གྷི་རི་སིའི་གཞུང་གིས་ཁྱབ་ཆེ་ཤོས་ཀྱི་གསར་ཁང་ཞིག་སྒོ་རྒྱག་རྒྱུ་གསལ་བསྒྲགས་བྱས་རྗེས་མང་ཚོགས་སྟོང་ཕྲག་མང་པོས་ངོ་རྒོལ་ཡར་ལངས་བྱས་འདུག
ཁ་སང་གྷི་རི་སིའི་རྒྱལ་ས་ཨེ་ཐན( Athen)ཞེས་པ་རུ། གྷི་རི་སའི་ངལ་རྩོལ་མཐུན་ཚོགས་ཀྱིས་སྣེ་འཁྲིད་པའི་གཞུང་གི་གསར་འགྱུར་བརྒྱུད་ལམ་ཁག་ཅིག་བཅས་ཀྱི་མི་སྟོང་ཕྲག་མང་པོས་དུས་ཚོད་ ༢༤ རིང་གི་ལས་ཀ་མཚམས་འཇོག་གིས་གཞུང་ལ་ངོ་རྒོལ་ཁྲོམ་སྐོར་བྱས་ཡོད་འདུག དེ་ནི་ཕྱི་ཚེས་ ༡༢ ཉིན་གྱི་ཕྱི་དྲོ་ཆུ་ཚོད་ ༥ པའི་ཐོག་གཞུང་གིས་གྷི་རེ་སེའི་ནང་ཁྱབ་རྒྱ་ཆེ་ཤོས་ཀྱི་གསར་འགྱུར་ལས་ཁུངས་ (ERT)སྒོ་རྒྱག་རྒྱུའི་བཀའ་ཁྱབ་བཏང་ཡོད་པ་དང་། གསར་ཁང་དེ་སྒོ་བརྒྱབ་པ་ཡིན་ན་ལས་བྱེད་ ༢༧༠༠ ལྷག་རང་བཞིན་གྱིས་ལས་མེད་ཆགས་ཀྱི་ཡོད་པ་རེད།
ཉིན་དེའི་ངོ་རྒོལ་རྗེས་གྲོང་ཁྱེར་ཡོངས་ཀྱི་གཞུང་ལམ་དང་མེ་འཁོར། སྨན་ཁང་། སློབ་གྲྭ་སོགས་སྒོ་རྒྱག་དགོས་བྱུང་ཡོད་པ་དང་། གཞུང་གིས་ཉེན་རྟོག་མང་པོ་བཏང་སྟེ་གཞུང་གི་ལས་ཁུངས་ཁག་ལ་སྲུང་སྐྱོབ་དམ་པོ་བྱས་ཡོད་འདུག
གསར་ཁང་དེ་སྒོ་རྒྱག་དོན་སྐོར་ལ་གྷི་རི་སིའི་སྲིད་བློན་ཨན་ཊོ་ནེ་སི་( Antonis Samaras) ལགས་ཀྱིས། གསར་ཁང་དེ་ནི་གཞུང་དངུལ་ཆུད་ཟོས་སུ་གཏོང་མཁན་གཙོ་གྲས་ཀྱི་མཚོན་རྟགས་ཤིག་ཡིན་པ་མ་ཟད། ལས་ཁུངས་དེའི་ནང་གི་ལས་དོན་མང་པོ་ཞིག་ཕྱི་གསལ་ནང་གསལ་མི་མེད་སྟབས། གཞུང་གི་ཐག་གཅོད་ལྟར་གསར་ཁང་དེ་སྒོ་རྒྱག་རྒྱུ་ཁབ་བསྒྲགས་བྱས་སྐོར་བརྗོད་འདུག
བྷི་བྷི་སིའི་ས་གནས་གསར་འགོད་པ་མཱ་ཁུ( Mark lowen)ལགས་ཀྱིས་རྒྱལ་ས་ཨེ་ཐན་ནས་བརྗོད་པ་ལྟར་ན། ད་རེབ་གྷི་རི་སིའི་གཞུང་གིས་གསར་ཁང་( ERT) སྒོ་རྒྱག་དོན་གཙོ་བོ། གསར་ཁང་དེར་ལྐོག་ཟ་རུལ་སུངས་ཤུགས་ཆེན་པོ་ཡིན་པ་མ་ཟད། གསར་ཁང་རང་གི་འཛིན་སྐྱོང་ལས་དོན་ཚགས་ཚུད་མེད་པ་བཅས་ལ་བརྟེན་ཏེ་སྒོ་རྒྱབ་ཡོད་པ་དང་། དེ་ནི་གྷི་རི་སའི་བརྒྱུད་ལམ་སྟེང་གི་ནོར་འཁྲུལ་ཆེ་ཤོས་ཞིག་རེད་ཅེས་སོགས་བརྗོད་འདུག ཡིན་ནའང་རྒྱལ་མཚམས་མེད་པའི་གསར་འགོད་མཐུན་ཚོགས་ཀྱི་གསར་འགོད་པ་ཁུ་རེ་སི་ཊོབ་ཧྥེ་ཡིས “དེ་ནི་གྷི་རི་སི་རྒྱལ་ཁབ་ཀྱིས་དམངས་གཙོ་རྩ་མེད་གཏོང་གི་ཡོད་པ་རེད་ ” ཅེས་ཧྥ་རན་སིའི་( AFP)གསར་ཁང་ལ་བརྗོད་འདུག
༢༠༠༩ ལོ་ནས་བཟུང་གྷི་རི་སི་རྒྱལ་ཁབ་ལ་དཔལ་འབྱོར་ཉམས་རྒུད་ཆེན་པོ་བྱུང་སྟེ། ཡུ་རོབ་མཐུན་ཚོགས་ཀྱིས་ཡུ་སྒོར་དུང་ཕྱུར་ ༡༣༠ ཡི་རོགས་རམ་གནང་ཡོད་འདུག་ལ། ༢༠༡༠ ལོར་ཡུ་རོབ་མཐུན་ཚོགས་དང་རྒྱལ་སྤྱིའི་དངུལ་ཁང་གཉིས་ཀྱིས་གྷི་རི་སི་ལ་ཡུ་སྒོར་དུང་ཕྱུར་ ༢༠༠ ཡི་བུ་ལོན་བཏང་ཡོད་འདུག དེང་སྐབས་གྷི་རི་སིའི་གྲོས་ཚོགས་ནང་གྲོས་ཆོད་བྱུང་དོན་ལྟར་ན། ད་ལོིའི་ལོ་མཇུག་བར་གཞུང་གི་ལས་བྱེད་ ༢༠༠༠ ལྷག་ལས་མེད་ཆགས་རྒྱུ་ཡིན་པ་དང་། ༢༠༡༤ ལོའི་ལོ་མཇུག་བར་གཞུང་གི་ལས་བྱེད་ ༡༡༠༠༠ ཙམ་ལས་མེད་ཆགས་རྒྱུ་ཡིན་པའི་ཚོད་དཔག་བྱས་འདུག
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
