དེ་རིང་གཞོན་ནུའི་ཚོགས་ཆེན་ཉིན་ལྔ་པའི་སྟེང་དགའ་ལྡན་ཕོ་བྲང་གི་སྐུ་ཚབ་བཀའ་བློན་ཁྲི་ཟུར་ཟམ་གདོང་རིན་པོ་ཆེ་མཆོག་ཕེབས་ཏེ་ལམ་སྟོན་གསལ་བཤད་གནང་ཡོད་པ་དང་། ཚོགས་འདུའི་ཉིན་གསུམ་པར་ས་གནས་ཁག་ཅིག་གི་ཚོགས་བཅར་བ་རྣམས་ཕྱིར་འཐོན་པ་དང་། ཚོགས་འདུའི་ནང་བཞུགས་མཁན་བཅས་ཕྱོགས་གཉིས་ཀར་བཅར་འདྲི་ཞུས་ཡོད།
གཞོན་ནུའི་ཚོགས་ཆེན་སྟེང་ནས་ཕྱིར་འཐོན་མཁན་གྲས་སྦེལ་ཀོབ་ས་གནས་གཞོན་ནུའི་ཚོགས་གཙོ་བྱ་ཉལ་ཚེ་རིང་ལྷ་སྐྱབས་ལགས་སུ། ཚོགས་ཆེན་ནས་ཕྱིར་ཐོན་དགོས་དོན་གང་ཡིན་སྐོར་དྲིས་པར།
ལན། ང་ཚོ་ཚོགས་འདུ་ནས་མར་ཐོན་མཁན་ས་གནས་ ༨ དང་ཚོགས་མི་ ༣༤ ཡོད། ཐོན་དགོས་པའི་གནས་སྟངས་ག་རེ་ཆགས་ཡོད་ཟེར་ན། ནམ་རྒྱུན་ཡིན་ན་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་ཆེན་ཕྱི་ཟླ་ ༨ ནང་འཚོགས་ཀྱི་ཡོད། ལམ་ནས་༧གོང་ས་མཆོག་གིས་འབྱུང་འགྱུར་བོད་ཀྱི་འཐབ་རྩོད་དང་འབྲེལ་བའི་ཐོག་བཀའ་སློབ་རིམ་པར་ཕེབས་ཡོད་རེད། དེ་ལ་བརྟེན་ནས་ས་གནས་འགའ་རེའི་རྒྱུན་ལས་ཚོགས་འདུ་ཚོགས་ཏེ་ཚོགས་ཆེན་སྔ་སྣུར་བྱ་དགོས་པའི་འབོད་སྐུལ་ཞུས་སྟབས་འདི་ལོའི་ཚོགས་ཆེན་སྔ་སྣུར་བྱས་པ་རེད། ད་རེབ་ཀྱི་ཚོགས་ཆེན་ཉིན་དང་པོའི་ནང་གྲོས་གཞི་དོན་ཚན་བཞི་བའི་ནང་ཚོགས་ཆེན་སྔ་སྣུར་དང་འབྲེལ་བའི་ཐོག་སྐད་ཆ་བཤད་པ་རེད། ཚོགས་ཆེན་སྔ་སྣུར་དེ་ཛ་དྲག་ཚོགས་འདུ་ཞིག་ཡིན་པ་ལྟར། དབུས་ནས་མར་གནང་བཞག་པའི་གྲོས་གཞིའི་ཐོག་ས་གནས་སོ་སོ་ནས་གོ་བསྡུར་དང་སྦྱངས་བཤད་བྱས་ཡོད་པ་རེད། དེའི་མངོན་འདོད་ཚོགས་ཆེན་སྟེང་ཡིག་ཐོག་ནས་འབུལ་དགོས་ཀྱི་ཡོད་རེད་ལ་ང་ཚོ་ས་གནས་འཐུས་ཚབ་ཚོའི་ངོས་ནས་བསམ་ཚུལ་ཞིག་འབུལ་དགོས་ཀྱི་ཡོད་རེད།
ཡིན་ནའང་། ཚོགས་གཙོས་དབུས་སྤྱི་ཁྱབ་རྒྱུན་ལས་ཁང་གིས་གཏན་འབེབས་གནང་པའི་གྲོས་གཞི་དོན་ཚན་ ༣ ཞིག་ཁྱེར་ཡོང་པ་རེད། གྲོས་གཞི་དོན་ཚན་དང་པོའི་ནང་༧གོང་ས་མཆོག་ལ་ལྷ་དགོངས་དྭངས་གསལ་དང་མཇལ་ཁ་ཞུ་རྒྱུ། གཉིས་པ། ཐེངས་སྔོན་མར་སྦེར་ལ་འགན་འཛིན་ལྷན་ཚོགས་ཚོགས་སྐབས་གྲོས་ཆོད་(དབུས་བོད་མིའི་སྒྲིག་འཛུགས་ཀྱིས་གཏན་འབེབས་གནང་པའི་དབུ་མའི་ལམ་གྱི་སྲིད་བྱུས་རང་བཙན་ལ་འགྱུར་པ་གཏོང་དགོས་) ཕྱིར་འཐེན་བྱ་རྒྱུ། གསུམ་པ། གཞོན་ནུའི་ལངས་ཕྱོགས་རང་བཙན་གཙོ་བོར་གྱུར་པའི་ཐོག ༧གོང་ས་མཆོག་གི་བཀའ་དགོངས་གཞིར་བཟུང་མ་འོངས་སྒྲིག་འཆར་སླེབས་མཚམས་འགྱུར་བ་གཏོང་གི་ཡིན་ཟེར་བ་བཅས་རེད། ང་ཚོའི་ངོས་ནས་དེ་དག་དོན་ཚན་རེ་རེ་བཞིན་གོ་བསྡུར་སྦྱངས་བཤད་འགྲོ་གི་རེད་བསམ་གྱི་ཡོད་ཀྱང་། དབུས་རྒྱུན་ངོས་ནས་མང་མོས་རྒྱབ་སྐྱོར་ཡོད་མེད་ལ་བལྟ་གི་ཡིན་གསུངས་ཏེ། ལག་པ་བསྐྱངས་བཅུག་སྟེ་མང་མོས་ཆགས་པ་རེད། ཚོགས་གཙོའི་སྟངས་འཛིན་འོག་ག་རེ་གསུངས་པ་རེད་ཟེར་ན། མང་མོས་ཕྱིན་པ་དེར་དགག་བྱ་ཡོད་དམ་ཞེས་དྲིས་བྱུང་། ས་གནས་ཁག་ཅིག་གིས་དགག་བྱ་ཡོད་ཅེས་ལག་པ་བརྐྱངས་པ་རེད། འོན་ཀྱང་དགག་བྱ་ཡོད་མེད་ལ་མ་ལྟོས་པར། སུ་གང་ལའང་དེའི་ཐོག་བསམ་ཚུལ་ཞུ་