པེ་ཅིན་དུ་རྒྱ་བོད་འཁྲུག་འཛིང་།

ཐེངས་འདིའི་རྒྱ་ནག་གི་རྒྱལ་སའི་ཤར་སྒོའི་དོན་རྐྱེན་དེའི་ཐད་ནས་རྩོམ་པ་པོ་དང་མཆན་འབྲི་མཁན་ཚོའི་བར་ལ་བལྟ་ཚུལ་དང་འགྲེལ་བཤད་མི་མཐུན་པ་མང་པོ་ཞིག་བཀོད་འདུག གཙོ་བོ་གཞི་འཛིན་ས་གཅིག་ནི་རྒྱ་ནག་གི་དེང་དུས་སྒྱུ་རྩལ་པ་གྲགས་ཅན་ཨེ་ཝེ་ཝེ་དང་བོད་ཀྱི་བུད་མེད་རྩོམ་པ་པོ་འོད་ཟེར་གཉིས་ཀྱི་འགྲེལ་བརྗོད་རེད། འོ་ན་ཨེ་ཝེ་ཝེ་ཡིས་བོད་པ་ཡིན་པར་ཐག་བཅད་འདུག་ལ། ཟ་ཁང་དེའི་མདུན་ཐང་དུ་བོད་མིས་ས་ཆ་བཙན་བཟུང་བྱས་པར་འགྲེལ་བརྗོད་ཀྱང་བྱས་འདུག དོན་དངོས་ཐོག་བརྙན་པར་ལ་བལྟ་དུས་ཟ་ཁང་དེའི་མདུན་དུ་རླངས་འཁོར་གྱི་ལམ་ཁ་གཉིས་གཤར་ཡོད་པ་ཞིག་ལས་ཕར་ཕྱོགས་ཀྱི་ལམ་ཁ་དེར་རླངས་འཁོར་འགྲོ་བཞིན་པའང་མཐོང་རྒྱུ་འདུག ཚུར་ཕྱོགས་ཀྱི་རྒྱ་ལམ་གྱི་གཡས་གཡོན་དུ་རླངས་འཁོར་བཞག་པའང་མཐོང་རྒྱུ་འདུག མིག་གིས་དངོས་སུ་མཐོང་རྒྱུ་ཡོད་པའི་བརྙན་པར་དེ་ལས་ཚོང་ཁྲོམ་སྟོན་སའི་ས་ཆ་དག་ཟ་ཁང་གི་ཡིན་པར་འགྲེལ་བརྗོད་བྱས་པ་འདི་ནི་དྲང་བདེན་ལས་བརྒལ་འདུག་ལ་རིགས་རུས་ཕྱོགས་ཞེན་གྱི་བལྟ་ཚུལ་ཡང་ཅུང་ཙམ་མངོན་འདུག་སྙམ། རྒྱ་ནག་གིས་བོད་ཀྱི་ནགས་ཚལ་ཐམས་ཅད་གཅོད་འབྲེག་དང་རི་ལུང་ཐང་གསུམ་གྱི་གཏེར་ཁ་བསྔོགས་འདོན། ད་དུང་རྒྱ་མི་སྟོང་ཕྲག་མང་པོ་བོད་དུ་གནས་སྤོར་བྱེད་ཆོག་ན་བོད་མི་ཁ་ཤས་ཤིག་གིས་རྒྱ་ནག་གི་སྲང་ལམ་གྱི་གཡས་གཡོན་དུ་ཚོང་ཁྲོམ་གྱི་ཁེ་གཉེར་ཙམ་ཡང་ཉར་མི་ཆོག་པ་འདི་བོད་མིའི་སྲིད་ཀྱི་སྣེ་མོ་པ་དག་གིས་ངེས་པར་དུ་ཤེས་དགོས་ལ། རྒྱ་ནག་གི་དབུས་གཞུང་གིས་མི་རིགས་འདྲ་མཉམ་མིན་པའི་སྲིད་བྱུས་ཀྱི་འོག་ནས་བོད་ཙམ་མ་ཡིན་པར་སྤྱིར་གྲངས་ཉུང་མི་རིགས་ལ་དཀའ་ངལ་གཅིག་མཚུངས་ཡིན་པ་དེར་དྲི་བ་ཅེས་ཀྱང་འདོན་དགོས་པར་མཐོང་།
