འོད་ཟེར་གྱིས་བརྩམས། ནགས་ཤོད་སད་མིས་བསྒྱུར།
བོད་རང་སྐྱོང་ལྗོངས་སུ་དགོན་པ་ ༡༧༠༠ ལྷག་ཡོད་ལ། དགོན་པ་ཐམས་ཅད་ལ་བཅའ་སྡོད་ལས་དོན་ཚོགས་ཆུང་ཡོད། གོ་ཐོས་ལྟར་ན། པེ་ཅིང་གི་འཆར་ཇུས་ནི་ལས་དོན་མི་སྣ་ ༣ སྟོང་དགོན་པར་མངགས་གཏོང་བྱ་རྒྱུ་དེ་རེད། དོན་དངོས་སུ་ལས་དོན་མི་སྣ་ ༧ སྟོང་ལྷག་དགོན་པར་བསྡད་ཚར་ཡོད། དེས་མ་ཚད། བོད་རང་སྐྱོང་ལྗོངས་སུ་སྲིད་འཛིན་གྲོང་ཚོ་ ༤༥༠༠ ཡོངས་རྫོགས་ལ་གྲོང་ཚོར་བཅའ་སྡོད་ལས་དོན་རུ་ཁག་བཙུགས་ཡོད། བོད་ཀྱི་དཔོན་པོ་ཞིག་གིས་གསར་འགྱུར་བརྒྱུད་ལམ་དུ་བཤད་པ་ལྟར་ན། ལས་བྱེད་ཁྲི་ཚོ་ ༢ ལྷག་གྲོང་ཚོར་བསྡད་ཡོད་ཟེར། གྲངས་ཀ་འདིའི་ནང་དུ་དགོན་པར་བཅའ་སྡོད་བྱས་པའི་ལས་བྱེད་ཚུད་ཡོད་མིན་མི་ཤེས།
ཆབ་མདོ་ས་ཁུལ་དུ། དགོན་སྡོད་ལས་དོན་རུ་ཁག་དང་གྲོང་སྡོད་ལས་དོན་རུ་ཁག་གཉིས་ནི་བོད་རང་སྐྱོང་ལྗོངས་སུ་ཡོད་དགོས་པ་དགུ་ལག་བསྟར་བྱ་ཆེད་རེད། (དེ་དག་ནི་མགོ་ཁྲིད་བཞིའི་པར་ཡོད་པ། རྒྱལ་དར་ཡོད་པ། གཞུང་ལམ་ཡོད་པ། ཆུ་ཡོད་པ། གློག་ཡོད་པ། རླུང་འཕྲིན་བརྙན་འཕྲིན་ཡོད་པ། གློག་བརྙན་ཡོད་པ། དེབ་ཁང་ཡོད་པ། ཚགས་པར་ཡོད་པ་བཅས་རེད།) ཕྱི་ལོ་ ༢༠༡༡ ལོ་མཇུག་ནས། ཆབ་མདོ་ས་ཁུལ་གྱི་དགོན་པ་ ༥༠༠ ལ་ཉེ་བའི་ལྷ་ཁང་དང་གྲྭ་ཤག་ཡོད་ཚད་ཀྱི་ཁང་ཐོག་དང་། དེ་བཞིན་ཁྱིམ་ཚང་རེ་རེའི་ཁང་ཀླད་ཏུ་སྐར་ལྔའི་དར་དམར་འཛུགས་དགོས་ལ། དེ་བཞིན་དགོན་པ་ཡོངས་རྫོགས་ཀྱི་ལྷ་ཁང་དང་གྲྭ་ཤག དུད་ཁྱིམ་རེ་རེའི་ནང་རྒྱ་ནག་གི་མགོ་ཁྲིད་ཚོའི་འདྲ་པར་བཤམས་དགོས།
