ཨ་ཚོགས་ཀླུ་མཁར་བྱམས།
སྲོག་འབེན་ལ་འཛུགས་ཏེ་བོད་རང་བཙན་རྩོད་མཁན་གྱི་གྲྭ་བཙུན་དཀྱུས་མ་ཚོར་ཅང་བཤད་ཡ་མེད་མོད། མི་ཞིག་གིས་བོད་རྒྱལ་ཁབ་ག་པར་ཡོད་དྲིས་དུས། ཐག་ཉེ་ས་ནས་བཤད་ན་ཞྭ་སེར་བོ་ཚང་གི་བྱུང་རབས་ནང་འཛུབ་མོ་འཛུགས་དགོས་པ་ནི་གུ་ཡངས་མེད་པའི་གནད་དོན་ཞིག་ཡིན། རེད་དེ། སྐབས་ཐོག་གི་བརྗོད་གཞི་ནི་དེབ་སེར་པོ་དང་གདོང་སེར་པོ་གཉིས་ཡིན་པ་ལས། ཞྭ་སེར་པོ་ཚང་མིན། ཉིན་མོ་དེར་ཡང་གནམ་གྲུ་ས་ངོས་སུ་ཉེ་བར་བཅར་བས་ན། ནམ་རྒྱུན་ལྟར་ལག་དེབ་སེར་པོ་དང་འབྲེལ་བའི་དྲི་བ་ཁག་གིས་ཁོ་བོའི་བྲང་གཞུང་བརྡུང་མགོ་བཙུགས། སྡེ་བ་ལག་འཁྱེར་ཚད་ལྡན་ཅན་གྱི་མགྲོན་པོ་རྣམས་གནམ་ནས་ས་ལ་བབ་མ་ཐག དོལ་སྒམ་འབབ་སྟེགས་( Bag Zone )ཕྱོགས་སུ་འཐེན་པའི་བགྲོད་རྟགས་དེད་ནས་ཆུ་བཞུར་བཞུར་ངང་མདུན་ལ་གཤར། ང་ནི་རླུང་བཞིན་གཡོ་བའི་སེམས་ཁམས་དེའི་དབང་གིས་གློག་སྐས་རིང་པོ་དག་ནས་ཅི་ལྟར་བབ་པ་དང་། འགྲུལ་སྐས་མཐོན་པོ་དེ་ཚོར་ཅི་ལྟར་འཛེགས་པའང་ཧ་གོ་མ་སོང་།
ཅིག་ལྟ་དུས་ལུས་བཤེར་ས་ཚུགས་ལ་སླེབས་འདུག དེར་མི་ཀྲུང་ཧ་མི་སེར་རྒྱལ་ཁབ་ཀྱི་འབངས་མི་དང་ཕྱི་གླིང་བ་འགྲོ་ས་ལམ་རྟགས་ཁ་ཁ་ཡོད་པས། ང་རང་ཕྱི་གླིང་བའི་ནང་ཕྱིན་པ་དང་། དེར་འགག་སྒོའི་ལས་བྱེད་ཚོར་ཉམས་ཚོད་ཅིག་བརྟག་རྗེས། ལྟས་ཚོད་ལ་རྒྱ་མོ་བབ་ཆགས་ཤིག་འདུག་པས་ཁོ་མོའི་མདུན་གྱི་གྲལ་ཤུར་ནང་བང་སྒྲིག་ཅིང་། ཐོག་མ་ནས་ནོར་འཁྲུལ་རྐང་གཅིག་མི་འབྱུང་རྒྱུའི་ཆེད་ཡིག་ཆ་ཁག་སྔོན་ནས་སྟོན་ཆོག་ཆོག་བྱས་པ་དང་། ཕར་ནས་ཤོག་ཟེར་རག་བར་སྒུག་མཚམས་ས་ཐིག་ནང་ལངས་ནས་བསྡད། སྐད་བཏང་མཚམས་སྣང་མེད་ཡིན་མདོག་གིས་ཕར་ཕྱིན་ནས་འཚམས་འདྲི་དང་བཅས་ལག་དེབ་སེར་པོ་སྒྲོམ་སྒོའི་ནང་ཕར་བསྲིངས། གང་ནས་ཡོང་བ་ཡིན། འགྲོ་དོན་ག་རེ་ཡོད། འབྲེལ་བ་བྱེད་ས་སུ་ཡོད་སོགས་རྣ་བྱང་ལ་སོང་ཡོད་པའི་དྲི་བ་དག་སླེབས་སྐབས། དེ་ལ་འབབ་པའི་ལན་ཞིག་སྔ་ས་ནས་ཡོད་ཀྱང་། དངོས་ནས་བཤད་ན་སྐྱེས་ཡུལ་དང་སྐྱེས་ལོ་ཡན་ཆོད་ཁ་གསལ་བཀོད་ཐུབ་མེད་པའི་ལག་འཁྱེར་རྫོབ་པོ་དེ་མི་ཞིག་གི་ལག་པར་འཇོག་སྐབས། རང་བཞིན་གྱིས་གདོང་བ་ཕྱེད་ཀ་དམར་པོ་ཆགས་འགྲོ་གི