སྤྱིར་འོད་ཟེར་ལགས་ཀྱིས་བོད་མི་རིགས་ལ་བཅིངས་པའི་བརྩེ་སེམས་དང་ལར་རྒྱ་ལ་སྙིང་ནས་གུས་བརྩི་ཡོད། འོན་ཀྱང་བོད་ཀྱི་བཙན་པོ་རིང་ལ་ས་ཁུངས་རྒྱ་བསྐྱེད་དང་བོད་མིའི་སྡོད་གནས། ས་མཚམས་དང་ཆུ་མཚམས། དེ་བཞིན་བོད་མི་རིགས་ཀྱི་ལོ་རྒྱུས་ཀྱི་འཕེལ་རིམ་ལ་རྒྱུས་མེད་ན་ས་མཚམས་འདི་དང་མི་རིགས་འདི་བོད་ཡིན་མིན་གྱི་ཐག་གཅོད་སྔ་མི་རུང་། དེའི་ཐོག་ནས་ནོར་འཕྲུལ་ཆེན་པོ་ཤོར་ངེས་པ་ལྟར། ཐེངས་འདིར་འོད་ཟེར་ལགས་ཀྱིས་ནོར་འཕྲུལ་ཆེན་པོ་ཞིག་ཤོར་སོང་། ཆང་རིགས་ཞེས་པའི་མི་རིགས་འདི་བོད་པ་ཡིན་མིན་གྱི་ཐོག་ནས་རྒྱ་ནག་གི་མཁས་དབང་ཚོ་དང་མཉམ་དུ་བོད་པའི་མཁས་པ་མང་པོ་ཞིག་གིས་རྩོད་པ་རྒྱག་མྱོང་ཡོད་ལ། ཁྱད་པར་དུ་མཁས་པའི་དབང་པོ་རྗེ་དམུ་དགེ་བསམ་གཏན་རྒྱ་མཚོ་མཆོག་གིས་དྭགས་པོ་མི་རིགས་ཀྱི་གནད་དོན་ཞེས་པའི་དཔྱད་རྩོམ་དེའི་ཐོག་ནས་ཆང་རིགས་དང་ད་དུང་བོད་ཀྱི་ས་མཚམས་ཆུ་མཚམས་ཁག་གི་མིང་རྒྱ་ནག་གིས་གང་འདོད་དུ་འགྱུར་བ་བཏང་བར་གཅིག་གཅིགགཉིས་གཉིས་ཀྱིས་ཐེར་འདོན་བྱས་པ་ད་སྔ་ལོ་ངོ་སུམ་བཅུ་ཡས་མས་འགོར་མོད་རྒྱ་ནག་གི་མཁས་དབང་སུ་གཅིག་གིས་ཀྱང་དགག་ལན་སྤྲོད་ཐུབ་མེད། འོན་ཏེ་རྒྱ་དཔོན་མཁྲེགས་བཟུང་པ་དག་གིས་མུ་མཐུད་དུ་ཐ་སྙད་དེ་དག་བེད་སྤྱོད་བྱེད་པ་དེ་རྒྱ་ནག་གི་མགོ་དཔོན་ཚོའི་བསམ་བློའི་སྐྲན་ནད་ལས་བྱུང་བ་ཞིག་རེད།
