བོད་བཙན་པོའི་སྐབས་ཀྱི་ལྡེབས་རིས་རྙེད།

ཉེ་ཆར་བོད་རང་སྐྱོང་ལྗོངས་མལ་གྲོ་གུང་དཀར་རྫོང་ཐང་སྐྱ་དགོན་ཉམས་གསོ་བྱེད་སྐབས་བོད་བཙན་པོའི་སྐབས་ནས་ཉར་ཚགས་བྱས་པའི་ལྡེབས་རིས་ཆ་ཚང་ཞིག་རྙེད་ཡོད་འདུག

ཁ་སང་བོད་ལྗོངས་ཉིན་རེའི་ཚགས་པར་གྱིས་གནས་ཚུལ་སྤེལ་བ་ལྟར་ན། ཉེ་ཆར་བོད་རང་སྐྱོང་ལྗོངས་ཟེར་བའི་ཁོངས་གཏོགས་མལ་གྲོ་གུང་དཀར་རྫོང་ཐང་སྐྱ་དགོན་པ་ཉམས་གསོ་བྱེད་པའི་སྐབས་སུ། དགོན་པ་དེའི་ཉི་མ་ལྷ་ཁང་གི་ཤར་ངོས་གྱང་ལྡེབས་ནས་བོད་བཙན་པོའི་སྐབས་ནས་ཉར་ཚགས་བྱས་པའི་ལྡེབས་རིས་ཆ་ཚང་ཞིག་གསར་རྙེད་བྱུང་ཡོད་པ་དང་། དེ་མ་ཐག་མལ་གྲོ་གུང་དཀར་རྫོང་རིག་དངོས་ཁང་གི་མི་སྣ་སླེབས་ཏེ། བདག་བཟུང་གིས་ལྟ་རྟོག་ནན་མོ་བྱེད་མགོ་བརྩམས་ཡོད་འདུག

གནས་ཚུལ་དེའི་ནང་། ད་རེབ་གསར་རྙེད་བྱུང་བའི་ལྡེབས་རིས་དེ་དག་སྔོན་ཆད་དགོན་པ་དེ་ནས་རྙེད་སོན་བྱུང་བའི་ལྡེབས་རིས་ལྟར། བོད་རིག་པའི་ལྡེབས་རིས་ཞིབ་འཇུག་ཁྲོད་ཆ་ཚང་ཞིང་ལོ་རྒྱུས་ཀྱི་རིན་ཐང་ཆེན་པོ་ལྡན་སྐོར་བརྗོད་འདུག ཡིན་ནའང་ལྡེབས་རིས་དེ་དག་གི་ནང་དོན་དང་གྲངས་ཀ བཙན་པོའི་རྒྱལ་རབས་གང་གི་སྐབས་ནས་ཡིན་པ། རིན་ཐང་བཅས་ཀྱི་སྐོར་གང་ཡང་འཁོད་མི་འདུག