མ་གཞི་ནས་ལག་དེབ་སེར་པོ་ལབ་ན་གནད་དོན་ཅན་གྱི་ཡིག་ཆའི་ཁུངས་ཡིན་སྟབས། མོས་དེ་མཐོང་འཕྲལ་བབ་ཆགས་པའི་གདོང་པ་མདོག་འགྱུར་ཚར་འདུག
དེ་མུར་ཁོ་མོས་ཁྱོད་ལ་རྒྱ་གར་ཉེན་རྟོག་པའི་དག་མཆན་(Police Clean sheet ) ག་པར་ཡོད་ཟེར། ངས་( འོ་རེད་) དེ་ཕ་གའི་གནམ་ཐང་ནས་བསྡུས་འགྲོ་གི་ཡོད་པ་རེད། ཕྱིར་ལོག་ཆོག་པའི་ཐོངས་མཆན་(Return Visa ) ཞུས་ཡོད་པ་དེར་གཟིགས་དང་། ཉིད་ཀྱི་དྲི་བ་དང་ལན་གཉིས་ག་དེ་ཡིས་འཐུས་པ་རེད་བརྗོད་པ་ཡིན། ཚིག་དེ་ཁོ་མོའི་སྣང་བར་མ་སོང་བ་འདྲ། འཁྲིས་ཀྱི་རྒྱ་མོ་དེར་སྐད་ཆ་དྲིས་སོང་། རླུང་རྟ་བརྒྱུག་ནས་རྒྱ་མོ་གཞན་པ་དེས་ཡིག་ཆར་དཀའ་ངལ་མེད་ན་འགྲོ་སྟངས་དེ་རེད་ལབ་ཡོད་ས་རེད། དེ་ནས་ཁོ་མོས་སླར་ཡང་ངའི་ཡིག་ཆར་ཞིབ་བཤེར་བྱས་ཤིང་། དེབ་སེར་པོར་བརྟག་དཔྱད་བྱེད་སྐབས་ནག་ཚོང་བརྒྱག་མཁན་ཞིག་གི་ལག་པར་གནའ་རྫས་ཤོར་བ་བཞིན། གནམ་ལ་འཕྱར་ཏེ་འོད་ངོགས་ནས་བརྟག སྤྲུགས་སྤྲུགས་བཏང་ནས་བར་ན་ཅང་ཟེགས་རྒྱུ་ཡོད་མེད་ལ་བལྟས། མཐར་སྣ་སྒོར་ཁྱེར་ནས་མ་བསྣིམས་ཙམ་ཞིག་བྱས་རྗེས། གཞི་ནས་གློག་གི་བརྟག་ཆས་བར་བཅུག་སོང་། བྱེད་སྟངས་དེས་ང་ཙམ་མ་ཡིན་པར་གཡས་གཡོན་མི་རྣམས་ཀྱང་དོག་མ་བདེ་བ་ཞིག་བཟོས། མཐའ་མར་མོས་འཐད་ལ་མི་འཐད་པའི་ངང་ཐམ་ཀ་བརྒྱབ་ནས་ལག་འཁྱེར་ཚུར་སློག་སོང་། ཁོ་བོར་མཚོན་ན་གོ་ནོར་གྱི་གོ་རིམ་དེར་ཡ་ལན་སློག་སྟངས་ཉག་གཅིག་དྲན་པ་ནི། ཐོན་ཁར་རྒྱ་རྒན་མར་ཐུགས་རྗེ་ཆེ་མ་ཞུས་པ་ཙམ་ཡིན།
དེ་ནས་ཕྱི་ལོག་ཏུ་ཕྱིན་པའི་ན། འགྲུལ་སྒུག་ཁང་གི་མི་ཚོགས་ཁྲོད་དུ་བོད་རྒྱལ་ཁབ་ཆེན་པོའི་རྒྱལ་དར་ཞིག་གིས་ང་ལ་བསྒུགས་ནས་བསྡད་འདུག་ལ། ངས་ཕར་རྒྱལ་དར་མ་མཐོང་གོང་རྒྱལ་དར་གྱིས་ང་ཚུར་ངོ་རྟགས་ཆོད་སོང་བ་འདྲ་ཞིག་བྱུང་། སྤྱིར་ན་ལྷ་སྒྲུང་དང་འབྲེལ་བའི་རྒྱལ་དར་དེ་ངས་སྔས་མགོའི་མཐོ་སར་བཞག་ནས་ཕྱག་འཚལ་ཞིང་། བྲང་ལ་སྦྱར་ནས་ངུས་མྱོང་། སྡུག་ས་ནས་བཤད་ན་མ་རྒན་ཚེ་ལས་འདས་སྐབས་ཀྱང་ཚོར་བ་དེ་འདྲ་ཁག་སེ་འདུག