རྒྱ་ནག་གིས་དམིགས་བཀར་ཀྱིས་ཆང་རིགས་ཞེས་པའི་འཚོ་ཁག་རྣམས་རྒྱལ་རོང་རྒྱལ་ཕྲན་བཅོ་བརྒྱད་ལས་རྒྱལ་ཕྲན་ཁ་ཤས་ཤིག་ཟུར་འདོན་བྱས་པ་རེད། རྒྱལ་ཕྲན་དེ་དག་ནི་དུས་རབས་བདུན་པ་དང་བརྒྱད་པ་ལས་ཕལ་ཆེ་བ་དུས་རབས་བརྒྱད་པའི་བཙན་པོ་ཁྲི་སྲོང་སྡེ་བཙན་གྱི་རིང་ལ་ཐང་བོད་དམག་འཁྲུག་སྐབས་སུ་བཀོད་འདོམས་བྱས་པའི་དམག་སྡེ་ཤ་སྟག་རེད་འདུག དེ་བཞིན་མདོ་སྨད་ཆོས་འབྱུང་དུ་འགག་དོག་མོ་གསུམ་པོ་སྤྲ་ཡིས་བཟུང་སྤྲ་རྩལ་ཆེ་བ་དེ་ཡི་དོན་ཞེས་པའང་ས་ཆའི་གནས་བབ་དང་སྐབས་དེའི་དམག་འཁྲུག་ལ་གཞིགས་ན་དོན་དངོས་དང་མཐུན་སྙམ། འོ་ན་ཆང་རིགས་ཞེས་པའི་ས་ཁུངས་གང་གི་བར་རྒྱ་མིས་དངོས་འཛིན་བྱས་འདུག་ཞེ་ན། རྒྱལ་ཁ་བཀྲ་ཤིས་གླིང་ནས་བིན་ཁྲན་བར་དང་དེ་ནས་ཤར་ཟུང་ཆུ་དང་ཁྲོ་ཆུའམ་ཁྲི་བཅུ་ཡི་ས་མཚམས་བར་ངོས་འཛིན་བྱས་པ་རེད། དེས་ན་ལེ་བར་རྒྱ་ཕྲག་མང་པོ་རྒྱ་མིས་བོད་པའི་ས་ཁུངས་ནས་ལོགས་སུ་བཀར་འདུག གནད་དོན་དེ་བོད་མི་ཞིག་ཡིན་ཕྱིན་ཆད་གསལ་བོ་ཤེས་དགོས་པ་ཧ་ཅང་གལ་ཆེར་མཐོང་།
འོ་ན་རྒྱ་ནག་གི་རྒྱལ་སའི་ཤར་སྒོའི་སྲང་ལམ་གྱི་དོན་རྐྱེན་དེར་བལྟ་ཚུལ་མི་འདྲ་བའི་རྐྱེན་བྱས་ཏེ་དོན་དངོས་འཚོལ་འདོད་བྱུང་། དེའི་ཕྱིར་རྒྱ་ནག་གི་རྒྱལ་སའི་ཉེ་འཁྲིས་སུ་ཡོད་པའི་སློབ་གྲྭ་ག་གེ་མོ་ཞིག་ཏུ་ཡོད་པའི་དྲ་གྲོགས་ཤིག་ལ་དེའི་སྐོར་སྐད་ཆ་དྲིས་ཡོད་ལ། ཁོས་གསལ་གསལ་ཐང་ཐང་འགྲེལ་བརྗོད་བྱེད་དོན་ནི། ཚོང་ཁྲོམ་སྟོན་མཁན་ཚོ་མདོ་སྨད་ཁྲོ་ཆུའམ་ཁྲི་བཅུ་པ་ཡིན་པར་མ་ཟད། དོན་རྐྱེན་དེ་འདྲ་ཐེངས་དང་པོ་མ་ཡིན་པར་རྒྱ་མིས་མཐོང་ཆུང་ལ་བརྟེན་ནས་ད་སྔ་དེ་འདྲ་མང་པོ་བྱུང་མྱོང་ཡོད་པར་འགྲེལ་བརྗོད་ཅིང་བྱས་སོང་། འོ་ན་རྒྱལ་རོང་ཁྲོ་ཆུའམ་ཁྲི་བཅུ་ནི་རྒྱ་ནག་གིས་བོད་བཙན་བཟུང་བྱས་རྗེས་ཡང་བོད་མི་རང་ལས་མི་རིགས་ག་གེ་མོ་ཞིག་གི་མིང་གང་ཡངའདོགས་མྱོང་མི་འདུག་ལ། བོད་ཀྱི་རྒྱལ་རབས་དང་ཆོས་འབྱུང་ཁག་ལ་བལྟས་ན་རྒྱལ་རོང་རྒྱལ་ཕྲན་བཅོ་བརྒྱད་ལས་སོ་མང་རྒྱལ་པོའི་མངའ་ཁོངས་ཁྲོ་ཆུའམ་ཁྲི་བཅུ་མངའ་རིས་མདའ་མཁན་ཚང་གིས་དབང་བསྒྱུར་བྱས་ཡོད་འདུག རིམ་གྱིས་ཁྲི་བཅུ་མངའ་རིས་མདའ་མཁན་ཚང་གི་དབང་ཐང་ཧ་ཅང་རྒྱས་ཏེ་སླར་སོ་མང་གི་མངའ་རིས་ཡོངས་སུ་བདག་བཟུང་བྱས་པ་ཕྱིས་སུ་དམག་མི་ཁྲི་བཅུ་ཡོད་པའི་ཆ་ནས་ཁྲི་བཅུ་ཞེས་མིང་དེ་ཐོགས་འདུག་ལ། ཕྱིས་སུ་དཔོན་རྡོ་རྗེ་དཔལ་བཟང་དང་ཀུན་དགའ་ཡར་འཕེལ་གྱིས་དམག་སྣ་དྲངས་ཏེ་དམར་དམག་དང་འཐབ་འཛིང་བྱས་པར་མ་ཟད། ཕྱིས་སུ་བཅིངས་གྲོལ་དམག་དང་འཐབ་འཛིང་ཤུགས་ཆེན་པོ་བྱས་རྐྱེན་ལོ་ངོ་ཁ་ཤས་ཤིག་ལ་དབང་དུ་བསྡུས་མ་ཐུབ་པར་བརྟེན་ཐཱ་ཝན་གཉིས་པ་ཞེས་པའི་མིང་ཡང་ཐོགས་འདུག་ལ། ཏིན་ཤཱ་ཕིན་གྱིས་དམིགས་སུ་བཀོད་འདོམས་འོག་གི་དམག་དཔོན་ཞིག་གིས་སྐབས་དེའི་དམག་འཁྲུག་སྐོར་ཟིན་ཐོ་བྲིས་པ་ལོ་རབས་བརྒྱད་ཅུ་ནང་ཟིན་ཐོ་ཇི་བཞིན་གློག་བརྙན་ཁྲབ་སྟོན་བཟོས་པ་དབུས་བརྙན་འཕྲིན་སྡེ་ཚན་གཉིས་པར་ཐད་གཏོང་བྱས་པ་རྒྱ་ནག་གི་ཉམས་ཞིབ་པ་དག་གིས་རྒྱལ་ཁབ་གཙང་མ་ཞིག་ལ་བཙན་འཛུལ་ལ་དོགས་ནས་གཏན་ཏུ་ཕྱིར་ཐེན་བྱས་ཡོད་འདུག་ལ། དེབ་པར་སྐྲུན་འགྲེམ་སྤྲེལ་ཚར་བ་ཡོངས་ཕྱིར་བསྡུས་བྱས་ཡོད་འདུག ཁྲི་བཅུ་རྒྱལ་སའི་ཉེ་འཁྲིས་སུ་དུས་རབས་བརྒྱད་པའི་སྐབས་སུ་སློན་དཔོན་བཻ་རོ་ཙ་ནས་ཕྱག་འདེབས་འཛད་པའི་བདེ་ཆེན་གླིང་ཞེས་པའི་དགོན་ཆེན་ཞིག་ཅིང་ཡོད་འདུག དགོན་པ་དེ་ནི་མདོ་སྨད་ཕྱོགས་ནས་ཆེས་རྙིང་ཤོས་ཡིན་འདུག