དེས་མ་ཚད་འདྲ་པར་དེ་དག་ལ་དར་ཁ་ངེས་པར་གཡོགས་དགོས། གལ་ཏེ་མཇལ་དར་གཡོགས་མེད་ཚེ་ཆབ་སྲིད་ཀྱི་གནད་དོན་ལ་བརྩི། ཞིང་འབྲོག་ཁྱིམ་ཚང་དུ་སྐར་ལྔའི་དར་དམར་བཤམས་རྒྱུའང་རིན་པ་འཇལ་དགོས་ཀྱི་ཡོད། དར་དམར་རེ་རེའི་སྤུས་ཚད་ལྟར་སྒོར་ ༣ ནས་ ༦ བར་རེད། རྙིང་པ་ཆགས་ནས་གསར་པ་བརྗེ་བ་ལའང་སྒོར་མོ་ལེན་གྱི་ཡོད། ཡིན་ནའང་ད་ལོ་རིན་པ་བླངས་མ་སོང་ཟེར། དགོན་སྡོད་ལས་དོན་རུ་ཁག་དང་གྲོང་སྡོད་ལས་དོན་རུ་ཁག་གཉིས་ནས་རྟག་ཏུ་གློ་བུར་གློ་བུར་ལ་གྲ་ཤག་དང་དུད་ཁྱིམ་སྔོག་བཤེར་བྱེད་འོང་། ད་ཆ། ཆབ་མདོ་ས་ཁུལ་གྱི་དགོན་སྡེ་དང་ཤང་གྲོང་དག་ལ་བསྐྱོད་དུས། མིག་ལམ་དུ་སྣང་འོང་བ་ནི་རླུང་བུས་རྡེབ་བཞིན་པའི་ཀླུང་རྟ་མིན་ལ། དེ་ནི་དམར་ལེབ་ལེབ་ཀྱི་སྐར་ལྔའི་དར་དམར་རེད།
རེད་དེ་ཡ་མཚན་པ་ཞིག་ལ། གལ་ཏེ་པེ་ཅིང་དང་ཡང་ན་རྒྱ་ས་གཞན་དག་གི་མགོ་ཁྲིད་ས་གནས་སུ་ལས་དོན་རྟོག་ཞིབ་ལ་འབྱོར་ཚེ། ལས་དོན་རུ་ཁག་ནས་གྲྭ་པ་དང་མི་དམངས་ལ་སྐབས་འཕྲལ་རིང་དར་དམར་ཕྱིར་བསྡུ་བྱ་བཅུག་གི་ཡོད། ལས་དོན་རྟོག་ཞིབ་ཚོགས་པ་ཐོན་ཚར་རྗེས་དར་དམར་ངེས་པར་བསྐྱར་འཛུགས་བྱེད་དགོས་ཀྱི་ཡོད། ཉེ་བའི་ཆར། སི་ཁྲོན་ཞིང་ཆེན་གྱི་ཤེས་རིག་ལས་ཁུངས་དཔོན་པོ་ཞིག་མིང་གྲགས་ལྡན་པའི་ཀརྨ་དགོན་པར་ལྟ་སྐོར་ལ་འགྲོ་དུས། དགོན་པའི་ལྷ་ཁང་དང་གྲྭ་ཤག་ཐོག་གི་དར་དམར་སྔ་ས་ནས་ཕབ་ཚར་ཡོད།
འདི་ལོའི་ཟླ་བ་གསུམ་པའི་ནང་། དགོན་སྡོད་ལས་དོན་རུ་ཁག་དང་གྲོང་སྡོད་ལས་དོན་རུ་ཁག་གཉིས་ནས་དུད་རེ་ངོ་རེ་བྱས་ནས་ཞིབ་བཤེར་བྱས། གྲྭ་པ་དང་གྲོང་མིའི་རླངས་འཁོར་རམ་སྦག་སྦག་སོགས་ཀྱི་མོ་ཌའི་ས་སྣུམ་དང་། ཁྲའེ་ཡིའུ་སྣུམ་བཅས་གཞུང་ལེན་བྱས། གལ་ཏེ། ས་སྣུམ་ཉོ་དགོས་ཡོད་ཚེ་ངེས་པར་དུ་ཐོབ་ཐང་ལག་ཁྱེར་སྤྱད་ནས་ས་སྣུམ་ཉོ་བྱེད་ཀྱི་འཛིན་བྱང་བཟོ་དགོས། ད་གཟོད་གཞི་ནས་སྣུམ་སྣོན་ཚུགས་ལ་སོང་ནས་ས་སྣུམ་བླུགས་ཐུབ་ཀྱི་ཡོད་པ་རེད། དེ་མིན་ས་སྣུམ་བླུགས་ཐུབ་ཀྱི་ཡོད་པ་མ་རེད། ཡང་གལ་ཏེ། བོད་ཁུལ་གཞན་དཔེར་ན་སི་ཁྲོན་དང་། མཚོ་སྔོན་གྱི་བོད་མིས་ས་སྣུམ་ཉོ་བར་ཡོང་ན་ས་སྣུམ་གཏན་ནས་བླུགས་ཀྱི་ཡོད་པ་མ་རེད། དེ་དང་མཉམ་དུ། བོད་མི་ཚོས་ཡིག་ཆ་ཞིག་གི་སྟེང་དུ་མིང་རྟགས་འགོད་དགོས་ལ། མཛུབ་རིས་ཀྱང་དཔར་དགོས། འདིའི་ནང་དུ་ཕྲུ་གུའང་ཚུད་ཡོད།