རྒྱུའི་གོ་སྐབས་མ་སྤྲད་པར་འདི་མང་མོས་ཞེས་གཏན་འབེབས་བྱས་སོང་། ང་ཚོ་ཚོགས་འདུ་ནས་མར་ཐོན་མཁན་ཚོས་གྲོས་ཆོད་དོན་ཚན་དང་པོ་དང་གཉིས་པ་ལ་རྒྱབ་སྐྱོར་ཡོད་རེད། འོན་ཀྱང་དོན་ཚན་གསུམ་པར་གོ་བསྡུར་སྦྱངས་བཤད་བྱེད་དགོས་ཀྱི་འདུག་ཅེས་བཤད་ཀྱང་ང་ཚོར་གོ་སྐབས་མ་སྤྲད་སྟབས་ཕྱིར་ཐོན་པ་རེད། ཉིན་གཉིས་པར་དབུས་དང་ས་གནས་ཀྱི་རྩིས་ཕྲར་ཞིབ་བཤེར་བྱེད་ཀྱི་ཡོད་སྟབས། ང་ཚོས་གཞོན་ནུའི་སྒྲིག་འཛུགས་ལ་བརྩི་བཀུར་དང་ཆེ་མཐོང་ཐོག་ཚོགས་འདུར་ཞུགས་པ་ཡིན།
དེའི་རྗེས་ང་ཚོས་ཡིན་ལུགས་ཚུལ་ལྡན་གྱི་ཐོག་ནས་ཕྱི་ལ་འཐོན་དགོས་པའི་རྒྱུ་མཚན་ཚོགས་དྲུང་ལ་སྙན་ཞུ་ཕུལ་བ་ཡིན། ང་ཚོ་ཐོན་དགོས་པའི་རྒྱུ་མཚན་ག་རེ་བྲིས་ཡོད་རེད་ཟེར་ན། ཉིན་གསུམ་པར་དོན་ཚན་བཞི་བའི་ཐོག་སྦྱངས་བཤད་གནང་རྒྱུ་རེད། དོན་ཚན་བཞི་བའི་ནང་ལོགས་ལ་བོད་ཀྱི་གཞོན་ནུ་ལྷན་ཚོགས་ཀྱི་དམིགས་ཡུལ་དང་ལངས་ཕྱོགས་རང་བཙན་རེད། འདི་ལ་སླར་ཡང་ཤུགས་ཆེ་རུ་གཏོང་ཐབས་ཐད་ལས་ཀ་ག་རེ་བྱ་དགོས་ཀྱི་འདུག་ཅེས་པའི་གྲོས་གཞི་འཁྱེར་ཡོད་པ་རེད། ད་ང་ཚོ་ས་གནས་ ༨ ཀྱི་མངོན་འདོད་༧གོང་ས་མཆོག་གིས་སྔ་ཕྱི་བར་གསུམ་དང་། ལྷག་པར་དུ་ས་ལི་སྒར་དུ་བཀའ་སློབ་ལམ་སྟོན་གསལ་བཤད་རྒྱས་པ་གནང་པ་དག་ལ་ས་གནས་སོ་སོའོ་ཚོགས་མི་དག་གིས་དཔྱད་པ་བྱས་ཏེ་ངེས་པ་རྙེད་པའི་ཐོག་ནས། གཞོན་ནུ་ལྷན་ཚོགས་ཀྱི་ལངས་ཕྱོགས་ལ་འགྱུར་པ་གཏོང་དགོས་པའི་དུས་ལ་བབ་འདུག་ཅེས་པ་འདིའི་ཐོག་ནས་ཕྱི་ལ་ཐོན་པ་ལས། གཞོན་ནུ་ལྷན་ཚོགས་ཀྱི་སྒྲིག་འཛུགས་ལ་བརྩི་བཀུར་མ་ཞུས་པ་དང་ཆེ་མཐོང་མ་སྤྲད་པ་མིན།
ང་ཚོ་ཚོགས་འདུ་ནས་ཕྱི་ལ་ཐོན་ཡོད་ནའང་། ཉིན་གསུམ་པ་དང་བཞི་པ། ལྔ་བ་བཅས་ལ་ཚོགས་འདུ་ཚོགས་མགོ་ཚུགས་པ་ནས་མ་གྲོལ་བར་དུ་ཚོགས་ཁང་ཕྱི་ལོགས་ནས་གཞོན་ནུའི་སྒྲིག་ཆས་དང་རྒྱབ་ཁུག ཚོགས་བཅར་པའི་སྐེ་འདོག་ངོ་སྦྱོར་བཅས་བཏགས་ཏེ་བསྡད་ཡོད། ཚོགས་ཁང་ཕྱི་ལོགས་ནས་བསྡད་པ་དེའང་ངོ་རྒོལ་བྱེད་པ་ཞིག་མིན་པར་གཞོན་ནུའི་སྒྲིག་འཛུགས་ལ་བརྩི་བཀུར་དང་ཆེ་མཐོང་སྤྲད་པ་ཡིན།
ཚོགས་འདུ་ཉིན་བཞི་པར་དབུས་རྒྱུན་ལས་ཀྱི་སྐུ་ཚབ་དང་ཚོགས་བཅར་པའི་སྐུ་ཚབ་བཅས་ཕེབས་ཏེ་ང་ཚོར་ཚོགས་འདུར་ཡོང་རོགས། ཁྱེར་རང་ཚོའི་ཚོགས་གཙོ་རྣམ་པར་སོ་སོའི་བསམ་ཚུལ་བཤད་རྒྱུར་སྐར་མ་ ༥ རེ་ཡི་གོ་སྐབས་འབུལ་རྒྱུ་ཡིན་གསུངས་བྱུང་། ང་ཚོས་ཚོགས་འདུར་སྐད་བཏང་པར་ཐུགས་རྗེ་ཆེ། འོན་ཀྱང་ཚོགས་འདུར་བཅར་མིན་ང་ཚོས་གྲོས་བསྡུར་ཞུས་ཏེ་ལན་ཞུ་ངེས་ཡིན་ཞུས་པ་ཡིན། ཉིན་དེར་ང་ཚོས་གྲོས་བསྡུར་བྱས་མཐར་ཚོགས་ཞུགས་བྱས་ཡོད་པ་མ་རེད། ཕྱི་དྲོར་སང་ཞོགས་ང་ཚོས་ལན་འབུལ་ངེས་ཡིན་ཞུས་ཡོད། དེ་རིང་ང་ཚོས་གྲོས་བསྡུར་བརྒྱུད་སྙན་ཞུ་ཞིག་དབུས་གཞོན་ནུ་ལྷན་ཚོགས་ཀྱི་ཚོགས་གཙོ་དང་རྒྱུན་ལས། ཚོགས་བཅར་པ་བཅས་ཀྱི་མཚན་ཐོག་ལ་ཕུལ་ཡོད། དེ་རིང་བློ་བུར་དུ་དགའ་ལྡན་ཕོ་བྲང་གི་སྐུ་ཚབ་བཀའ་བློན་ཁྲི་ཟུར་ཟམ་གདོང་རིན་པ་ཆེ་ཕེབས་ཀྱི་ཡོད་རེད། ཁྱེད་རང་ཚོ་ཚོགས་ཞུགས་གནང་རོགས་གསུངས་བྱུང་། དེར་ང་ཚོས་གུས་བརྩི་ཞུས་ཏེ་ཟམ་གདོང་རིན་པོ་ཆེ་ཚོགས་བཞུགས་རིང་ཚོགས་འདུར་བཅར་པ་ཡིན་ཞེས་བརྗོད་བྱུང་།
