རིན་པོ་ཆེ་མཆོག་གི་ཁྲིམས་ཆད་ལ་བསྐྱར་ཞིབ་བྱོས།

སྤྲུལ་སྐུ་བསྟན་འཛིན་བདེ་ལེགས་མཆོག་གི་སློབ་འབངས་ཚོས་རྒྱ་གཞུང་ལ་སྙན་ཞུ་ཕུལ་ཏེ་རིན་པོ་ཆེ་མཆོག་གི་ཁྲིམས་ཆད་ལ་བསྐྱར་ཞིབ་དང་ཁོང་ཕྱི་ལོཊ་སུ་སྨན་བཅོས་ཆེད་གཏོང་དགོས་པའི་རེ་འདུན་བཏོན་འདུག

ཕྱི་ལོ་ ༢༠༠༢ ཟླ་ ༤ ཚེས་ ༧ ཉིན་གྱི་མཚན་མོར་རྒྱ་གཞུང་གིས་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གཟིམ་ཤག་ནས་འཛིན་བཟུང་བྱས་ཏེ། ཉེས་མེད་བསྙོན་འཛུགས་ཀྱིས་ཁོང་བཙོན་དུ་བཅུག་སྟེ་ལོ་ངོ་ ༡༡ ལྷག་ཕྱིན་ཡོད་པ་དང་། ཉེ་ལམ་རིན་པོ་ཆེ་མཆོག་གི་ཉེ་འབྲེལ་དང་སློབ་འབངས་ཚོ་རྒྱའི་བཙོན་ཁང་དུ་ཁོང་ལ་ཐུག་འཕྲད་དུ་སྐྱོད་སྐབས། ཁོང་གི་སྐུ་གཟུགས་གནས་སྟངས་ཧ་ཅང་སྐྱོ་བོ་ཆགས་ཡོད་སྟབས། རྒྱ་གར་གཙོས་རང་དབང་ལུང་པ་ཁག་ནང་ཡོད་པའི་རིན་པོ་ཆེ་མཆོག་གི་སློབ་འབངས་མཐུན་ཚོགས་ནས་རྒྱ་ནག་གི་ཆེས་མཐོའི་ཁྲིམས་ཁང་ཡོངས་རྫོགས་དང་། སི་ཁྲོན་ཞིང་ཆེན་གྱི་དབུས་ལས་ཁུངས་ཁག་ཅིག དཀར་མཛེས་བོད་རིགས་རང་ལྗོངས་ཁུལ་གྱི་ལས་ཁུངས་གཙོ་བོ་དག་དང་ཉག་ཆུ་རྫོང་གི་ལས་ཁུངས་གཙོ་བོ་ཁག་ཅིག ཉག་ཆུ་རྫོང་འོག་གི་ཞཱང་གཉིས་བཅས་ཀྱི་མགོ་ཁྲིད་ཚོར། རིན་པོ་ཆེ་མཆོག་གིས་རྒྱ་གཞུང་གི་ཁྲིམས་དང་མཐུན་པའི་ཐོག་ནས་ཤེས་ཡོན་སློབ་གསོ་དང་སྤྱི་དམངས་འཕྲོད་བསྟེན། ཁོར་ཡུག་སྲུང་སྐྱོབ་སོགས་གོང་འཕེལ་དུ་གཏོང་བར་མཛད་རྗེས་བླ་མེད་བཞག་ཡོད་པ་ལས།  ཁྲིམས་འགལ་གྱི་བྱ་སྤྱོད་གང་ཡང་གནང་མེད་ཀྱང་རྒྱ་གཞུང་གིས་ཁོང་ལ་མ་ཉེས་ཁག་གཡོགས་ཀྱིས་ཁྲིམས་ཆད་ལྕི་མོ་བཅད་ཡོད་པ་དེར་ངེས་པར་དུ་བསྐྱར་ཞིབ་བྱེད་དགོས་པ་དང་། ཁོང་ད་ལྟ་དགུང་ལོ་ཆེན་པོར་ཕེབས་ཡོད་པ་མ་ཟད། སྙིང་གི་ནད་ཚ་དང་ཞབས་གཉིས་ཐང་པོ་མེད་པ་ཆགས་ཡོད་པས་འཕྲལ་དུ་ཀློད་གྲོལ་གཏོང་དགོས་པ་དང་།  མ་མཐའ་ཡང་ཁོང་ལ་སྨན་བཅོས་བྱེད་པའི་གོ་སྐབས་སྤྲད་དགོས་པའི་སྐོར་གྱི་སྙན་ཞུ་ཞིག་ཕུལ་ཡོད་འདུག

