ཟླ་འདིའི་ཕྱི་ཚེས་ ༢༢ ཉིན་སུད་སིའི་གྲོང་ཁྱེར་ལུའུ་ཙན་ (Luzern) ནང་གནས་སྡོད་ལྷུན་འགྲུབ་ཚང་ཀརྨ་བཀྲིས་ཚེ་རིང་དང་སྟག་ཚང་དཀོན་མཆོག་ཁྱིམ་ཚང་གཉིས་ཀྱིས་སུད་སི་དང་ལེཀ་ཏན་སི་ཊཡན་བོད་རིགས་མི་མང་གི་བོད་དོན་དྲིལ་བསྒྲགས་ཡིག་ཆ་འགྲེམས་སྤེལ་ཆེད་ས་གནས་ཨེམ་མེན་བྷུ་རོ་ཁཱུ (Emmenbrück) ནང་བོད་ཀྱི་རྒྱལ་དར་སྒྲེང་འཛུགས་དང་ད་ལྟའི་བོད་ནང་གི་གནས་སྟངས་ངོ་སྤྲོད་ཡིག་ཆ་འགྲེམས་སྤེལ་གྱི་ལས་འགུལ་ཞིག་སྤེལ་ཡོད་འདུག
ཁྱིམ་ཚང་གཉིས་ཀྱི་རྒྱལ་ཚོགས་མདུན་དུ་བོད་དོན་ཞུ་གཏུག་ལས་འགུལ་མུ་མཐུད་སྤེལ་མཁན་སྟག་ཚང་དཀོན་མཆོག་ལགས་ཀྱིས་ངོ་སྤྲོད་གནང་བ་ལྟར་ན། ཁོང་ཁྱིམ་ཚང་གཉིས་ཀྱིས་ལས་འགུལ་འདི་ལྟར་སྤེལ་དོན། རྒྱ་གཞུང་གིས་བོད་ས་བཙན་བཟུང་གིས་བོད་མི་ས་ཡ་གཅིག་ལྷག་དམར་གསོད་བཏང་བ་དང་། དུས་རབས་ཉི་ཤུའི་ལོ་རབས་བརྒྱད་ཅུ་དང་། ཉིས་སྟོང་བརྒྱད་ལོར་བོད་མིའི་ཞི་རྒོལ་ཐོག་དྲག་གནོན་བྱས་པ། ཉིས་སྟོང་དགུ་ལོར་བཀྲ་བྷེ་ལགས་ཀྱིས་རང་ལུས་མེར་བསྲེགས་བཏང་ཚུན་དུ་དཔའ་བོ་དཔའ་མོ་ ༡༡༧ ཙམ་གྱིས་རང་དབང་གི་ཆེད་དུ་ཚེ་སྲོག་བཏང་བ། བོད་ནང་གི་བླ་སྤྲུལ་དང་མཁས་དབང་། རྩོམ་པ་བོ། སྒྱུ་རྩལ་བ། གཞས་པ་སོགས་གཅིག་འཕྲོར་གཅིག་མཐུད་ཀྱིས་གསོད་བཟུང་མནར་གཅོད་བཏང་དང་གཏོང་གི་ཡོད་སྟབས། བྱེས་འབྱོར་བོད་པ་རྣམས་ཀྱིས་རང་རང་གིས་འཇོན་ཚོད་དཔག་ཚོད་ཀྱིས་བོད་ནང་གི་ཆེས་ཛ་དྲག་གི་གནས་སྟངས་ལ་གདུང་སེམས་མཉམ་སྐྱེད་བྱེད་རྒྱུ་ལས་འགན་དུ་སོང་། ད་རེབ་ལྷག་དཀར་སྲུང་གཙི་དང་བསྟུན་ཏེ་སུད་སི་དང་ལེཀ་ཏེན་སིཊ་ཡན་བོད་རིགས་མི་མང་གི་བོད་དོན་དྲིལ་བསྒྲགས་ཡིག་ཆ་འགྲེམས་སྤེལ་བྱེད་ཀྱི་ཡོད་སྐོར་བརྗོད་སོང་།
གོང་གསལ་གནས་ཚུལ་སྐོར་ཙ་ཡུས་ཕུན་ཚོགས་ལགས་ཀྱིས་གནས་ཚུལ་བཏང་འབྱོར་ལ། ཐེངས་འདིའི་ལས་འགུལ་ནང་ཁྱིམ་ཚང་གཉིས་ཀྱི་ནང་མི་གཙོས་མི་གྲངས་ ༡༡ ལྷག་ཉམས་ཞུགས་བྱས་ཡོད་འདུག་པ་དང་། བོད་གནས་ངོ་སྤྲོད་ཡིག་ཆ་ ༣༠༠ ལྷག་འཇར་མན་སྐད་ཡིག་ནང་བསྒྱུར་ཏེ་མི་མང་ལ་འགྲེམས་སྤེལ་བྱེད་བཞིན་ཡོད་འདུག ཁྱིམ་ཚང་འདི་གཉིས་ཀྱིས་ད་ལོའི་ལོ་སར་སྐབས་ནས་རྒྱལ་ཚོགས་མདུན་དུ་བོད་དོན་ཞུ་གཏུག་གི་ལས་འགུལ་ཟླ་རེར་ཐེངས་ ༢ རེ་སྤེལ་བཞིན་ཡོད་ཅིང་། ད་བར་རྒྱལ་ཚོགས་མདུན་དུ་ཐེངས་༡༡ དང་། གོང་བརྗོད་ས་གནས་བཅས་ཁྱོན་ཐེངས་ ༡༢ སྤེལ་ཡོད་འདུག་ལ། ད་དུང་མུ་མཐུད་སྤེལ་འཆར་ཡོད་འདུག
