ཕྱིའི་རྣམ་པ་ལས་ནང་གི་དོན་རྙིང་གལ་ཆེ།

“ཕྱིའི་རྣམ་པ་ལས་ནང་གི་དོན་རྙིང་གལ་ཆེ”སྲིད་སྐྱོང་གི་བོད་རྒྱལ་འབྲེལ་མོལ་ལམ་བུ།

ཐུབ་བསྟན་དབྱིག་གཉེན།

༄༅། །སྲིད་སྐྱོང་བློ་བཟང་སེངྒེ་མཆོག་བཀའ་བློན་ཁྲི་པའི་འོས་གཞིར་བཞེངས་སྐབས་དབུ་མའི་ལམ་གྱི་སྲིད་བྱུས་ལ་རྒྱབ་སྐྱོར་དང་རྩ་འཛིན་གནང་རྒྱུའི་ཁས་ལེན་གནང་ཡོད་པ་མ་ཟད། བཀའ་བློན་ཁྲི་པའི་ཐུགས་འགན་བཞེས་པའི་གཏམ་བཤད་དུའང་ལངས་ཕྱོགས་དེར་བསྐྱར་ནན་གནང་ཡོད། བཀའ་བློན་ཁྲི་པའི་འགན་འཁུར་བཞེས་ཏེ་ད་བར་ལོ་གཉིས་ལ་ཉེ་བ་འགྲོ་ཡི་ཡོད་ནའང་། བོད་རྒྱ་འབྲེལ་མོལ་གྱི་གནས་སྟངས་དེ་འབྲེལ་བ་རྩ་ཆད་ཀྱི་གནས་སྟངས་རང་སོར་གནས་ནས་མདུན་སྐྱོད་བྱུང་མེད། གསར་འགྱུར་ལས་རིགས་ཀྱི་བཅར་འདྲི་དང་གསར་འགོད་པར་གཏམ་བཤད་གནང་བ། དེ་བཞིན་གཞུང་འབྲེལ་གསུང་བཤད་སོགས་ཀྱི་ནང་དབུ་མའི་ལམ་གྱི་སྲིད་བྱུས་ལ་མུ་མཐུད་རྩ་འཛིན་གནང་གི་ཡིན་གསུངས་པ་དང་ཆབས་ཅིག བོད་རྒྱ་འབྲེལ་མོལ་གྱི་འགན་འཁུར་གཙོ་བོ་བཞེས་མཁན་སྐུ་ཚབ་རྣམ་གཉིས་ལ་བསྐྱར་ཞིབ་དང་བོད་རྒྱ་གྲོས་མོལ་ལས་དོན་ཚོགས་ཆུང་གི་ཚོགས་མིར་བསྐྱར་བསྒྲིགས་གནང་གི་ ཡིན་གསུངས་པ་དང་། ལྷག་པར་བོད་མི་མང་སྤྱི་འཐུས་གྲོས་ཚོགས་ནང་དེ་ལྟར་གནང་རྒྱུའི་གསལ་བསྒྲགས་གནང་ཡོད།

སྔར་ལོ་སྐུ་ཚབ་རྣམ་གཉིས་ཀྱིས་བོད་ནང་གི་གནས་སྟངས་ཛ་དྲག་ཏུ་འགྲོ་བཞིན་པ་དང་རྒྱ་ནག་གཞུང་གིས་གྲོས་མོལ་བྱ་རྒྱུར་ལྷག་བསམ་རྣམ་དག་བྱེད་ཀྱི་མེད་ལུགས་རྒྱུ་མཚན་དུ་གསུངས་ནས་སྐུ་ཚབ་ཀྱི་ལས་འཁུར་ནས་དགོངས་ཞུ་གནང་ཡོད་པ་དང་། སྐབས་དེར་བཀའ་ཤག་གི་གསར་འགོད་བསྒྲགས་གཏམ་ནང་འདི་ལྟར་བཀོད་ཡོད། “ཕྱི་ ལོ་ ༢༠༡༢ ཟླ་ ༥ ཚེས་ ༣༠ དང་ ༣༡ ཉིན་དྷ་སར་བོད་རྒྱ་ཞི་མོལ་ལས་དོན་ཚོགས་ཆུང་གི་ཚོགས་འདུའི་སར་སྐུ་ཚབ་གཉིས་ ནས་རྒྱ་ནག་གཞུང་གིས་འབྲེལ་མོལ་ལ་བཟང་ཕྱོགས་ཀྱི་ལན་གཏན་ནས་མ་བྱུང་བར་བློ་ཕམ་ དང་བཅས་བཀའ་བློན་ཁྲི་པར་དགོངས་ཞུ་ཕུལ་ཡོད” དང་། ཡང་མཇུག་ཏུ་ “བོད་མིའི་འགོ་འཁྲིད་ཀྱིས་ཆོད་སེམས་བརྟན་པོའི་སྒོ་ནས་འཚེ་བ་མེད་པ་དང་དབུ་མའི་ལམ་གྱི་སྲིད་བྱུས་མུ་མཐུད་རྒྱུན་འཛིན་བྱ་རྒྱུ་མ་ཟད། འབྲེལ་མོལ་གྱི་ལམ་ནས་བོད་དོན་དཀའ་རྙོག་སེལ་ཐབས་བྱེད་རྒྱུ་དེ་ཉིད་ཐབས་ལམ་བཟང་ཤོས་ཡིན་པའི་ཡིད་ཆེས་བྱེད་ཀྱི་ཡོད། བོད་མིའི་འགོ་འཁྲིད་ཀྱིས་ཕྱིའི་རྣམ་པ་ལས་ནང་གི་དོན་སྙིང་གལ་ཆེ་བར་བརྩི་བཞིན་ཡོད་ན་ས་གནས་དང༌། དུས་ཚོད་གང་འདྲ་ཞིག་ཏུ་ཡིན་རུང་དོན་ཕན་ལྡན་པའི་འབྲེལ་མོལ་ཞུ་རྒྱུའི་གྲ་སྒྲིག་ཡོད” ཅེས་བཀོད་ཡོད། སྐུ་ཚབ་རྣམ་གཉིས་དགོངས་ཞུ་གནང་དགོས་པའི་རྒྱུ་མཚན་དེ་ཡོངས་བསྒྲགས་རྒྱུ་མཚན་གསུངས་པ་དེ་ཙམ་ཡིན་ནམ།

ཡང་ན་དེ་ལས་གཏིང་གཟབ་པ་དང་མགོ་རྙོག་ཆེ་བའི་རྒྱུ་མཚན་གནད་དོན་ཡོད་པར་ཞིབ་འཇུག་གནང་དགོས་པའི་གནས་སུ་གྱུར་ཡོད། སྲིད་སྐྱོང་བློ་བཟང་སེངྒེ་མཆོག་གིས་བཀའ་བློན་ཁྲི་པའི་འགན་འཁུར་བཞེས་རྗེས་བོད་སྐད་ཐོག་བཅར་འདྲི་དང་པོ་ཨ་རིའི་རླུང་འཕྲིན་ཁང་གི་ཀུན་གླེང་ལ་གནང་བའི་ནང་སྐུ་ཚབ་ཀྱི་གནད་དོན་ཐོག་རང་འཇགས་གནས་དང་འགྱུར་བ་གཏོང་དགོས་ཞིབ་འཇུག་གནང་གི་ཡིན་ཞེས་གསལ་པོར་གསུངས་ཡོད་པ་དེས་སྐུ་ཚབ་གཉིས་ལ་བཀའ་བློན་ཁྲི་པས་ཡིད་ཆེས་དང་གདེང་འཇོག་གནང་སྟངས་ལ་དྲི་བ་ཞིག་བྱུང་ཡོད་པ་མ་ཟད། ཨ་རིའི་རྒྱལ་ས་ཝ་ཤིན་ཌོན་དུ་ཡོད་པའི་རྒྱལ་སྤྱིའི་བོད་དོན་ལས་འགུལ་ཁང་གིས་ཨ་རི་གཞུང་དང་གྲོས་ཚོགས་ལ་འབྲེལ་བའི་ལས་དོན་བྱེད་སྟངས་ལ་འགྱུར་བ་དགོས་པའི་དགོངས་འཆར་གསུངས་ཡོད།