ཡང་གསར་འགོད་པས། དེ་རིང་སྔ་དྲོར་དགའ་ལྡན་ཕོ་བྲང་གི་སྐུ་ཚབ་བཀའ་བློན་ཁྲི་ཟུར་ཟམ་གདོང་རིན་པོ་ཆེ་མཆོག་ཚོགས་ཐོག་ཏུ་ཕེབས་ཏེ་ག་རེ་གསུངས་ཡོད་མེད་དྲིས་པར།
ལན། དེའི་ཐད་རིན་པོ་ཆེ་མཆོག་གིས། ཚོགས་གཙོ་ཚེ་དབང་རིག་འཛིན་སྐུ་སྒེར་དྲུང་ཆེ་སྐུ་ངོ་བློ་བཟང་སྦྱིན་པ་ལགས་ཀྱི་མདུན་ལ་བཅར་ཏེ། ད་རེབ་ཀྱི་ཚོགས་འདུ་འཐོར་འགྲོ་བའི་ཉེན་ཁ་དང་རྒྱུན་ལས་འོས་འདེམས་བྱ་མ་ཐུབ་པ་སོགས་ཀྱི་དཀའ་ངལ་ཞུས་ཡོད་པ་འདྲ། བློ་བུར་ཐོབ་རྒྱག་ལ་ཆུ་ཚོད་ ༡༡ དང་ཕྱེད་ཀ་ཙམ་ལ་ང་འགྲོ་དགོས་པའི་བཀའ་ཕེབས་པ་ལ་བརྟེན་ནས་ཡོང་པ་ཡིན་གསུངས་སོང་། ངས་རིན་པོ་ཆེ་མཆོག་གི་བཀའ་སློབ་ཚང་མ་ཞུ་ཤེས་ཀྱི་མི་འདུག གང་ལྟར་ཁོང་གིས་བཀའ་ནན་པོ་ཞིག་ལ། གཞོན་ནུ་ལྷན་ཚོགས་ཀྱི་ངོས་ནས་ཟླ་གཉིས་གོང་ཏུ་༧གོང་ས་མཆོག་ཚོགས་ཆེན་སྟེང་ཆིབས་བསྒྱུར་དང་ཚོགས་བཅར་བ་ཚོར་མཇལ་ཁ་ཞུས་སྐབས། དགའ་ལྡན་ཕོ་བྲང་གིས་དེ་ཡོང་གི་མ་རེད་ཅེས་ལན་ཕུལ་འདུག རྒྱུ་མཚན་༧གོང་ས་མཆོག་གིས་ཆབ་སྲིད་ཀྱི་སྐུ་དབང་རྩིས་སྤྲོད་གནང་རྗེས་བུད་མེད་ལྷན་ཚོགས་ཀྱི་ཚོགས་ཆེན་སྟེང་གདན་ཞུ་བྱས་ཡོད་ཀྱང་ཕེབས་ཡོད་མ་རེད། དགུ་བཅུ་གསུམ་གྱི་ཚོགས་ཆེན་ལའང་ཕེབས་ཡོད་མ་རེད། ད་རེབ་འདིར་མ་ཕེབས་པ་གཞོན་ལྷན་གྱི་ལངས་ཕྱོགས་རང་བཙན་ཡིན་པ་དེ་འདྲ་མ་རེད་ཅེས་བཀའ་གནང་སོང་།
ཚོགས་འདུའི་ནང་སྡོད་མཁན་གྲས་སྦེར་ཅོང་ཊ་རཱ་ས་གནས་གཞོན་ནུའི་ཚོགས་གཙོ་བསོད་ནམས་གཡུ་རྒྱལ་ལགས་སུ་གོང་གི་ས་གནས་བརྒྱད་ཀྱི་ཚོགས་མི་རྣམས་ཚོགས་ཐོག་ནས་ཐོན་པའི་སྐོར་དྲིས་པར།
ལན། ཚོགས་འདུའི་ནང་གཞོན་ནུ་ལྷན་ཚོགས་ཀྱིས་བོད་རང་བཙན་བསྐྱར་གསོའི་ཆེད་ལས་འགུལ་ག་རེ་སྤེལ་རྒྱུ་ཡིན་ཟེར་པའི་གྲོས་གཞི་དེ་ཕེབས་མ་ཐག ས་གནས་ཁག་ ༨ གྱི་ཚབ་བྱས་ཏེ་ཀོ་ལེ་གྷལ་ས་གནས་གཞོན་ནུའི་ཚོགས་གཙོ་ཡར་བཞེངས་ཏེ། གལ་སྲིད་གཞོན་ནུའི་ལངས་ཕྱོགས་ལ་འགྱུར་པ་མ་བཏང་པ་ཡིན་ན། ང་ཚོས་གྲོས་གཞི་འདིར་བགྲོ་གླེང་གནང་གི་མིན་ལ། ཚོགས་ཁང་ནས་ཀྱང་བཞུགས་རྒྱུ་མིན་ཞེས་ཕྱིར་འཐེན་གནང་པ་རེད། ཡིན་ནའང་། ས་གནས་བཞི་བཅུ་ཞེ་གྲངས་ཡོད་བསྡད་པ་ནས་ས་གནས་བརྒྱད་ཕུད་པའི་ས་གནས་གཞན་ཚང་མ་ཚོགས་ཁང་དུ་བཞུགས་ཏེ་གྲོས་གཞི་དེའི་ཐོག་བགྲོ་གླེང་ལྷུག་པོ་བྱུང་ཡོད་པ་མ་ཟད། གྲོས་ཆོད་གཏན་འབེབས་ཀྱང་འཇོག་ཐུབ་པ་བྱུང་ཡོད་རེད།
ང་ཚོའི་ཉིན་དང་པོའི་ཚོགས་འདུའི་སྐབས་དབུས་གཞོན་ནུའི་ཚོགས་གཙོས། འདས་པའི་ལོ་འགའི་རིང་༧གོང་ས་མཆོག་ལ་ཐུགས་ཕན་མ་གསོས་པ་དང་དགོངས་པ་དཀྲུགས་པའི་གནས་ཚུལ་མང་པོ་བྱུང་ཡོད་པའི་ཆ་ནས། ང་ཚོའི་ཚོགས་འདུའི་བགྲོ་གླེང་མ་བྱུང་སྔོན་ལ་དབུས་ནས་དོན་ཚན་གསུམ་ཞིག་བཏོན་ཏེ་མང་མོས་རྒྱབ་སྐྱོར་ཡོད་མེད་གཟིགས་པར། བརྒྱ་ཆ་ ༨༠ ཙམ་གྱིས་རྒྱབ་སྐྱོར་གནང་པ་ལ་བརྟེན་ནས་དོན་ཚན་གསུམ་པོ་དེ་སྐུ་སྒེར་ལ་ཡར་སྤྱན་འབུལ་ཞུ་རྒྱུར་ཕུལ་པ་རེད། དོན་ཚན་དང་པོ་༧གོང་ས་མཆོག་ལ་དགོངས་སེལ་ཞུ་རྒྱུ་དང་། གཉིས་པ་བོད་གཞུང་གི་དབུ་མའི་ལམ་གྱི་ལངས་ཕྱོགས་དེ་རང་བཙན་ལ་བསྒྱུར་དགོས་པའི་གྲོས་ཆོད་བཞག་ཡོད་པ་དེ་ཕྱིར་འཐེན་བྱ་རྒྱུ། གསུམ་པ་གཞོན་ནུའི་དམིགས་ཡུལ་དང་ལངས་ཕྱོགས་རང་བཙན་གཙང་མ་གཞིར་བཞག་ཐོག་མ་འོངས་པར་༧གོང་ས་མཆོག་གིས་བཀའ་སློབ་ག་རེ་གནང་པ་དེ་ལ་ང་ཚོས་བརྩི་བཀུར་ཞུ་རྒྱུ་བཅས་རེད། དེ་རིང་དགའ་ལྡན་ཕོ་བྲང་གི་སྐུ་ཚབ་འདིར་ཕེབས་ཏེ་ཚོགས་བཅར་པ་ཡོངས་ལ་བླངས་དོར་བཀའ་སློབ་གསལ་བོ་གནང་སོང་།
རིན་པོ་ཆེ་མཆོག་གིས་འདས་པའི་ལོ་འགའི་རིང་གཞོན་ནུས་༧གོང་ས་མཆོག་གི་དགོངས་པ་འཁྲུག་དགོས་པའི་རྒྱུ་རྐྱེན་ཁག་གསུམ་བཞི་ཞིག་གསུངས་སོང་། གནས་ཚུལ་དེ་འདིར་ཕེབས་མཁན་ཚོགས་བཅར་བ་མང་ཆེ་བ་ཞིག་གིས་མཁྱེན་གྱི་ཡོད་མེད་ང་ལ་དོགས་པ་ཡོད། ཉིན་རྒྱབ་བགྲོ་གླེང་ཕལ་ཆེར་དེའི་ཐོག་ཡོང་གི་རེད་བསམ་གྱི་འདུག རིན་པོ་ཆེ་འདིར་ཕེབས་ཏེ་བཀའ་སློབ་ལམ་སྟོན་གནང་པའི་ནང་། ཁོང་གིས་གལ་སྲིད་མ་འོངས་པར་༧གོང་ས་མཆོག་གིས་བཀའ་ཕེབས་པ་དང་དགོངས་པ་དཀྲུག་པ་དེའི་ཐད་ནས་ས་གནས་ཁག་ཁ་ཤས་ཤིག་གིས་གཞོན་ནུའི་ལངས་ཕྱོགས་ལ་འགྱུར་བ་གཏོང་དགོས་ཟེར་པ་དེ་འདྲ་དང་། ཡོང་རྒྱུ་བསྡད་པའི་གཞོན་ནུའི་དབུས་རྒྱུན་གསར་པ་འདེམས་རྒྱུ་ལག་ལེན་བསྟར་མ་ཐུབ་པ་ཡིན་ན། དེའི་མིང་ཆལ་ཟེར་ན་འདྲ་དོ་ཕོག་དེ་༧གོང་ས་མཆོག་ལ་ཕོག་མི་སྲིད་པ་མ་རེད། དེར་བརྟེན་གཞོན་ནུའི་ལངས་ཕྱོགས་དང་ལྟ་གྲུབ་བརྟན་པོར་བསྡད་པའི་ཐོག་ནས་མུ་མཐུད་ཕེབས་ཐུབ་ན་ཡག་པོ་ཡོད་པ་རེད་བཀའ་སློབ་ཕེབས་སོང་བསམ་ཡོད་ཅེས་བརྗོད་བྱུང་།
ཁེ་ན་ཌ་ས་གནས་གཞོན་ནུའི་ཚོགས་གཙོ་གུ་རུ་རྡོ་རྗེ་ལགས་སུ། ད་རེབ་ཚོགས་འདུའི་ནང་གཞོན་ནུའི་རང་བཙན་ལངས་ཕྱོགས་ལ་འགྱུར་པ་མ་བཏང་ཡང་མ། མ་འོངས་པར་ལས་དོན་བྱེད་ཕྱོགས་དང་ལས་འགུལ་སྤེལ་ཕྱོགས་ལ་ཏན་ཏན་འགྱུར་པ་གཏོང་དགོས་ཀྱི་འདུག་ཟེར་བ་ཞིག་བྱུང་ཡོད་ས་རེད། དེའི་སྐོར་ངོ་སྤྲོད་ཅིག་གནང་རོགས་ཞུས་པར།
ལན། ད་ལྟའི་ཆར་གྲོས་གཞི་ཁག་གི་ཐད་གྲོས་བསྡུར་འགྲོ་བཞིན་ཡོད་སྟབས། འདི་དང་དེ་ཞེས་ཞུ་ཡ་མི་འདུག ང་རང་ཉིད་ཀྱི་བསམ་ཚུལ་ཡིན་ན། རང་བཙན་གྱི་མེ་རོ་འདི་ངེས་པར་དུ་གསོན་གནས་ཐུབ་དགོས་ཀྱི་འདུག ཡིན་ནའང་དབུ་མའི་ལམ་དང་གཞུང་ལ་སྐྱོན་འཛུགས་བྱེད་རྒྱུ་དེ་ནོར་འཁྲུལ་ཞིག་མཐོང་གི་འདུག གང་ལྟར་ལས་དོན་བྱེད་ཕྱོགས་དང་ལས་འགུལ་སྤེལ་ཕྱོགས་ཐད་ནས་གཞུང་ལ་ཕོག་ཐུགས་མི་འགྲོ་བ་དང་༧གོང་ས་མཆོག་གི་དགོངས་པ་འཁྲུག་གཞིའི་རིགས་མ་ཡོང་བ་ཞིག་གི་སྟེང་འགྲོ་རྒྱུར་འབད་དགོས་ཀྱི་འདུག
ཧོང་སུར་ས་གནས་གཞོན་ནུའི་ཚོགས་གཙོ་རྟ་མགྲིན་ཚེ་དབང་ལགས་སུ། ཚོགས་འདུའི་སྟེང་གི་མང་མོས་ལ་ངོས་ལེན་མ་བྱས་པར་ཚོགས་ཁང་ཕྱི་ལོགས་སུ་ཐོན་པ་དེ་དམངས་གཙོའི་འགྲོ་སྟངས་དང་མཐུན་གྱི་ཡོད་མེད་དྲིས་པར།
