ཁ་སང་རྒྱ་ནག་ལྕགས་ལམ་ལས་ཁུངས་ཀྱི་འགན་འཛིན་ལུའུ་ཡིས་འདས་པའི་ལོ་མང་རིང་དབང་ཆ་སྒེར་སྡོམ་དང་ལྐོག་ཟ་རུལ་སུངས་བྱས་པའི་ནག་ཉེས་འོག་སྲོག་ཁྲིམས་བཅད་ཡོད་ཀྱང་། ཁོ་བོ་རྒྱ་ནག་དབུས་གཞུང་གི་མགོ་ཁྲིད་ཚོར་བརྒྱུད་ལག་དམ་པོ་ཡོད་སྟབས་མ་འོངས་པར་ཁྲིམས་ཆད་ལག་བསྟར་ཐུབ་མིན་བཤད་ཁག་པོ་ཆགས་ཡོད་འདུག
རྒྱ་ནག་དབུས་མེ་འཁོར་ལྕགས་ལམ་ལས་ཁུངས་ཀྱི་མགོ་ཁྲིད་ཟུར་པ་ལུའུ་ཀྲི་ཅིན་ཀྱིས་ཕྱི་ལོ་ ༡༩༨༦ ནས་ ༢༠༡༡ བར་གཞུང་གི་དབང་ཆ་སྒེར་སྤྱོད་ཀྱིས་རྒྱ་སྒོར་ས་ཡ་ ༦༤ ལྷག་ལྐོག་ཟ་བྱས་པ་དང་། བུད་མེད་མང་པོར་ལྐོག་འབྲེལ་གྱིས་སྤྱི་དངུལ་དུང་ཕྱུར་ ༣ ལྷག་བཏང་བ་སོགས་ཀྱི་ནག་ཉེས་འོག ཟླ་འདིའི་ཚེས་ ༨ ཉིན། རྒྱ་ནག་པེ་ཅིན་འབྲིང་རིམ་མི་དམངས་ཁྲིམས་ཁང་གིས་ལུའུ་ལ་ལོ་ ༢ ཕྱིར་འགྱངས་ཀྱིས་སྲོག་ཁྲིམས་བཅད་ཡོད་པ་དང་། ཚེ་གང་བོར་ཆབ་སྲིད་ཀྱི་དབང་ཆ་ཕྱིར་བསྡུ་བྱས་ཡོད་པ་ལས། ལུའུ་ཡི་ཁྱིམ་ཚང་གི་རྒྱུ་ནོར་ཡོངས་རྫོགས་གཞུང་བཞེས་བྱས་མེད་ལུགས་ཁྱབ་བསྒྲགས་བྱས་འདུག
ལུའུ་ཀྲི་ཅིན་ཕྱི་ལོ་ ༢༠༡༡ ཟླ་ ༢ ནང་ཅང་སུའུ་ཞིང་ཆེན་ནན་ཅིན་གྲོང་ཁྱེར་གྱི་སྐར་མ་ལྔ་ཅན་གྱི་མགྲོན་ཁང་ཞིག་ཏུ་བུད་མེད་གཞོན་ནུ་མ་གཉིས་དང་མཉམ་དུ་བསྡད་ཡོད་སྐབས་གློ་བུར་དུ་ཉེན་རྟོག་པས་འཛིན་བཟུང་བྱས་ཡོད་པ་དང་། འདི་ལོའི་ཕྱི་ཟླ་ ༤ ཚེས་ ༡༠ ཉིན། པེ་ཅིན་གྲོང་ཁྱེར་མི་དམངས་ཞིབ་བཤེར་ཁང་གཉིས་པས་ལུའུ་ཡི་ནག་ཉེས་པེ་ཅིན་འབྲིང་རིམ་མི་དམངས་ཁྲིམས་ཁང་ལ་ཞུ་གཏུག་བྱས་ཏེ། ཟླ་ ༦ ཚེས་ ༩ ཉིན་ཁྲིམས་བཤེར་བྱས་པ་བརྒྱུད་ལོ་ ༢ ཕྱིར་འགྱངས་ཀྱིས་སྲོག་ཁྲིམས་གཅོད་རྒྱུ་ཐག་བཅད་ཡོད་པ་དང་། ཁྲིམས་ཞིབ་པས་ཝེ་བྷོ་དྲ་བའི་ནང་ལུའུ་ལ་རྒྱ་སྒོར་དུང་ཕྱུར་ ༨ ལྷག་གི་ཁང་པ་ཡོད་སྐོར་སོགས་བརྗོད་ཡོད་ཀྱང་། དེ་ཁོ་དང་འབྲེལ་བ་མེད་སྐོར་བརྗོད་འདུག
