ཟླ་དྲུག་པ་ཧྲིལ་བོར་དབུས་སྣེ་ལེན་ཁང་སྟོང་པ་ཆཊ་འདུག

འདས་པའི་ལོ་འགའི་གོང་ནས་བོད་མི་སྐྱབས་བཅོལ་དུ་ཡོང་མཁན་ཇེ་ཉུང་དུ་ཕྱིན་ཏེ། འདི་ལོའི་ཕྱི་ཟླ་ ༦ པའི་ཚེས་མགོ་ནས་བཟུང་དབུས་སྣེ་ལེན་ཁང་སྟོང་པ་ཆགས་ཡོད་འདུག་ལ། བལ་ཡུལ་སྣེ་ལེན་ཁང་དུ་མི་ ༨ ཙམ་ལས་མེད་སྐོར་སྣེ་ལེན་འགན་འཛིན་ངག་དབང་ནོར་བུ་ལགས་ཀྱིས་བརྗོད་བྱུང་།

ཕྱི་ལོ་ ༢༠༠༨ ནས་བཟུང་རྒྱ་གཞུང་གིས་བོད་ནང་དུ་སྔར་ལས་དམ་དྲག་ཆེ་རུ་བཏང་པར་བརྟེན། བཙན་བྱོལ་ནང་གི་སློབ་གྲྭ་ཁག་དང་གདན་ས་ཁག་ཏུ་སློབ་ཞུགས་བྱེད་མཁན་ཇེ་ཉུང་དུ་འགྲོ་བཞིན་ཡོད་པ་མ་ཟད། ཉེ་སྔོན་ནས་དབུས་སྣེ་ལེན་ཁང་སྟོང་པ་ཡིན་སྐོར་གོ་ཐོས་བྱུང་སྟབས། འདི་གའི་གསར་འགོད་པས་དབུས་སྣེ་ལེན་ཁང་གི་དབུ་འཛིན་ངག་དབང་ནོར་བུ་ལགས་སུ་དེའི་སྐོར་ལ་བཀའ་འདྲི་ཞུས་པར། ཁོང་གིས་འདི་ལོའི་ལོ་མགོ་ནས་བཟུང་བོད་ནས་འབྱོར་མཁན་ཉུང་དུ་སོང་སྟེ་ད་ལྟའི་བར་མི་ ༣༥ ལྷག་ཙམ་ལས་འབྱོར་མེད་སྐོར་གསུངས་སོང་།

དབུ་འཛིན་ངག་དབང་ནོར་བུ་ལགས་ཀྱིས་གསུངས་བ་ལྟར་ན། སྣེ་ལེན་ཁང་གསར་པའི་ནང་དུ་བུ་མོ་ ༢༠༠ དང་བུ་ ༣༠༠ བཅས་ཁྱོན་མི་གྲངས་ ༥༠༠ ལ་འདུག་སའི་ཉལ་ཁང་དང་ཚོགས་ཁང་། ཟ་ཁང་བཅས་གྲ་སྒྲིག་ཆ་ཚང་ཡོད་ཀྱང་། ༢༠༠༨ ལོ་ནས་ད་ལྟའི་བར་ཁྱོན་མི་གྲངས་ ༣༢༠༠ ཙམ་འབྱོར་ཡོད་པ་དང་། ༢༠༠༨ ལོའི་ཡར་སྔོན་དུ་ལོ་རེར་མི་གྲངས་ ༣༥༠༠ ཡས་མས་འབྱོར་གྱི་ཡོད་སྟབས། འདས་པའི་ལོ་ ༥ ཡི་བསྡོམས་རྩིས་ཀྱི་གྲངས་འབོར་དེ་སྔོན་ཆད་ལོ་གཅིག་གི་གྲངས་འབོར་ལས་ཀྱང་ཉུང་བ་ཡིན་པ་དང་། ཉེ་བའི་ལོ་ཤས་ནས་བཟུང་བོད་ནས་གསར་དུ་འབྱོར་མཁན་མང་ཆེ་བ་གྲྭ་བ་ཡིན་པ་དང་། དེའི་འཕྲོས་ཀྱི་སློབ་གྲྭར་འགྲོ་མཁན་ཚོ་ཤེས་རབ་དགའ་ཚལ་སློབ་གླིང་དང་སུ་ཇ་བོད་ཁྱིམ་དུ་འགྲོ་མཁན་མ་གཏོགས།  རང་ལོ་ ༡༢ མན་ཆད་ཀྱི་བྱིས་པ་ཧ་ཅང་ཉུང་ཉུང་ཆགས་ཡོད་འདུག  