དམིགས་བསལ་སྐུ་ཚབ་རྒྱ་རི་རིན་པོ་ཆེ་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་ལྷན་ཚོགས་ཀྱི་ཚོགས་གཙོ་ཡིན་པའི་ཆ་ནས་ཉིན་རེའི་ལས་དོན་གནང་ཡུལ་རྒྱལ་སྤྱིའི་བོད་དོན་ལས་འགུལ་ཁང་དུ་གནང་གི་ཡོད་མ་ཟད། ལས་ཁུངས་དེའི་མིའི་ནུས་ཤུགས་སོགས་དམིགས་བསལ་སྐུ་ཚབ་ཀྱི་ཕྱག་ལས་གནང་ཕྱོགས་ལ་གཞོགས་འདེགས་དང་མཉམ་རུབ་གནང་གི་ཡོད་པ་དང་། སྲིད་སྐྱོང་བློ་བཟང་སེངྒེ་མཆོག་གིས་རྒྱལ་སྤྱིའི་བོད་དོན་ལས་འགུལ་ཁང་གིས་ཨ་རིའི་གྲོས་ཚོགས་དང་ཨ་རི་གཞུང་ལ་འབྲེལ་གཏུག་ལ་ཐད་ཀར་འགན་འཁུར་ལེན་སྟངས་ཀྱི་ངོ་བོ་ལ་འགྱུར་བ་དགོས་པའི་དགོངས་ཚུལ་གསུངས་རྗེས་ཝ་ཤིན་ཌོན་ནང་བོད་དོན་ལས་འགུལ་གནང་ཕྱོགས་ལའང་འགྱུར་བ་བྱུང་ཡོད་པ་དང་། དེས་དམིགས་བསལ་སྐུ་ཚབ་རྒྱ་རི་རིན་པོ་ཆེས་སྔར་བཞིན་ཕྱག་ལས་གནང་མི་བདེ་བར་གྱུར་ཡོད། གནས་ཚུལ་དེ་ཚོས་དམིགས་བསལ་སྐུ་ཚབ་རྒྱ་རི་བློ་གྲོས་རྒྱལ་མཚན་ལགས་ལ་བཀའ་བློན་ཁྲི་པ་བློ་བཟང་སེངྒེས་ཡིད་ཆེས་ཀྱི་གནས་ཚད་ཅི་འདྲ་ཡོད་མེད་དྲི་བ་རང་བཞིན་གྱིས་བསླེབས། གནས་ཚུལ་དེ་དག་གིས་དམིགས་བསལ་སྐུ་ཚབ་རྒྱ་རི་བློ་གྲོས་རྒྱལ་མཚན་ལགས་ཀྱིས་དགོངས་ཞུ་གནང་རྒྱུར་ཐག་གཅོད་མ་གནང་ཀ་མེད་དུ་གྱུར་བའི་རྐྱེན་བྱས་ཡོད་སྲིད།

དེ་བཞིན་ད་ཡོད་བོད་རྒྱ་གྲོས་མོལ་ལས་དོན་ཚོགས་ཆུང་གི་ཚོགས་མི་ཚང་མར་སྲིད་སྐྱོང་བློ་བཟང་སེངྒེ་མཆོག་གིས་ཡིད་ཆེས་ཇི་ཙམ་གནང་གི་ཡོད་མེད་ཀྱང་དྲི་བ་ཆེན་པོ་རེད། ད་ཡོད་ལས་དོན་ཚོགས་ཆུང་གི་ཚོགས་མི་མང་ཆེ་བ་རྒྱ་རི་བློ་གྲོས་རྒྱལ་མཚན་ལགས་དང་འབྲེལ་བ་ཡོད་པ་དང་ཕྱག་ལས་མཉམ་དུ་གནང་མྱོང་ཡོད་མཁན་ཡིན། དེ་མིན་སྲིད་སྐྱོང་བློ་བཟང་སེངྒེ་མཆོག་གིས་བོད་རྒྱ་གྲོས་མོལ་ལས་དོན་ཚོགས་ལ་འགྱུར་བ་གཏོང་གི་ཡིན་ཞེས་ཅིའི་ཕྱིར་གསུངས་པ་ཡིན་ནམ། འོན་ཀྱང་ད་བར་ལས་དོན་ཚོགས་ཆུང་གི་ཚོགས་འདུ་སྔ་རྗེས་ཚོགས་ཡོད་ནའང་། གནས་སྟངས་རང་འཇགས་རེད། སྐུ་ཚབ་རྣམ་གཉིས་དགོངས་ཞུ་གནང་ནས་ལོ་གཅིག་ལྷག་སོང་ཡོད་ནའང་། ད་ལྟའང་སྐུ་ཚབ་གསར་པ་བསྐོ་གཞག་གནང་མ་ཐུབ་པའི་རྒྱུ་མཚན་ཅི་ཡིན་ནམ། གནས་སྟངས་འདི་ཕྱིའི་རྣམ་པ་ལས་ནང་གི་དོན་རྙིང་གལ་ཆེ་བའི་གོ་དོན་ཡིན་ནམ།

