རྒྱ་ནག་དབུས་གཞུང་གི་བཀོད་ཁྱབ་ལྟར། དེ་རིང་ཞཱིན་ཅིང་ཡུ་གུར་ནང་དམག་མི་ཁྲི་ ༧ ལྷག་གིས་དྲག་རྡུང་ལས་འགུལ་སྤེལ་རྒྱུའི་དམ་བཅའ་བཞག་ཡོད་ཟེར།
རྒྱ་ནག་གཞུང་འབྲེལ་ཞཱིན་ཧྭ་དྲ་བའི་སྟེང་གནས་ཚུལ་སྤེལ་བའི་ནང་། ད་ལོའི་ཕྱི་ཟླ་ ༣ ཚེས་ ༧ ཉིན་ཞིན་ཅིང་ཁའུ་ལཱར་ངོ་རྒོལ་དོན་རྐྱེན་ཁྲོད་མི་ ༤ རྐྱེན་འདས་དང་། ཟླ་ ༤ ཚེས་ ༢༣ ཉིན་ཁེ་ཧྲེ་སི་ལུ་པུ་གྲོང་བསྡལ་གྱི་ངོ་རྒོལ་ཁྲོད་མི་ ༡༥ རྐྱེན་འདས། ཕྱི་ཟླ་ ༦ ཚེས་ ༢༦ ཉིན་ཧྲན་ཧྲད་རྫོང་དུ་ངོ་རྒོལ་དོན་རྐྱེན་ཁྲོད་མི་ ༢༤ རྐྱེན་འདས་བཅས་བྱུང་ཡོད།
ཕྱི་ཟླ་ ༦ ཚེས་ ༢༨ ཉིན་རྒྱ་ནག་དབུས་ཆབ་སྲིད་སྡེ་ཚན་གྱིས་ཞཱིན་ཅིང་ལས་དོན་ཚོགས་འདུ་བསྐོངས་ཏེ། སྲིད་འཛིན་ཞི་ཅིན་ཕིན་གྱི་གོ་སྒྲིག་འོག རྒྱ་ནག་རྒྱལ་ཡོངས་སྲིད་གྲོས་ཀྱི་ཀྲུའུ་ཞི་ཡུས་ཊྲེན་ཧྲན་གྱིས་སྣེ་འཁྲིད་དེ་ལས་དོན་ཚོགས་ཆུང་ཞིག་ཚེས་ ༢༩ ཉིན་ཞཱིན་ཅིང་དུ་འབྱོར་ཡོད་པ་དང་། ཞཱིན་ཅིང་དུ་བརྟན་སྡོད་དྲག་ཆས་ཉེན་རྟོག་དཔུང་སྡེ་དང་མཉམ་འབྲེལ་ཐོག་ངོ་རྒོལ་བར་དྲག་རྡུང་བྱེད་པའི་ལས་འགུལ་ཞིག་མགོ་འཛུགས་བྱས་ཡོད་འདུག
དེ་རིང་ཕྱི་ཚེས་ ༢ ཉིན་ཞཱིན་ཅིང་སྤྱི་བདེ་ཉེན་རྟོག་སྡེ་ཁག་གིས་དོན་ཚན་ ༨ ཅན་གྱི་གསལ་བསྒྲགས་ཤིག་སྤེལ་ཏེ། ཡུ་གུར་བ་མི་ ༡༠ འཛིན་བཟུང་བྱེད་རྒྱུ་ཡིན་པ་དང་། མི་དེ་དག་གི་པར་དང་ལོ་རྒྱུས་བཀྲམས་ཏེ་ཁོ་ཚོའི་གནས་ཚུལ་ཡར་ཞུ་བྱེད་མཁན་ལ་རྒྱ་སྒོར་ཁྲི་ ༥ ནས་ ༡༠ བར་སྤྲོད་རྒྱུ་ཡིན་པ་དང་། གནས་ཚུལ་སྦ་གསང་དང་ཉེས་ཅན་འགེབ་སྲུང་བྱེད་མཁན་ལ་ཁྲིམས་གཅོད་ནན་མོ་གཏོང་རྒྱུ་བཅས་བཀོད་ཡོད་འདུག
ད་དུང་གནས་ཚུལ་ནང་། ད་ལྟ་ཞཱིན་ཅིང་དུ་དྲག་ཆས་ཉེན་རྟོག་དམག་མི་ཁྲི་ ༧ ཙམ་ས་གནས་ཁག་ཏུ་འགྲེམས་འཇོག་བྱས་ཡོད་པ་དང་། དེ་ནི་དྲག་ཆས་དཔུང་དམག་ཆེས་མང་ཤོས་ཀྱི་ས་ཁུལ་ཞིག་ཆགས་ཡོད། ཅེས་སོགས་བརྗོད་འདུག
རྒྱ་ནག་གཞུང་གིས་མིག་མཐོང་ལག་ཟིན་གྱི་གནས་ཚུལ་ཁག་ལ་འཁྱོག་བཤད་དང་རྫུན་སྒྲོག་རྐྱང་རྐྱང་བྱེད་པ་འདི་ག་རེ་ཡིན་ནམ། སྤྱི་ཟླ་དྲུག་པ་གཅིག་པའི་ནང་ཡུ་གུར་ནང་མི་མང་ཚོས་རྒྱ་གཞུང་ལ་ངོ་རྒོལ་བྱས་ཏེ་ཡུ་གུར་མི་མང་དང་གཞུང་གི་ཉེན་རྟོག་པ། ད་དུང་རྒྱ་རིགས་ཚོང་པ་བཅས་མི་གྲངས་ ༥༨ ་ལྷག་འདས་གྲོངས་སུ་ཕྱིན་ཡོད་པ་ཕྱི་ལོགས་ཀྱི་གསར་འགྱུར་བརྒྱུད་ལམ་ཁག་ཏུ་སླེབས་འདུག་པ་མ་མཐཽང་མ་ཐོས་སམ།