དབུས་སྣེ་ལེན་ཁང་ག་དུས་ནས་སྟོང་པ་ཆགས་པ་དང་། ད་ལྟ་བལ་ཡུལ་སྣེ་ལེན་ཁང་དང་ལྡི་ལི་སྣེ་ལེན་ཁང་དུ་གསར་འབྱོར་བ་ཡོད་མེད་དྲིས་པར་ཁོང་གིས། “ དབུས་སྣེ་ལེན་ཁང་སྟོང་པ་ཆགས་ཏེ་ཟླ་གཅིག་ཙམ་འགྲོ་བཞིན་ཡོད། གསར་འབྱོར་བ་མ་བསླེབ་ནས་ཟླ་བ་ ༡ ཙམ་འགྲོ་གྲབས་ཡོད་པ་རེད། དེའི་སྔོན་དུ་མི་ ༨ བསླེབས་ནས་སློབ་གྲྭ་དང་དགོན་སྡེ་ཁག་ཏུ་ཕྱིན་ཚར་བ་རེད། སྤྱིར་བཏང་ད་ལོའི་ལོ་མགོ་ནས་བཟུང་གསར་འབྱོར་བ་སྔར་ལས་ཀྱང་ཉུང་དུ་ཕྱིན་ཏེ། ད་བར་གྱི་ཟླ་དྲུག་ལྷག་རིང་མི་གྲངས་ ༣༥ ཙམ་ལས་འབྱོར་མ་སོང་།  ད་ལྟ་བལ་ཡུལ་སྣེ་ལེན་ཁང་དུ་མི་ ༨ བསླེབས་ཡོད་ཟེར་གྱི་འདུག ” ཅེས་བརྗོད་སོང་།

ངྷ་རམ་ས་ལའི་དབུས་སྣེ་ལེན་ཁང་དང་བལ་ཡུལ་དང་ལྡི་ལི་ཡན་ལག་སྣེ་ལེན་ཁང་བཅས་སུ་ཁྱོན་ལས་བྱེད་ག་ཚོད་ཡོད་མེད་དྲིས་པར། “ཚང་མ་བསྡོམས་ན་ལས་བྱེད་ ༤༥ ཡོད་པ་རེད། ད་ལྟ་གསར་འབྱོར་བ་ཡོང་གི་མེད་ཀྱང་། དབུས་བོད་མིའི་སྒྲིག་འཛུགས་ཀྱི་ངོས་ནས་སྣེ་ལེན་ཁང་སྒོ་མ་བརྒྱབ་པར་ཡག་པོ་གནས་བསྡད་ཡོད་པ་རེད། ལས་བྱེད་ཀྱང་ཚང་མ་རང་འཇགས་རེད། ཡིན་ནའང་། བཀའ་ཤག་གིས་གསར་འབྱོར་བ་ཉུང་དུ་སོང་ཡོད་སྟབས་ལས་བྱེད་ཀྱང་ཉུང་དུ་གཏོང་དགོས་པའི་སྐོར་རབ་རིབ་ཅིག་གསུང་གི་ཡོད་ཀྱང་། ད་ལྟའི་ཆར་ཡིག་ཐོག་ནས་བཀའ་གང་ཡང་འབྱོར་མ་སོང་” ཞེས་གསུངས་སོང་།