བོད་མི་མང་སྤྱི་འཐུས་ཚོགས་གྲོས་སུ་དམིགས་བསལ་སྐུ་ཚབ་བསྐོ་གཞག་གནང་ཐུབ་པའི་འགལ་རྐྱེན་གང་ཡིན་སྐོར་སྐར་རྟགས་ཅན་གྱི་དྲི་བ་བྱུང་བར་སྲིད་སྐྱོང་བློ་བཟང་སེངྒེ་ལགས་ཀྱིས་ཕྱིའི་རྣམ་པ་ལས་ནང་གི་དོན་རྙིང་གསལ་ཆེ་བར་ངོས་འཛིན་གནང་གི་ཡོད་ལུགས་དང་། རྒྱ་ནག་གཞུང་གིས་གྲོས་མོལ་བྱེད་ཀྱི་ཡིན་བཤད་པ་ཡིན་དེ་ཉིན་སྐུ་ཚབ་བསྐོ་ཆོག་ཡོད་ཅེས་ལན་འདེབས་གནང་ཡོད། སྲིད་སྐྱོང་གིས་ཕྱིའི་རྣམ་པ་ལས་ནང་གི་དོན་རྙིང་གལ་ཆེ་བ་ཡིན་ཞེས་གྲོས་ཚོགས་སུ་གསུངས་པ་དེ་ནི་སྐབས་བབས་ལན་འདེབས་གནང་ཐུབ་ཙམ་ལས་དྲི་བ་དེར་ལན་ངོ་མ་ད་ལྟའང་གནང་མེད།

དོ་སྣང་བྱེད་དགོས་པའི་གནད་དོན་གཅིག་ནི་བོད་མི་མང་སྤྱི་འཐུས་རྒྱུན་ལས་དང་གྲོས་ཚོགས་ནང་བོད་རྒྱ་འབྲེལ་མོལ་གཙོས་སྲིད་སྐྱོང་བློ་བཟང་སེངྒེ་མཆོག་ལ་བོད་དོན་བདེན་མཐའ་གསལ་ཐབས་ལ་སྲིད་བྱུས་དང་ལས་རིམ་གང་ཡོད་སྐོར་འདྲི་ཞིབ་དང་གླེང་སློང་གནང་གི་མེད་པ་དེ་ཅི་ཡིན་ནམ། སྐབས་བཅོ་ལྔ་པའི་བོད་མི་མང་སྤྱི་འཐུས་རྒྱུན་ལས་དང་གྲོས་ཚོགས་གཉིས་ཁ་ཁུ་སིམ་པོར་བཞུགས་དོན་ཅི་ཡིན་ནམ། ཕྱོགས་གཅིག་ནས་བོད་ནང་གི་ཛ་དྲག་གི་གནས་སྟངས་ལ་སེམས་ཚབས་ཆེ་མདོག་གིས་གྲོས་ཆོད་རིམ་པར་བཞག་ཡོད་པ་མ་ཟད། དེའི་སྐོར་ལ་གྲོས་ཚོགས་ཀྱི་དུས་ཚོད་ཉིན་གྲངས་མང་པོ་བཏང་ནས་སྤྱི་འཐུས་རྣམས་བོད་ནང་གི་གནས་སྟངས་གསལ་རྟོགས་བཟང་པོ་དང་མཁས་མདོག་གིས་གཏམ་བཤད་རིང་ཐག་ཆོད་མང་པོ་གནང་སོང་ནའང་། བོད་ནང་གི་ཛ་དྲག་གནས་སྟངས་ལ་གདོང་ལེན་གནང་རྒྱུའི་ཐབས་ལམ་གཅིག་ཁོ་ན་དེ་བོད་རྒྱ་འབྲེལ་མོལ་བརྒྱུད་ནས་སེལ་ཐབས་ཡོད་མེད་ལ་བགྲོ་གླེང་ཙམ་གནང་མེད།

སྐད་འབོད་ལས་འགུལ་དང་གདུང་སེམས་མཉམ་སྐྱེད་ཀྱི་མཆོད་འབུལ་བྱས་པ་དང་ཚོགས་འཛོམས་བྱས་པ་ཙམ་གྱིས་བོད་ནང་གི་ཛ་དྲག་དཀའ་ངལ་སེལ་ཐུབ་ཐབས་མེད་པ་དེ་ཀུན་གྱི་སྣང་ངོར་ཡོད་པ་དེ་རེད། འོན་ཀྱང་གདུང་སེམས་མཉམ་སྐྱེད་ཅེས་པའི་ཚིག་སྙན་པོ་འདི་མ་ཎེ་བགྲང་པ་བཞིན་གནང་བཞུགས་ན་བོད་ནང་གི་ཛ་དྲག་དཀའ་ངལ་ག་ལ་སེལ་ཐུབ། མདོར་ན་སྐབས་བཅུ་གསུམ་པའི་བཀའ་ཤག་ལ་སྤྱི་འཐུས་གྲོས་ཚོགས་ཀྱིས་བོད་རྒྱ་འབྲེལ་མོལ་ལ་སུན་པོ་བཟོས་ཡོད་པ་བཞིན་སྐབས་བཅོ་ལྔ་པའི་བཀའ་ཤག་ལ་གནང་གི་མེད་པ་དེ་ཅི་ཡིན་ནམ།