དེ་བས་རྒྱལ་དར་ལ་སེམས་ཤིག་ཡོད་ན་ང་ངོ་ཤེས་དགོས་པའི་ཚད་ཡིན། གཞན་རྒྱལ་དར་གྱི་འགྲེལ་བཤད་ནི་ཆོས་སྤེལ་མཁན་ཚོའི་ཧམ་བཤད་ཡིན་སྟབས། ཕྱོགས་དེ་ནས་ང་ནི་ཁ་དང་ཁ་སྤུ་ཁ་ཁ་ཡིན་པ་ཞོར་འཕྲོས་ཙམ་མོ།།
ལག་དེབ་སེར་པོ་འདི་ངའི་ཐོབ་ཐང་དངོས་གནས་དེ་ཡིན་ལ། གདོང་བ་སེར་པོ་འདི་ངའི་ལྷན་སྐྱེས་ཀྱི་ཤ་མདངས་ཡིན། རྒྱལ་ཁབ་བཙོང་བའི་ནག་ཉེས་ཁོ་ནས་མ་གཏོགས་ཞྭ་སེར་བོ་ཚང་ངའི་ཕ་ཆོས་ཡིན། སོང་ཙང་ལག་དེབ་སེར་པོ་དང་། གདོང་བ་སེར་པོ། ད་དུང་ཞྭ་མོ་སེར་པོ་གསུམ་པོར་ང་སྒེར་ངོས་ནས་ཁ་འཁང་ར་ཞིག་ཡོང་གཞི་མེད་མོད། ཡུལ་ལུང་སོ་སོའི་ཐོངས་མཆན་སྤྲོད་མཁན་གྱི་ལས་བྱེད་པ་དང་། འགག་སྒོ་སྲུང་མཁན་གྱི་སྐོར་གཡེང་པ་ཚོའི་མདུན་ཅོག་ཐོག ངའི་ལག་དེབ་སེར་པོ་དང་། ངའི་གདོང་སེར་པོ་འདི་གཉིས་མཉམ་པོར་བཤམས་དུས། གང་ཞིག་ན་ཅིག་ཏག་ཏག་བསྡད་མེད་པ་ལམ་སེང་ཧ་གོ་ཡོང་གི དེར་བརྟེན་བྱུང་རབས་ཀྱི་ཁ་མཚམས་གང་ཞིག་ནས་རྒྱལ་ཁབ་ནག་གསུབ་ཕྱིན་པར་མནོ་བསམ་གཏོང་སྐབས། སྤྱིར་ན་ཆོས་སྲིད་ཟུང་འབྲེལ། སྒོས་སུ་ཞྭ་སེར་འདི་ཚང་དུས་མཐའི་ཉི་མ་དམར་པོ་ནང་བཞིན་ཅི་འདྲའི་མིག་ལ་འཛེར་བ་ཞིག་རེད། དེས་ཀྱང་ག་ལ་ཚད། ཁ་བ་རི་བ་ཚང་གི་སྣོད་བཅུད་གཉིས་ཀྱི་རླུང་རྟ་མར་ལ་འགྲིབ་བཞིན་པའི་སྐབས་སུ། ཁོ་ཚོ་དྲ་ཇེ་རྒྱས་དང་མགོ་ཇེ་སྐྲང་ཡིན་དོན་ཅི། ད་ནི་གང་ལྟར་ཤོར་པོ་ཞིག་གི་སྐྱེས་པ་བླངས་ཏེ་མི་ཚེ་རྫོགས་གྲབས་འདུག དུས་ཡུན་འདིའི་ནང་ཁུངས་འཁྱོལ་རུང་མ་འཁྱོལ་རུང་ཨུ་ཚུགས་མཐར་སྐྱེལ་བྱས་པ་རེད། སོང་ཙང་ངས་ད་ནས་བཟུང་ལོ་རྒྱུས་ལ་སྨྲེ་ངག་མི་འདོན། ཆོས་རྒྱུད་ལ་བསྐུར་བ་མི་འདེབས། རང་གིས་ཅིག་འཇོན་པ་ནི་ལག་དེབ་སེར་པོ་འདི་ཁྱེར་ཏེ། གདོང་བ་སེར་པོ་འདི་བསྟན་ནས། མུ་མཐུད་བདག་གཞན་ཉིས་ཆར་གྱག་གྱག་བྱེད་རྒྱུ་ཙམ་ཡིན།