ལན། ད་རེབ་ང་ཚོའི་ཁྱེར་ཡོང་པའི་མངོན་འདོད་དེ་ང་ཚོ་ཚོགས་བཅར་པ་གཅིག་པུའི་བསམ་ཚུལ་མ་རེད། དེ་ས་གནས་ཚོགས་མི་ཚང་མའི་མངོན་འདོད་རེད། ལྷོ་ཕྱོགས་ས་གནས་ཚོགས་མི་ཚོས་ཐེངས་འདིར་གཞོན་ནུའི་ལངས་ཕྱོགས་ལ་འགྱུར་པ་མ་བཏང་པ་ཡིན་ན་གཞོན་ནུའི་ཚོགས་མི་ནས་འཐོན་རྒྱུ་ཡིན་ཟེར་མཁན་ཤ་སྟག་ཆགས་བསྡད་ཡོད་རེད། མི་མང་ཚོགས་ཁོངས་ནས་མ་བསྡད་པ་ཡིན་ན་ང་ཚོ་རྒྱུན་ལས་གཅིག་པུ་ས་གནས་ནས་བསྡད་ན་ག་གེ་ཅིག་བྱེད་རྒྱུ་ཡོད་པ་མ་རེད། མི་མང་གིས་ཐག་ཆོད་པོའི་ཐོག་ནས་གཞོན་ནུའི་ལངས་ཕྱོགས་ལ་འགྱུར་བ་གཏོང་དགོས་ཞེས་པ་དེ་ང་ཚོ་སྐུ་ཚབ་བྱས་ཏེ་འདིར་ཚོགས་ཆེན་སྟེང་མང་ཚོགས་ཀྱི་མངོན་འདོད་ཞུས་པ་རེད། དེར་སྦྱངས་བཤད་བྱ་དགོས་རེད། འོན་ཀྱང་། ང་ཚོར་མངོན་འདོད་ཞུ་ས་མེད་པར་བརྟེན་ཕྱི་ལ་ཐོན་པ་རེད། དངོས་ནས་བཤད་ན་ཉིན་དང་པོའི་བརྗོད་གཞི་དེ་ཉིན་གཅིག་གཉིས་འགྲོ་དགོས་པའི་གལ་ཆེན་ཞིག་ཆགས་ཡོད། ཁོ་ཚོས་ཆུ་ཚོད་ ༢ ནང་ཐག་གཅད་བཞག་པ་རེད། གཞོན་ནུའི་ལངས་ཕྱོགས་ལ་འགྱུར་པ་བཏང་པ་ཡིན་ན། ང་ཚོས་སྔར་རྒྱུན་བཞིན་གཞོན་ནུའི་ལས་དོན་ཚང་མར་མཉམ་ཞུགས་བྱ་འདོད་ཡོད། དེ་མིན་ཕྱིར་ཐོན་རྒྱུ་ལས་ལྷག་ཡོད་མ་རེད།
གསར་འགོད་པ།་བནྡེ་སྐྱབས།
གཞོན་ནུའི་ཚོགས་མི་དང་མི་སྒེར་སུ་ཡིན་རུང་བླ་མ་དང་སྲིད་གཉིས་ཁ་ཁ་ཕྱེ་ཐུབ་པ་གནང་རོགས་ཞུ་རྒྱུ་ཡིན
གལ་སྲིད་ད་དུང་བླ་མས་བཀའ་བསྒྲུབ་དགོས་ཟེར་བསྡོད་ན་དེ་ནི་སྲིད་དབང་སྒེ་བཅོད་པ་ཞིག་ལ་འགྱུར་འགྲོ་ལས་དམངས་གཙོ་ཞིག་ག་ན་ཡིན །དེ་ལུགས་ཐུགས་ལ་འཇོག་རྒྱུ་དང་མི་རྒན་སུ་ཡིན་རུང་ལེགས་ཆ་རྣམས་ལ་སློབ་སྦྱོང་བྱེད་པ་ལས་དེ་ངོས་པ་ལག་ལས་དགོས་ཟེར་ན་ཅུང་འགྲིག་ཨེ་ཡོང་ངམ །
མངའ་རིས་འཕྲིན་ལས། ཁྱོད་ཁ་བདེ་པོ་མ་ཤོད། ༧ གོང་ས་མཆོག་གིས་འཛམ་གླིང་གི་རྒྱལ་ཁབ་མང་པོར་ཕྱག་གཉིས་ཐལ་མོ་སྦྱར་ནས་ངའི་བོད་མི་སྐྱབས་བཅོལ་བ་ཚོར་མཐུན་འགྱུར་རོགས་རམ་གནང་རོགས་ཞུས་ནས་ལོ་རྒན་བརྒྱད་ཅུ་མ་སླེབས་ཙམ་དུ་དཀའ་ཚེགས་གང་མང་རྒྱབ་པ་རེད། ད་བཙན་བྱོལ་ནང་གི་བོད་མི་གང་མང་ཞིག་གིས་རང་གི་མདུན་ལམ་ཡག་ཙམ་བྱུངབས་ད་ཁ་བདེ་པོ་བཤད་པ་འདི་ཚོར་འགྲོ་བ་མིའི་ཀུན་སྤྱོད་ཟེར་བ་མེད་པ་མངོན་གསལ་རེད། ང་ཚོར་དམངས་གཙོ་གནང་མཁན་༧གོང་ས་མཆོག་རེད། ཁོང་གིས་དེ་བྱེད་དེ་་བྱེད་ཆོག་གི་མ་རེད་ནམ་ཡང་གསུངས་སྲིད་ཀྱི་མ་རེད། ཁྱོད་བློ་བདེ་པོར་བསྡོད།
གང་ལྟར་ལྷོ་ཕྱོགས་གཞོན་ནུ་ཚོགས་མི་ཁག་གཅིག་གིས་ཞབས་འདྲེན་བཞག་འདུག་ཚང་མའི་ངོ་གདོང་ལ་ཐལ་བ་འདེབས་རྒྱུ་རང་རེད། གཞོན་ནུ་ཚོགས་པ་ནི་གཞིས་བྱེས་གཉིས་ཀྱི་རེ་བའི་དམིགས་ཡུལ་ཆབ་སྲིད་ཚོགས་པ་གལ་ཆེ་ཤོས་དེ་རེད། ད་ཆ་ཚོགས་པ་དེའི་ཚོགས་ཆེན་སྟེང་རང་རིགས་བརྒྱ་ཕྲག་ལྷག་བོད་མི་རིགས་ཀྱི་བདེ་དོན་ཆེད་རང་སྲོག་བློས་གཏོང་གནང་བའི་ཐད་ཁོ་ཚོས་དམིགས་ཡུལ་དང་མཐུན་པ། ཁོ་ཚོས་དམིགས་འདུན་དང་མཐུན་པའི་ལས་འགུལ་སྤེལ་ཕྱོགས་ཐད་བཤད་རྒྱུ་མེད་པར། མི་དགོས་བཙན་བྱོལ་ནང་གི་བླ་ཆེན་དང་དཔོན་ཆེན་ཁག་གཅིག་གི་དགོངས་པར་འགྲོ་དང་མ་འགྲོ་གླེང་བསྡད་པ་མ་གཏོགས་གཞིས་ལུས་བོད་མི་ལ་བསམ་བློ་མ་འཁོར་པ་དེ་ངོ་ཚ་དགོས་པའི་ལས་ཀ་རང་རེད། ད་ནི་བཟུང་གཞོན་ནུས་སྔར་བཞིན་མི་རེ་བཟུང་དང་ཆོས་ལུགས་རེ་བཟུང་གི་སྣང་བ་འགྲོ་དང་མི་འགྲོ་མི་ལྟ་བར། གཞིས་བྱེས་གཉིས་ཀྱི་བོད་མི་རིགས་ཀྱི་བདེ་དོན་ཁོ་ན་ལ་དགོངས་པ་བཞེས་ནས་ཕྱག་ལས་སྔར་བཞིན་གནང་རོགས་ཞུ་རྒྱུ་ཡིན།
