རྩོམ་པ་པོ་སྐལ་བཟང་སྦྱིན་པ་ཀློད་གྲོལ།

རྒྱ་ནག་གཞུང་གིས་ ༢༠༡༠ ལོའི་ཕྱི་ཟླ་ ༧ པའི་ཚེས་ ༡༩ ཉིན་རྒྱལ་ཁབ་ཁ་བྲལ་ལ་ངན་སྐུལ་གྱི་དོགས་གཞིའི་འོག བོད་ནང་གི་༼དུས་རབས་ཀྱི་ང་༽ ཞེས་པའི་དུས་དེབ་ཀྱི་རྩོམ་སྒྲིག་པ་དང་རྩོམ་པ་པོ་སྐལ་བཟང་སྦྱིན་པ་འམ་སྨྱུག་མིང་ལ་མགར་མི་ཞུ་བ་འཛིན་བཟུང་བྱས་ཡོད་པ་མ་ཟད། ༢༠༡༠ ལོའི་ཕྱི་ཟླ་ ༡༢ ཚེས་ ༣༠ ཉིན་རྔ་བ་ཁུལ་འབྲིང་རིམ་མི་དམངས་ཁྲིམས་ཁང་གིས་རྒྱལ་ཁབ་ཁ་བྲལ་ལ་ངན་སྐུལ་གྱི་ཉེས་མིང་འོག་ཁོང་ལ་ལོ་ ༣ གྱི་དུས་བཀག་བཙོན་འཇུག་གི་ཁྲིམས་ཐག་བཅད་དེ། ད་ལྟའི་བར་ཟི་ཁྲོན་མེན་ཡང་བཙོན་ཁང་བཙོན་འཇུག་བཀག་ཉར་བྱས་ཡོད་པ་དང་། ཟླ་འདིའི་ཕྱི་ཚེས་ ༡༨ ཉིན་ལོ་གསུམ་གྱི་བཙོན་འཇུག་དུས་ཡུན་རྫོགས་ཏེ་ཀློད་གྲོལ་ཐོབ་ཡོད་འདུག

རྩོམ་པ་པོ་སྐལ་བཟང་སྦྱིན་པ་ལགས་ནི། དེ་སྔོན་རྔ་བ་རྫོང་ཐོག་ཏུ་ཚོང་ལས་ཙག་ཙིག་རེ་བྱས་ཏེ་འཚོ་བ་སྐྱེལ་ཞོར། ༼དུས་རབས་ཀྱི་ང་༽ཞེས་པའི་རྩོམ་སྒྲིག་པའི་འགན་འཁུར་ཡོད་པ་མ་ཟད། སྔ་ཕྱིར་ནུབ་བྱང་མི་རིགས་སློབ་ཆེན་གྱི་༼ཤར་དུང་རིའི༽དུས་དེབ་ཐོག་༼ ཟུངས་ཁྲག་དང་ཚེ་སྲོག་གི་གཏུག་བཤེར༽ ཞེས་པའི་རྩོམ་ཡིག་དང་། ༢༠༠༨ ལོའི་ཤར་དུང་རི་དུས་དེབ་ཐོག་བོད་མིའི་ཞི་རྒོལ་ཆེན་མོའི་སྐོར་གྱི་རྩོམ་ཡིག་སྤེལ་བ་སོགས་ཀྱིས་རྒྱ་ནག་གཞུང་གིས་ཁོང་ལ་རྒྱ་ཁབ་ཁ་བྲལ་ལ་ངན་སྐུལ་བྱས་པའི་ཉེས་མིང་འོག་འཛིན་བཟུང་ཁྲིམས་ཆད་བྱས་པ་ཞིག་ཡིན་འདུག

ལོ་དེར་རྒྱ་ནག་གཞུང་གིས་རྩོམ་པ་པོ་འཇང་རྩེ་དོན་ཁོ་ལགས་དང་བུད་ངྷ་བཅས་སྔ་ཕྱིརའཛིན་བཟུང་བྱས་ཏེ། ༢༠༡༠ ལོའི་ཕྱི་ཟླ་ ༡༢ ཚེས་ ༣༠ ཉིན་རྔ་བ་ཁུལ་འབྲིང་རིམ་མི་དམངས་ཁྲིམས་ཁང་གིས་ཁོང་དང་མཉམ་དུ་རྒྱལ་ཁབ་ཁ་བྲལ་ལ་ངན་སྐུལ་གྱི་ཉེས་མིང་འོག  འཇང་རྩེ་དོན་ཁོ་ལགས་སུ་ལོ་༤ དང༌། རྩོམ་པ་པོ་བུད་ངྷ་ལགས་སུ་ལོ་ ༤  བཅས་ཀྱི་ཁྲིམས་ཐག་ཡོད་པ་མ་ཟད།  ལོ་དེའི་ཕྱི་ཟླ་ ༡༠ ཚེས་ ༡ ཉིན་རྩོམ་སྒྲིག་པ་དང་རྩོམ་པ་པོ་ཇོ་ལེབ་ཟླ་བ་ལགས་འཛིན་བཟུང་བཀག་གིས་ཟླ་ཤས་རིང་བཀག་ཉར་བྱས་རྗེས། ལོ་ ༣ དུས་བཀག་བཙོན་འཇུག་གི་ཁྲིམས་ཐག་བཅད་དེ་ད་ལྟའི་ཆར་རྩོམ་པ་པོ་ཁོང་གསུམ་རྒྱ་གཞུང་གི་བཙོན་འཇུག་བཀག་ཉར་ཁྲོད་ལྷག་ཡོད།