རྡོ་རྗེ་གདན་གྱི་འགད་རྫས་གཏོར་རྒོལ་ཁྲོད་གཏེར་སྒར་དགོན་གྱི་འཛིན་ཁང་ལ་འགད་རྫས་གཏོར་འདུག་ལ། གསར་འགོད་པས་དགོན་པའི་འགན་འཛིན་ལགས་སུ་ཁ་ཕར་བརྒྱུད་གནས་ཚུལ་རྒྱུས་ལོན་བྱས་ཡོད།
དེ་རིང་གསར་འགོད་པས་ཁ་པར་བརྒྱུད་གཏེར་སྒར་དགོན་པའི་འགན་འཁུར་བ་བསོད་སྟོབས་ལགས་སུ་ཁ་སང་གི་འགད་རྫས་དེས། དགོན་པར་གནོད་སྐྱོན་གང་འདྲ་བྱུང་ཡོད་མེད་དྲིས་པར་ཁོང་གིས། “དགོན་པ་འདི་ནི་མི་འགྱུར་རིན་པོ་ཆེས་ཕྱག་བཏབས་པ་ཞིག་དང་། ད་ཆར་གྲྭ་མང་ལས་སྣེ་བ་བཅས་ཁྱོན་ ༢༢༠ ལྷག་ཙམ་ཡོད་པ་དང་། ཁ་སང་འགད་རྫས་གསུམ་དགོན་པའི་རྒྱབ་ལོགས་སུ་ཡོད་པའི་འཛིན་གྲྭ་ཡོད་སར་ཞོགས་པའི་ཆུ་ཚོད་ ༥།༤༠ ཡས་མས་སུ་འཐོར་ཡོད་པ་དེས། འཛིན་ཁང་གི་སྒོ་དང་སྒེའུ་ཁུང་ལ་གཏོར་སྐྱོན་བཟོས་ཡོད་པ་ལས་མི་ལ་གནོད་འཚེ་གང་ཡང་ཕོག་མེད། གཞན་ཉེན་རྟོག་པས་འགད་རྫས་གཅིག་རྙེད་སོན་བྱུང་ཡོད་པ་ནི་དགོང་མོའི་ཆུ་ཚོད་ ༦ ཙམ་འགད་རྒྱུའི་ཆུ་ཚོད་བསྒྲིགས་འདུག་ཟེར་” ཞེས་བརྗོད་བྱུང་།
ཡང་ཁོང་ལ་རྒྱ་གར་གྱི་གསར་ལམ་ཁག་ཏུ་ཀརྨ་པའི་དགོན་པ་ཟེར་གྱི་ཡོད་པའི་རྒྱུ་མཚན་དྲིས་པར་ཁོང་གིས། “དུས་རྒྱུན་ཀརྨ་པ་མཆོག་རྡོ་རྗེ་གདན་དུ་ཕེབས་སྐབས་དགོན་པ་འདིར་བཞུགས་ཀྱི་ཡོད་སྟབས། ཉེ་འཁོར་གྱི་རྒྱ་གར་བ་དང་རླངས་འཁོར་ཁ་ལོ་བ་ཚོས་ཀརྨ་པའི་དགོན་པ་ཟེར་གྱི་ཡོད་པ་རེད། དེ་ཀརྨ་པའི་མཚན་སྙན་ལ་བརྟེན་ནས་ཐོགས་པ་ཞིག་ལས་དགོན་པ་གཏེར་སྒར་དགོན་རེད།”ཅེས་བརྗོད་བྱུང་ལ། ཉིན་དེའི་འགད་གཏོར་དོན་རྐྱེན་ཁྲོད་མི་གཉིས་ལ་རྨས་སྐྱོན་ཕོག་པའི་གཅིག་བོད་པ་ཞིག་ཡིན་འདུག་པའི་སྐོར་དྲིས་པར་ཁོང་གིས། དེ་རྙིང་མའི་དགོན་གྱི་ལས་ཀར་ལྟ་རྟོག་བྱེད་མཁན་སྤོ་བོ་ཞིག་ཡིན་པར་བརྗོད་བྱུང་།
ཡང་ཁོང་གིས་ “སྤྱིར་རྡོ་རྗེ་གདན་དུ་ནང་པའི་དགོན་པ་ ༥༥ ཙམ་ཡོད་པ་ལས། ཐེངས་འདིར་རྩ་ཆེ་ཤོས་མཆོད་རྟེན་ཆེན་མོ་དང་ཉི་ཧོང་སྟོན་པའི་སྐུ་བརྙན་ཆེ་མོ། གཏེར་སྒར་དགོན་གསུམ་ལ་གཏོར་རྒོལ་བཏང་པ་ཞིག་ཆགས་ཡོད་རེད། ཡིན་ནའང་གཏོར་རྒོལ་དོན་རྐྱེན་འདིའི་ཐད་ཚང་མས་ཞེ་སྡང་ཁོང་ཁྲོ་མི་གནང་པར་ཐུགས་སྣང་དང་བྱང་ཆུབ་ཀྱི་སེམས་སྒོམ་གནང་རྒྱུའི་འབོད་སྐུལ་ཞུ་ཡི་ཡོད་”ཅེས་འབོད་སྐུལ་གནང་སོང་།
