ངྷ་སའི་ཆང་ཁང་ཞིག་ཏུ་ལས་ཀ་བྱེད་མཁན་ཞིག་གིས་ཧིན་སྒོར་ཁྲི་ ༥ ལྷག་དང་སྒོར་ཁྲི་ ༢ ལྷག་གི་ཁ་པར་ཞིག དེ་མིན་གྱི་ཅ་དངོས་ཙག་ཙིག་བཅས་ཡོད་པའི་རྒྱབ་ཁུག་ཅིག་རྙེད་དེ་ཕྱིར་བདག་པོར་སྤྲད་འདུག
གཟའ་ཟླ་བའི་ཉིན་གྱི་མཚན་མོའི་ཆུ་ཚོད་ ༡ ཙམ་ལ་ངྷ་ས་མེག་གྷན་དབྱངས་སྒྲོན་ཆང་ཁང་དུ་ལས་ཀ་བྱེད་མཁན་ཕ་ཡུལ་མཚོ་སྔོན་ཞིང་ཆེན་ཆབ་ཆ་རྫོང་ནས་ཡིན་པ་ཡར་བྷོ་ཞུ་བ་ཁོ་རང་ལས་ཀ་གྲོལ་ཏེ་ཕྱིར་ནང་དུ་ལོག་སྐབས། མེག་གྷན་སྲང་ལམ་གྱི་ཨ་མདོའི་ཟ་ཁང་སྒོ་འགྲམ་དུ་རྒྱབ་ཁུག་ཅིག་རྙེད་ཡོད་པ་དང་། རྒྱབ་ཁུག་དེའི་ནང་ཧིན་སྒོར་དངུལ་རྐྱང་ཁྲི་ ༥ ལྷག་དང་། ཧིན་སྒོར་ཁྲི་ ༢ ལྷག་གི་ལག་ཁྱེར་ཁ་པར་གཅིག དེ་མིན་གྱི་ཅ་དངོས་ཙག་ཙིག་བཅས་ཡོད་འདུག ཁ་སང་ཚེས་ ༢ ཉིན་ཡར་བྷོ་ལགས་ཀྱིས་རྒྱབ་ཁུག་དེའི་བདག་པོར་འབྲེལ་བ་བྱས་ཏེ་ཕྱིར་རྩིས་སྤྲོད་བྱས་ཡོད་འདུག
གསར་འགོད་པས་གནས་ཚུལ་རྒྱུས་ལོན་བྱས་པར། རྒྱབ་ཁུག་དེའི་བདག་པོ་མེག་གྷན་ཨ་མདོའི་ཟ་ཁང་གི་སྦྱིན་བདག་ཕ་ཡུལ་སྡེ་དགེ་ནས་ཡིན་པའི་བསོད་ནམས་ལྷ་སྐྱིད་ཞུ་བ་ཁོ་མོ་ཡིན་འདུག ཁོ་མོས་སྒོར་མོ་དང་ཅ་དངོས་བཅུག་པའི་རྒྱབ་ཁུག་དེ་ཇི་ལྟར་བོར་བརླག་ཕྱིན་སྐོར་ངོ་སྤྲོད་བྱས་པ་ལྟར་ན། ཕྱི་ཚེས་ ༡ ཉིན་གྱི་ཕྱི་དྲོ་ཀཱང་རར་སྤྲོ་འཆམ་དུ་འགྲོ་རྩིས་ཀྱིས་གྲོགས་པོ་ཁ་ཤས་དང་མཉམ་དུ་བྲེལ་འཚུབ་ངང་ཟ་ཁང་གི་སྒོ་བརྒྱབ་པ་དང་། སྐབས་དེར་རྒྱབ་ཁུག་ཟ་ཁང་གི་སྒོ་ཁར་བཞག་ནས་དྲན་པ་བརྗེད་ཡོད་པ་རེད།
