དེ་རིང་ཕྱི་ཚེས་ ༡༣ ཉིན་མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ལྷན་ཁང་གིས་སེ་རི་ཡའི་ཟིང་འཁྲུག་ཁྲོད་རྐྱེན་འདས་སུ་གྱུར་པའི་གྲངས་ཐོ་ཞིག་ཕྱིར་བསྒྲཊ་བྱས་ཡོད་འདུག་ལ། དེའི་ནང་། ༢༠༡༡ ལོའི་ཟླ་ ༣ པ་ནས་ ༢༠༡༣ ལོའི་ཟླ་ ༤ བའི་མཇུག་བར་མི་ ༩༢༩༠༡ རྐྱེན་ལམ་དུ་ཕྱིན་ཡོད་པ་ཤེས་རྟོགས་བྱུང་ཡོད་པ་དང་། ཤེས་རྟོགས་བྱུང་མེད་པའི་རིགས་ཀྱི་གྲངས་ཚད་ཆེ་མང་ཚུལ་བཀོད་འདུག རྒྱལ་ཚོགས་འགྲོ་བ་མིའི་ཐོབ་ཐང་ལྷན་ཁང་གི་ཚོགས་གཙོ་ནཱ་ཝེ་པེ་ལེ་ (Navi Pillay) ཡིས་ལོ་སྔོན་མའི་ཕྱི་ཟླ་ ༦ ནས་ད་བར་ཆ་སྙོམས་ཟླ་རེར་མི་ ༥༠༠༠ ལྷག་དང་། འདས་ལོའི་ཕྱི་ཟླ་ ༡༢ ནས་ད་བར་མི་ ༢༧༠༠༠ ལྷག་དམར་གསོད་རྐྱེན་འདས་སུ་ཕྱིན་ཡོད་པར་བརྗོད་འདུག
སྙན་ཐོ་དེའི་ནང་རྐྱེན་འདས་སུ་གྱུར་པའི་གྲངས་འབོར་གྱི་བརྒྱ་ཆ་ ༨༠% སྐྱེས་པ་ཡིན་པ་དང་། ལོ་ ༡༠ མན་གྱི་བྱིས་པའི་གྲངས་འབོར་ ༡༧༠༠ ལྷག་ཡོད་ཚུལ་བཀོད་ཡོད་པ་མ་ཟད། ཟིང་འཁྲུག་ཁྲོད་སེ་རི་ཡའི་གཞུང་དང་གྱེན་ལངས་ཤོག་ཁག་གཉིས་ཀྱིས་བྱིས་པ་ཚོའི་ལུས་སྟེང་ལ་འགད་རྫས་བཞག་སྟེ་དམིགས་འབེན་ལ་གཏོར་རྒོལ་བྱེད་པ་དང་། བྱིས་པ་དགྲ་བོ་འགོག་བྱེད་དུ་བེད་སྤྱོད་གཏོང་གི་ཡོད་ཚུལ་སོགས་བཀོད་འདུག
འཇིག་རྟེན་འདིའི་སྒང་གི་ཆབ་སྲིད་པ་དང་ཚོང་བ་ཚང་ནི་བདུད་བདུད་རྐྱང་ཏག་ཏག་རེད། ཚེ་སྲོག་འཕྲོག་མཁན་དང་དཀའ་སྡུག་མྱོང་མཁན་མང་ཚོགས་རྣམས་ནི་དེ་དག་གི་ལག་ཆ་དང་རྩེད་སྤྱད་ཁོ་ན་ཡིན། སེ་རི་ཡའི་ནང་མང་ཚོགས་འདི་འདྲའི་མང་པོ་ཞིག་རྐྱེན་ལམ་དུ་ཕྱིན་ཚར་བ་རེད་དེ། ད་དུང་། དེའི་རྒྱབ་ལྗོངས་ནས་ཇུས་གཞི་འདོན་མཁན་དང་ཁེ་སྤོགས་ཟ་མཁན་གྱི་སྲིད་དོན་མིང་འཁྱེར་མཁན་དང་ཚོང་དཔོན་དག་གིས་གད་མོ་དགོད་ཀྱིན་སྤྲོ་སྐྱིད་གཏོང་བཞིན། མང་ཚོགས་ཇི་ལྟར་རྐྱེན་ལམ་དུ་བཏང་ན་རང་ཉིད་ལ་ཁེ་སྤོགས་ཇི་ལྟར་རག་མིན་ལ་འཇིག་དེད་ནས་བསྡད་ཡོད་པ་རེད། འདི་ནི་སེ་རི་ཡ་ཙམ་མ་ཡིན་པར། འཛམ་གླིང་རྫོབ་ཏོ་འདིའི་ཁྱོན་ཡོངས་ལ་དུག་ཆུ་བཞིན་བརྡོལ་ནས་ཡོད།