སྲིད་སྐྱོང་བློ་བཟང་སེངྒེ་མཆོག་གིས་ཕྱིའི་རྣམ་པ་ཞེས་གསུངས་པ་དེས་རྒྱ་ནག་ལ་འབྲེལ་མོལ་ཆེད་སྐྱོད་མཁན་ཙམ་གྱི་སྐུ་ཚབ་གཅིག་བསྐོ་བཞག་གནང་རྒྱུར་གོ་དགོས་ཀྱི་ཡོད་དམ། ནང་གི་དོན་རྙིང་ཞེས་པའི་འགྲེལ་བཤད་ལ་རྒྱ་ནག་གཞུང་གིས་གྲོས་མོལ་བྱེད་ཀྱི་ཡིན་ཟེར་ན་ལམ་གསེང་མི་འགྲོ་གཏོང་ཆོག་ཡོད་ཅེས་གསུངས་ཡོད། གལ་སྲིད་དེ་འདྲ་ཞིག་ཡིན་ན་དམིགས་བསལ་སྐུ་ཚབ་ཀྱི་ལས་འགན་དང་ངོ་བོ་ལ་འགྱུར་བ་སོང་བ་ཡིན་ནམ། དེའི་གོང་དམིགས་བསལ་སྐུ་ཚབ་དང་སྐུ་ཚབ་རྣམ་གཉིས་ཀྱི་ལས་འགན་ནི་རྒྱ་ནག་ལ་འབྲེལ་མོལ་ཆེད་ཕེབས་རྒྱུའི་འགན་འཁུར་ཙམ་མིན་པར་བོད་རྒྱ་གྲོལ་མོལ་ཡོང་ཐབས་དང་དབུ་མའི་ལམ་གྱི་སྲིད་བྱུས་མདུན་བསྐྱོད་ཐུབ་ཐབས་ལ་དངོས་ཤུགས་ཀྱི་ལས་དོན་བསྟུད་མར་གནང་དགོས་ཀྱི་ཡོད་པ་དང་། ལྷག་པར་ ༢༠༠༢ གོང་འབྲེལ་མོལ་རྩ་ཆད་ཀྱི་གནས་སྐབས་སུ་གཞུང་དང་གཞུང་འབྲེལ་མིན་པའི་བརྒྱུད་ལམ་ཐོག་འབྲེལ་མོལ་དངོས་སུ་མགོ་འཛུགས་ཐུབ་ཐབས་ལ་ལས་དོན་གནང་ཡོད། སྲིད་སྐྱོང་བློ་བཟང་སེངྒེ་མཆོག་གིས་ཕྱིའི་རྣམ་པ་ལས་ནང་གི་དོན་རྙིང་གལ་ཆེ་བ་གསུངས་པ་དེ་རྒྱ་ནག་གིས་འབྲེལ་མོལ་བྱེད་ཀྱི་ཡིན་ཟེར་བའི་དུས་ཚོད་ལ་རེ་སྒུག་གནང་སྟེ། འབྲེལ་མོལ་གྱི་འགན་འཁུར་བཞེས་མཁན་སྐུ་ཚབ་དེ་གསང་བར་འཇོག་རྒྱུ་དེ་ཡིན་ནམ།

