ཉེ་ཆར་བོད་མི་མང་སྤྱི་འཐུས་ལྷན་ཚོགས་རྒྱ་གར་བྱང་ཤར་ཁུལ་གྱི་བོད་དོན་ཞུ་གཏུག་ལས་འགུལ་ཚོགས་ཆུང་གི་ཚོགས་མི་སྤྱི་འཐུས་པདྨ་འབྱུང་གནས་ལཊ་དང་སྤྱི་འཐུས་ཤར་གླིང་ཟླ་སྒྲོན། སྤྱི་འཐུས་དབྱངས་ཅན་སྒྲོལ་དཀར་བཅས་ཀྱིས། འབྲས་ལྗོངས་སྒང་ཏོག་དང་ཨ་སམ་མངའ་སྡེའི་རྒྱལ་ས་གྷོ་ཝ་ཊི་བཅས་སུ་བོད་དོན་ཞུ་གཏུག་གི་ལས་འགུལ་ཐེངས་གཉིས་པ་སྤེལ་ཡོད་པ་ལྟར། ཟླ་འདིའི་ཕྱི་ཚེས་ ༢༠ ཉིན་ནས་བཟུང་ཨ་རུ་ནཱ་ཅལ་མངའ་སྡེའི་རྒྱལ་ས་ཨི་ཀྲ་ན་སྒར་དུ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ན་བམ་ཏུ་ཀུ་ (Shri Nabam Tuku) མཆོག་གཙོས། མངའ་སྡེའི་སྤྱི་ཁྱབ་བློན་ཆེན་ཟུར་པ་དང་དབུས་གྲོས་ཚོགས་གོང་མའི་འཐུས་མི། ཀང་རེ་སི་མངའ་སྡེའི་ཚོགས་གཙོ་སྐུ་ཞབས་མུ་ཀུཊ་མི་ཐི་མཆོག་དང་། མངའ་སྡེའི་གྲོས་ཚོགས་འཐུས་མི་ལྷ་ལྕམ་ཀར་ཡ་བྷ་གངྒ་དང་པ་སངས་རྡོ་རྗེ་སོ་ན། ཀོང་རེ་སི་ཚོགས་པའི་བརྒྱུད་ལམ་སྡེ་ཚན་གྱི་ཚོགས་གཙོ་དང་བློན་ཆེན་ཟུར་པ་སྐུ་ཞབས་ཐུབ་བསྟན་བསྟན་པ། བྷེ་ཇེ་པེ་ཚོགས་པའི་ཚོགས་གཙོ་སྐུ་ཞབས་ཏ་ཡི་ཏ་ཀཱ། ཨེན་སི་པི་ཚོགས་པའི་ཚོགས་གཙོ་དང་བློན་ཆེན་ཟུར་པ་སྐུ་ཞབས་ཁ་ཕ་བེན་གི་ཡ། ས་གནས་ཀྱི་ཚོགས་པ་པི་པོལ་ས་པར་ཀྲི་ཨོབ་ཨ་རུ་ན་ཅལ་ཚོགས་པའི་ཚོགས་གཙོ་སྐུ་ཞབས་ཀ་མིང་རིན་གུ་བཅས་ལ་ཐུག་འཕྲད་ཀྱིས་བོད་དོན་དཀའ་རྙོག་སེལ་ཐབས་སུ་མངོན་གསལ་དོད་པོའི་རྒྱབ་སྐྱོར་གནང་རྒྱུའི་འབོད་བསྐུལ་ཞུས་ཡོད་པ་མ་ཟད། བློན་ཆེན་དང་གྲོས་ཚོགས་འཐུས་མི་༥༨ ལ་སྦྲགས་ཐོག་ནས་ཞུ་གཏུག་སྙན་ཞུ་སྐུལ་གནང་ཡོད་འདུག
སྐབས་དེར་མངའ་སྡེ་བློན་ཆེན་གཙོས། གྲོས་ཚོགས་འཐུས་མི་དང་སྲིད་དོན་ཚོགས་པ་ཁག་གི་དབུ་ཁྲིད་ཚོས་མ་འོངས་པར་བོད་དོན་ཐོག་མཐའ་གཅིག་ཏུ་རྒྱབ་སྐྱོར་གནང་རྒྱུ་ ཡིན་པའི་ཞལ་བཞེས་གནང་ཡོད་འདུག་ལ། ཉིན་མཐའ་མར་སྤྱི་འཐུས་རྣམ་པས་ས་གནས་སུ་གསར་འགོད་ལྷན་ཚོགས་སྐོང་ཚོགས་ཀྱིས་ལས་འགུལ་མཇུག་སྒྲིལ་རྗེས། མེ་གྷ་ལ་ཡ་ལའི་ནང་བོད་དོན་ཞུ་གཏུག་གི་ལས་འགུལ་སྤེལ་གྱི་ཡོད་འདུག
གསར་འགོད་པ། དོན་གོ