རྩོམ་པ་པོས་མཆན: [ ཁ་སྔོན་ཕྱི་ཟླ་ལྔ་བར་ཐའེ་ཝན་བོད་ཀྱི་མཛའ་གྲོགས་ཚོགས་པ་གཙོས། ཚོགས་པ་ཁག་མཉམ་འབྲེལ་འོག རྒྱལ་ས་ཐའེ་པེ་རུ་<< ཐའེ་ཝན་ཡང་རྩ་སྟོང་དུ་འགྲོ་བའི་རྒྱལ་ཁབ་ཅིག་ལ་མི་འགྱུར་བའི་ཆེད་དུ། ལྷོ་སོག་དང་། ཡུ་གུར། བོད་བཅས་ཀྱི་ཐོག་ན་བློ་སྐྱེད་གང་ཡོིད། >>ཅེས་པའི་བརྗོད་གཞིའི་ཐོག རྒྱལ་སྤྱི་རང་བཞིན་གྱི་ཚོགས་འདུ་ཞིག་འཚོགས་པ་དང་། ཚོགས་ཐོག་དེར་ལྷོ་སོག་དང་། ཡུ་གུར་གྱི་འབྲེལ་ཡོད་མི་སྣ་གདན་ཞུས་གནང་འདུག་ལ། ཕྲན་བོད་ཀྱི་མིང་ཐོག་ནས་ཕྱིན། སྐབས་དེའི་མཐོང་ཐོས་དང་། བརྒྱུད་ལམ་ཁག་གིས་ཡིག་ངག་གཉིས་ཐོག་ནས་བཅར་འདྲི་བྱས་པ་བཅས་གཞིར་བཞགས་སྟེ། སྙན་ཞུའི་རྩོམ་ཡིག་གི་འབྲི་ཐབས་སྤྱད་ནས་རྩོམ་འདི་བྲིས་ཤིང་། རྩོམ་ཡིག་འདི་ནི་དེའི་ནང་གི་ཚན་པ་གཅིག་ཡིན། ]
སེར་བོའི་གདོང་ལ་མ་སུན། སེར་བོའི་གདོང་ལ་སུན་ན། རང་ལ་སུན་པ་ཡིན་འགྲོ། རང་མཚང་སྟོན་པ་ཡིན་འགྲོ། སེར་བོའི་དེབ་ལ་མ་སུན། སེར་བོའི་དེབ་ཀྱི་དྲིན་ན། སེར་བོའི་གདོང་བ་ཅན་ཚོ། ཕྱོགས་ངེས་མེད་ཁྱབ་ཡོད། སེར་བོའི་བསྟན་པར་མ་སུན། སེར་བོའི་བསྟན་པའི་དྲིན་ན། ནུབ་གླིང་མགོ་སེར་ཅན་ཚོའི།། སེམས་པ་དབང་མེད་བཀུག་ཡོད།།
སེར་བོ་གསུམ་ལ་མ་སུན། སེར་བོ་གསུམ་ལ་སུན་ན། འཚོ་བའི་གནས་ཤིག་མེད་པས། ལམ་ཁ་གཅིག་ལས་མི་འདུག།
ཉམས་མྱོང་ངོ་མ་རེད། ས་སྣུམ་ཉོ་བྱེད་ཀྱི་ལག་དེབ་ལྟ་བུའི་དེབ་སེར་དེ་འཁུར་ནས་འགག་མཚམས་ཀུན་དུ་དཀའ་ངལ་འཕར་མ་རེ་ཕྲད་པ་ཐེངས་ཁ་ཤས་མིན། མཚམས་རེར་ངོ་མ་འཇིགས་རྟེན་འདིར་ཡོད་པ་ཙམ་ལས། མིའི་གྲས་སུ་མེད་པའི་ཚོར་བའང་སྤྲད་མྱོང་།
གདོང་སེར་པོ་ཕ་མས་གནང་ལེ་རེད། དེབ་སེར་པོ་ཏང་གིས་བཟོས་ལེ་རེད། མགོ་སེར་པོ་མིན་པ་སྔོན་ལས་རེད། ཞྭ་སེར་པོ་གྱོན་དང་གྲོང་ཆོག་གཉེར།
༑མདང་ནུབ་ཤར་མར་བྲིས་པའི་མཆན་དེར་སེམས་གཡེངས་པ་ལས་ཡིག་འབྲི་མཛུབ་གནོན་འཁྱོར་བ་རྣམས་དག་བཅོས་འདི་ལྟ་སྟེ།
དུམ་ཚན་ ༡ པོའི་མཐའ་ཕྲེང་ན། འགྲུལ་པར་ཞེས་པ་འགྲུལ་པར་སྤྲོད་པའི་ཞེས་དགོད་བྱ་ཡིན།