གནས་ཚུལ་ཤེས་རྟོགས་ཡོང་རྒྱུར་ཨ་རིའི་ནང་ཕྱི་འབྲེལ་ལས་དོན་གྱི་འགན་འཁུར་ཆ་ཚང་བ་སྲིད་སྐྱོང་གིས་ཐད་ཀར་བཞེས་ཏེ་ཕྱི་དྲིལ་བཀའ་བློན་ལ་འགན་འཁུར་མེད་པའི་ཐག་གཅོད་གནང་བ་རེད་ཅེས་གོ་རྒྱུ་འདུག  གནས་ཚུལ་དེ་ཕལ་ཆེ་བདེན་པ་ཡིན་ཚོད་འདུག སྲིད་སྐྱོང་བློ་བཟང་སེངྒེ་ལགས་ཀྱིས་མཛད་འཁུར་བཞེས་པ་ནས་ད་བར་ཨ་རིའི་ནང་ཐེངས་ལྔ་ཙམ་ཕེབས་ཡོད་ནའང་། ཕྱི་དྲིལ་བཀའ་བློན་དང་། ཡང་ན་ཕྱི་དྲིལ་དྲུང་ཆེ་སོགས་ཕྱི་འབྲེལ་གྱི་མི་སྣ་གཞན་སུའང་ཨ་རིའི་ནང་གཞུང་འབྲེལ་ཐོག་ཕེབས་མེད། གཅིག་བྱས་ནང་བོད་རྒྱ་འབྲེལ་མོལ་གྱི་འགན་འཁུར་ཡང་སྲིད་སྐྱོང་གིས་ཐད་ཀར་བཞེས་ཏེ་དམིགས་བསལ་སྐུ་ཚབ་ལ་འགན་འཁུར་དེ་གནང་འདོད་པ་མེད་པ་ཡིན་སྲིད། དེ་འདྲ་ཞིག་གནང་གི་ཡོད་ན་དེ་ནི་འཛིན་སྐྱོང་ལས་དོན་ཚགས་ཚུད་དང་ནུས་པ་ལྡན་པ་ཡོང་རྒྱུར་དོ་ཕོག་བྱེད་ཉེན་ཡོད།

བཀའ་ཤག་གི་ཐག་གཅོད་དང་འབྲེལ་བའི་ལས་དོན་ཅི་འདྲ་ཞིག་ཡིན་རུང་དེའི་མཐའ་མའི་འགན་འཁུར་སྲིད་སྐྱོང་ལ་ཡོད་ནའང་། འཛམ་གླིང་སྤྱི་སྲོལ་ལ་ལས་བགོས་ཀྱི་ངོ་བོར་ཉིན་རེའི་ལས་དོན་རྣམས་ཁུངས་སོ་སོར་བཀའ་ཁྱབ་གནང་དགོས་པ་ནི་གཞུང་གི་འཛིན་སྐྱོང་ལམ་ལུགས་ཡང་དག་པ་གཅིག་ངོས་འཛིན་བྱེད་ཀྱི་ཡོད། རྩོམ་ཐུང་འདི་འབྲི་བཞིན་པའི་སྐབས་འདིར་བྱང་ཨ་རིའི་སྐུ་ཚབ་དོན་གཅོད་ལ་དབུ་དཀར་ཚང་སྐལ་བཟང་རྡོ་རྗེ་བསྐོ་བཞག་གནང་བའི་གསལ་བསྒྲགས་གནང་བའི་གནས་ཚུལ་ཐོན་སོང་། སྐལ་བཟང་རྡོ་རྗེ་ལགས་ནི་སྲིད་སྐྱོང་གི་བློས་ཐུབ་ཅན་གྱི་གྲོགས་པོ་རྙིང་པ་ཞིག་ཡིན་པ་མ་ཟད། བཀའ་བློན་ཁྲི་པའི་འོས་བསྡུའི་སྐབས་མཐུན་འགྱུར་ཞུ་མཁན་གཙོ་བོ་དེ་རེད། ཁོང་ལ་ཕྱི་འབྲེལ་གྱི་ཉམས་མྱོང་དང་འཛིན་སྐྱོང་གི་ཉམས་མྱོང་གཉིས་ཀ་ཅུང་ཙམ་ལས་མེད། བྱང་ཨ་རིའི་སྐུ་ཚབ་དོན་གཅོད་ཀྱི་ལས་དོན་དེ་རྙོག་འཛིང་ཆེ་ཙམ་ཞིག་རེད། སྐལ་བཟང་རྡོ་རྗེའི་གཤིས་སྤྱོད་དང་གཞན་ལ་འབྲེལ་བ་གནང་ཕྱོགས་ཀྱི་ནུས་པ་བཅས་ཀྱིས་ཝ་ཤིན་ཌོན་སུ་སྤོ་འཆར་ཡོད་པའི་བྱང་ཨ་རིའི་སྐུ་ཚབ་དོན་གཅོད་ཀྱི་འགན་འཁུར་ཐེག་ཐུབ་ཀྱི་ཡོད་མེད་ནི་དྲི་བ་ཆེན་པོ་རེད།