ཡར་བྷོ་ལགས་ཀྱིས་རྒྱབ་ཁུག་ཇི་ལྟར་རྙེད་སྐོར་བརྗོད་དོན། “ ངས་དབྱངས་སྒྲོན་ཆང་ཁང་དུ་ལས་ཀ་བྱས་ཏེ་མཚན་མོ་ཆུ་ཚོད་ ༡ ཙམ་ལ་ནང་དུ་ལོག་པ་དང་། ཨ་མདོ་ཟ་ཁང་གི་སྒོ་ཁར་བསླེབས་སྐབས་རྒྱ་གར་ཁ་ཤས་དེར་ཚོགས་ཏེ་ཅིག་ལ་བལྟས་ནས་བསྡད་འདུག ངས་ར་བཟི་ཞིག་དེར་འགྱེལ་བསྡད་ཡོད་ས་རེད་བསམ་ནས་ཕར་བལྟས་དུས་རྒྱབ་ཁུག་ཁྲ་ཁྲ་ཞིག་ལྷག་འདུག དེ་ནས་ངས་བདག་པོ་ཞིག་ཡོད་རྒྱུ་རེད་བསམ་ནས་རྒྱབ་ཁུག་དེ་སྲུང་ནས་ཡུན་རིང་བསྒུགས་ཀྱང་མི་སུ་གཅིག་ཀྱང་འབྱོར་མ་སོང་སྟབས་ངས་རྒྱབ་ཁུག་དེ་ནང་ལ་ཁྱེར་བ་ཡིན” ཟེར།
ཧིན་སྒོར་ཁྲི་ ༥ ལྷག་དང་ཅ་དངོས་དེ་དག་ཕྱིར་བདག་པོར་སྤྲོད་འདོད་ཇི་ལྟར་བྱུང་མིན་དྲིས་པར་ཁོང་གིས། “ ང་རང་ཉིད་ཀྱིས་ཀྱང་སྔོན་ཆད་ཅ་ལག་མང་པོ་བརླགས་མྱོང་ཡོད་ལ། སྐབས་དེ་དག་ལ་སེམས་ཁྲལ་ཡང་མང་པོ་བྱས་པ་ཡིན། རང་གཞན་སུ་ཡིན་ནའང་ཅ་དངོས་བོར་བརླག་ཕྱིན་ཚེ་སེམས་ཁྲལ་ཡོད་སྟབས། ཅ་དངོས་ག་རེ་རྙེད་ཀྱང་ཕྱིར་བདག་པོར་སྤྲོད་རྒྱུ་ཧ་ཅང་གལ་ཆེན་པོ་རེད། ང་ཚོས་རྒྱུན་དུ་༸ གོང་ས་མཆོག་གི་བཀའ་སློབ་ལ་ཉན་པ་དང་། ང་ཚོ་ནང་པ་ཡིན། བྱམས་སྙིང་རྗེ་སྒོམ་དགོས་ཟེར་གྱི་ཡོད་སྟབས། ང་རང་གི་ངོས་ནས་སོ་སོའི་འཚོ་བའི་གནས་སྟངས་ལ་མ་བལྟས་པར་དངུལ་དངོས་འདི་ཕྱིར་བདག་པོར་སྤྲོད་རྒྱུའི་སེམས་ཐག་བཅད་པ་ཡིན ” ཞེས་བརྗོད་སོང་།
མཇུག་ཏུ། བུ་མོ་བསོད་ནམས་ལྷ་སྐྱིད་ལགས་ཀྱིས་བརྗོད་དོན། “མི་སུ་ཞིག་ཡིན་ཡང་འདི་འདྲའི་སྒོར་མོ་ཕོན་ཆེན་པོ་ཞིག་རག་སྐབས་ཕྱིར་སྤྲོད་རྒྱུ་ཁག་པོ་རེད། སོ་སོས་བེད་སྤྱོད་གཏོང་གི་རེད། ཡིན་ནའང་། ཡར་བྷོ་ལགས་ཀྱིས་ང་རང་གི་སྒོར་མོ་དང་ཅ་དངོས་ཚང་མ་ཕྱིར་སྤྲད་པར་ཧ་ཅང་དགའ་བོ་བྱུང་སོང་། ང་རང་ལ་ཞེ་དྲག་མེད་ཀྱང་ཐུགས་རྗེ་ཆེ་ཞུ་ཆེད་ཁོང་ལ་ཞལ་ལག་ཅིག་ཕུལ་རྒྱུ་དང་། དེ་དང་མཉམ་དུ་ཧིན་སྒོར་ ༡༥༠༠ ཞིག་སྤྲོད་དགོས་བསམ་ཡོད། ” ཅེས་བརྗོད་སོང་།