རང་རེ་བཙན་བྱོལ་པ་རྣམས་རང་དབང་མང་གཙོ་ཡིན། རྒྱ་ནག་ནི་དམངས་གཙོ་གཅིག་སྡུད་རེད། དེ་གཉིས་ཀྱི་ཁྱད་པར་ནི་གཞུང་དང་གཞུང་འཛིན་ལ་སྐྱོན་བརྗོད་བྱེད་པ། སོ་སོ་རང་ཉིད་ཀྱི་ལྟ་བ་བཤད་རྒྱུར་སྨྲ་བརྗོད་རང་དབང་སོགས་ཚུད་ཡོད། གཞན་ནི་དེ་ལས་ལྡོག་པ་རེད།
ས་གནས་བརྒྱད་ཀྱི་ཚོགས་མི་རྣམས་ལ་མཁྲེགས་འཛིན་ཆེ་བ་ལས་བོད་པའི་སྐྱིད་སྡུག་ལ་བསམ་བློ་རྩ་ནས་བཏང་མིན་འདུག།
གཞོན་ནུས་རང་གི་ལངས་ཕྱོགས་དོར་བ་ནི་བོད་པའི་ཕམ་ཁ་ཞིག་རེད།
རང་དབང་ལུང་པའི་ནང་ང་ཚོ་དམངས་གཙོའི་ལམ་ལ་གནས་ཚུལ་གང་ཡང་ཡོང་སྲིད།
མ་གཞི་ནས་བོད་ཀྱི་གཞོན་ནུ་ལྷན་ཚོགས་ཀྱིས་རང་བཙན་གྱི་ལང་ཕྱོགས་ལ་འགྱུར་བ་གཏོང་མི་དགོས་པ་གང་ཡང་མེད། ཚོགས་པའི་མིང་ལ་གཞོན་ནུ་ལྷན་ཚོགས་ཟེར་བ་ལས་རང་བཙན་ལྷན་ཚོགས་འམ་བོད་རྒྱལ་ཁབ་རང་བཙན་ཚོགས་པ་ཟེར་མིང་ཡོད་མ་རེད། ཚོགས་དྲུང་དང་ཚོགས་འདུར་སྟངས་འཛིན་གནང་མཁན་གིས་ཚོགས་ཞུགས་པ་ཚོར་དགོངས་ཚུལ་བཤད་མ་བཅུག་པ་ནི་ངོ་མ་བློ་ཕམ་རེད་ལ་དམངས་གཙོའི་འགྲོ་སྟངས་དེ་བས་ཀྱང་མ་རེང། ཚོགས་མི་མི་ཉུང་བ་ཞིག་ཕྱིར་འཐོན་མེད་ཀྱང་ཐེ་ཚོམ་ངང་བཞུགས་ཡོད་པ་ནི་བརྗོད་མི་དགོས་པ་ཞིག་རེད། ། གཞོན་ལྷན་ཡང་དམངས་གཙོའི་ཐོག་འགྲོ་དགོས་གལ་ཆེ།
གསར་ོའགོད་པའི་
ཁྲི་ཟུར་ོམཆོག་གི་༧གོང་ས་མཆོག་དགོངས་པ་སྐྲུགས་རྐྱེན་༤་བརྗོད་གཞི་བཀོད་པ་ཙམ་ལས་དོན་དངོས་བརྗོད་བྱའི་ནང་ཁོད་མི་འདུག་པའི་གསར་འའགྱུར་ཁ་གསལ་མི་འདུག།
ཕྱིར་འཐོན་པའི་ས་གནས་བརྒྱད་གྱི་ཚོགས་མི་ཚོས་གལ་སྲིད་གཞོན་ནུ་ཚོགས་པ་དེ་མཐུ་ཐུད་གནས་མ་ཐུབ་པ་དང་དབུས་རྒྱུན་གསར་འདེམས་པ་ཐུབ་ཚེ་ཁྲི་ཟུར་མཆོག་གི་གསུངས་པ་ལྟར་༧གོང་ས་མཆོག་ལ་མིང་ཆལ་ཡོངས་ཉེན་ཡོད་པ་སྔ་ས་བསམ་བློ་མ་འཁོར་པ་སྐྱོ་བོ་རེད་ལ་ཁྱེད་རྣམ་ནས་༧གོང་ས་མཆོག་གི་བཀའ་སློབ་ལ་ཁག་ཀུར་ནས་ལངས་ཕྱོགས་འདོར་བ་ཡིན་ན་མང་གཙོ་ཡང་དག་གི་འགྲོ་བཏང་ཞིག་ཀྱང་མ་ཐོངས།
ད་འགྲིག་བཞག ལྷ་མིའི་རྣམ་འདྲེན་གང་གི་བཞེད་དོན་འགྲུབ་སོང་བ་རེད། ལྷ་དགོངས་དྭངས་གསལ་ཡོང་ཤག་རེད། ཡིན་ནའི། བོད་ནང་ནས་འདི་ལྟར་བསྡད་མི་སྲིད་པ་ཞིག་རེད།
གསར་འགྱུར་འཁྲུག་ཏུ་འགྲོ་རིམ་བཞིན་གསར་འགོད་པའི་ཡིག་ནོར་ཡང་མང་དུ་འགྲོ་གིན་འདུག་པས་ངེས་པར་ཡིད་གཟབ་དགོས་པ་རེད། ཇི་ཙམ་གྱི་བྲེལ་ཡང་ཡིག་ནོར་རྩ་ནས་འབྲི་མི་ཉེན།
གཞོན་ནུའི་ལངས་ཕྱོགས་དང་འབྲེལ་བའི་གསར་འགྱུར་འདིས་ས་གནས་ཁག་ཏུ་འཁྲུག་ཏུ་ཅིི་འགྲོ་རེད།
སྲང་གཞུང་ཁག་ཁུག་ཚང་མར་ཚོ་ཁག་ཚོ་ཁག་ཏུ་གྱེས་ནས་ཕན་ཚུལ་བགྲོ་གླེང་བྱེད་ཀྱིན་མཐོང་།