དྲིལ་བསྒྲགས་བྱས་པ་ལྟར་ན། གལ་ཏེ་ཁྱིམ་མི་སུ་ཞིག་རང་སྲེག་བྱས་ཚེ། ཁྱིམ་ཚང་དེར་གཞུང་གི་ལས་བྱེད་ཡོད་ན་ལས་གནས་ལས་འཕུད་རྒྱུ་དང་། ཁྱིམ་ཚང་དེར་གཞུང་གི་ལས་བྱེད་པ་མེད་ན། ཁྱིམ་མི་ཆ་ཚང་འཛིན་བཟུང་གཏུག་རྒྱུ། གྲོང་མི་སུ་ཞིག་རང་སྲེག་བརྩམས་ཚེ། གྲོང་ཚོ་དེའི་ཆུང་ཙག་འགན་ལེན་སོགས་ལྟ་སྐྱོང་ལས་གཞི་ཡོངས་རྫོགས་རྩིས་མེད་གཏོང་རྒྱུ་དང་། གྲོང་མི་ཚང་མ་འཛིན་བཟུང་བྱ་རྒྱུ། དགོན་པའི་གྲྭ་པ་ཞིག་གིས་རང་སྲེག་བྱས་ན། དགོན་པ་སྒོ་རྒྱག་རྒྱུ་དང་གྲྭ་དམངས་འདྲི་རྩད་བྱ་རྒྱུ རང་སྲེག་པའི་སླད་དུ་སྨོན་ལམ་འཚོགས་པའི་དགོན་པ་དང་གྲྭ་པ་དེ་དག་ལ། ཐུན་མོང་གིས་མི་བསད་པའི་ཉེས་བསགས་ལྟར་ཐག་གཅོད་བྱ་རྒྱུ།
ན་ནིང་ནས་བཟུང་། ཆབ་མདོ་ས་ཁུལ་གྱི་དགོན་པ་ ༥༠༠ ཉེ་བ་དེ་དག་གི་གྲྭ་བཙུན་ཡོངས་རྫོགས་དགོན་པ་ལས་ཕྱིར་ཐོན་མི་ཆོག་པའི་གཏན་འབེབས་བྱས་ནས་རང་སོ་སོའི་དགོན་པར་སྡོད་དགོས་ཀྱི་ཡོད། ཅི་སྟེ་དོན་དག་ཞིག་གི་སླད་དུ་ཕྱིར་ཐོན་དགོས་ཡོད་ན། དགོན་སྡོད་ལས་དོན་རུ་ཁག་ནས་ཉིན་ ༣ དུས་ཚོད་སྤྲོད་ལ། དེ་ལས་མང་བའམ་ཉིན་ ༡༥ ནང་ཚུན་ལ་ས་གནས་ཤང་ཀྲང་དང་ཧྲུའུ་ཅིའི་བཀའ་འཁྲོལ་ཐོབ་དགོས། དུས་ཆད་ནང་རང་གནས་སུ་ལོག་ཐུབ་མེད་རིགས་ལ་སྲིད་གཞུང་ལ་ཁ་གཏད་གཅོག་གི་ཡོད་པ་བརྩི་འགྲོ་ལ། དེ་ནས་ཆད་པའང་གཅོད་འོང་། ཤེས་གསལ་ལྟར་ན། སྔ་ལོའི་ནང་ཆབ་མདོ་ས་ཁུལ་གྱི་གྲྭ་པ་གཅིག་ཀྱང་ལྷ་སར་བསྐྱོད་ཐུབ་མེད། འདི་ལོའི་ནང་། མིག་སྔར་གྲྭ་པ་ ༤ ཡིས་ལྷ་སར་བསྐྱོད་ཆོག་པའི་ལག་ཁྱེར་རག་པ་རེད།