བཀའ་ཤག་གོང་མས་དུས་ནས་དུས་སུ་དབུ་མའི་ལམ་གྱི་སྲིད་བྱུས་དང་འབྲེལ་བའི་སྐོར་ལ་བཀའ་བློན་ཁྲི་པ་རང་ཉིད་ཀྱི་མང་ཚོགས་འདུ་འཛོམས་སོགས་གང་སར་ནན་ཏན་ཆེན་པོས་འགྲེལ་བཤད་དང་ལམ་སྟོན་གནང་གི་ཡོད་པ་མ་ཟད། ཕྱི་དྲིལ་ལས་ཁུངས་ཀྱིས་དབུ་མའི་ལམ་གྱི་སྲིད་བྱུས་དང་དེའི་འཇུག་ངོགས་སོགས་ཀྱི་སྐོར་མང་ཚོགས་ལ་གསེད་བཀྲོལ་དང་སློབ་གསོ་གནང་རྒྱུའི་ལས་འགུལ་ཡང་ཡང་སྤེལ་ཡོད། ལྷག་པར་སྤྱི་ཚོགས་ནང་༧གོང་ས་མཆོག་གི་དགོངས་གཞི་ལ་ལོག་བཤད་བྱེད་མཁན་བྱུང་ན་དེར་བཀའ་བློན་ཁྲི་པ་དབུས་པའི་བཀའ་བློན་རྣམས་ཀྱིས་གསལ་བཤད་དང་ལན་འདེབས་ནན་པོ་གནང་བ་སོགས་དུས་ཐོག་གདོང་ལེན་གནང་ཡོད།

སྲིད་སྐྱོང་བློ་བཟང་སེངྒེ་མཆོག་གིས་མང་ཚོགས་ནང་གཏམ་བཤད་དང་དེ་བཞིན་གཞུང་འབྲེལ་གཏམ་བཤད་ནང་དབུ་མའི་ལམ་གྱི་སྲིད་བྱུས་ལ་འགྱུར་བ་མེད་པར་མུ་མཐུད་རྩ་འཛིན་གནང་གི་ཡོད་ཅེས་གསུངས་པ་ཙམ་ལས་སྲིད་བྱུས་དེ་མངོན་དུ་གྱུར་ཐབས་ལ་མང་ཚོགས་ཀྱིས་འགན་འཁུར་དང་གནད་འགག་སོགས་ནན་པོར་གསུངས་པ་ནི་ཧ་ཅང་དཀོན་པོ་རེད། ད་བར་རྒྱ་གར་དང་ཕྱི་རྒྱལ་ཡུལ་གྲུ་གང་དུ་མང་ཚོགས་ལ་གཏམ་བཤད་གནང་ནའང་། དེའི་ནང་དོན་ནི་བཀའ་ཤག་གི་བྱས་རྗེས་གྲུབ་འབྲས་དང་རྒྱལ་སྤྱིའི་ནང་གྲོས་ཆོད་བཞག་ཡོད་ལུགས་ཁོ་ན་བྱིས་པར་སྒྲུང་བཤད་པ་ལྟར་གསུངས་ཏེ་དུས་ཚོད་བཏང་བ་མངོན། འདས་པའི་ལོ་གཅིག་གཉིས་ནང་སྤྱི་ཚོགས་ནང་རང་བཙན་དོན་གཉེར་བ་ཚོའི་འབོད་ཚིག་ཤུགས་ཆེ་བ་དང་། ༸རྒྱལ་མཆོག་སྐུ་ཕྲེང་བཅུ་གསུམ་པས་རང་བཙན་གསལ་བསྒྲགས་གནང་བའི་ལོ་ཚིགས་དང་འབྲེལ་ནས་འུར་སྒྲ་ཞིག་ལངས་ཡོད་ནའང་། གནས་ཚུལ་དེ་དག་ལ་བཀའ་ཤག་གིས་གང་ཡང་གསན་མ་བྱུང་བ་ལྟ་བུར་བཞུགས་སོང་། དེ་ཡང་གཅིག་བྱས་ན་ཕྱིའི་རྣམ་པ་ལས་ནང་གི་དོན་རྙིང་གལ་ཆེ་བའི་དགོངས་པ་བཞེས་ཡིན་སྲིད།