ཡིན་ནའང་ཡ་མཚན་ཆེ་ཤོས་ནི། གཞོན་སྐྱེས་ཀྱི་ཁྲོད་དུ་བོད་རང་བཙན་རྩ་བ་ནས་དོར་མི་རུང་ཟེར་ཐུབ་ཙམ་ལས། ལམ་དབུ་མ་དང་། རང་བཙན་གཙང་མ་ཟེར་ན་གང་འདྲ་ཞིག་ཡིན་པ་དང་། དེའི་རྒྱབ་མདུན་གྱི་གནས་ཚུལ་རྩ་ནས་ཤེས་ཀྱི་མི་འདུག་པས། མ་འོངས་པར་སྒྲིག་འཛུགས་གཉིས་ནས་གཞོན་སྐྱེས་རྣམས་ལ་ཟབ་སྦྱོང་གོ་རྟོགས་མང་ཙམ་སྤེལ་དགོས་པ་ནི་ཛ་དྲག་ཆེ་ཤོས་ཀྱི་གནས་ཚུལ་ཞིག་ཡིན་འདུག
གཞོན་ལྷན་གལ་སྲིད་དབུ་མར་བཞུགས་པ་ཡིན་ན་ཡང་། ༸གོང་ས་མཆོག་གི་བཀའ་ལ་བརྟེན་ནས་བཞུགས་ན་ནོར་བ་རེད། དེ་བཞིན་བོད་མིའི་སྒྲིག་འཛུགས་དང་མཐུན་ཐབས་བྱས་ནས་དབུ་མར་འཇུག་ན་ཡང་ནོར་བ་རེད། འོནད་ཀྱང་། གཞོན་ནུ་རང་གི་སྔ་གྱི་སྲོལ་རྒྱུན་ལྟར་རང་བཙན་གྱི་ལྟ་བ་འཁྲེགས་བཟུང་བྱས་ནས་ཕན་ཐོགས་མེད་པ་མཐོང་བཞིན་དུ། གཞོན་ལྷན་དབུ་མར་མ་བཞུགས་ན་དེ་བས་ཀྱང་ནོར་བ་རེད་དོ།།
༣༠༽ ཀརྡོ་གཉེར་ཕྱག་པ་ནས།
སྤྱི་ལོ་ ༢༠༡༣ ཟླ་ ༥ ཚེས་ ༣༡ གི་ཆུ་ཚོད་ ༢༢ སྐར་མ་ ༡༡
གཞོན་ལྷན་གལ་སྲིད་དབུ་མར་བཞུགས་པ་ཡིན་ན་ཡང་། ༸གོང་ས་མཆོག་གི་བཀའ་ལ་བརྟེན་ནས་བཞུགས་ན་ནོར་བ་རེད། དེ་བཞིན་བོད་མིའི་སྒྲིག་འཛུགས་དང་མཐུན་ཐབས་བྱས་ནས་དབུ་མར་འཇུག་ན་ཡང་ནོར་བ་རེད། འོནད་ཀྱང་། གཞོན་ནུ་རང་གི་སྔ་གྱི་སྲོལ་རྒྱུན་ལྟར་རང་བཙན་གྱི་ལྟ་འཁྲེགས་བཟུང་བྱས་ནས་ཕན་ཐོགས་མེད་པ་དང་མཐོང་བཞིན་དུ། གཞོན་ལྷན་དབུ་མར་མ་བཞུགས་ན་དེ་བས་ཀྱང་ང་ཀྱང་ནོར་བ་རེད་དོ།།
གཞོན་ནུའི་ལང་ཕྱོགས་དབུ་མར་བསྒྱུར་ཚེ། གཞོན་ལྷན་དགོས་དོན་མི་འདུག བཙན་བྱོལ་སྒྲིག་འཛུགས་ཡོད་ཡོད་པ་རེད། གོང་གསལ་གདམ་ག་ཚོགས་པ་བཞིན་སྒོ་རྒྱོབས། ཟམ་གདོང་བླ་རྒན་མང་པོ་མ་གསུང་སྔར་ཁྱེད་རང་གིས་བཤད་པ་ལ་བསམ་བློ་ཐོངས། ཐེངས་ཤིག་ཕལ་ཆེར་རྡ་སའི་རྒྱ་གར་བའི་གསར་འགོད་པ་ཞིག་ངོ་ཤར། དེ་ལ་ཁོང་གིས། མ་འོོངས་པར་ང་རང་ཆབ་སྲིད་ཀྱི་ལས་ཀ་འདི་ལས་ཡོལ་མཚམས། མེ་ཏོག་གླིང་ཁ་ཞིག་ལ་ཆུ་བླུག་ནས་མེ་ཏོག་སྐྱེད་སྤེལ་དང་ལྷོད་དལ་ངང་སྡོད་རྒྱུ་དང་། བར་བར་ལ་དེབ་འདྲ་རྩོམ་བྲིས་བྱས་ནས་བསྡད་རྒྱུ་ཡིན་ཞེས་གསུང་འདུག་དེ་ཡིད་ལ་དྲན་པར་གྱིས། ༧སྐྱབས་མགོན་རིན་པོ་ཆེ་ཡིནའང་ཆབ་སྲིད་རྩིས་སྤྲོད་ཟིན་པས་ལྷོད་བཞུགས་མཛད་ན་ལེགས་ཆ་ཆེ་བས་ཐུགས་དབུས་བསྟི་བ་ཞུ།
གཞོན་ནུ་ཡིན་ཟེར་ན་ངོ་ཚ་ཡས་རང་རེད། ལོ་ལ་ཆ་བཞག་ན་སྤོ་རྒན་ལོ་ལྔ་བཅུ་དྲུག་བཅུ་ཟིན་ཀྱང་ད་དུང་གཞོན་ནུ་ཡིན་ཟེར། ལྟ་བ་ལ་ཆ་བཞག་ན་གུ་ཡང་གིས་བསམ་པ་རྩ་བ་ནས་མེད་པར་རང་ལྟ་མཆོག་འཛིན་ཁོ་ན་བྱེད་མཁན་ཤ་གཅིག་རེད། གཟིགས་དང་ཕྱི་ལ་དོན་ཡོངས་མཁན་ནས་མང་ཆེ་བ་སྤོ་ཏོ་རེད་འདུག འདི་དག་ལ་གཞོན་ནུ་ཟེར་ན་སྤོ་ཏོ་ང་ཡང་ཕོ་གསར་ཡིན་བགྱི་རེད། ཧཧཧཧཧཧ
ད་ལན་ཚོགས་ཆེན་ནས་ཕྱིར་ཐོན་མཁན་རྣམ་ལ་༧་གོང་ས་མཆོག་ལ་མཚས་སྨད་བཟོ་འདོད་ཀྱི་ཀུན་སློང་ཡོད་མེད་མི་ཤེས་ཀྱང་གཞོན་ནུའི་ཚོགས་ཆེན་ལ་བར་ཆད་འདྲ་བྱུང་ན་༧་གོང་ས་མཆོག་ལ་མཚན་ཤས་སུ་མི་འགྲོ་བའི་ངེས་པ་མེད་སྟབས་དེའི་འགན་དེ་དག་ཚོགས་ཐོག་ནས་ཐོན་མཁན་དག་གི་ཕྲག་ཏུ་བབ་ཡོད།
གཞོན་ནུ་ལྷན་ཚོགས་ལ་གྲོས་སུ་བཏབ་པ་ཁ་ཚ་དགོས་གཏུགས་མ།
འདིར་ཚིག་ཉུང་ངུའི་སྒོ་ནས་གོ་བདེ་བར་ཞུ་རྒྱུར། དུས་དང་གནས་སྐབས་ལ་དཔག་ནས་བཤད་ན།