གལ་སྲིད་བོད་ནས་ཡོང་མཁན་རྦད་དེ་མཚམས་ཆད་པ་ཡིན་ན། མ་འོངས་པར་གྲ་སྒྲིག་དང་དགོངས་འཆར་ཅི་ཡོད་སྐོར་ལ་ཁོང་གིས། “སྣེ་ལེན་ཁང་དེ་བོད་མིའི་སྒྲིག་འཛུགས་ཀྱི་ངོས་ནས་སྒོ་རྒྱག་ཐུབ་ཀི་མ་རེད། ག་དུས་ཡིན་ཡང་མི་འབོར་ལ་དཔག་པའི་སྣེ་ལེན་ཁང་ཞིག་དགོས་པ་རེད། ཡིན་ནའང་། སྣེ་ལེན་ཁང་གི་བྱེད་སྒོ་ཚང་མ་ད་ལྟ་ནང་བཞིན་མེད་པར་ཉུང་དུ་སོང་བ་ཡིན་ན། མི་འབོར་ལ་དཔག་པའི་ལས་བྱེད་མི་གྲངས་དང་སྣེ་ལེན་ཁང་འདི་གནས་ཐུབ་དང་མི་ཐུབ་བཤད་ཐབས་མེད་པ་ཞིག་རེད། ལྡི་ལི་སྣེ་ལེན་ཁང་སྒོ་རྒྱག་དགོས་མིན་ཐད་ང་ཚོས་གོ་བསྡུར་བྱས་ན་འགྲིག་གི་རེད་བསམ་གྱི་འདུག ཡིན་ནའང་། བལ་ཡུལ་སྣེ་ལེན་ཁང་དེ་རྒྱལ་སྤྱིའི་ལྟ་རྟོག་འོག་ཡོད་སྟབས། མུ་མཐུད་གནས་དགོས་པ་དེ་གལ་ཆེན་པོ་རེད། ”ཅེས་བརྗོད་སོང་།

ལོ་རེ་བཞིན་གསར་འབྱོར་བ་ཉུང་དུ་འགྲོ་དགོས་པའི་རྒྱུ་རྐྱེན་གཙོ་བོ་གང་ལ་ངོས་འཛིན་གནང་གི་ཡོད་མེད་དྲིས་པར། “རྒྱ་གཞུང་གིས་བོད་ནང་དུ་དྲག་གནོན་དང་དམ་དྲག་ཞེ་དྲག་བྱེད་ཀྱིན་ཡོད་སྟབས། བོད་ནས་ཡོང་མཁན་ཚོ་ཡོང་ཐུབ་ཀྱི་མེད་པ་རེད། སྔོན་མ་ནང་བཞིན་རྐང་པ་བརྒྱབ་སྟེ་དཀའ་ངལ་ཆེན་པོ་བརྒྱུད་ནས་ཡོང་མཁན་མེད་པ་དང་། ཡང་སྔོན་ཆད་འགྲམ་བརྒྱུད་དེ་དངུལ་ཅུང་ཙམ་སྤྲད་ནས་ཡོང་ཐུབ་ཀྱི་ཡོད་ཀྱང་། དེང་སང་དངུལ་མང་པོ་སྤྲད་ཀྱང་ཡོང་ཐུབ་ཀྱི་མེད་སྟབས། འགག་ས་གཙོ་བོ་དེ་ཆགས་བསྡད་ཡོད་པ་རེད།” ཅེས་གསུངས་སོང་།

བོད་ནས་ཡོང་མཁན་འདི་ལྟར་ཇེ་ཉུང་དུ་ཕྱིན་པ་ཡིན་ན། སྣེ་ལེན་ཁང་གི་རོགས་ཚོགས་དང་དཔལ་འབྱོར་གྱི་ཡོང་ཁུངས་ལ་འགྱུར་བ་འགྲོ་སྲིད་མིན་ཐད་ཁོང་གིས། “སྣེ་ལེན་ཁང་གི་སྤྱིན་བདག་གཙོ་བོ་དེ་ཨ་རིའི་གཞུང་ཆགས་བསྡད་ཡོད་པ་རེད། ནམ་རྒྱུན་ང་ཚོས་གསར་འབྱོར་གྱི་མི་འབོར་ལ་དཔག་ནས་འཆར་གཞི་བཟོས་ཏེ་རོགས་རམ་གནང་གི་ཡོད་པ་རེད། མ་འོངས་པར་ད་ལྟའི་གནས་སྟངས་འདི་མུ་མཐུད་ལྷག་སྟེ་གསར་འབྱོར་བ་ཇེ་ཉུང་དུ་ཕྱིན་པ་ཡིན་ན། ཁོ་ཚོས་གསར་འབྱོར་བ་མེད་དུས་ང་ཚོས་རོགས་རམ་བྱེད་ཐུབ་ཀྱི་མི་འདུག་ལབ་སྲིད་པ་རེད། ཡིན་ནའང་། ད་ལྟའི་ཆར་གང་ཡང་ལབ་མ་སོང་།” ཞེས་བརྗོད་བྱུང་།

༼ བོད་ཀྱི་དུས་བབ་ཚགས་པར་ལས་འདིར་བཀོད། ༽