ཉེ་ཆར་གྷོ་པལ་པུར་བོད་ཁྱིམ་དུ་གྲོད་ཁོག་བཤལ་བ་དང་ཚ་བ་འཕར་བའི་ན་ཚ་ཞིག་བསླེབས་ཏེ། ཁྱོན་དགེ་སློབ་ ༡༩༢ ཙམ་སྨན་པར་བསྟེན་གཏུག་དང་སྨན་ཁང་དུ་ཉལ་དགོས་བྱུང་འདུག
ཟླ་སྔོན་མའི་ཕྱི་ཚེས་ ༡༤ ཙམ་ནས་བཟུང་གྷོ་པལ་པུར་བོད་ཁྱིམ་དུ་གྲོད་ཁོག་བཤལ་བ་དང་ཚ་བ་འཕར་བ་སོགས་ཀྱི་ན་ཚ་ཞིག་བསླེབས་ཏེ། ད་ལྟའི་བར་ཁྱོན་སློབ་མ་ ༡༩༠ དང་དགེ་རྒན་ ༢ ཙམ་གྱིས་སློབ་གྲྭའི་སྨན་ཁང་དང་། ཉེ་འགྲམ་གྱི་རྒྱ་གར་སྨན་ཁང་དུ་བསྟེན་གཏུག་བྱེད་དགོས་བྱུང་ཡོད་པ་དང་། ཡང་སློབ་མ་ཁ་ཤས་ཁྱིམ་བདག་གིས་དགོངས་པ་ཞུས་ཏེ་ཁྱིམ་དུ་ཁྲིད་ཡོད་འདུག སློབ་གྲྭའི་སྨན་ཁང་དུ་གཏན་འཇགས་སྨན་པ་མེད་སྟབས། སློབ་མ་ ༦ ཙམ་རྒྱ་གར་སྨན་ཁང་དུ་ཛ་དྲག་སྨན་བཅོས་བྱས་ཏེ་ད་ལྟ་དྲག་སྐྱེད་བྱུང་ཡོད་པ་དང་། ཟླ་སྔོན་མའི་ཕྱི་ཚེས་ ༢༢ ཙམ་ནས་བཟུང་ནད་པ་ཉུང་དུ་ཕྱིན་ཡོད་འདུག
དེ་རིང་སྔ་དྲོར་གསར་འགོད་པས་ཁ་པར་བརྒྱུད་གྷོ་པལ་པུར་བོད་ཁྱིམ་གྱི་འགན་འཛིན་ཚུལ་ཁྲིམས་རྡོ་རྗེ་ལགས་སུ་ན་ཚའི་འབྱུང་རྐྱེན་སྐོར་དྲིས་པར་ཁོང་གིས། “ ང་ཚོས་ཆུ་དང་ཟས་རིགས་ཀྱིས་ཡིན་པར་དོགས་ཏེ་རྒྱ་གར་མངའ་སྡེ་གཞུང་གི་ཆུ་བརྟག་དཔྱད་པར་བརྟག་དཔྱད་བྱེད་དུ་བཅུག་ཀྱང་། ཆུ་གཙང་མ་རེད་གསུངས་སོང་། དེ་ནས་ཁ་ལག་གིས་ཡིན་སྲིད་པ་རེད། ཁ་ལག་དེ་ཁྱིམ་ཚང་ནས་གཏོང་གི་ཡོད་པ་རེད། ཡིན་ནའང་། སློབ་མ་གྲོད་ཁོག་ན་མཁན་ཚོ་ཁྱིམ་ཚང་གཅིག་པ་དང་སྡོད་ཁང་གཅིག་པ་ཁོ་ན་མ་རེད། ང་ཚོར་ཁྱིམ་ཚང་དང་སྡོད་ཁང་ཁྱོན་ ༣༥ ཙམ་ཡོད་ཅིང་། སློབ་མ་ཁྱོན་ ༡༢༠༠ ལྷག་དང་ལས་བྱེད་ ༡༥༠ ཡས་མས་ཡོད་སྟབས། སྤྱིའི་གྲངས་འབོར་དང་བསྡུར་ན་ནད་པ་དེ་འདྲའི་མང་པོ་མ་རེད། ཁ་ཤས་ཀྱིས་ཤིང་ཏོག་སྨིན་ལ་མ་སྨིན་པ་ཟོས་ན་གྲོད་ཁོག་བཤལ་གྱི་འདུག་ཟེར་བས་སློབ་གྲྭའི་ཤིང་ཏོག་བཙོང་ས་དེ་ཡང་གནས་སྐབས་སུ་སྒོ་རྒྱག་ཏུ་བཅུག་ཡོད། ” ཅེས་སོགས་གསུངས་སོང་།
ཡང་ཁོང་གིས། འདས་པའི་ལོ་ ༥ ཡི་ནང་དུ་ལོ་རེར་སློབ་མ་ ༢༠༠ ཡས་མས་ལ་ན་ཚ་དེ་ཕོག་ཡོད་པ་དང་། ད་ལོར་ཟླ་སྔོན་མའི་ཕྱི་ཚེས་ ༡༤ ནས་ ༢༡ བར་དུ་ཉིན་རེར་སློབ་མ་ ༢༠ མ་ཟིན་ཙམ་ན་ཡོད་པ་དང་། ཕྱི་ཚེས་ ༢༢ ནས་བཟུང་ནད་པ་ཉུང་དུ་ཕྱིན་ཏེ་ཉིན་རེར་སློབ་མ་ལྔ་དྲུག་ཙམ་ལས་མེད་སྟབས། ལོ་སྔོན་མ་དག་དང་བསྡུར་ན་ད་ལོའི་ནད་པའི་གྲངས་འབོར་ཅུང་ཙམ་ཉུང་བ་ཡོད་ཀྱང་། ད་དུང་མུ་མཐུད་འཕར་སྲིད་སྐོར་གསུངས་སོང་།
ནད་འདི་བྱུང་བའི་རྒྱུ་རྐྱེན་གསལ་བོ་ད་དུང་ཡང་ཤེས་མེད་པ་རེད་དམ།