རྒྱ་ནག་དང་ཨ་རིའི་སྲིད་འཛིན་རྣམ་གཉིས་ཐུག་འཕྲད་དང་བསྟུན་ཏེ་རྒྱ་རིགས་སྒྱུ་རྩལ་པ་སྐོར་ཞིག་གིས་བོད་མི་རང་ལུས་མེར་བསྲེགས་གནང་མཁན་ཚོར་གདུང་སེམས་མཉམ་སྐྱེད་ཀྱི་ངོ་རྒོལ་ལས་འགུལ་སྤེལ་འདུག
ཨ་རིར་གནས་བཞུགས་རྒྱ་རིགས་སྒྱུ་རྩལ་པ་གྲགས་ཆེན་ཊྲིན་ཝེ་མིན་ (chen wei ming) ལགས་ཀྱིས་བོད་མི་རང་ལུས་མེར་བསྲེགས་གནང་མཁན་ཡོངས་ལ་མྱ་ངན་གུས་འདུད་མཚོན་ཆེད། འབར་བཞིན་པའི་བོད་ཅེས་པའི་རྡོའི་འདྲ་བརྙན་ཞིག་བཟོས་ཏེ་རྒྱ་ནག་གཅིག་སྡུད་དམར་གཞུང་གི་གཡོན་ལྷུང་སྲིད་བྱུས་འཕྲལ་དུ་མཚམས་འཇོག་དགོས་པ་དང་། བོད་མི་ཚོར་སྨྲ་བརྗོད་རང་དབང་དང་ཆོས་དད་རང་དབང་སྤྲོད་དགོས་པའི་དགོས་འདུན་བཏོན་ཡོད་འདུག
ཟླ་འདིའི་ཚེས་ ༧ དང་ ༨ ཉིན་གཉིས་རིང་རྒྱ་ནག་གི་སྲིད་འཛིན་ཞི་ཅིན་ཕིན་ཨ་རིར་ཕྱོགས་སྐྱོད་ཀྱིས་ཨ་རིའི་སྲིད་འཛིན་ཨོ་བྷ་མ་མཆོག་དང་ཐུག་འཕྲད་ཀྱིས་རྒྱལ་ཁབ་གཉིས་བར་གྱི་གནད་དོན་ཁག་ཅིག་གི་ཐད་གྲོས་མོལ་གནང་བཞིན་པའི་གོ་སྐབས་དང་བསྟུན་ཏེ། རྒྱ་རིགས་སྒྱུ་རྩལ་པ་ཊྲིན་ཝེ་མིན་ལགས་དང་གཞན་བོད་དོན་རྒྱབ་སྐྱོར་བ་མང་པོ་ཞིག་གིས་འདྲ་བརྙན་དེ་འཁྱེར་ནས་སྐོར་སྐྱོད་ངོ་རྒོལ་གནང་ཡོད་པ་མ་ཟད། ཉིན་དེར་རྒྱ་མི་གཉིས་ཀྱིས་གཟུགས་པོ་ཧྲིལ་བོ་དམར་ཧྲང་གིས་རྐང་ལག་ལྕགས་ཐག་གིས་སྦྲེལ་ཅིང་། གཞན་ཁག་ཅིག་གིས་ལུས་སྟོད་དམར་ཧྲང་གིས་གཟུགས་པོའི་སྟེང་བོད་དོན་སྐོར་གྱི་འབོད་ཚིག་སྣ་ཚོགས་བྲིས་ཏེ་ “ ང་ཚོ་ཚང་མར་རང་དབང་སྤྲོད་རོགས། བོད་མི་ཚོར་གཉའ་གནོན་མཚམས་འཇོག་རོགས། ”ཞེས་འབོད་ཚིགས་སྒྲོག་བཞིན་སྐོར་སྐྱོད་གནང་ཡོད་འདུག
རྒྱ་རིགས་སྒྱུ་རྩལ་པ་ཊྲིན་ཝེ་མིན་ལགས་ཀྱིས་བརྗོད་པ་ལྟར་ན། འདྲ་བརྙན་དེ་འབྱུང་འགྱུར་ཕྱི་ཟླ་ ༩ པའི་ནང་ཨ་རིའི་རྒྱལ་ས་ནེའུ་ཡོག་གི་མཉམ་འབྲེལ་རྒྱལ་ཚོགས་མདུན་དུ་དབུ་འབྱེད་ཀྱིས་རྒྱ་རིགས་སྒྱུ་རྩལ་བ་ཡོངས་ཀྱི་ཚབ་བྱས་ཏེ་བོད་མི་རང་ལུས་མེར་བསྲེགས་གནང་མཁན་ཚོར་གདུང་སེམས་མཉམ་སྐྱེད་ཞུ་འཆར་ཡོད་འདུག
