འཆར་ལོའི་དུས་དབང་ཐོག་ལ་དྭགས་དང་གར་ཤཱ། སྦེལ་ཏི། ཁུ་ནུ་གཙོས་ཧི་མ་ལ་ཡའི་རི་རྒྱུད་ནས་ཁྱོན་ཆོས་ཞུ་བ་ ༥༠༠༠༠ ལྷག་འཛོམས་ཐུབ་པར་ཚོད་དཔག་གནང་བཞིན་ཡོད་ཅིང་། མ་གཞི་ལ་དྭགས་ས་བབ་མཐོ་བོ་ཡིན་རུང་འགྲིམ་འགྲུལ་ཐད་ཤི་རུ་ན་གྷར་བརྒྱུད་ནས་འགྲོ་སའི་ལམ་ཁ་གཅིག་དང་མཱ་ན་ལི་ནས་གཅིག ལྡི་ལིར་ཡང་ཐད་ཀར་མཁའ་ལམ་བརྒྱུད་དེ་འགྲོ་སའི་ལམ་ཁ་གཅིག་བཅས་ཡོད་པར་བརྟེན། འགྲུལ་བཞུད་ཐོག་དམིགས་བསལ་དཀའ་ངལ་གང་ཡང་འཕྲད་ཀྱི་མེད་པའི་ངོས་འཛིན་གནང་བཞིན་ཡོད་སྐོར་གསུངས་བྱུང་།

དུས་དབང་ཐེངས་སོ་གསུམ་པའི་སྦྱིན་བདག་གཙོ་བོ་ལ་དྭགས་ནང་པའི་ཆོས་ཚོགས་ཚོཊ་གཙོ་བདུད་འདུལ་ཚེ་དབང་ལགས་སུ་ཁ་པར་བརྒྱུད་བཅར་འདྲི་ཞུས་པར་ཁོང་གིས་བརྗོད་དོན། “ང་ཚོས་༸གོང་ས་མཆོག་ལ་དུས་འཁོར་དབང་ཆེན་རྒྱས་པ་ཞིག་ལ་དྭགས་རྒྱལ་ས་སླེ་རུ་བསྩལ་གནང་ཡོང་བའི་གསོལ་འདེབས་ཞུས་པ་ལྟར། ལོ་རྗེས་མའི་ཕྱི་ཟླ་ ༧ པའི་ནང་དུས་དབང་ཐེངས་ ༣༣ པ་དེ་ལ་དྭགས་རྒྱལ་ས་སླེ་རུ་ཡོད་པའི་ཞི་བ་ཚལ་དུ་བསྩལ་རྒྱུར་ཞལ་བཞེས་གནང་བ་རེད། ད་ལྟའི་ཆ་ལ་དུས་འཁོར་དབང་ཆེན་ལ་ཕེབས་མཁན་མི་ག་ཚོད་འཛོམ་ཐུབ་མིན་དང་། དེ་ལ་དཔག་པའི་སྡོད་གུར་དང་ཆུ། གློག གསང་སྤྱོད་ག་ཚོད་གྲ་སྒྲིག་དགོས་མིན་ཐོག་གྲོས་བསྡུར་གནང་རྒྱུ་ལྷག་བསྡད་ཡོད་པ་རེད། ང་རང་སྒེར་ངོས་ནས་ལོ་རྗེས་མའི་དུས་དབང་ཐོག་མི་ ༨༠༠༠༠ ལྷག་འཛོམས་ཐུབ་པའི་ཚོད་དཔག་བྱེད་ཀྱིན་ཡོད། ཡིན་ནའང་། ཟླ་འདིའི་ཕྱི་ཚེས་ ༢༢ ཉིན་ང་ཚོ་ལ་དྭགས་ནང་པའི་ཆོས་ཚོགས་དང་དགོན་ཚོགས་གཉིས་ཐུན་མོང་ཐོག་དུས་དབང་གོ་སྒྲིག་ཞུ་ཕྱོགས་དང་། རྒྱ་གར་གཞུང་དབུས་དང་ས་གནས་གཞུང་གིས་མཐུན་འགྱུར་གང་དག་གནང་དགོས་མིན་སོཊ་ཀྱི་ཐད་ཞིབ་ཚགས་ཀྱི་གྲོས་བསྡུར་བྱ་འཆར་ཡོད། དེའི་རྗེས་བཞུགས་སྒར་ངྷ་རམ་ས་ལར་ཡོང་སྟེ་སྐུ་སྒེར་ཡིག་ཚང་དང་བོད་མི་མང་སྤྱི་འཐུས་ལྷན་ཚོགས་ལ་འབྲེལ་བ་ཞུས་པའི་ཐོག བཞུགས་སྒར་ངྷ་རམ་ས་ལ་རང་དུ་གསར་འགོད་གསལ་བསྒྲཊ་ཤིག་སྤེལ་རྒྱུ་ཡིན ”ཞེས་བརྗོད་སོང་།

དུས་དབང་ཐེངས་སོ་གསུམ་པའི་ཇོ་ནང་ཆོས་བརྒྱུད་ཀྱི་གོ་སྒྲིག་པ་སྐུ་ཞབས་ཚངས་དབྱངས་རྒྱ་མཚོ་ལགས་སུ་བཀའ་འདྲི་ཞུས་པར། ཐེངས་འདིའི་དུས་འཁོར་དབང་ཆེན་དེ་ ༢༠༡༢ ལོའི་རྡོར་གདན་དུས་དབང་སྐབས། གཞིས་བྱེས་ཇོ་ནང་དགོན་སྡེ་ཁག་ ༢༠ ལྷག་གི་སྐུ་ཚབ་ཀྱིས་༸གོང་ས་མཆོག་ལ་གསོལ་འདེབས་ཞུས་དོན་བཞིན་ཉེ་ལམ་ཞལ་བཞེས་ཐོབ་པ་དང་། ད་སྔ་དུས་དབང་གོ་སྒྲིག་ཚོགས་པ་ནང་ཁུལ་གྲོས་བསྡུར་བྱ་རྒྱུའི་གོ་སྐབས་བྱུང་མེད་ཀྱང་། མི་འགྱངས་བར་སྦྱིན་བདག་ནང་ཁུལ་གྲོས་བསྡུར་བྱས་ཏེ་མང་ཚོགས་ལ་གསལ་བསྒྲགས་བསྐྱང་རྒྱུ་ཡིན་སྐོར་བརྗོད་བྱུང་།

༢༠༡༡ ལོའི་ཕྱི་ཟླ་ ༡༢ ཚེས་ ༣༡ ནས་ ༢༠༡༢ ལོའི་ཕྱི་ཟླ་ ༡ ཚེས་ ༡༠ ཉིན་བར། ༸གོང་ས་མཆོག་གིས་རྒྱ་གར་གནས་མཆོག་རྡོ་རྗེ་གདན་དུ་བོད་ནས་ཆོས་ཞུ་བ་ ༨༠༠༠ དང་རྒྱ་ནག་སྐམ་ས་ནས་རྒྱ་རིཊ་ཆོས་ཞུ་བ་ ༡༠༠༠ གཙོས། འཛམ་གླིང་རྒྱལ་ཁབ་ ༦༠ ནས་བཅར་བའི་ཕྱི་ནང་དད་ལྡན་ཆོས་ཞུ་བ་ ༢༠༠༠༠༠ བརྒལ་བར་དཔལ་དུས་ཀྱི་འཁོར་ལོའི་བཀའ་དབང་ཐེངས་ ༣༢ པ་དེ་བསྩལ་ཡོད།

གསར་འགོད་པ། དཔལ་ལྡན།