ཁ་སང་ཕྱི་ཚེས་ ༡༦ ཉིན་ནས་བཟུང་མདོ་སྨད་ཀན་ལྷོ་གཙོད་རྩ་ཐང་དུ། རྒྱ་གཞུང་གིས་ཀན་ལྷོ་བོད་རིགས་རང་སྐྱོང་ཁུལ་བཙུགས་ནས་ལོ་འཁོར་ ༦༠ འཁོར་བའི་དུས་སྟོན་ཞིག་ཚུགས་ཡོད་པ་དང་། དེར་རྒྱ་ནག་དབུས་གཞུང་དང་ཞིང་ཆེན། ཀན་ལྷོ་ཁུལ་བཅས་ཀྱི་དཔོན་རིགས་ལས་བྱེད་དང་། གཞས་བ་གཞས་མ་དང་སྒྱུ་རྩལ་པ། དེ་བཞིན་གསར་འགོད་པ་སོགས་བསྐོངས་ཏེ། ཀན་ལྷོ་ཁུལ་གྱི་བོད་མི་ཚོའི་དཔལ་འབྱོར་ཡར་རྒྱས་ཆེན་པོ་ཕྱིན་ཡོད་པ་དང་། མང་ཚོགས་ལ་བདེ་སྐྱིད་ལྡན་པ་དང་གུང་ཁྲན་ཏང་ལ་དགའ་ཞེན་ཆེན་པོ་ཡོད་པ་བཅས་ཀྱི་རྣམ་པ་སྟོན་ཐུབ་བྱས་ཡོད་འདུག
འདིའི་སྐོར་བོད་ནས་གནས་ཚུལ་འབྱོར་བའི་ནང་། ཐེངས་འདིའི་སྟོན་མོའི་ཐོག་མདོ་དབུས་ཁམས་གསུམ་གྱི་གཞས་པ་གཞས་མ་མང་པོ་ཞིག་མགྲོན་འབོད་བྱས་ཀྱང་མང་ཆེ་བ་ཡོང་མེད་པ་དང་། ཀན་ལྷོ་ཁུལ་ཐོག་གི་ལས་ཁངས་ཁག་དང་སློབ་གྲྭ་ཁག དེ་བཞིན་ཁུལ་འོག་གི་རྫོང་དང་ཞང་གི་ལས་ཁུངས་ཁག་བཅས་ལ་བཀའ་རྒྱ་བཏང་སྟེ་རིག་རྩལ་འཁྲབ་སྟོན་བྱེད་དུ་བཅུག་ཡོད་འདུག
ས་གནས་དེའི་བོད་མི་ཚོས་མ་འདོད་པའི་རྣམ་འགྱུར་ཤུགས་ཆེན་སྟོན་བཞིན་ཡོད་པ་མ་ཟད། སྤྱི་ཚོགས་དྲ་ལམ་ཁག་དང་ལག་ཐོགས་ཁ་པར་སོགས་རྒྱ་བོད་ཡིག་རིགས་གཉིས་ནང་ཕན་ཚུན་ལ་འཕྲིན་ཐུང་བཏང་སྟེ། མཛད་སྒོ་དེར་ཞུགས་མཁན་བོད་རིགས་ལས་བྱེད་དང་སྒྱུ་རྩལ་པ་སོགས་ལ་མཚང་འདྲུ་དང་། སྟོན་མོ་དེའི་དམིགས་ཡུལ་རྒྱབ་ལྗོངས་སོགས་ལ་གླེང་སློང་ཤུགས་ཆེན་བྱེད་ཀྱིན་ཡོད་འདུག
སྟོན་མོ་ཚོགས་ཡུལ་གྱི་མཐའ་འཁོར་དམག་གིས་སྐོར་ཡོད་པ་མ་ཟད། ཁུལ་སྟོན་མགོ་འཛུགས་དང་མཉམ་དུ་ཁུལ་མཐའ་འཁོར་གྱི་བོད་མིའི་ཐོག་དམ་དྲག་བྱས་ཡོད་འདུག ཀན་ལྷོ་ཁུལ་འོག་ཏུ་བསང་ཆུ་རྫོང་དང་རྨ་ཆུ་རྫོང་། ཀླུ་ཆུ་རྫོང་། འབྲུག་ཆུ་རྫོང་། ཐེ་བོ། ཅོ་ནེ་རྫོང་བཅས་རྫོང་ ༦ ཡོད་འདུག