༢ ཀྱིས་ལ་ཀྱི། མེགློར་ལ་མེགློཌ། [ཤཱཀྱ་ཐུབ་པ་དང་ཤཱཀ་ཐུབ་དང་ཨུཏྤལ་སོགས་བཞིན། བོད་ཡིག་གི་སྔོན་རྗེས་རྣམ་གཞག་རིགས་སྒྲེ་མི་རུང་བ་སྐད་གཞན་གྱི་དངོས་མིང་རྣམས་སྐད་དེའི་དག་ཆ་ལྟར་འབྲི་བ་སྔ་ནས་དར་ཡོད།] ༑དུམ་ཚན་ ༢ པའི་ཕྲེང་གསུམ་པ་ན། པའི་གནས་སུ། པས།
༣ མདོང་ལ་གདོང་། རྒྱུད་ལམ་ཡིན་པར་ཞེས་པའི་གནས་སུ། རྒྱུད་ལམ་ལག་བསྟར་བྱེད་པ། [སྐབས་འདིར་གསར་འགོད་བརྒྱུད་ལམ་ཞེས་པའི་བརྒྱུད་ལམ་གྱི་དོན་མིན་པར། ལས་མི་ཚོས་ལས་ཀ་ཚད་ལྡན་དང་ཁྲིམས་ལྡན་རིམ་ཅན་དུ་བྱེད་སྲོལ་གང་དབྱིན་ཚིག་གི་པོརོསིཇོར་ཞེས་པ་དེའི་དོད་ཡིན།]
༦ མཚོད་ལ་མཚོན།
༑ཁྱེད་ལ་དེབ་སེར་པོའི་མཐོང་ཆུང་བའི་ཉམས་མྱོང་བྱུང་བ་ཁག་མེད། བོད་མི་དང་རྒྱ་གར་དུ་གནས་སྡོད་པའི་སྐྱབས་བཅོལ་བ་མང་པོར་དཀའ་ངལ་འདི་རྒྱུན་པར་འཕྲད་བཞིན་ཡོད། རྒྱ་གར་གྱི་དེབ་སེར་པོ་དེ་ནི་དེབ་གཟུགས་ཅན་རྒྱལ་སྤྱིའི་ཡུལ་གྲུ་གཞན་གྱི་ངོས་འཛིན་འགྲུལ་དེབ་དང་ཆ་འདྲ་བ་ཡིན། མཉམ་སྦྲེལ་རྒྱལ་ཚོགས་ཀྱིས་རྒྱལ་ཁབ་མེད་པའི་འགྲུལ་པར་སྤྲོད་པའི་དེབ་ཀྱང་ཁ་མདོག་སྔོན་པོ་དང་སེར་པོའི་ཁྱད་ཙམ་ལས་རྒྱ་གར་གྱི་དེ་དང་དེབ་ཀྱི་སྤུས་ཀ་བཟོ་དབྱིབས་གཅིག་མཚུངས་འདུག །བལ་ཡུལ་སོགས་ལུང་པ་དཔལ་འབྱོར་ཞན་པ་རྣམས་ཀྱིས་ནི། ཡུལ་མེད་འགྲུལ་པར་ངོས་འཛིན་དེབ་ནི། ཤོག་ཛར་ཞིག་ལ་ཐེལ་ཙེ་ཡོད་ཙམ་རེད།
ཁྱོད་ཀྱི་དེབ་སེར་ཐད་བརྟག་པ་ནན་བྱས་བྱུང་བ་བོད་པ་སྒེར་ཞིག་ལ་ཕོག་དགོས་དོན་མེད་དེ། སྤྱིར་བཏང་ལོ་མང་སྔོན་ནས་འགྲུལ་པ་མང་པོས་དེབ་སེར་ཚབ་རྫུན་བེད་སྤྱོད་བྱས་པ་དང་། འཕར་མ་ཡོད་ཐོག་དེབ་སེར་བཏོན་པ་སོགས་བཟུང་བ་བྱུང་བས། འདི་ནི་བོད་མི་ལས་མང་བའི་རྒྱ་གར་ནང་སྐྱབས་བཅོལ་བ་གཞན་ཡོད་པ་རྣམས་ཀྱིས་གྲས་ནས་ཀྱང་བེད་སྤྱོད་ལོག་པ་བྱས་པའི་དོ་དམ་ཆེ་རུ་ཕྱིན་པ་མཇྣུཊིལ་ཇ་ལམ་དང་མེགློར་སྐོར་ལམ་དུའང་ཁྱབ་ཡོད་པའི་སྤྱིར་བཏང་ཤེས་བྱའི་གཏམ་ཞིག་ཏུ་གནས།