བུ་ཁྱོད་རང་ཚེ་རིང་ནད་མེད །བྱ་བ་ལམ་འགྲོ་ཡོང་བར་ཤོག །
བཀྲ་ཤིས་ཤོག
བུ་ཁྱོད་རང་ཚེ་རིང་ནད་མེད །བྱ་བ་ལམ་འགྲོ་ཡོང་བར་ཤོག །
དངོས་གནས་ཡག་པོ་རེད་འདུག
གོང་ས་མཆོག་གི་བཀའ་དྲིན་རེད་བསམ་གི་འདུག
བདག་པོ་དང་ཡར་བྷོ་གཉིས་ཀ་མི་དྲང་པོ་སེམས་བཟང་ཅན་རེད།
བདག་པོ་འགའ་ཤས་ཀྱིས་ཁ་ནས་ཐུགས་རྗེ་ཆེ་ཞུ་བ་མ་གཏོགས་གཞན་གང་ཡང་སྤྲོད་གི་མ་རེད།
ཡག་པོ་རེད་ན་གཞོན་ཡར་བྷོའི་སེམས་པ་རྣམ་དག་དེས་བོད་མ་སྤྱིའི་རིན་ཐང་ཕན་ངེས་ཡིན་་་་་་་་
ན་གཞོན་ཡར་བྷོའི་སེམས་པ་རྣམ་དག་དེས་བསོད་ནམས་ལྷ་སྐྱིད་སྐྱབས་པ་རེད། སྤྱིར་ང་ཚོ་སྤྱི་ཚོགས་ཁྲོད་དུ་༧གོང་ས་མཆོག་གི་བཀའ་གསུང་བརྕི་དགོས་ཟེར་བའི་སྐད་ཆ་དུས་རྒྱུན་དུ་གོ་ཐོས་ཡོད་པ་རེད། ཡིན་ནའང་། གནད་འགག་དང་ཕྲ་ས་ལ་སླེབས་དུས་ཡར་བྷོ་ལྟ་བུའི་ལག་ལེན་བསྟར་མཁན་ཧ་་ཅང་གི་དཀོན་པོ་རེད། རང་ཉིད་ཀྱི་ནུས་ཚོད་ཀྱིས་༧གོང་ས་མཆོག་གི་བཀའ་གསུང་བརྩིས་ཏེ་ལག་ལེན་བསྟར་རྒྱུ་ནི་སེམས་ཁོང་ནས་སྐྱབས་མགོན་ལ་དད་གུས་དང་བོད་ཀྱི་ཡ་རབས་བཟང་སྤྱོད་ལ་འབྲེལ་དམ་ཟབ་ཡོད་པ་ཞིག་ཏུ་འདོད་དོ།
ཁྱེད་ལ་བྱ་བ་ལམ་འགྲོ་ཡོང་བ་ཤོག ༧གོང་ས་མཆོག་གི་བཀའ་སློབ་ཁ་ཙམ་མིན་པ་སྙིང་ལ་བཅངས་འདུག བུ་ཁྱེད་ལ་སེམས་གཏིང་ནས་ཐུགས་རྗེ་ཆེ་ཞུ།
༧གོང་ས་མཆོག་གི་དུས་རྟག་ཏུ་བཀའ་སློབ་གནང་གི་ཡོད་པ་ལྟར་བོད་མི་རིགས་ཟེར་པ་དྲང་བདེན་དང་གནས་ལུགས་བརྩི་མཁན་ཡར་བྷོ་ལྟ་བུའི་སྐྱེ་བུ་གང་མང་ཞིག་བོད་གངས་ཅན་གྱི་ལྗོངས་སུ་འཁྲུངས་བའི་སྨོན་འདུན་ཞུ་རྒྱུ་དང་སླད་མར་འདི་ལྟར་རླབས་ཆེན་གྱི་བྱ་བ་སྒྲུབ་མཁན་རེ་བྱུང་ན་འདི་ལྟར་ངོ་སྤྲོད་གནང་ཐུབ་ན་དགེ་མཚན་ཆེ་རིགས་བཟང་གི་བུ་ཡར་བྷོ་ལྟ་བུ་སྐུ་ཚེ་བརྟན་པའི་སྨོན་ལམ་འདེབས།