དེ་རིང་ཁ་པར་བརྒྱུད་རིན་པོ་ཆེ་མཆོག་གི་སློབ་འབངས་མཐུན་ཚོགས་ཀྱི་ཚོགས་གཙོ་བློ་བཟང་ཡོན་ཏན་ལགས་སུ་གོང་གསལ་གནས་ཚུལ་སྐོར་ལ་བཅར་འདྲི་ཞུས་པར། ཁོང་གིས། “ འདས་པའི་ལོ་ངོ་ ༡༡ རིང་རིན་པོ་ཆེ་མཆོག་ལ་བཙོན་ཁང་དུ་སྡུག་སྦྱོང་མནར་གཅོད་ཚད་མེད་བཏང་རྐྱེན། ད་ལྟ་ཁོང་གི་སྐུ་གཟུགས་གནས་སྟངས་ཧ་ཅང་སྐྱོ་བོ་ཡིན་པ་མ་ཟད། སྙིང་གི་སྙུང་གཞི་ཞིག་བཞེས་ཡོད་པ་དང་། ཞབས་གཉིས་ཀྱང་ཐང་པོ་མེད་པ། དགུང་ལོ་ ༦༣ ལ་ཕེབས་ཡོད་པ་སོགས་གནས་སྟངས་མང་པོ་ཞིག་གི་སྒང་ནས་འཕྲལ་དུ་ཀློད་གྲོལ་གཏོང་དགོས་པ་དང་། དེ་མ་བྱུང་ཡང་སྨན་བཅོས་ཀྱི་ཆེད་དུ་ཕྱི་ལོགས་སུ་གཏོང་རྒྱུར་ང་ཚོས་རྒྱ་ནག་གི་རྩ་ཁྲིམས་གཞིར་བཟུང་རེ་སྐུལ་བྱེད་ཀྱི་ཡོད། ” ཅེས་བརྗོད་སོང་།

ཡང་ཁོང་གིས་རྒྱ་གཞུང་གིས་རིན་པོ་ཆེ་མཆོག་གི་སློབ་འབངས་ཚོའི་མངོན་འདོད་ལ་བསམ་ཤེས་མ་བྱས་ཚེ་གནས་ཚུལ་ཅི་ཆགས་ཚོད་དཔག་བྱེད་དཀའ་བའི་སྐོར་བརྗོད་དོན། “ རིན་པོ་ཆེ་མཆོག་ལ་སློབ་འབངས་ཧ་ཅང་མང་པོ་ཡོད་པ་རེད། ད་ལྟའི་ཆར་བླ་མ་དགེ་བཤེས་མང་པོའི་ལམ་སྟོན་འོག་ཞི་བའི་ཐོག་ནས་རྒྱ་ནག་གཞུང་ལ་སྐད་ཆ་བཤད་ཀྱི་ཡོད་ཀྱང་། གལ་སྲིད་རྒྱ་གཞུང་གིས་བསམ་ཤེས་མ་བྱས་ཚེ། ཉིན་ཞིག་མཇུག་འབྲས་ཅི་བྱུང་བཤད་ཤེས་ཀྱི་མ་རེད། གང་ཡིན་ཟེར་ན། རིན་པོ་ཆེ་མཆོག་ལ་མ་ཉེས་ཁག་གཡོགས་བྱས་པའི་གནད་དོན་དེ་མི་སུ་གང་གིས་ཀྱང་དྲང་བདེན་ཞིག་ལ་མཐོང་གི་མེད་པ་མ་ཟད། ཁྲིམས་ཆད་དེར་བདེན་པ་ཏིལ་འབྲུ་ཙམ་ཡང་མེད་པ་ཉིན་ཞིག་ར་འཕྲོད་ཡོང་གི་རེད། དེ་དུས་མི་མང་གིས་ག་རེ་བྱེད་དང་ཁ་ཕྱོགས་ག་འདྲ་ཞིག་ཏུ་འགྱུར་མིན་བཤད་ཚོད་ཐུག་གི་མ་རེད། ” ཅེས་སོགས་བརྗོད་སོང་།