དེ་རིང་གི་མཛད་འཕྲིན།

དེ་རིང་༧གོང་ས་མཆོག་གིས་ཨ་རིའི་ཕོར་ཊི་ལན་གྲོང་ཁྱེར་ནང་མཛད་འཕྲིན་བསྐྱངས་ཏེ་སློབ་ཆེན་གྱི་དགེ་སློབ་དང་ཆོས་ལུགས་དབུ་ཁྲིད་ཚོར་བཀའ་སློབ་གནང་འདུག

དེ་རིང་ཨ་རིའི་ཕྱི་ཚེས་ ༩ ཉིན་གྱི་ཞོགས་པའི་ཆུ་ཚོད་ ༩།༣༠ ཐོག་༧གོས་ས་མཆོག་འདི་གའི་ཕོར་ཊི་ལན་གྲོང་ཁྱེར་གྱི་ཉེ་འགྲམ་དུ་ཡོད་པའི་ཕོར་ཏྲི་ལན་སློབ་གྲྭ་ཆེན་མོའི་ཆའ་ཡལ་སུ་(University of Portland, Chiles Center) ཞེས་པའི་ཚོགས་ཁང་དུ་ཕེབས་ཏེ། དུས་ཡུན་ཆུ་ཚོད་གཉིས་རིང་ལ། ཆོས་དད་དང་ཁོར་ཡུག་ཅེས་པའི་བརྗོད་གཞིའི་ཐོག་ས་ཁུལ་འདིའི་ཆོས་ལུགས་རིས་མེད་ཀྱི་དབུ་ཁྲིད་རྣམ་པ་དང་ལྷན་དུ་བགྲོ་གླེང་གནང་སོང་།

དེ་རིང་གི་བགྲོ་གླེང་ལ་མཉམ་ཞུགས་གནང་མཁན་གྱི་མི་སྣ་དག་ནི། ཕོར་ལན་སློབ་ཆེན་གྱི་སློབ་སྤྱི་ཝེ་ལེམ་བྷོ་ཤམ་( William Beauchamp) མཆོག་དང་། ཇོའུ་ཆོས་ལུགས་ཀྱི་དབུ་ཁྲིད་རའ་བྷིས་མཡེ་ཀལ་(Rabbi Michael Cahana) མཆོག ཁ་ཆེའི་ཆོས་ལུགས་ཀྱི་དབུ་ཁྲིད། མོ་ཧ་མི་ཌི་ནའ་ལྗིབ་( Muhammed Najieb )མཆོག ཨ་རིའི་གདོད་མའི་མི་རིགས་ཀྱི་སོ་ལི་ཚི་ཞེས་པའི་ཚོ་ཁག་གི་དབུ་ཁྲིད། རྨོ་ཨེག་ནིས་བྷེ་ཁིར( Grandmother Agnes Baker pilgrim)མཆོག་བཅས་བཅོས་པའི་མི་མང་ ༥༠༠༠ ཙམ་འདུ་འཛོམས་བྱུང་སོང་།

བགྲོ་གླེང་སྐབས་༧གོང་ས་མཆོག་གིས། “འཇིག་རྟེན་འདིར་ཆོས་ལུགས་ཚང་མ་འདྲ་མཉམ་དང་། ཞི་བདེ་བག་ཕེབས་ངང་གནས་ཐུབ་པར་ཆ་རྐྱེན་གལ་ཆེ་ཤོས་དེ་ཆོས་ལུགས་མ་འདྲ་བར་ཆ་སྙོམས་ཀྱི་ལྟ་ཚུལ་དང་། ཕན་ཚུན་གུས་བརྩི་བྱ་རྒྱུ་དེ་རེད། ང་ཚོས་ནམ་ཡང་སའི་གོ་ལ་འདིའི་སྟེང་གི་འགྲོ་བ་མི་ཡོད་ཚད་ནང་པར་ཡང་བསྒྱུར་མི་ཐུབ་ལ། ཡེ་ཤུའི་དང་ཁ་ཆེའི་ཆོས་ལུགས་སོགས་ལའང་བསྒྱུར་ཐབས་མེད།” ཞེས་དང་། ཡང་ཁོང་གིས། “ཚན་རིག་གི་འཕེལ་རིམ་ལ་བརྟེན་ནས་ང་ཚོ་རྒྱུ་སྐར་མིག་དམར་དང་ཟླ་བ་སོགས་ཀྱི་སྟེང་དུ་བསྐྱོད་ཐུབ་ཀྱི་ཡོད་ཀྱང་། དེ་དག་ཏུ་འགྲོ་བ་མི་གནས་སྡོད་བྱེད་ཐབས་གཏན་ནས་མེད་པར་འདོད། དེར་བརྟེན། ང་ཚོས་བུ་རབས་ཚ་རྒྱུད་ཚོའི་ཆེད་དུ་རང་ཉིད་འཚོ་སྡོད་བྱེད་སའི་ཁོར་ཡུག་འདི་ལ་བདག་གཅེས་ལེགས་པོ་གནང་དགོས་པ་མ་ཟད། སའི་གོ་ལའི་དྲོད་ཚད་ཀྱི་གནད་དོན་འདི་ལའང་ངེས་པར་དུ་བསམ་བློ་ཞིབ་ནན་གཏོང་དགོས་ཀྱི་འདུག” ཅེས་གསུངས།