གལ་སྲིད་བཀའ་ཤག་གིས་དབུ་མའི་ལམ་གྱི་སྲིད་བྱུས་སྐོར་མང་ཚོགས་ལ་དུས་ནས་དུས་སུ་ནན་ཏན་གྱིས་འགྲེལ་བཤད་གནང་ཡོད་ན། བར་ལམ་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གིས་མང་ཚོགས་ལ་དབུ་མའི་ལམ་གྱི་ སྲིད་བྱུས་དང་འབྲེལ་བའི་བཀའ་སློབ་ནན་པོ་དེ་དག་གནང་དགོས་བྱུང་མེད། བཀའ་ཤག་གོང་མའི་སྐབས་སུ་བོད་རྒྱ་འབྲེལ་མོལ་སྐོར་བཀའ་ཤག་དང་དམིགས་བསལ་སྐུ་ཚབ་རྣམ་གཉིས་ཀྱིས་དུས་ནས་དུས་སུ་འགྲེལ་བཤད་གནང་གི་ཡོད་པ་དེས་༸གོང་ས་མཆོག་གིས་ད་ལྟའི་གནས་སྟངས་བཞིན་འགྲེལ་བཤད་གནང་དགོས་བྱུང་མེད། སྲིད་སྐྱོང་བློ་བཟང་སེངྒེ་མཆོག་གིས་འོས་བསྡུའི་རྒྱལ་ཁ་ཐོབ་ཐབས་ཁོ་ནར་དམིགས་ཏེ་དབུ་མའི་ལམ་གྱི་སྲིད་བྱུས་ལ་རྒྱབ་སྐྱོར་གནང་བ་ཞིག་མ་ཡིན་པར་སྲིད་ཇུས་དེར་དོན་དམ་གྱི་ཡིད་ཆེས་དང་ཐབས་ལམ་དེ་བརྒྱུད་བོད་རྒྱའི་དཀའ་རྙོག་སེལ་ཐབས་ལ་ཆོད་སེམས་བརྟན་པོ་ཡོད་ན། ཕྱིའི་རྣམ་པ་ལས་ནང་གི་དོན་རྙིང་གལ་ཆེ་བ་ཟེར་བའི་ཆབ་སྲིད་ཀྱི་མིང་ཚིག་སྙན་པོ་དེ་བགྲང་རྒྱུ་མཚམས་བཞག་ནས་དོན་དམ་གྱི་ལས་འཆར་ལམ་སྟོན་དང་དོན་ཕན་གསོན་པའི་ལས་དོན་གནང་དགོས་པ་ཡིན།

ཅི་སྟེ་སྲིད་སྐྱོང་བློ་བཟང་སེངྒེ་མཆོག་གིས་འོས་བསྡུའི་རྒྱལ་ཁ་ཁོ་ནའི་དོན་དུ་དབུ་མའི་ལམ་ལ་རྒྱབ་སྐྱོར་གནང་གི་ཡོད་ཅེས་གསུངས་ཡོད་པའི་དབང་དུ་བཏང་ནའང་། འོས་བསྡུའི་དྲིལ་བསྒྲགས་ཀྱི་གཏམ་བཤད་དང་ཁས་ལེན་རྣམས་དོན་འཁྱོལ་གནང་དགོས་པ་དེ་ཛ་དྲག་གཉན་འཕྲང་ནང་ལྷུང་ཡོད་པའི་བོད་མི་མང་གི་རེ་འདུན་དུ་འགྱུར་ཐབས་ལ་འབད་དགོས་པ་མ་ཟད། ཨ་རི་སོགས་རང་དབང་ལྡན་པའི་དམངས་གཙོའི་ལམ་ལུགས་ནང་འོས་བསྡུར་ཁས་ལེན་གནང་བའི་ལས་དོན་རྣམས་གལ་ཆེའི་རྩ་དོན་ཞིག་ལ་ངོས་འཛིན་གནང་གི་ཡོད་པས། སྲིད་སྐྱོང་བློ་བཟང་སེངྒེ་མཆོག་གིས་ཕྱིའི་རྣམ་པ་ལས་ནང་གི་དོན་རྙིང་གལ་ཆེ་བ་ཞེས་པའི་ཚིག་སྐམ་ཙམ་མ་ཡིན་པར་བོད་རྒྱ་འབྲེལ་མོལ་གྱི་ལས་དོན་མདུན་བསྐྱོད་ཐུབ་ལ་འདས་པའི་ལོ་གཉིས་ལ་ཉེ་བའི་རིང་ཕྱག་ལས་གནང་ཕྱོགས་ལ་འགྱུར་བ་བཏང་ནས་དོན་དམ་གྱི་ཤུགས་གནོན་རྒྱག་རྒྱུའི་རེ་བ་དང་ཡིད་ཆེད་བྱེད་ཀྱི་ཡོད།