ཡར་བྷོས་ཅ་ལག་ཕྱིར་སྤྲད་པ་དེས་ཁོ་རང་གི་མི་གཤིས་དང་རིན་ཐང་བསྟན་པ་རེད། དེའི་ཆ་ནས་མི་ཚང་མས་ཁོ་ལ་རིན་ཐང་ཞིག་སྤྲོད་གི་རེད། དེ་ཁོའི་ཡོང་འབབ་རེད། དེ་ལས་ལྷག་ཅིག་ལ་རེ་བ་བྱས་ན་ནོར་བ་རེད། བདག་མོས་སྒོར་1500 སྤྲད་པ་དེས་མོའི་མི་གཤིས་དང་རིང་ཐང་བསྟན་པ་རེད། མི་རང་ཉིང་ལ་རིན་ཐང་ཅི་ཙམ་ཡོད་པ་དེ་ཙམ་ལས་ལྷག་ཅིག་ཇི་ལྟར་སྟོན་ནམ། མི་ལ་ལས་བདག་མོས་ཁོ་ལ་སྒོར་ཆིག་ཁྲི་སྟེར་དགོས་ཟེར། དེ་ཟེར་མཁན་དག་གིས་རང་རང་གི་རིང་ཐང་བསྟན་པ་རེད། ཡིན་ནའང་དོན་ཐོག་ལ་བབས་ན་སྟེར་ཐུབ་མིན་སུས་ཤེས། མདོར་དེར་ན་གསར་འགྱུར་ཐུང་ཐུང་འདིའི་སྟེང་ནས་མི་འགས་རང་ཉིད་ཀྱི་ལྗིད་ཚད་མ་བསམ་ས་ནས་མིའི་མིག་ལ་བསྟན་པ་ཙམ་རེད། ངས་ཡར་བྷོར་བཤད་འདོད་པ་ནི་གནད་འགག་གི་སྐབས་སུ་༧ གོང་ས་མཆོག་གི་བཀའ་སློབ་ཅིག་སེམས་ལ་དྲན་ནས་ལག་ལེན་དུ་བསྟར་བ་དེ་ཁྱོད་ཀྱི་ཡོན་ཏན་དང་༧གོང་ས་མཆོག་གི་ཡོང་སྒོའང་རེད། དེ་མིན་སྒོར་ཁྲི་ལྔ་ཁུར་ནས་སྤྲོ་འཆམ་ལ་འགྲོ་མཁན་ཞིག་ལ་སྒེར་མོ་དེ་དག་ཕྱིར་མ་སྤྲད་ནའང་སྤྲོ་འཆམ་བྱེད་མ་ཐུབ་པའི་གྱོང་ཙམ་རེད། དེ་ཙམ་ཡིན།
གསར་འགོད་པས་གསར་འགྱུར་འགོད་སྐབས་ཀླད་གོར་གཅིག་ཆད་སོང་ནི་མིན་ནམ། ཧུ་ཧུ། ཨ་ལེ། ཀུ་རེ་ཡིན།
ཇོ་བོ་རིན་པོ་ཆེ། ཁྱེད་རང་གིས་དེ་ལྟར་བྱས་པ་དཔེ་ཡག་པོ་རེད། ཁྱེད་རང་མ་འོངས་པར་དེ་ནས་ལྷག་པའི་དངོས་གྲུབ་ཐོབ་པ་དོན་མི་ཟ།
ང་རང་གི་བསམ་བློ་གཏོང་སྟངས་བྱས་ན། ད་རེས་ཨ་མདོའི་ཟ་ཁང་སྦྱིན་བདག་མ་བསོད་ནམས་ལྷ་སྐྱིད་ལགས་ཀྱིས། དབྱངས་སྒྲོན་ཆང་ཁང་གི་ལས་ཀ་བ་ཡར་བྷོ་ལགས་སུ་ཧིན་སྒོར་ ༡༥༠༠ སྤྲད་ན་ཅུང་ཉུང་དྲག་འདུག