དེ་རིང་ཉིན་རྒྱབ་ཆུ་ཚོད་ ༡།༣༠ ནས་ ༣།༠༠ བར་སླར་ཡང་ཚོགས་ཁང་དེའི་ནང་མཛད་འཆར་བསྐྱངས་ཡོད་པ་དང་། ཐོག་མར་ཕོར་ཏྲི་ལན་གྲོང་ཁྱེར་གྱི་སྤྱི་ཁྱབ་ཆར་ལིས་ཧེལ་སུ་( Charlie Hales, City Mayor) མཆོག་གིས་༧གོང་ས་མཆོག་ངོ་སྤྲོད་དང་སྦྲགས་དགའ་བསུའི་འཚམས་འདྲི་ཞུས། དེ་ནས་༧ གོང་ས་མཆོག་གིས་ཀུན་ཁྱབ་འགན་འཁྲི་དང་ནང་གི་ཁོར་ཡུག སེམས་ཀྱི་རང་བཞིན་ཞེས་པའི་བརྗོད་གཞིའི་ཐོག་མང་ཚོགས་ལ་བཀའ་སློབ་གནང་དོན། “མཚམས་རེར་ང་ཚོས་ཚན་རྩལ་ཡར་རྒྱས་ཀྱིས་ཡོད་ཚད་དབང་བསྒྱུར་བྱེད་ཐུབ་པར་འདོད་ཀྱི་ཡོད་མོད། ཕྱོགས་ཁ་ཤས་ནས་བལྟས་ན་དེ་བདེན་པ་རེད། འཕྲུལ་རྩལ་ལ་བརྟེན་ཏེ་ང་ཚོས་ཁང་པ་ཆེན་པོ་འདིའི་ནང་ལོགས་ཚ་བོ་དང་གྲངས་མོ་བཟོ་ཐུབ་ཀྱི་རེད། འོན་ཀྱང་། འཛམ་བུ་གླིང་གཞིར་བཞག་སྟེ་བཤད་ན། རང་བྱུང་ཁམས་ཀྱི་ནུས་པ་ལ་འགྲན་ཟླ་ཡེ་ནས་མེད” ཅེས་གསུངས།

ཡང་༧གོང་ས་མཆོག་གིས། “ང་ཚོས་ལོ་རྒྱུས་ལ་ཕྱིར་ལྟ་བྱས་ན། རྒྱལ་ཁབ་མང་པོའི་ནང་། མི་སེར་ཚོས་སོ་སོའི་རྒྱལ་ཁབ་ཀྱི་ཆེད་དུ་དམག་འཁྲུག་ལ་ཞུགས་པ་ནི་རྒྱལ་ཞེན་དང་། སྤོབས་པར་བརྩིས་ཡོད་ཀྱང་། བསམ་བློ་དེའི་རིགས་རིམ་གྱིས་འགྱུར་བཞིན་ཡོད་པ་རེད། དཔེར་ན། དུས་རབས་ཉི་ཤུ་པའི་མཇུག་ནས་ཨ་རི་སོགས་ལུང་པ་མང་པོའི་ནང་མི་མང་གིས་དམག་འཁྲུག་ལ་ངོ་རྒོལ་ཤུགས་ཆེན་བྱེད་ཀྱི་ཡོད། ཡང་མི་ཁ་ཤས་ཀྱིས་ཤར་དང་ནུབ་ཅེས་མི་ལ་དབྱེ་འབྱེད་བྱེད་མཁན་ཡོང་གི་ཡོད་པ་དེ་ནི་ངོ་མ་བྱབ་ཆུང་རེད། མི་ཚང་མ་གཅིག་པ་ཡིན། དཔེར་ན། ཤར་ཕྱོགས་པ་དང་ནུབ་ཕྱོགས་པ་ཚོ་ཡང་ཕན་ཚུན་གཉེན་སྒྲིག་བྱས་ཏེ་བདེ་སྐྱིད་ཀྱི་འཚོ་བ་རོལ་གྱི་ཡོད་ལ། བུ་ཕྲུག་ཀྱང་སྙིང་རྗེ་བོ་སྐྱེ་བཞིན་ཡོད་པ་རེད།”ཞེས་གསུངས།

ས་གནས་གསར་འགོད་པ། ཕྱོར་ཚང་འཇམ་དབྱངས།