དེ་རིང་རྒྱ་གར་ཧིན་རྡུའི་དུས་བབ་(Hindustantimes)སྟེང་གནས་ཚུལ་སྤེལ་བ་ལྟར་ན། ཕྱི་ཚེས་ ༢༠ ཉིན་ལྡི་ལི་ཉེན་རྟོག་པས་རང་ལོ་ ༣༠ ཡིན་པའི་བོད་པའི་བུ་མོ་ཚེ་རིང་ཆོས་འཛོམས་ཟེར་བ་ཞིག་དང་། ནཱ་ཇི་རེ་ཡ་( Nigerian) རྒྱལ་ཁབ་ནས་ཡིན་པའི་རང་ལོ་ ༢༧ ཡིན་པ་ (Isika Collins) ཟེར་བ་ཞིག གཞན་རང་ལོ་ ༢༧ ཡིན་པ་ (Omenoys Favor) ཟེར་བ་ཞིག་བཅས་མི་ ༣ གྱིས་མྱོས་རྫས་ཀྱི་རིགས་ཤིག་སྟེ་ (cocaine)ལྗིད་ཚད་གྷ་རཱམ་ ༩༤༠ ཙམ་ཡོད་པ། མ་གནས་ཧིན་སྒོར་འབུམ་ ༡༠༠ ལྷག་གི་ནག་ཚོང་ཉར་ཡོད་པ་ལག་སོན་བྱུང་སྟེ་འཛིན་བཟུང་བྱས་ཡོད་སྐོར་བཀོད་འདུག
དེ་ནི་ལྡི་ལིའི་ཅ་དངོས་གཏོང་ཡུལ་(courier agency)ཞིག་ཏུ། ཚེས་ ༡༢ ཉིན་རྒྱ་གར་གྱི་བུད་མེད་པའོ་ཇྭ་(Pooja Ray)ཟེར་བ་ཞིག་གིས་བུད་མེད་ཀྱི་ཅ་དངོས་ཙག་ཙིག་ཅིག་གཏོང་རྒྱུ་བཞག་ཡོད་པ་དེ། ཡིག་ཆ་དང་ཁ་བྱང་འགྲིག་མིན་གྱི་དབང་གིས་དུས་ཐོག་ཏུ་གཏོང་མ་ཐུབ་པར་ཅུང་འགོར་འགྱངས་ཕྱིན་པར། བུད་མེད་དེས་ཅ་ལག་གཏོང་མཁན་དེར་ཛ་དྲག་གི་བརྡ་འདེད་ཡང་ཡང་བྱས་སྟབས། ཅ་དངོས་གཏོང་ཡུལ་བདག་པོ་(Vashist Kumar)ཟེར་བ་དེ་བུད་མེད་དེའི་ཅ་ལག་ལ་ཅུང་དོགས་པ་ཟོས་ཏེ། ས་གནས་ཉེན་རྟོག་པར་སྐད་བཏང་སྟེ་ཅ་དངོས་དེར་ཞིབ་བཤེར་བྱས་སྐབས་ནག་ཚོང་དེ་དག་ཐོན་ཡོད་འདུག
ཞིབ་བཤེར་བརྒྱུད་ཤེས་རྟོགས་བྱུང་བར་རྒྱ་གར་བུད་མེད་དེའི་མིང་ཐོག་ནས་སྔོན་མ་ཧའོ་ལན་ཌི་དང་ཨོ་སི་ཊི་ལི་ཡ་བཅས་སུ་ཐེངས་གཉིས་ལ་ཅ་དངོས་བཏང་ཡོད་འདུག་པ་དང་། ཉེན་རྟོག་པས་བུད་མེད་དེ་འཛིན་བཟུང་ཞིབ་བཤེར་བྱས་སྐབས་ལག་འཁྱེར་གློག་ཀླད་དང་ཁ་པར་བྱང་བུ་སོགས་མང་པོ་ཞིག་ཐོན་ཡོད་སྟབས་ཁྲིམས་འགལ་གྱི་ལས་ཀ་གཞན་ཡང་བྱེད་ཀྱིན་ཡོད་པའི་དོགས་པ་བྱུང་ཡོད་འདུག རྒྱ་གར་བུད་མེད་དེ་དང་གོང་གསལ་བོད་པའི་བུད་མེད་དེ་དག་བར་གྱི་འབྲེལ་བ་ཅི་ཡིན་གསལ་ཁ་མི་འདུག
གནས་ཚུལ་ནང་བཀོད་པར། བོད་པའི་བུད་མེད་ཚེ་རིང་ཆོས་འཛོམས་ཟེར་བ་དེ་ལྡི་ལི་མཱ་ཅིང་ཊེ་ལའི་མཛེས་བཟོ་ཁང་ཞིག་དང་། ལྡི་ལི་གྲོང་ཁྱེར་ལྷོ་ཕྱོགས་ཀྱི་སཱ་ཀེ་ཊི་(Saket)གཉིས་སུ་མཛེས་བཟོའི་ལས་ཀ་བྱེད་མཁན་ཞིག་ཡིན་འདུག