ང་ཚོའི་སྒྲིག་འཛུགས་གཞུང་གི་ཆབ་སྲིད་ལང་ཕྱོགས་ནི་ལམ་དབུ་མ་ཉག་གཅིག་ལ་ཡིད་ཆེས་བརྟན་པོའི་ངང་། བོད་ཁུལ་སྣོད་བཅུད་ཡོངས་རྫོགས་གཅིག་ཏུ་སྒྲིལ་བའི་ཆེས་ཚད་མཐོའི་རང་སྲིད་རང་སྐྱོང་ལ་དངོས་ཤུགས་བརྒྱུད་གསུམ་ནས་འབད་ཅིང་སྐྱོད་རྒྱུ་ནི་ཅི་ནས་ཀྱང་གལ་ཆེ་བ་ནང་བཞིན། རང་བཙན་གཙང་མ་རྩོད་མཁན་གྱི་གཞུང་འབྲེལ་མ་ཡིན་པའི་ཚོགས་སྒེར་སྤྱི་དང་། སྐབས་བབ་གཞོན་ནུ་ལྷན་ཚོགས་ཀྱི་རང་བཙན་གཙང་མའི་འཐབ་རྩོད་རྒྱུན་སྐྱོང་བྱེད་རྒྱུ་ནི་གོང་དང་གཅིག་མཚུངས་ཀྱི་གནད་འགག་གལ་བོ་ཆེ་ཞིག་ཏུ་མཐོང་ཡོད།
ལང་ཕྱོགས་ལ་འགྱུར་བ་ཟེར་བ་དེའི་གོ་བ་རང་བཙན་བློས་གཏོང་ལ་གོ་གི་ཡོད་ན།དེ་ནི་ནོར་འཁྲུལ་ཚབ་པོ་ཆེ་ཞིག་ཡིན་ལ། ཉི་མ་དེ་ནས་བཟུང་གཞོན་ལྷན་ནི་ལས་མེད་ཕོ་ལྷག་འབའ་ཞིག་ལས་ཅི་ཡང་མེད།
རེད་དེ་གཤམ་གསལ་དོན་ཚན་འགའ་ལ་དོ་སྣང་ཆེན་པོ་བྱེད་རྒྱུར་སྐུལ་གྱིན་ཡོད།
༼༡༽༧གོང་ས་མཆོག་སྐུ་སྒེར་དང་།སྒྲིག་འཛུགས་གཞུང་།དེའི་ལང་ཕྱོགས་ལམ་དབུ་མ་དང་བཅས་པ་ལ།མཚོན་ཁ་ནང་སྐོར་གྱིས་མ་ཉེས་ཁ་ཡོག་དང་།མ་གོ་ལོག་འགྲེལ། སྒྲོ་འདོགས་སྐུར་འདེབས་སོགས་རྩ་བ་ནས་མི་བྱེད་རྒྱུ་དང་། དེ་རིགས་བྱེད་མཁན་གྱི་གཞོན་ནུའི་ཚོགས་མི་བྱུང་ན་ཕྱིར་འཕུད་ཀྱི་ཡོངས་ཁྱབ་གསལ་བསྒྲག་བྱེད་རྒྱུ།
༼༢༽ སྒྲིག་འཛུགས་གཞུང་གིས་ལས་འགུལ་ཆེ་ཕྲ་སྤེལ་རིགས་ལ ། གཞོན་ནུའི་ཚོགས་མི་སྒེར་བ་མཉམ་ཞུགས་བྱས་ཡོད་ནའང་། སྐབས་དེར་གཞུང་གི་ལང་ཕྱོགས་ལ་བརྩི་བཀུར་ཐོག་འབོད་ཚིག་སོགས་དབུ་མའི་ལམ་དང་བསྟུན་དགོས་པ་ལས།( བོད་རང་བཙན་གཙང་ཡིན)སོགས་སྐབས་འཚོལ་རིང་ལུགས་བྱེད་མི་རུང་།
༼༣༽རང་བཙན་འཐབ་རྩོད་ཀྱི་དགོས་པ་རྒྱུ་མཚན་གསལ་པོར་ངེས་ཐོག ཐབས་ལམ་སྣ་མང་ཅན་དང་།ཤེས་རབ་ཅན། གསར་གཏོད་ཅན ། ཞི་བ་ཅན། ཆེ་མཐོང་ཅན། མིག་རྒྱང་ཅན། སྟུན་མཁས་ཅན་བཅས་བྱེད་དགོས་རྒྱུ།
༼༤༽རང་བཙན་མི་སྤྲོད་མཁན་དེ་སུ་ཡིན་མིན་ངོས་ཟིན་པའི་ཐོག་ནས།འཐབ་རྩོད་བྱེད་སའི་ཁ་ཕྱོགས་ཕྱི་ནང་མ་ནོར་བ་བྱེད་རྒྱུ་བཅས་དཔྱད་གཞི་ཙམ་ལ་ཕུལ་བ་ལགས།
དགའ་ལྡན་ཕོ་བྲང་གི་སྐུ་ཚབ་ཟམ་གདོང་རིན་པོ་ཆེས།
གལ་སྲིད་མ་འོངས་པར་༧གོང་ས་མཆོག་གིས་བཀའ་ཕེབས་པ་དང་དགོངས་པ་དཀྲུག་པ་དེའི་ཐད་ནས་ས་གནས་ཁག་ཁ་ཤས་ཤིག་གིས་གཞོན་ནུའི་ལངས་ཕྱོགས་ལ་འགྱུར་བ་གཏོང་དགོས་ཟེར་པ་དེ་འདྲ་དང་། ཡོང་རྒྱུ་བསྡད་པའི་གཞོན་ནུའི་དབུས་རྒྱུན་གསར་པ་འདེམས་ཡ་ལག་ལེན་བསྟར་མ་ཐུབ་པ་ཡིན་ན། དེའི་མིང་ཆལ་ཟེར་ན་འདྲ་དོ་ཕོག་དེ་༧གོང་ས་མཆོག་ལ་ཕོག་མི་སྲིད་པ་མ་རེད། དེར་བརྟེན་གཞོན་ནུའི་ལངས་ཕྱོགས་དང་ལྟ་གྲུབ་བརྟན་པོར་བསྡད་པའི་ཐོག་ནས་མུ་མཐུད་ཕེབས་ཐུབ་ན་ཡག་པོ་ཡོད་པ་རེད་ཅེས་པའི་བཀའ་སློབ་ཕེབས་བྱུང་ཞེས་བརྗོད་བྱུང་ཟེར།
སྤྱི་འཐུས་༡༢ ཀྱིས་བསོད་སྟོབས་རྩེད་ཆོས་བྱས་པ་བཞིན་ཧོང་སོར་གཞོན་ནུ་འགས་རྒྱུན་ལས་ལ་སྤོར་བཅུ་ལོག རྒྱུན་ཚབ་ཚོས་དབུས་གཞོན་ལ་རྙོག་དྲ་སློང་གི་ཡོད་ཀྱང་། བསོད་སྟོབས་ལ་ཁ་གཡར་བ་དང་གཅིག་མཚུངས་རེད་མི་འདུག་གམ།