གཞན་ཐེངས་འདིར་ནང་པའི་གནས་མཆོག་རྡོ་རྗེ་གདན་དུ་དྲག་སྤྱོད་པས་འགད་རྫས་གཏོར་པའི་དོན་རྐྱེན་ཐད། ༧གོང་ས་མཆོག་གིས་གཏོར་རྒོལ་དེར་བློ་ཕམ་ཆེན་པོ་ཡོད་ཚུལ་དང་། དེ་ནི་གང་ཟག་རེ་འགའི་བྱ་སྤྱོད་ཅིག་ཡིན་པས་གནས་ཚུལ་ཚབས་ཆེན་ཞིག་ཏུ་གཙི་དགོས་དོན་མེད་སྐོར་དང་། དེ་བཞིན་རྒྱལ་བ་ཀརྨ་པ་མཆོག་གིས་དྲག་གཏོར་གྱི་གནས་ཚུལ་དེ་ཐོས་བར་བློ་ཕམ་ཆེན་པོ་བྱུང་ཡང་། བྱ་སྤྱོད་དེའི་ལན་དུ་སྟོན་པའི་བསླབ་བྱ་བརྩེ་བ་དང་ཞི་བ་ལག་ལེན་བྱ་དགོས་སྐོར་གསུངས་འདུག་ལ། སྲིད་སྐྱོང་མཆོག་གིས་ཀྱང་སེམས་འཚབ་དང་རྨས་སྐྱོན་ཕོག་མཁན་དང་ཁོང་ཚོའི་ནང་མིར་གདུང་སེམས་མཉམ་སྐྱེད་ཡོད་པའི་གསལ་བསྒྲགས་སྤེལ་འདུག
གསར་འགོད་པ། བནྡེ་སྐྱབས།
༄༅། །རྩ་བའི་གནས་ཚུའ་འདི་འབྱུང་རྐྱེན་འབའ་མའི་ནང་གི་རྩོད་རྙོག་དེར་དོགས་གཞི་བྱེད་ཀྱི་ཡོད། འབའ་མའི་ནང་གི་གནད་དོན་དེ་ནི་ཆོས་ལུགས་ཤོག་ཁའི་དབར་འཐབ་རྩོད་ཞིག་ཡིན་པར་སྣང་ཀྱང་། ཞིབ་ཏུ་དཔྱད་ན་མི་རིགས་གཉིས་ཀྱི་གནད་དོན་ཞིག་ཡིན་པ་མ་ཟད། རྡོ་རྗེ་གདན་དོན་རྐྱེན་དེས་འཛམ་གླིང་ནང་པའི་ཆོས་ལུགས་ལ་དགའ་དད་ཡོད་པའི་ནང་པ་ཚང་མ་ལན་བརྡ་ཞིག་སྤྲོད་ཀྱི་ཡོད་པ་ལས་རང་རིགས་བོད་པ་གཅིག་པུར་བྱེད་ཀྱི་མེད་པས། དེར་བརྟེན་རང་རེའི་གཞུང་འཛིན་དང་ཚོགས་སྒེར་ཅི་རིགས་ནས་འདིའི་ཐོག་ལྷོད་པོར་བཞག་ནས་ཡག་ཤོས་རེད། ཡར་མར་འགྲེལ་བཅོས་མང་ན་འཁྲུག་སྐྱོན་ལས་མེད་སྙམ།།
ཁ་སང་ནས་གནས་ཚུལ་འདི་སྐོར་ཚང་མས་དོ་སྣང་དང་གླེང་སློང་སྣ་ཚོགས་ཤིག་བྱེད་ཀྱིན་འདུག
ལ་དྭགས་ནི་༧གོང་ས་མཆོག་གི་འཁྲུངས་སྐར་ཞུ་ཡུལ་འདུ་འཛོམས་མང་ཤོས་ཞིག་ཡིན་ཞིང་། ཉིན་གྲངས་མང་པོར་སྤྲོ་སྐྱིད་གཏོང་སྲོལ་ཡོད་ཀྱང་། དོན་རྐྱེན་དེ་བྱུང་བའི་ཉིན་གཉིས་པའི་སྔ་དྲོ་ནས་བསྡུ་གསོག་བྱ་དགོས་པའི་བཀོད་ཁྱབ་བཏང་འདུག
དེ་ནི་ལ་དྭགས་ནང་པའི་ཚོགས་འདུ་ནས་ནང་པའི་གནས་ཆེན་འདི་འདྲར་གཏོར་རྒོལ་བྱས་པར་ངོ་རྒོལ་གྱི་རྣམ་འགྱུར་ཤུགས་ཆེར་བསྟན་པ་ཞིག་རེད།
མི་མང་དཀྱུས་མའི་ནང་གནས་ཚུལ་འདི་ནི་ཧ་ཅང་གི་མ་རབས་ཐ་ཤལ་གྱི་བྱ་སྤྱོད་དང་། དེར་ནང་ཆོས་ཀྱི་བསླབ་བྱ་ལས་ལྡོག་ཏེ་ཡ་ལེན་སློག་དགོས་སྐོར་ཡང་གླེང་གིན་འདུག
དགེ་བཤེས་བླ་མ་ཚོའི་ཁྲོད་དུའང་སྣ་ཚོགས་ཀྱི་དགོངས་འཆར་གླེང་གིན་འདུག