དེ་བས་ན། ཕྱོགས་གཅིག་ནས་དེབ་སེར་ལ་བརྟག་པ་ནན་པོ་བྱེད་པའི་སྐབས་དེབ་བཤེར་བྱེད་པོ་རྣམས་ཀྱིས་ལས་ཀའི་རྒྱུད་ལམ་ཡིན་པར་ཤེས་ཏེ་བློ་འཚབ་དང་དོན་ལོག་འགྲེལ་དགོས་དོན་མེད། ཕྱོགས་གཞན་ཞིག་ནས་དེབ་བཤེར་ལས་བྱེད་ཚོར་འཚམས་འདྲི་བྱ་རྒྱུ་དེ་ལས་ཀའི་འབྲེལ་ལམ་གྱི་སྒོ་ནས་མ་འཚམ་པ་ཐལ་བའི་སྐྱོན་ཆར་འགྲོ་ངེས་པ་དང་ཕ་རོལ་པོས་དོགས་པ་བྱེད་པའི་རྐྱེན་དུའང་འགྱུར་སྲིད།
ཁྱེད་ལ་མི་བདེ་བ་བཟོས་པ་ཚོར་བར་ཐུགས་གསོ་ཞུ་བ་ཡིན། ལར་ནས་དེབ་སེར་པོ་དེ་དང་དགེ་ཆོས་ཀྱིས་གསུང་བའི་མདོང་དམར་དེ་གཉིས་པོ་དཔའ་ཞུམ་དགོས་པའི་གནད་དོན་གང་ཡང་མིན། ང་རྒྱལ་མིན་པའི་དོན་ལྡན་གྱི་སྤོབས་པ་བྱེད་དགོས་པའི་གཞི་ཡིན། དེབ་སེར་ནང་བོད་མི་དང་བོད་ཞེས་མ་འཁོད་རུང་། ཕ་རོལ་པོས་རྩད་གཅོད་ཀྱི་རིམ་པ་ལས་བོད་མི་ཡིན་པ་ཤེས་པར་འགྱུར་བས། བོད་མི་ཞིག་ཡིན་སེམས་པའི་གདེང་སྤོབས་མ་ཞུམ་པ་གནད་ཆེ། ༧གོང་ས་མཆོག་ཀྱང་དེབ་སེར་འདི་ཉིད་ཀྱི་ཐོག་འཛམ་གླིང་ཡུལ་གྲུ་རྣམས་སུ་མཛད་པ་འཕྲིན་ལས་རླབས་ཆེན་མཛད་བཞིན་ལགས། མཁྲིས་ནད་ཅན་ངོ་གདོང་སེར་པོ་ཡོད་པ་ལས། སྔོན་གྱི་དམག་ཆེན་གཉིས་པའི་སྐབས་ཀྱི་ནུབ་གླིང་པས་འགྲེལ་བརྗོད་བྱས་པའི་ཇཱཔཱན་ནས་འོང་དོགས་པའི་སེར་པོའི་ཉེན་ཁ་ཞེས་པའི་ཟེར་བཟློས་བྱས་པས་རང་ཉིད་རང་གིས་དམའ་ལ་འབེབས་པར་ཟད།
རིང་ལུགས་གང་ཞིག་གི་ཁོངས་གཏོགས་གང་ཟག་སྒེར་གྱིས་དད་པ་སུན་འབྱིན་སོགས་བྱས་པའི་ཡུལ་དུ་གྱུར་ཡོད་ནའང་། དེས་རིང་ལུགས་ཡོངས་རྫོགས་ལ་དབྱུག་པ་ལེབ་འཕྱར་བྱེད་པ་ཆེས་ནོར་བ་ཡིན་ལ་ལས་ངན་ཚབ་ཆེ། ཁྱེད་སྒེར་ལ་ཕམ་ཉེས་བྱུང་བ་དེ་གནས་དོན་ཡོད་ཚད་དང་སྦྱོར་ཏེ་སྐུར་བ་འདེབས་པ་ནི་ཧ་ཅང་ཐལ་ཆེ།
༑ཁྱེད་ཀྱིས་སྔས་ལ་བཞག་སྟེ་རྒྱལ་དར་དེའི་འོག་ངུས་པ་ལ་ལྷག་པའི་རྒྱལ་དར་དེའི་འོག་རང་སྲོག་བློས་བཏང་མཛད་པ་བརྒྱ་ཕྲག་དུ་མ་བྱུང་ཡོད། རྒྱ་མིས་བོད་དབུས་སུ་རྒྱལ་དར་དམར་པོ་འཁྱེར་བཞིན་བཙན་འཛུལ་བྱས་པའི་སྔ་རོལ་མདོ་སྟོད་ཆབ་མདོ་སོགས་སུ་རང་རེའི་རྒྱལ་དར་དེ་འཁྱེར་བཞིན་རྒྱར་འཐབ་སྟེ་སྲོག་ཤོར་བ་བགྲང་དུ་མེད། བོད་ཀྱི་རྒྱལ་དར་འདི་ནི་ཕྱི་ལོ་ ༡༩༥༩ སྔ་རོལ་བོད་མ་ཤོར་བའི་སྐབས་ནས་ཡོད། གངས་སེང་ཟུང་དེ་ཁྱེད་ཀྱིས་བཤད་པ་ལྟར་ལྷ་སྒྲུང་ཧམ་བཤད་ལྟ་བུ་ཡིན་མོད་ཀྱང་། རྒྱལ་ཁབ་གཞན་གྱི་རྒྱལ་དར་མང་པོར་མཚུངས་བསྡུར་བྱས་ན་འོ་ཅག་གི་རྒྱལ་དར་འདིའི་གཡུ་རལ་མཆེ་སྡེར་བརྗིད་པའི་མི་འཇིགས་གདོང་ལྔ་རྣམ་པར་འགྱིངས་པའི་ཆ་འདི་ནི། དབྱིོན་ཇིའི་རྒྱལ་རྟགས་ཀྱི་སེང་གེ་སྦྲུལ་འདྲ་བ་དེ་ལས་དངོས་པོའི་གནས་ཚོད་དང་འཚམ་ཆེ་བ་དང་། དབྱིན་ཇིའི་རྒྱལ་དར་གྱི་རྒྱ་གྲམ་མཚམས་བཅད་དང་བཅས་པ་གང་གནའ་བོའི་ཆོས་ཀྱི་དམག་བརྒྱབ་པའི་སྐབས་ནས་དར་བ་དང་ཆོས་དམག་གི་མཚོན་དོན་དེ་འདྲ་མིན་པར། བཟང་ཕྱོགས་ཀྱི་བསླབ་བྱ་ལྡན་པས་མངོན་པར་འཕགས། རྒྱལ་དར་དང་རྒྱལ་རྟགས་རྣམས་ནི་དེང་རབས་སྤྱི་གྲོས་ཀྱི་རང་དབང་བའི་ལུང་པ་ཡིན་པའི་རྟགས་ཙམ་ལས། དེ་རྣམས་ཀྱི་ངོས་གསལ་བའི་དཔེ་རིས་ཀྱི་མཚོན་དོན་ཐད་བལྟས་ཚེ། ལོ་ཉིས་བརྒྱ་ཚུ་རོལ་གྱི་རྒྱལ་དར་མང་ཆེ་བ་ནི་ཁོ་མདོག་གསུམ་ཅན་གཅིག་མཚུངས་ཡིན་པ་མངོན་གསལ་ཙམ་ལས། གནའ་ནས་ཡོད་པའི་རྒྱལ་ཁབ་ཕལ་ཆེ་བའི་རྒྱལ་དར་མཚོད་དོན་དང་རྒྱལ་རྟགས་རྣམས་ནི། དམག་འཁྲུགས་དང་འཚེ་བའི་རྣམ་པ་ཅན་དང་། རྒྱལ་རྟགས་ཁོངས་དུད་འགྲོ་ལྷ་སྒྲུང་ལས་ཀྱང་འདས་པ་མང་།
༑ཐལ་ཆེ་བའི་བསམ་ཚུལ་དེ་ཚོ་ཁྱེད་ཀྱིས་འཛེམ་མེད་བཤད་པའི་ལྐོག་ཤོད་མིན་པར་མདུན་ཤོད་བྱེད་པ་ཙམ་གྱི་ཆ་ནས་བསྔགས་བརྗོད་ཡོད། ཡི་གེའི་ཐད་དེང་སང་མང་པོ་ཞིག་གིས་བརྡ་དག་ཚིག་མཛོད་ནང་ཡོད་ཚད་སྐབས་ཐོབ་ཡིན་མིན་ལ་མ་བལྟོས་པར་བེད་སྤྱོད་བྱེད་པའི་རྟགས་སུ། བཅར་ཞེས་འགྲོ་སྐྱོད་ཀྱི་དོན་དང་གཅིག་མཚུངས་ཡིན་པར་བསམས་ཏེ་གནམ་གྲུ་རིན་པོ་ཆེའི་སྐུ་མདུན་དུ་བཅར་བ་ལྟ་བུའི་དོན་དུ་བེད་སྤྱོད་བྱེད་པ་དང་། བསྲིངས་པ་ནི་དུས་ཡུན་རིང་དུ་བཏང་བའི་དོན་ཙམ་ལས་། ཚིག་མཛོད་དུ་ལག་པ་བརྐྱང་བའི་དོན་དང་ཡི་གེ་བསྐུར་བའི་དོན་གཉིས་པོ་ལའང་འཇུག་པ་བཤད་པ་མཐོང་སྟེ། བསྐུར་བ་དང་སྤྲད་པ་གཉིས་དོན་གཅིག་ཏུ་འཁྲུལ་ཏེ་སྤྲད་པའི་དོན་དུ་བེད་སྤྱོད་