གངས་ལྗོངས་མཁས་པའི་ལྷན་ཚོཊ།

ཟླ་འདིའི་ཕྱི་ཚེས་ ༡༠ ནས་ ༡༥ བར་གངས་ལྗོངས་མཁས་པའི་ལྷན་ཚོགས་ཐེངས་བཅུ་བ་སི་ཁྲོན་ཞིང་ཆེན་དཀར་མཛེས་ཁུལ་སེར་ཤུལ་རྫོང་འཇུ་མང་དགོན་དུ་ཚོཊ་འདུག

ཟླ་འདིའི་ཕྱི་ཚེས་ ༡༠ ནས་ ༡༥ བར་སི་ཁྲོན་ཞིང་ཆེན་དཀར་མཛེས་བོད་རིགས་རང་སྐྱོང་ཁུལ་སེར་ཤུལ་རྫོང་འཇུ་མང་དགོན་དགའ་ལྡན་བཤད་སྒྲུབ་དར་རྒྱས་གླིང་དུ། གངས་ལྗོངས་མཁས་པའི་ལྷན་ཚོཊ་ཐེངས་ ༡༠ ཚོགས་ཡོད་འདུག་ལ། ཐེངས་འདིའི་ལྷན་ཚོགས་ཐོག་རྩོམ་པ་པོ་སྒོ་ཤེས་རབ་ལགས་ཀྱིས། དགོན་སྡེའི་སྐོར་གྱི་རྒྱུན་ཤེས་གསུམ་ཞེས་པའི་བརྗོད་གཞིའི་ཐོག་གཏམ་བཤད་དང་། དགེ་བཤེས་འཇམ་དཔལ་བློ་ཤེས་ལགས་ཀྱིས།  ཚད་གཞི་རྣམ་བརྒྱུད་ཀྱི་ཐོག་ནས་ནང་བསྟན་ཁྱད་འཕགས་དུ་སྒྲུབ་ཚུལ་ཉུང་ངུར་བསྡུས་པ་ཞེས་པའི་བརྗོད་གཞིའི་ཐོག་གཏམ་བཤད་བཅས་གནང་ཡོད་འདུག  དེ་བཞིན་གངས་ལྗོངས་ཤེས་རིག་ནོར་བུའི་གླིང་གི་སློབ་སྤྱི་འཇིགས་མེད་རྒྱལ་མཚན་ལགས་དང་སློབ་དཔོན་ཆེན་མོ་ལྡོང་ཡོན་ཏན་རྒྱ་མཚོ།   རྟོག་གྲོལ་ཡོན་ཏན་རྒྱ་མཚོ།  མཚོ་སྔོན་མི་རིགས་སློབ་གྲྭ་ཆེན་མོའི་སློབ་དཔོན་དགེ་འདུན་དང་ཟླ་བ། རྩོམ་པ་པོ་དགེ་ཆོས། འཕགས་ཡུལ་ནས་ཕེབས་པའི་དགེ་བཤེས་ལྷ་རམས་པ་འཇམ་དཔལ་བློ་ཤེས། འདན་མ་བློ་བཟང་དགེ་ལེགས་བཅས་མཁས་དབང་དང་དགེ་བཤེས་མང་པོ་འཛོམས་ཏེ་གཏམ་བཤད་དང་བརྗོད་གཞི་ཁག་གི་ཐད་བགྲོ་གླེང་གནང་ཡོད་འདུག