རྒྱ་ཡིག་རྒྱ་སྐད་ཤེས་པ་ཙམ་གྱིས་རང་མི་རིགས་ཀྱི་སྐད་ཡིག་དང་། རིག་གནས་ལོ་རྒྱུས་བཅས་མ་ཤེས་ན། འོད་ཟེར་འདྲ་བ་ཞིག་ཆགས་ངེས་རེད། དེ་རིང་འོད་ཟེར་གྱིས་ཞབས་འདྲེན་བླ་ན་མེད་པ་ཞུས་འདུག ཆང་རིགས་ནི་རྒྱལ་རོང་གི་ཆ་ཤས་ཤིག་རེད། འོན་ཀྱང་ཕྱི་ལོ་༡༩༥༩རྗེས་ནས་རྒྱ་ནག་གཞུང་གིས་རྒྱ་རོང་ས་ཁུལ་ཁ་ཤས་ཤིག་ཆང་རིགས་རེད། བོད་མ་རེད། ཅེས་བོད་མི་རིགས་ཁ་བྲལ་དུ་བཏང་བ་རེད། ད་ནི་དེའི་རྗེས་སུ་འབྲང་ནས་འོད་ཟེར་གྱིས་ཀྱང་ཆང་རིགས་བོད་རིགས་མ་རེད། ཅེས་ཤོད་བཞིན་ཡོད་པ་རེད། དེ་ལྷག་ཞབས་འདྲེན་ཞིག་ཞུ་རྒྱུ་མི་འདུག

༄༅། །གསར་འགྱུར་ཟེར་བ་དེ་དངོས་ཡོད་ཁུངས་ལུང་ཡོད་པ་ཞིག་འགོད་གལ་ཆེ། ང་རང་ཚོ་མི་མང་ངོས་ནས་ཀྱང་གསར་འགྱུར་ཁག་གཅིག་རང་ལ་ཡིད་ཆེད་གནང་ནས་གནས་ཚུལ་རྣམས་ཕྱི་གྲགས་མ་བྱས་ན་བཟང་། དེང་སངས་རྒྱ་བོད་བར་གསར་འགྱུར་ཁུངས་ལུང་མེད་པ་མང་དག་ཞིག་ཡོང་དང་ཡོང་བཞིན་པ་སོང་ངེས་པར་དུ་ཟབ་དགོས། ང་རང་བསམ་ན་རྩམ་པ་པོ་ཚེ་རིང་འོད་ཟེར་ལགས་ནས་གསུང་དངོས་བདེན་ཡིན་པ་ཡིད་ཆེད་གཙང་མ་ཡོད། གང་ལ་ཞུས་ན་ཁོང་ནས་གནས་ཚུལ་དེ་རིགས་རྫུན་བཟོ་གནང་དགོས་དོན་མེད། ལྷན་རྒྱས་ནས་དཔྱད་པར་འཚལ།

༄།ཆང་རིགས་ཟེར་བ་དེ་སྔོན་མ་བོད་རིགས་ཡིན་པ་དང་ཕྱིས་སུ་རྒྱས་མི་རིགས་གསར་བ་ཞིག་ཏུ་བཟོས་པ་ཡིན་ཚུལ་ཨ་ཁུ་དམུ་དགེ་བསམ་གཏན་ཚང་གིས་གསུང་བ་ཞིག་དྲན་མོད། ད་ལྟ་དཔེ་ཆ་གང་ཡིན་སོགས་མ་རྙེད་པས་དཔྱད་གཞིར་ཕུལ།

གསར་འགྱུར་ཡག་པོ་བྲིས་གནང་འདུག གསར་འགོད་པ་ཐུགས་རྗེ་ཆེ། གནས་ཚུལ་འདི་བརྒྱུད་ལམ་གཞན་མང་པོ་ཞིག་ན་་ཁྱབ་ཀྱི་འདུག་ནའང་གསལ་བོ་གཅིག་ཀྱང་མི་འདུག