སྤྱིར་བཏང་རིན་ཐང་ཆེ་ཤོས་སྒོར་མོ་ལས་གཞོན་སྐྱེས་དེས་དངུལ་ཕྱིར་སྤྲད་པའི་དྲང་བདེན་གྱི་གཤིས་ཀ་དེ་ཡིན་ན་ཡང་། “བཟང་པོར་གཟེངས་རྟགས་དང་ངན་པར་ཉེས་ཆད” ཞེས་པའི་དཔེ་ལྟར། རྒྱུ་མཚན་གསུམ་གྱི་ཐད་ནས་ཕོ་གསར་དེ་ལ་ངས་ཧ་ཅང་གདེང་འཇོག་བྱེད་ཀྱིན་ཡོད། བསོད་ནམས་ལྷ་སྐྱིད་ཀྱི་དངུལ་དངོས་ཧིན་སྒོར་ཁྲི་ ༧ ལྷག་བོར་བརླག་ཕྱིན་པ་སླར་རྙེད་པ་དང་གཅིག བོད་རིགས་ན་གཞོན་གཞུང་རྒྱུད་དྲང་མོ་དང་ཁོའི་ཡ་རབས་སྤྱོད་བཟང་གཉིས། བསོད་ནམས་ལྷ་སྐྱིད་ཟ་ཁང་ཞིག་གི་བདག་མོ་ཡིན་པ་དང་ཡར་བྷོ་ཆང་ཁང་ཞིག་གི་ཉིན་གླ་བ་ཡིན་པ་དང་གསུམ། རྒྱུ་མཚན་འདི་གསུམ་གྱི་དབང་གིས་ཉུང་མཐར་ཧིན་སྒོར་ ༡༥༠༠༠ ཙམ་སྤྲོད་དགོས་ངེས་ཤིག་རེད་འདུག
ཤིན་ཏུ་ལེགས། ཕ་བཟང་བུ། ཁྱོད་ཁ་དྲོ་། ཚེ་རིང་། བཀྲ་ཤིས། མི་ཁྱོད་འདྲ་བརྒྱ་ཡོད་ན་ཡང་ཉུང་སྐྱོན་ལས་མེད།
བོད་པའི་མར་དྲི་དང་རྩམ་དྲི་བྲོ་ཟེར་ན་འདི་འདྲ་ལ་ཟེར་བ་རེད། མྱི་ཁྱོད་ལ་བྱ་བ་ལམ་ལྷོངས་ཡོང་བར་ཤོག
བོད་མིའི་ནང་དུའང་མི་བཟང་འདི་འདྲ་ཡོད་པ་ཡ་མཚན་ཆེ། མི་འདི་ལ་ཁ་བྲོ་བཀྲ་ཤིས་ཤོག
ད་ད་ཐེངས་ཡིན་ན་སྐད་གྲགས་བཞག་ཚར་འདུག
་་་་་་ རང་གཞན་སུ་ཡིན་ནའང་ཅ་དངོས་བོར་བརླག་ཕྱིན་ཚེ་སེམས་ཁྲལ་ཡོད་སྟབས། ཅ་དངོས་ག་རེ་རྙེད་ཀྱང་ཕྱིར་བདག་པོར་སྤྲོད་རྒྱུ་ཧ་ཅང་གལ་ཆེན་པོ་རེད། ང་ཚོས་རྒྱུན་དུ་༸ གོང་ས་མཆོག་གི་བཀའ་སློབ་ལ་ཉན་པ་དང་།
ང་ཚོ་ནང་པ་ཡིན། བྱམས་སྙིང་རྗེ་སྒོམ་དགོས་ཟེར་གྱི་ཡོད་སྟབས། ང་རང་གི་ངོས་ནས་སོ་སོའི་འཚོ་བའི་གནས་སྟངས་ལ་མ་བལྟས་པར་དངུལ་དངོས་འདི་ཕྱིར་བདག་པོར་སྤྲོད་རྒྱུའི་སེམས་ཐག་བཅད་པ་ཡིན ” ཞེས་བརྗོད་སོང་། ་་་་་ཟེར།
འདི་རྩ་ཆེན་རེད། བོད་པའི་དྲི་མ་དང་མ་བྲལ་བས་ཤིན་ཏུ་ལེགས་ཟེར་འདོད་དོ།།