དྲག་ཆར་ཁྲོད་མི་ ༦༨ རྐྱེན་ལམ་དུ་ཤོར།

སི་ཁྲོན་ནུབ་རྒྱུད་དུ་དྲག་ཆར་ཤུགས་ཆེན་བབས་ཏེ་ཉུང་མཐར་མི་ ༦༨ རྐྱེན་འདས་དང་མི་ ༡༧༩  ཙམ་གར་སོང་ཆ་མེད་ཆགས་ཡོད་འདུག  

ཟླ་འདིའི་ཚེས་ ༧ ཉིན་ནས་སི་ཁྲོན་ནུབ་རྒྱུད་ཀྱི་རྫོང་ཁག་ ༡༩ ནང་དྲག་ཆར་ཤུགས་ཆེན་བབས་ཏེ། ཁང་པ་དང་གཞུང་ལམ་མང་པོར་བརྡིབ་སྐྱོན་བྱུང་ཡོད་པ་མ་ཟད། མི་ ༢༧ རྐྱེན་ལམ་དུ་ཤོར་ཡོད་པ་དང་། མི་ ༡༧༩ གར་སོང་ཆ་མེད་ཆགས་ཡོད་འདུག ཐེངས་འདིར་མི་ཡ་ས་ ༣ ལྷག་ལ་གནོད་འཚེ་ཐེབས་ཏེ་སྲིད་གཞུང་གིས་རྒྱ་སྒོར་དུང་ཕྱུར་ ༤ .༥ དང་། སྡོད་གུར་ ༨༠༠༠ བཅས་ཀྱི་རོགས་སྐྱོར་བྱས་ཏེ། མི་མང་གི་འཚོ་བ་གོ་སྒྲིག་ལེགས་པོ་བྱས་ཡོད་ལུགས་རྒྱ་ནག་གཞུང་འབྲེལ་གསར་ལམ་དུ་ཐོན་འདུག

ཡིན་ནའང་། ཟླ་འདིའི་ཚེས་ ༡༥ ཉིན་གནོད་ཐེབས་ས་ཁུལ་གྱི་ཡུལ་མི་ཞིག་གིས་བརྗོད་ན།  ཐེངས་འདིའི་དྲག་ཆར་ཆུ་ལོག་ཁྲོད་སི་ཁྲོན་ནང་ལོགས་གཅིག་པུ་ནས་ཉུང་མཐར་མི་ ༦༨ ལྷག་རྐྱེན་ལམ་དུ་ཤོར་བ་དང་།  རྒྱལ་ཁབ་ཀྱིས་གནོད་ཐེབས་ཁྱིམ་ཚང་རེར་འབྲས་རྒྱ་མ་ ༢༠ རེ་སྤྲད་པ་མ་གཏོགས་རོགས་རམ་གཞན་གང་ཡང་མ་བྱས་སྟབས། མི་མང་སྟོང་ཕྲག་མང་པོར་བཟའ་བཏུང་དང་གློག་སོགས་ཀྱི་དཀའ་ངལ་འཕྲད་ཀྱིན་ཡོད་པ་མ་ཟད། གད་སྙིགས་ཀྱི་ཕུང་བོ་བསགས་ཏེ་ཁོར་ཡུག་ལ་འབག་བཙོག་ཆེན་པོ་བཟོས་ཡོད་སྟབས། གནོད་ཐེབས་མི་མང་ལ་ཆམ་རིམས་འགོས་བ་ཉིན་རེ་བཞིན་ཇེ་མང་དུ་འགྲོ་བཞིན་ཡོད་སྐོར་དང་། ཟླ་འདིའི་ཚེས་ ༡༥ དང་ ༡༦ ཉིན་གཉིས་ལ་དྲག་ཆར་བབས་པ་ཅུང་ཉུང་དུ་ཕྱིན་ཡོད་ཀྱང་། དེ་རིང་ཡང་བསྐྱར་དྲག་ཆར་བབས་ཏེ་མི་མང་གི་འཚོ་བར་དཀའ་ངལ་ཆེན་པོ་འཕྲད་ཀྱི་ཡོད་ལུགས་བརྗོད་འདུག