ཡང་གལ་ཏེ་དགོན་པ་འདི་དང་གྲོང་ཚོ་དེའི་མི་གང་ཞིག་དགོན་པ་དང་གྲོང་ཚོ་གཞན་ལ་འགྲོ་དགོས་ཡོད་ཚེ། ས་གནས་དེ་གར་འབྱོར་འཕྲལ་ངེས་པར་དགོན་སྡོད་ལས་དོན་རུ་ཁག་གམ་གྲོང་སྡོད་ལས་དོན་རུ་ཁག་སར་སྙན་སེང་ཞུ་དགོས་ལ་མིང་ཐོ་ཡང་འགོད་དགོས། དེ་མིན་ཁོང་ཚོས་ཧ་གོ་ཚེ། ས་ཆ་དེ་ནས་བསྐྲོད་རྒྱུ་མ་ཟད་ཆད་པའང་གཅོད་འགྲོ གལ་ཏེ་བོད་ཁུལ་གཞན་དཔེར་ན་སི་ཁྲོན་དང་། མཚོ་སྔོན་གྱི་བོད་མི་ཞིག་ཆབ་མདོར་འགྲོ་དགོས་ན་ཉུང་མཐར་ལག་ཁྱེར་ ༦ ཚང་དགོས། ཐོབ་ཐང་ལག་ཁྱེར་དང་གྲྭ་པའི་ལག་ཁྱེར་ཕུད། ད་དུང་གྲོང་ཚོ། ཤང་། མངགས་གཏོང་ཁང་། སྤྱི་བདེ་ཅུས་སོགས་ཀྱི་ལག་ཁྱེར་ཡོད་དགོས།
ཆབ་མདོ་རྫོང་གི་གཞུང་ལམ་ཡོངས་སུ་རྫོགས་པ ( གནམ་ཐང་ལ་ཟུག་པའི་གཞུང་ལམ་དང་ཡུལ་སྐོར་གཞུང་ལམ་ཕུད། ) ཞིབ་བཤེར་ས་ཚིགས་བཙུགས་ཡོད། ཆབ་མདོ་རྫོང་ནས་སྨད་མདའ་ཤང་བར་གྱི་ལམ་ཐག་སྤྱི་ལེ་ ༡༧༠ ལས་མེད་ནའང་ཞིབ་བཤེར་ས་ཚིགས་ཆེ་བ་ ༣ དང་ཆུང་བ་ ༡ ཡོད། སྦག་སྦག་འགྲོ་སྐྱོད་བྱ་ཆོག་གི་མེད། ས་གནས་གྲོང་མི་དང་དགོན་པའི་འཁོར་ཆུང་རྣམས་རྡེ་གདང་ཟེར་བའི་ཞིབ་བཤེར་ས་ཚིགས་སུ་སྒོར་ ༢༠༠ འཇལ་དགོས་ཀྱི་ཡོད། དེ་ནི་ཏན་ཏན་ཞིབ་བཤེར་ས་ཚིགས་རང་ཉིད་ཀྱི་གཏན་འབེབས་ཙམ་ཡིན། འཁོར་ཆེན་ཡང་རིན་པ་བསྡུ་དགོས་མོད་ཅི་ཙམ་བསྡུ་གི་ཡོད་མེད་མ་ངེས། བོད་མི་ཞིག་ཡིན་ཕྱིན་ཞིབ་བཤེར་ས་ཚུགས་དག་ལས་ལུས་བཤེར་བཟོ་དགོས་ལ། ད་དུང་ལྟོ་ཕད་དང་ཁ་པར་ལ་ཞིབ་བཤེར་ནན་མོ་རེ་བྱ་འོང་། གལ་ཏེ་ཁ་པར་ནང་དུ་གོང་ས་མཆོག་གི་སྐུ་པར་དང་བཀག་གཞས ( ཁྲིམས་འགལ་གླུ་གཞས ) སོགས་ཉར་ཡོད་ཚེ། ས་ཆ་དེ་ག་རང་ནས་བཀག་ཉར་བྱེད་ཀྱི་རེད།
༢༠༡༣ ། ༦ ། ༢
སྐར་ལྔའི་དར་ཆ་དབུ་མའི་དགོངས་དོན་རེད།
དེ་འཕྱར་ན་ཧ་ལས་ཧོན་འཐོར་རྒྱུ་ཅི་ཡོད།
བཙན་བྱོལ་ནའང་ཕྱར་ཟིན་པ་རེད་ལ།
ད་དུང་འཕྱར་དགོས་ཀྱི་རེད།