བྱེད་པ་སྣང་བ་འདི་དག་ནི། སྲོལ་རྒྱུན་གནའ་བོའི་མེས་པོ་རྣམས་ཀྱི་ཡིག་སྲོལ་ལས་ཉམས་པ་དང་། ཚིག་དེ་ལྡན་གྱི་གླེགས་བམ་རྣམས་ཀྱང་བཀླག་ཨེ་ཡོད་སྙམ་པའི་དོགས་པ་སློང་། ཚིག་མཛོད་ནང་གི་ཚིག་རིགས་གང་མང་རྙེད་ཐུབ་ངལ་བ་བྱེད་པ་བཟང་ཡང་། སྐབས་ཐོབ་བེད་སྤྱོད་དུ་ཡོད་པ་སོགས་ཤེས་པ་གལ་ཆེ། ཞར་བྱུང་དུ་ཐུགས་ཕན་གསོ་བའི་ཆེད་ཞུས་པ་ཡིན།
མ་འོངས་པ་ན་ཁྱེད་ཀྱི་འགྲུལ་བཞུད་ཆུ་བཞུར་བཞུར་ཡོང་བའི་རེ་བ་ཡོད། བཀྲིས་བདེ་ལེགས།
ངོ་མདོག་སེར་མདངས་རིགས་རྒྱུད་རྟགས། ལག་དེབ་སེར་པོ་སྐྱབས་བཅོལ་རྟགས།
ཞྭ་མོ་སེར་པོ་ཆོས་ཀྱི་རྟགས། དེ་གསུམ་འདོར་ཐབས་མེད་པའི་རྟགས།
འཁང་ར་མ་བྱེད་སེམས་མ་ཕམ། ལོ་རྒྱུས་འཁོར་ལོ་གནས་གཅིག་མིན།
རང་བཙན་ལམ་ཡིག་བྲིས་པ་ལྟར། རང་བཙན་འཐབ་རྩོད་དཔའ་མ་ཞུམ།
སྤྱིར་ན་བཤད་འདོད་མེད་ལ་འདྲི་འདོད་ཀྱང་མེད། འོན་ཀྱང་བསམ་མ་ཤེས་པའི་ཟུར་ཁ་ཅན་དེས་ང་འདུག་གི་བཅུགས་མ་སོང་། དེ་ནི་འདི་ལྟར་གོང་དུ་མི་ཞིག་གིས་བོད་རྒྱལ་ཁབ་ག་པར་ཡོད་དྲིས་དུས། ཐག་ཉེ་ས་ནས་བཤད་ན་ཞྭ་སེར་བོ་ཚང་གི་བྱུང་རབས་ནང་འཛུབ་མོ་འཛུགས་དགོས་པ་ནི་གུ་ཡངས་མེད་པའི་གནད་དོན་ཞིག་ཡིན་ཞེས་ཟེར། ཡང་འོག་ནས་རྒྱལ་ཁབ་བཙོང་བའི་ནག་ཉེས་ཁོ་ནས་མ་གཏོགས་ཞྭ་སེར་བོ་ཚང་ངའི་ཕ་ཆོས་ཡིན་ཞེས་ཟེར། གནོད་དོན་དེ་གཉིས་ཀྱི་བར་ནས་རྒྱལ་ཁབ་བཙོང་ཞེས་པའི་བརྗོད་དོན་གྱིས་སྟོང་བའི་ཚིག་གི་ནག་ཉེས་དེ་སུ་ལ་འགེལ་འདོད་པ་ཡིན། སྤྱིར་ན་གང་ཞིག་བཙུང་ན་ཆེ་ཆུང་ལ་མ་ལྟོས་པར་ཚུརཡོང་འབབ་ཅིག་ཡོད་དགོས་པ་ཁྱོད་ཀྱི་བཤད་ཚུལ་ལྟར་གུ་ཡང་མེད་པའི་གནད་དོན་ཞིག་ཡིན། འོ་ན་ཁྱོད་ཀྱི་སེམས་ནང་གི་མ་རུང་བ་རྒྱལ་ཁབ་བཙུང་མཁན་དེ་ལ་ཡོང་འབབ་ཅི་བྱུང་དང་དགྱ་བོད་གང་གི་ཡུལ་དུ་འཚོ་བཞིན་པ་བཤད་རོགས་གནོངས་ཞེས་རེ་སྐུལ་ཡིན་སྐུ་མཁྱེན། གང་ལྟར་མི་དེ་བཙན་བྱོལ་བ་ཞིག་མིན་པ་གནས་ལུགས་ཀྱིས་ཐག་བཅད་འདུག གང་ཡིན་ཞེ་ན་རང་གི་རྒྱལ་ཁབ་དགྱ་ལ་བཙུང་ནས་དགྱ་ཡི་ཁྲིམས་འོག་ནས་འབྲོ་དགོས་དོན་མེད་ལ།