ཆབ་སྲིད་དབྱེ་ཞིབ་པ་ཚོས་བརྗོད་ན། ལུའུ་ལ་ཁྲིམས་བཤེར་བྱེད་པའི་བརྒྱུད་རིམ་ཁྲོད་དུ་གཞུང་གི་དཔོན་རིགས་ཚོ་དང་མཉམ་འབྲེལ་རྒྱུན་སྲིང་ཡོད་སྟབས། ལོ་ ༢ ཕྱིར་འགྱངས་ཀྱི་སྲོག་ཁྲིམས་དེ་ཚེ་བཙོན་གྱི་ངོ་བོར་འགྱུར་རྒྱུ་ཡིན་པ་མ་ཟད། ཁོའི་བཙོན་ཁང་གི་འཚོ་བ་ཡང་སྔར་བཞིན་རྒྱས་སྤྲོས་ཡོད་པ་ཚོད་དཔག་བྱེད་ཐུབ་པ་ཞིག་ཡིན་སྐོར་དང་། ད་དུང་ལུའུ་ལ་རྒྱུས་མངའ་ཡོད་པའི་མི་ཞིག་གིས་མཐའ་མའི་ཁྲིམས་བཤེར་སྐབས། ལུའུ་ལ་ནག་ཉེས་ཀྱི་དཔང་རྟགས་ཆུང་ཆུང་འགའ་ཁྱེར་ཡོང་བར་གཞིགས་ན་རྒྱ་གཞུང་གིས་ཁོ་ལ་དངོས་སུ་སྲོག་ཁྲིམས་གཅོད་འདོད་མེད་པ་གསལ་བོ་ཡིན་པ་དང་། ཁོ་ལ་སྲོག་ཁྲིམས་མི་གཅོད་པའི་རྒྱུ་མཚན་ནི། ཧུའུ་ཅིན་ཐའོ་ཡི་བུ་ཧུའུ་ཧེ་ཧྥོང་དང་རྒྱ་ནག་ཆབ་སྲིད་ཅུའུ་ཡི་རྒྱུན་ལས་ཝང་ཐའོ་གོ་ཡི་བུ་ཝང་ཆིན་ཉང་དང་འབྲེལ་བ་ཡོད་པ་དང་། ད་དུང་ལུའུ་ལ་རྒྱབ་ལོགས་ནས་སྲུང་སྐྱོབ་བྱེད་པར་རྒྱ་ནག་གི་སྲིད་འཛིན་ཟུར་པ་ཅང་ཙེ་མིན་ཡོད་སྐོར་སོགས་རྗོད་ཀྱི་འདུག
ལུའུ་ཀྲི་ཅིན་ཕྱི་ལོ་ ༡༩༥༣ ཟླ་ ༡ ནང་རྒྱ་ནག་ཧོའུ་པའི་ཞིང་ཆེན་ཨི་ཀྲུའུ་ཡི་ཞིང་བའི་ཁྱིམ་ཚང་ཞིག་ཏུ་སྐྱེས་ཤིང་། ༡༩༧༢ ལོའི་ཟླ་ ༢ པའི་ནང་རྒྱ་ནག་དབུས་ཏང་གི་སློབ་ཆེན་ནས་རབ་འབྱམས་པ་ཐོན་ཏེ་འཛུགས་སྐྲུན་གྱི་སློབ་སྟོན་པ་བྱས། ཕྱི་ལོ་ ༡༩༧༣ ཟླ་ ༨ ནང་གུང་ཁྲན་ཏང་ནང་ཞུགས་པ་དང་། ༢༠༠༣ ནས་ ༢༠༡༡ བར་རྒྱ་ནག་དབུས་མེ་འཁོར་ལྕགས་ལམ་ལས་ཁུངས་ཀྱི་མགོ་ཁྲིད་དང་། རྒྱ་ནག་རྒྱལ་ཡོངས་འཐུས་མིའི་ཚོགས་ཆེན་སྐབས་ ༡༦ དང་ ༡༧ གྱི་རྒྱུན་ལས་བཅས་ཡིན་འདུག
་་་་ རྒྱ་ནག་པེ་ཅིན་འབྲིང་རིམ་མི་དམངས་ཁྲིམས་ཁང་གིས་ལུའུ་ལ་ལོ་ ༢ ཕྱིར་འགྱངས་ཀྱིས་སྲོག་ཁྲིམས་བཅད་ཡོད་པ་དང་། ཚེ་གང་བོར་ཆབ་སྲིད་ཀྱི་དབང་ཆ་ཕྱིར་བསྡུ་བྱས་ཡོད་པ་ལས། ལུའུ་ཡི་ཁྱིམ་ཚང་གི་རྒྱུ་ནོར་ཡོངས་རྫོགས་གཞུང་བཞེས་བྱས་མེད་ལུགས་ཁྱབ་བསྒྲགས་བྱས་འདུག ་་་་་ཟེར།