ཐེངས་འདིའི་གངས་ལྗོངས་མཁས་པའི་ལྷན་ཚོགས་ཀྱི་གོ་སྐབས་བརྒྱུད། ཕྱི་ཚེས་ ༡༡ ཉིན་གྱི་སྔ་དྲོ་གངས་ལྗོངས་ཤེས་རིག་ནོར་བུའི་སློབ་གླིང་གི་སློབ་དཔོན་ཆེན་མོ་ལྡོང་ཡོན་ཏན་རྒྱ་མཚོ་ལགས་ཀྱིས། ༼བོད་ཀྱི་རིམ་གྲོ་ཆེན་པོ་གསུམ་ལས་མཐུན་སྒྲིལ་གླེང་བ༽ཞེས་པའི་བརྗོད་གཞིའི་ཐོག་སྣོད་བཅུད་མཐུན་སྒྲིལ་དང་། མིའི་རིགས་དང་གཅན་གཟན་དུད་འགྲོ་བར་གྱི་མཐུན་སྒྲིལ། མིའི་རིགས་ཡོངས་གྱི་མཐུན་སྒྲིལ། རྒྱལ་ཁབ་གྱི་མཐུན་སྒྲིལ། ཆོས་ལུགས་ཁག་གི་མཐུན་སྒྲིལ། གྲུབ་མཐའི་བར་གྱི་མཐུན་སྒྲིལ། ཤར་ནུབ་གཉིས་ཀྱི་ལྟ་གྲུབ་བར་གྱི་མཐུན་སྒྲིལ། ལྟ་བ་གསར་རྙིང་དང་རིག་གཞུང་གསར་རྙིང་བར་གྱི་མཐུན་སྒྲིལ། མི་རིགས་བར་གྱི་མཐུན་སྒྲིལ།  རང་མི་རིགས་ཀྱི་ནང་ཁུལ་དང་རུ་སྡེ་བར་ཕན་ཚུན་བར་གྱི་མཐུན་སྒྲིལ།  ཁྱིམ་མཚེས་གཡས་གཡོན་དང་ཁྱིམ་ཚང་ནང་ཁུལ་གྱི་མཐུན་སྒྲིལ།  སྐྱ་སེར་དང་ཕོ་མོ་རྒན་གཞོན་བར་གྱི་མཐུན་སྒྲིལ། མཛའ་བཤེས་གྲོགས་པོ་དང་ཕ་རོལ་དགྲ་བོའི་བར་གྱི་མཐུན་སྒྲིལ་བཅས་མཐུན་སྒྲིལ་ཆེན་པོ་ ༡༣  སྐོར་ནས་གཏམ་བཤད་གནང་ཡོད་པ་དང་། ཕྱི་ཚེས་ ༡༢ ཉིན་ཁམས་འདམ་མའི་ཡུལ་དུ་བསྡུས་པའི་རིས་མེད་གངས་ལྗོངས་སྨོན་ལམ་ཆེན་མོའི་གྲ་སྒྲིག་ཚོགས་ཆུང་གིས་གདན་ཞུ་གནང་བ་ལྟར། དེར་ཡོད་སྐྱ་སེར་ ༡༤༠༠༠ ཙམ་ལ་བོད་པའི་ཆོས་དང་རིག་གཞུང་བརྒྱུད་འཛིན་གནང་ཕྱོགས་དང་། གྲུབ་མཐའ་ཁག་གི་བར་ཁ་ཙམ་མིན་པར་དོན་དང་ལྡན་པའི་མཐུན་སྒྲིལ་དགོས་ལུགས་སོགས་ཀྱི་གཏམ་བཤད་གནང་ཡོད་འདུག

ཕྱི་ཚེས་ ༡༣ ཉིན་སློབ་དཔོན་ཆེན་མོ་ལྡོང་ཡོན་ཏན་རྒྱ་མཚོ་ལགས་སེར་ཤུལ་དགོན་ཐེག་ཆེན་དར་རྒྱས་གླིང་གིས་གདན་ཞུ་གནང་བ་ལྟར། དགོན་པ་དེའི་བླ་གྲྭ་དང་མི་མང་ ༡༥༠༠ ལྷག་ལ་དགེ་འདུན་པ་ཞིག་ལ་ཚང་དགོས་པའི་བསམ་བློ་ཀུན་སྤྱོད་དང་མི་ཚེའི་དམིགས་འདུན།  མདོ་སྔགས་གཉིས་གཙོས་གནའ་དེང་རིག་པའི་གནས་ཀུན་ལ་སློབ་གཉེར་གྱིས་སངས་རྒྱས་བསྟན་པ་རྒྱས་པའི་མཐུན་རྐྱེན་དུ་སྦྱོར་དགོས་ཚུལ་དང་། དགོན་སྡེ་ཞིག་ལ་ངེས་པར་དུ་ཚང་དགོས་པའི་ཆ་རྐྱེན་བཅས་ཀྱི་ཐོག་གཏམ་བཤད་གནང་སྟེ། ས་གནས་ཀྱི་དགོན་སྡེ་ཁག་དང་མི་མང་གིས་བསྔགས་བརྗོད་དང་དགའ་བསུ་གནང་ཡོད་འདུག

 གསར་འགོད་པ། དོན་གོ